與"星"同行...

現在可能是日短夜長的關係，收工時候都已經天黑黑，反而有種放鬆感，又因為接近聖誕又感受到呢排很有放假氣氛，對很多人來講一上到車，都會頭耷耷玩手機，但森伯儘量都唔會睇太多手機，通常都會望下窗景，又加上現在天朗氣清，感到天色很舒服...都已經發覺了一段時間，清空下除了見到皎潔的月亮之外，仲見到有一顆如大光燈的星星，顆星星很大很亮，而且閃亮了夜空，車子去到哪裡都會見到那顆星星跟到哪裡，仿似與星同行一樣，相信這個時期，大家也能看到的，而且見到月亮就應該見到那顆大星星在附近，又唔知大家有冇留意到??!!

不經不覺又到年尾了，聖誕都越來越接近，今年本想影些樓下的聖誕佈置放上blog，殊不知竟然乜都冇，而最叻叻就係出年又話要加管理費......真係唔知咩玩法!!!!

其實市面都唔太多聖誕氣氛，一來還是疫情關係，二來相信聖誕經濟都是一般，商家就好似森伯果類慳得就慳，所以唔會大手筆搞什麼大型佈置...有日行到某間生活百貨公司裡，都有少少聖誕佈置，順便影來增點聖誕氣氛，而且用新過一排的"拿唯"手機拍，看來質素都OK，基本上現在外出吃東西都要掃安心出行，所以智能機都要跟身，至於長者機就未必時時用到...

森伯同森blog都要放下假抖抖，祝願各位節日愉快，新年進步...

講乜"話"?!!...

相信現今身處的地方，都會以兩文三語為基本，上一代的人懂得一種外語已經很吃香，冇錯，的確以前的港人都會當普通話係外語，但時至今日香港回歸祖國的日子都已有多年，普通話自然都成為香港的基本語~~

基本上森伯最流利當然係廣東話，母語關係，至於英語、普通話要講的機會唔多，所以都好一般啦!!發覺公司最為看重的，都係英語，其次係普通話，廣東話更次要...有時都好怕廣東話被邊緣化，不過現在始終都係大勢所趨，很多公司也是一樣...

其實我覺得港人都幾著數，著數在兩邊語言都可以涉獵到，基本上殖民時代會著重英語，到現在反而看重國語，現在一打開新聞，都係兩個大國對峙，相信日後呢兩種語言都是大眾必學的大熱，早學就早撈到油水吧!!!!

都順便問問大家有識之士，國語跟普通話有什麼分別，以前聽人講國語係指台灣的語言，而普通話係指中國的語言......這講法又不知對嗎??

森情十二月...

不經不覺又踏入十二月了，所謂快樂不知時日過，但森伯今年只覺有很大壓力，所以都是時候抖抖，每年的十二月都係放假月，但今年放假前特別多東西要做，既忙又趕而且不能馬虎...

本來都慳返時間唔寫網誌，但已成習慣了，所以今趟都唔長氣，簡單的講下森事就算~~

聽聞壓力大可以吔下蕉，不過費時帶梳蕉返公司食啦，我覺得果仁都有呢個效用，呢隻果仁都幾好食，都係輕鬆番少少咋~~~~

添衣...

呢段時間真正感受到開始有點冷，早上的時候都唔太想起床，不過以香港氣候可能冷幾日又熱幾日，徘徊在冷與熱之間!!!

其實對於森伯來講，都無話換季不換季，現在四季的氣候不分明，所以無論什麼季節的衣服，都總有好幾件來遷就變化不定的氣溫，都已經冇在櫳底摷出來著這種經典的換季場口!!!

平時對慳得一毫得一毫，慳得一分得一分的森伯來講，換季都可能要添些新衣，視乎有沒有些著了幾個世紀的舊衣，可謂送舊迎新，至於N個世代前的青葱時代都會入一入連鎖式的服裝店睇睇，但發覺年紀越大，那類衣款就唔太適合自己，反而去些大眾化公司的服裝部較易找到森頭好...老人家總之老實款就OK，薯嘜得來又帶點官仔骨骨，老土得來又帶點懷舊氣息...

今年好想買件風褸質地的背心外套，但都幾難搵，本來相中的衫都幾合心水，但無端端灰色中又加條螢光粉藍的拉練...個look好唔得!!!可能遲下再留意過其他......

森記椰醬...

一向有睇開森伯網誌都知老人家喜好椰子食品，所以很多有椰子味的食品都喜歡，其實椰子都幾多樣化，無論甜鹹都好有獨特香味...現在超市都有隻椰醬推出，差唔多已有兩三年，試過一次都偏甜，用來搽餅乾麵包或做甜點用的...而市面上的抹醬其實都幾唔健康，多糖就一定，莫講其他人工添加成份~~

所以家下的起森肝，試下自己做個醬用來搽麵包都唔錯，材料相當簡單，紙包椰漿、少許紅糖、椰絲、麥餅就可以，但要開火煮一煮...

自己食過後都直竪姆指，自家製作起碼少許甜，做完後放雪櫃，三、四日內食完!!唔好話森伯自吹自擂，自己認為幾得架!!!!

安森出"痕"...

自11月開始，如要進入政府機構或部門，就要掃描安心出行，據講假若當時有人患新冠，都可以追蹤與患者接觸過的人群...呢個措施有人認為好擾民，而且有部份人未必有智能手機，被迫又要買一部手機為求方便出入...

其實對於森伯來講都OK，大家都知森伯平時森居揀出(正確寫法：深居簡出)唔會處處都去，就算要用到的機會都少，尤其政府部門，之不過自有安心出行以來，多間食肆都見有響應，很多門前都貼有安心出行二維碼，但記得早前去某間大型的連鎖食肆食晏，乜都唔需要，又冇強迫掃安心出行，又某填紙仔，好鬼free...但實施後就唔得!!相信對部份稍為年長人士來講，都會幾擔心，可能都有些之前未接觸過智能手機的，忽然諗起森伯伯之前都一樣，他們要重新學過點用智能機...

有日經過食店門前見大排長龍，都無謂同人爭凳仔，我都既然裝左個出行Apps，手痕痕都想試下點用，掃一掃真係好簡單...大吉利是講句當日若有食客中左招，我只係躝過門口，掃過個code，前後不到半分鐘就按離開，咁都可能要強制檢測同隔離......真係好唔抵~~一時手痕的代價~~哈哈哈

現成餃子...

幾相信有很多人都會喜歡食餃子，不過如果要親手整餃子就未必個個會喜歡，因為總怕太麻煩太複雜，但論到質素當然自己整就最真材實料，餡料也豐富一點...外邊不會有太多有名的餃子店，八方都有食過，但感覺都是一般般...

今次在超市買來些包裝餃子，它有好幾樣不同餡料的餃子，甚至素餃子也有，可隨自己口味選擇...買現成好方便，簡單煮煮就食得!!很適合又想食又懶整的朋友們~~

有煎餃送粥，真不錯，適合當周末常餐!!講到餃子，最好味都是森媽製作的，有機會都要出博講講!!! 

二揀一...

一向都少買罐裝飲品，但有時餐飯比較豐富，都想飲杯東西送飯，當然唔會選擇汽水或者人造果汁之類...記得N十年前，有種蔗汁是罐裝，好新鮮好好飲，而罐是要用罐頭刀開(唔知大家飲過未?!!)相信是鮮榨蔗汁，但時至今日就算有都唔會太多人買，因為蔗汁都比較甜...現在容易買到就有椰青水，味道都OK天然...

同時兩種都有，你又會選擇哪一種...

重量：當然係椰皇重，拎兩至三個可以當舉啞鈴~~帶出街飲唔方便!!

淨量：應該罐裝較多，相信椰皇是罐裝的大半......

味道：只要佢話pure 100%，我認為跟新鮮椰皇味道差唔多...

價錢：應該椰皇比較貴!!

慳家：罐裝只得椰水，新鮮椰皇可以有肉挖出來食或整個滋潤品...

創意：如果有閒情或藝術細胞，可以將飲完的椰皇殼(雕或畫)做個工藝品~~

唔知大家又點揀?!!始終我個人認為罐裝方便，買多些少放雪櫃較好，隨時有咩虛火燥火上升，都有些清涼東西飲飲，又冇咁易變質，合乎經濟效益~~ 

食塊餅...

發覺我們的日常飲食當中，澱粉類的食物都好難在餐單剔除，除了麵飯外，仲有麵包、餅乾等......

至於近來消委會測試，發覺有多款餅乾都唔合格，有致癌風險!!一聽到個「癌」字大家都驚驚啦!!因為製作餅乾的過程，會產生一些致癌物，多食就會增大患癌的機會~~除非你完全唔食餅乾，在報導中所講的60款餅乾裡，或多或少你可能會食過，我食的餅乾多數當早餐來吃，有時都會當小食...不過就很少餅乾當正餐!!

呢隻食開的B字頭消化餅又冇出現在問題餅乾裡，而另一款老牌子的消化餅就有問題，不過唔會食太多，唔驚...

其實好老土講句，少食多滋味，多食就壞肚皮，適可而止唔過量便是了!!!

兩個爬蟲的日事...

爬蟲---紅耳龜

話說有人年底可能要移居外地，現在的時間都要作好準備，搞掂好香港的「手尾」，大事小事現在就要處理，大的事就唔講，至於細事就係要安排寵物日後的生活，如果係幫狗隻移民要幾萬元，至於佢養的是龜又如何?初時以為細細寵物會平宜些?!!點知佢都唔需要問價，佢養的紅耳龜(俗稱巴西龜)係冇得移民，所以要搵新主人...迫於無奈要人龜分開，所謂在自由的國度裡，連養隻龜的自由都冇......真係一個諷刺~~哈哈哈

註：紅耳龜是外來物種，怕進入當地就會造成生態災難都唔定...所以外國的把關好嚴謹!!!!

爬蟲---檐蛇

記得以前都在網誌裡講過，森宅仿似一個檐蛇竇，又唔可以話好多，但間中都會見到大大小小的檐蛇同你say句hi...可能與牠們共存了好一大段日子，慢慢都完全唔驚...

基本上檐蛇是益蟲，有牠存在曱甴仔都絕了跡，相比曱甴仔麻煩得多...牠們慢慢成為家中的守護者，而有件趣事就係當見到檐蛇的C體仔，果排都知當黑~~~~所以都唔希望見到檐蛇的C體仔，當佢地視為金叵蘿，打都唔敢打C...後來睇到資料，原來家中有檐蛇係代表好，古時檐蛇叫「守宮」，守宮代表守護家宅，守著家中的福氣和財氣...財氣好似唔多覺喎!!!!

據講話以前的老人家唔會趕走檐蛇，因牠們是守護獸......都係果句：信則有；不信則無...

舊地重遊...

收到銀行信，話說分行將會遷址，分行的營業時間到上月底就結束...森諗：日後要親身辦理些銀行事都不知到哪間去了，最主要是未必間間分行可以就腳又方便...而且很多有關銀行的事項都在此辦理，想想不經覺地也有十多年了...趁未關門前都順便搞些銀行事務，過往通常辦完要事後就會到這裡個商場逛逛，一來大把食肆，二來對這個場更充滿回憶...其實香港有很多地方，都不停在變更，早些時候有次車程經過這裡，發覺這個商場變靚了很多，時尚很多，以為內裡可能改頭換面，但今次走進去發覺原來都是差不多，我反而覺得保持舊貌便好了...

長沙灣廣場主打上班食晏客，所以食肆很多，而午飯時間都有很多人，以前買電子產品的舖頭都有好幾間，不過被大部份食肆佔據後餘下只是一兩間，可惜早前已經買了部「拿為」機，否則都會認真睇睇有咩合森水手機...

到我幾日前經過這裡，發覺地下多間分行已被木板圍封了，相信遲下又有一番新面貌，估計地舖都係開食肆多.

捉緊乜乜的尾巴......

捉緊"中秋"的尾巴~~

通常過時過節後，都有很多節慶食物留下來，相信中秋過後，月餅剩下來都不少，畢竟一年一渡吃耐一點都冇所謂，月餅糖份高可以耐擺，所以冇必要即刻食晒...

就因近排過時過節吃多了，成個人呆呆滯滯...家下又要森醫師出來講下養生推介，年年都係差唔多得一味教大家，就是胡蘿蔔果糊，今次仲加了豐水梨，兩樣加埋好適合秋天天氣飲用...

森伯一向燥底，食得月餅多就好易虛火上升，飲用這個甘筍水梨，又潤燥又潤喉......重點係甘筍有清熱降糖作用，合晒清月餅時飲用!!!!

捉緊"夏天"的尾巴~~

雖則中秋都過了，但下午天氣還暑熱，趁暑天還未過，都可以趁季尾食番杯雪糕，都很久沒有吃過雪糕，起碼今年冇食過...相對之前吃過的抹茶雪糕都有年多前，今次就食咖啡雪糕，講開又講，如果不是常常吃的話，買呢隻雪糕唔錯，佢的成份比較自然，沒有太多添加劑(冇乜化學數字)...而今次呢隻咖啡雪糕，食過後森伯即刻竪起...手指公，真係好好味，雖然唔大杯但都夠1-3人品嚐!!

都唔敢講為夏天的甜品劃個完美的句號，家陣分分鐘再熱多一頭半個月，到時又可能整多杯.....

今個中秋好......慳家!!

正所謂一年容易又中秋，天氣還是相當熱，完全未有感到絲絲的涼意就已經踏入中秋了，雖然話因疫情關係，但市面仍有很多月餅廣告，做節飯廣告...似乎餐飲都漸漸見起色!!

有時都會諗中秋只得食嘛?!!...月餅?!!...做節飯?!!...商業社會邊樣最搵錢，就重視那一樣，其餘舊有的習俗、東西就越來越少見，今年就完全不見一個賣的燈籠...至於森伯的中秋至愛---月餅，就點都唔慳得，買少少來應節!!!平時睇開森博的友好們都知，森伯都幾慳家，如果今天仲有「分」呢種面值，相信森伯會慳得一分得一分...哈哈哈哈，大家唔好以為信用卡儲積分喎，只係面值有元、角、分，分就係比較細的面值而已~~

其實今年有消費券的帶動下，百物騰貴，當然月餅都唔例外，普通到唔普通的月餅都要好幾舊水一盒，而我買的國貨月餅就仲可以二百蚊有找添...

而且相信國貨月餅做法會有傳統風味，而我買的是陳皮豆沙月餅，雖然陳皮味唔夠濃，但紅豆就有一粒粒的紅豆口感，好原味，而且唔油膩...

而另一種係迷你月餅仔，都闊別幾年冇買過，今年有機會經過呢間餅店，一於掃多少少，無論送禮、自奉、派街坊都幾相宜!!所以今個中秋特別慳番唔少...Yeah!!!

在此，祝願大家人月兩圓，兼且有個愉快開心的中秋佳節!!

 

小白菜...

一向都有種植物，雖然未必種得好好，但都會付上全付精神照料它們，因為我認為活動空間裡應有些植物存在才感到有點生氣，較接近大自然...所以在工作枱上都種了一兩盆，因工作對電腦多，偶爾望望綠色都唔錯!!

始終室內的環境陽光不多，所以很多耐陰的室內植物都大行其道，森伯伯可以種的植物要有一個要求，就係夠粗生粗養類，費事種兩種，玩兩玩就耷晒頭...

記得好細個時候，會畀一種室內植物所吸引，現在的人會叫：白網紋草，以前的稱為：小白菜...唔知大家有冇聽過?!!正所謂唔怕生壞命，最緊要係改啱名，小白菜...頓時間感覺葉子細細，真似是一棵可愛的白菜仔，細時的森伯真係以為長大後會變一棵白菜...

不過呢種植物唔太好種，好容易就會枯邊養得唔多靚，之後就甚少買來種，另一種係文竹，如其名真係無竹令人俗，文竹好幽雅，好適合粗粗魯魯的森伯種練貴氣，但係種唔耐...所以問世間的確有些東西，只宜遠觀，不可褻玩~~~~哈哈哈 

返晒嚟...

除了人生要充滿希望之外，人生還會充滿著很多的回憶，很多人都認同細路仔的回憶特別深，或者小時思想不會過於複雜，正值腦中要裝載很多新記憶的開始，所以童年的回憶特別深刻...

有日見到呢隻雪糕，都很久沒有見過這杯裝，忽然小時的回憶完全返回來...記得這種雪糕杯又有另一稱號：綿花杯(不知是否正確名稱...)，以前的雪糕杯通常都附上一支小木匙(係用紙包裝)不過都幾廿年前了，都好似都係這家公司出品，現在見到都當是懷舊版，當時最喜歡都係云呢拿綿花杯、椰子味綿花杯(椰子味已不見了)、朱古力味綿花杯...

可能這款綿花杯一直都存在，現在多年來都是買家庭裝，這款已經沒有留意了...這兩年來都沒有真正吃過雪糕，可能遲下要捉緊暑熱天時的尾巴，買些雪糕吃吃先!!!!

奇就奇在...

現在的健康食品真係有得做，畀著廿幾三十年前根本沒有市場，以前的人以慳家為主，所謂貴價又奢侈的健康食品，根本唔多人問津...家陣時勢為英雄，一有標榜健康食品，什麼超級食品，個個都想食了變健美變健康~~

好似今篇網誌介紹呢種奇就奇在...奇亞籽，外表細細粒好似黑芝麻，但經過浸水後就會發脹，變得粒粒好似西米...簡單介紹：奇亞籽是一種外國鼠尾草的種子，據講有降血糖的作用，唔想吸收太多澱粉質食物的都幾適合，食佢有飽肚感...

相中的是送人，我未食過，因含有大量奧米加成份，我反而唔食得太多...所以只影包裝，飲食宜忌要搜尋清楚...一般人試吓無妨況且對身體都有好處，可放在任何流質食物裡，待發脹後更易吸收!!!

其實我認為健康食品都係因人而異，可能係來佬(外國運來)產品特別貴，識食平東西都收到同樣功效!! 

同森伯傾森事...

補    倉

有時真係唔一定要打疫苗才有副作用，近來真係時時感到臉癱，經過戴口罩一整日，臉部肌肉都麻木晒，相信都同面癱的感受差唔多...

現在雖則香港常常聽到清零的消息，但是仍有些其他地方疫情依然嚴峻，所以有感戴口罩都唔知要戴多少時間...唔知有沒有戴口罩後遺症呢?!!唔駛問，森伯應該有唔少~~

所以家陣見到有森水口罩都要吟荷包買些少補倉!!!!

消    費

唔知大家D消費券用晒未?!!相信都用得七七八八，在大家開心消費到如火如荼的時候，森伯的仲未到手......都唔緊要，睇大家消費都一樣開心，話說今趟消費券對促進經濟的效用漸漸見成效，講真今次政府振興經濟，市民都有份，而且係駛錢果個!!當然好喇，所以經此一做後，大家都希望趟趟的財政預算都撥一筆畀消費券就好...

政府的官員做親什麼事，市民唔多鍾意就肯定有鑊揹，但今次唔知是否一班政府的智囊諗呢?!!又唔見有人走出來讚賞下他們......

騰    貴

俗語有話，財多身子弱...呢一點森伯已經打破左好耐，就算冇乜財都可以身子弱......可能燥火的關係，呢排真係周身痛，好想請假休幾日，現在唯有睇情況啦!!!!有日經過超市的門口，見到又有另一批新車仔換，感覺今次又冇上次咁墟撼(森伯好似寫錯字...)但相信佢都會一早又換晒!!可能有消費券的關係，諗住要大家買多D就可以換下車仔~~~昨日又見到七仔又有卡通冷熱杯換，質素唔錯，不過太細露仔!!

其實唔知大家有冇發覺，自消費券可以用之後，突然間很多商品都賣貴了，疫情期間超市生意最好，消費券期間又唔覺唔覺加價...真係好識食住條水做生意!!!

移唔移?!...

近排移民這個話題都是城中熱話，聽就聽人有提起，但自己身邊又唔覺有人移咗去...都唔敢話(走咗)真係唔多老嚟喎~~可能森伯身邊的人們不能代表一切，但唔知各位博友又覺唔覺?!!

其實一向香港都有移民潮，曾幾何時有大陸同胞移居香港，九七又有一波移民潮，現在英國的BNO又造成另一波的移民潮等...可能途中都有些移民潮，但森伯唔太清楚，因為森伯實在太年輕了...XXXXD (清楚的博友可以告訴森伯，當可以補充一下內容)

假設真係有批人移民，相信最令港人開心就係有望樓價跌，但可惜到現時為止都係不跌反升...有時覺得所謂多人移走是否純為帶方向定製造輿論而已...亦有人認為拿著BNO移民的人未必個個有物業，所以對樓市都冇咩太大影響...

呢一刻的人講到移民就好似搬過隔離住咁簡單，但不要忘記，外地仍是要生活、要使費、要工作、要睇病...但這些統統都離不開個錢字!!如果係森伯移居外地，相信只有一個生存技巧...就係「乞」囉!!!

始終相信香港明天會更好，最簡單的原因：香港是福地，還要走到哪裡呢!! 

人棄我取...

近排天氣仍然好熱，當然唯獨最舒服就是嘆下冷氣，食下凍品...記得細個，家中都會備有啫喱粉和大菜，可以隨時整來吃，尤其是大熱天時，這類消暑品一定唔少得，而甜中帶酸的凍布甸裡通常都有人喜歡落些少花奶(即是淡奶)，對我來講都無咩所謂...有日大家食完布甸後剩餘大半罐花奶，個個都唔再要，如果掉丟真的很浪費，於是我就要了留待明日用!!

其實這些淡奶放在什麼食物上也可以，都蠻好用!!我就用來整杯朱古力，把餘下的奶加些水加熱，再放朱古力粉，很簡單又可整杯熱飲，記得有次用包裝淡奶加咖啡粉沖來飲真係好好飲，可以媲美"士打筆"一試難忘~~

現在自己都少飲奶類，見有剩餘物資就唔好浪費啦...有時人棄我取都可以係好嘢!!!唔講咁多，嘆杯嘢飲先!!!

扭吓...扭吓...

外出時都有很多機會見到扭蛋機，有些店舖在前面都總有兩三部，有時都諗真的有人喜歡扭嗎??因為大部份時間都係唔多見人影...

可能有時森伯個老人家真係童心未泯，每每見到都會睇睇裡面有什麼扭，真的要視乎是什麼玩意，有趣又森頭好就會扭扭，至於內裡的小物品是否值回票價呢??我見的就很多都唔值!!!

感覺上扭蛋機都有少少賭博成份，因不是畀錢就買到，要靠你的手氣彩數，有時扭出來的都未必係你心目中想要那款~~再扭多隻又真係唔值得!!

或者扭蛋機都學懂一點點人生小道理，咪就係......運氣扭到什麼你就唯有欣然接受囉!!因為真係冇得你揀!!!!

森伯講時事...

一向有「維園森伯」之稱的森伯伯，好似好耐都冇同大家講下時事，有鑑於近日有太多的時事新聞，正正挑起森伯條筋，忽然想發表下個人己見~~~

河南水災...

今年真的很多雨水嗎?!!呢幾天香港又不是，外面不見得霧氣，完全不感到潮濕，但這幾天早上回到公司的時候，發覺在洗手間出現一個奇奇現象，牆壁佈滿水珠全濕透，而杯子放在內也立刻出現一陣霧氣，仿似回南天時的情況...唔知大家有冇發現這情況呢?!!不是大回南但瓷磚牆出晒水...

難怪這幾天河南也奇怪有傾盆大暴雨，電視台反而有關的報導篇幅不大，而睇YT的視頻會感到雨災的震撼驚人，唔單止國內，甚至世界都有些地方水災...在此我都唔知什麼因素造成，總之災難很可怕...有體會才知身處的香港是福地，如果香港發生同樣的災情，相信早已陸沉...願受災的當地居民同胞們早日脫離險境，平安回家!!!!

東瀛奧運...

今屆奧運因政府買了個播放權，所以本港的免費電視台，台台都不停播奧運，周末期間播完又播，睇完又睇，甚至連發夢都夢見奧運，咁又冇咁誇!!今屆的奧運都隔了五年，可能大家對奧運餓得太耐，相對特別關注，既然有香港隊參予的盛事，當然會支持下港隊，今屆最估唔到係港隊都有份奪金喎，果然令人出乎意料，近幾年香港實在太多負能量，突然奧運奪金可當沖喜下!!

之後睇下單車又有冇奬牌!!會繼續望港隊有奬項...除了支持港隊外，都會撐國家隊，實力當然毋庸置疑可以同其他國家鬥下，有得鬥才精彩嘛!!!至於中華台北的選手好似好低調，昨天話舉重拿金牌，仲見過參賽乒乓球項目!!井底森多口問問，一路以來澳門有冇派運動員出賽呢?!!有冇澳門隊?!!!一齊睇奧運的人們都唔清楚......

政治化...

對於港人來講，政治是什麼?!!可能都未必個個清楚，但連串的政治事件的出現，忽然個個人都政治上身...唔同政見立場唔緊要，最離譜在日常生活上都要扯上政治，無論著什麼顏色的衫，甚至戴什麼顏色的口罩，幫襯邊間舖頭，甚至飲支豆奶或看哪間電視台等...統統都畀人分顏色、分立埸!!!

這種政治化的生活不要以為好有態度，對立場好堅持，其實就不知不覺間令到社會分化，兩派人對立批鬥，令社會不安，很不理智!!我的做法是有既定立場，但對事不要做到過偏激便是了!!!

跟芒果有仇 之 一芒兩味(下)

夏日除了吃凍品之外，其實水果都不錯，起碼多選擇又正氣...在炎炎夏日裡凍的甜品都唔少得，雪糕都好耐冇食，反而今年多吃了涼粉，相對起雪糕涼粉就比較健康~~

今個夏季有芒果又有涼粉，一於整返杯芒果涼粉撈，雖然話整個甜品，但所有甜份都來自果肉，所以基本上都唔算甜，食開又幾唔錯，相信平過街外的!!望落已經夠晒消暑，完全零難度的做法...其實正式可以加些椰漿、楓糖漿、西米、罐頭雜果...不過森伯乜都冇買!!!!

唔知大家又多唔多幫襯街外的甜品店，我就比較少，通常甜品又未必在我首選之列，我會選些輕食比較簡單!!聽講某間好出名「芒果撈」的甜品店許x山已清盆，有時見到呢間舖都想幫趁，看看是否真的好味，可惜一路以來都未有幫襯過...(相中的店舖只是幾年前在APM所映)

至於整涼粉的原材料仙草，就有這些功效，可消暑、解渴、除熱毒、預防中暑等...真係幾適合呢個時候食用!!

跟芒果有仇 之 一芒兩味(上)

 夏日炎炎，最當造就是水果，的確在暑熱天時，食個冰鎮西瓜真係透心涼，所以如果可以以水果入饌都幾唔錯，整頓飯都容易兼且開胃得多...

近排真的食得芒果最多，仿似跟芒果有仇，要KO晒佢地...

突然想到可以用芒果整飯，只要在飯裡加上椰漿，就可以變出有東南亞味道的香芒椰漿飯!!做法當然簡單，飯用糙米、扁豆、腰果仁，再加上椰漿同蒸...剛蒸好的飯有微微椰香!!厚正!!

之後放上新鮮芒果肉，果肉不能蒸，這樣才會好味...一個簡簡單單的午餐便完成了，估唔到帶飯都可以帶出東南亞風味!!!

雖然返到去食都已經攤凍了，但仍好食兼且好開胃，如果熱食相信會更好，呢個飯森伯極推介!!!

搵路記...

對於森伯伯來講，出街最怕係搵路、記路...除了因為老人痴呆之外，也會隨時忘記路線，除非係時時行，行開就會記得...

就算要問森伯平時返工的車程，我只能答主要路線，要細緻講解什麼路名，街名就未必會答得到...可能未盡全力去記喇，不過現在有手機在身，一些未到過的地方，慎防唔記得，都會搵手機拍拍，呢個係最保險的方法，有人同行就靠大家記下...

記得有次最驚險的是去山頂廣場，應該係第一次去，去的時候已經好似迷宮咁款 (對森伯伯來講)，而且這地方交通又唔太方便，落車後就行，行完之後先至最「金」...要記返行過的路才能到車場搭車，最弊條條路又差唔多，入口出口又差唔多......要在腦裡的殘餘記憶勾返出來真係唔易~~當時真真正正係個：森急人上~~~車!!!唔係誇，諗番都仍有餘悸!!!!哈哈哈。正所謂危急生智，後來都記記地得去返車場...之後第一次去的生疏地方都要搵手機或相機拍拍途經的門口，出入口等等...

今次第一次去這個新蒲崗的商廈，都要真的要認認路，所以不免用手機拍拍，日後要多去幾次後就會很熟...

時下興細細件...

相信香港地最矜貴就係地方，所以現時新推出的單位好多都以納米樓作招徠，因此傢俬，家品都趨向細細，甚至迷你，當然最好一機多功能啦~~

近排常常留意一些小型多功能鍋，貪佢可以蒸食物，平時常用電飯煲因為怕時時操作會蒸壞，之前飯煲裡的易潔塗層花了又要去換，所以就想買個細細地唔阻地方的來用...當有留意就發現小型的萬用鍋真係幾多款式，甚至一個智能蒸煮飯盒都有煮飯功能，款式多多...當然要睇定先買啦，常常心多多!!睇下有咩功能自己適合最重要!!

呢種係自己的森水選擇，蒸少少煮少少都得，而有些款式好似一個大型的漱口盅差不多，畀人一路打機一路泡個麵食，好有毒男feel~~不過感覺呢種鍋唔耐用，但又未用過唔知~~~~對森伯來講都係蒸少少東西居多!!...冇諗住搞咁多!!更加唔會諗住用佢整九大簋啦!!!

聽吓靚歌......

現代人的個人娛樂看似豐富，但來來去去都係對住電腦，對住手機...不過始終網上的娛樂可以玩你喜歡的，看你喜歡的...至於電視就一向少睇，以前還有ATV的時候都會捧少少場，基本上免費頻道現在仲有TVB，至於其他頻道的電視台都冇乜留心去看~~現在除了睇TVB齣處境劇、新聞等之外，其他就甚少刻意睇，尤其現在什麼歌唱比賽，看來看去都未見有歌唱部份，只見成班人齊齊哇、齊齊喊、齊齊講...真真正正講多過做~~可能森伯古老得滯，唔喜歡這種形式的歌唱比賽!!!

反而在網上，有留意開一個外國女孩，係呀!上次講一位國內不會大的男孩視頻，今次就講一位外國女孩的視頻，歌聲真正繞樑三日，唱就唱，冇乜浮誇，而最特別係美國女生竟然翻唱一些舊國語金曲，常常母女檔一齊唱，歌聲真有點似老歌手的聲線，講多無謂，自己聽聽吧!!聽後可以留言講講意見...

https://www.youtube.com/watch?v=rE7Y6uBnSpM  甜蜜蜜

https://www.youtube.com/watch?v=_G5RLjN29GM&t=94s  月亮代表我的心

https://www.youtube.com/watch?v=H8bobAwj_vM  橄欖樹

https://www.youtube.com/watch?v=NalyCrj3Yj4  喜歡你 (廣東話)

講開聽歌，近排真係冇咩留意新歌、新歌手的動向，只知有個叫＂姜B＂的歌手，在早排上堂都有聽同學仔提過，當時連樣都未清楚，一向想扮後生的森伯伯想話自己係聽＂姜B＂的歌大...

但森底裡又問佢既歌識得幾多首，一首都唔識，完全呃唔到人又呃唔到自己...XXD

南瓜豆漿～

有時很喜歡煮一餐就可以分幾次食，除了森記鬆糕之外，仲有森記唔係雞粥係豆粥，更多個選擇就係南瓜豆漿，整好就可以放在雪櫃內，食三、四日都可以！！

做法先蒸熟南瓜，再煮一煮滾，攤凍就可放雪櫃，千祈唔好加豆漿，到食時才加豆漿就可以，聽講話對骨骼關節幾好架！！

南瓜唔難買，豆漿用現成都可以~～早餐飲都幾唔錯！而且翻熱都好容易！！

呢排都幾忙下，晨咁早有杯南瓜豆漿飲飲都算有少少能量，眼神當堂炯炯！！

抱在父親懷裡28年的男孩...

如果用BB仔來形容一個人，相信大家都會諗起這個人被寵愛，被呵護...所以時下很多女星都會加BB兩個字，頓時好似BB仔咁可愛~~~

的確有些BB仔好可愛，但當一個人廿幾歲仲係好似BB仔，相信就唔係可愛係可憐...有日睇到個視頻，一個廿幾歲的後生仔仲係好似BB咁，你即時的反應都會感到萬分無奈!!!這個是國內的真實個案，這個男孩因為個子太小所以生活空間大部份都在家，唯一消遣就是去附近的士多買自己喜歡的零食，因為環境熟悉知沒有危險!!而每次外出都要有大人陪同才可，因怕被車撞倒.....可能將來的歲月都要受人照顧......以下是當中視頻，是普通話但有簡體字幕，可click上去看看：https://www.youtube.com/watch?v=US3yQG7ENx8&t=1014s

當你看完這個個案後，有沒有什麼感想?!!我就感到在無奈的境況中，都總有些人和事係值得珍而重之!!或者看完段片你便會明白!!!! 

粉紅扁豆~~

都很久沒有介紹過什麼好食材，今篇又可以同大家講講，據講如能在每餐飯中加些乾豆類會比較好，有些時候都會把豆來煲豆粥，但我多數喜歡把豆加在飯吃，好似之前講過的眉豆，眉豆好易煮熟又好食，其他豆要煮稔真的要些時間，還有一樣幾唔錯，就是扁豆，呢種豆都吃了很多年，用來加在飯裡最好!!

如果浸的時間足夠，跟米飯一同吃都唔覺它的存在，口感粉粉的~~製作甜或鹹都冇什麼所謂，絕不會搶走飯菜的味道!!扁豆的顏色頗多，有啡，有暗綠，有淺黃種種，不過最好煮都是這種粉紅色的扁豆，煮熟後會轉色，變得好似開邊綠豆顏色黃黃的，買一包都可以食一段時間，現在很多時候都用來帶飯~~

因為呢種扁豆是洋貨，以前唔多見，所以找到中文介紹的網頁不多，如果查扁豆可能會搜查很多中式湯水用作袪濕的扁豆，其實兩者很大分別，呢種豆森伯極力推介，可到以下視頻睇睇...https://www.youtube.com/watch?v=0hnrKYOGwnI

滴藥水...

我們平時所講的都市病，一般都係指三高或者肥胖症之類，但有些身體問題都會被忽視，就是都市人眼睛的問題，相信都有很多人唔係睇電腦，就係睇手機，今早都有見人在完全暗黑的車霜內睇手機，有很多人都係機不離手，去到邊就睇到邊，現在寫字樓工作大都要對住電腦，而每日上班都要對足電腦好幾個小時，所以收工乘車時都甚少再睇手機，畀時間眼睛休息下，而事實光線唔夠的情況下，睇手機對眼睛都幾傷，所以坊間都有幾多防藍光的產品出售，自己都有副防藍光眼鏡，作用都係差唔多，聽人講話戴微粉紅鏡片就係最好，但要搵玻璃做的鏡片，又係淡粉紅色，而且又要男裝粗黑框就真係唔易~~~~

返到屋企雙眼都幾疲累，所以暫時都係滴住眼藥水先，都用了好一段日子，呢種似人工淚水，滴完後幾清涼舒服，據佢講都係以滋潤眼睛為主...好過冇啦!!

睇到近排的炯炯新聞，真係好羡慕人家的雙目可以稱為炯炯，自已對眼當然好似想訓覺咁款啦!!

熱力迫人~~~

都仲未到端午，天氣已經熱熱熱，四月尾感覺經已踏入夏季，而過去的冬天春天都只是有幾天冷的，所以今年換季清清個衣櫃時，都要清埋些舊厚褸!!!因為已經好耐冇穿過...

天氣好似不知不覺在變化，一來夏天早來了，若到七、八月有可能更加酷熱...二來雖然天氣熱辣辣，但落很大的雨水近排都冇，如果香港單憑落雨來供水，相信隔日就要制水~~~~

如果唔係有冷氣，相信大熱天時都會幾難挨，尤其是森伯呢類燥熱底，都好怕天時熱成身黐立立~~~

早上浸的眉豆，下午就見發出長長的芽，熱的威力好勁呀~~~只是短短幾小時!!@@

...睇嚟浸下芽菜食都好喎!!

聽森伯講森事......

近排可算是忙到甩轆，可謂工有工忙，私有私忙，本來都冇打算出博，不過唯有懾些時間來打打「森」事~~

忽然間又多了工作量，算係開工忙到收工，當然間中會蛇吓王抖抖啦，其實現在能有工作忙都應該興幸，尤其是在這個時勢下，相信忙一段少少時間，又可以hea番夠本~~~

最近可謂買手機月，政府的消費券未到手，D消費欲已經蠢蠢欲動，講笑啫 !!要買的東西都要買，因為之前的智能機已經用了相當長時間，越叉越少電，一日可以叉兩三次，唔用就熄機~~都係時候要換換，於是終於買到部華X手機，當然唔駛用高價錢，基本上打出打入上吓網就OK，另一部係長者機，多一部電話用，之前都用了很耐個幕都有少許爆裂，另外可能會買給長輩用的手機，總之就乜都手機~~

呢篇可算是即諗，即打，即出的Biog，真係無乜幾可!!!!!

有餅餅食...

 都想知道大家平時多唔多買餅乾，餅乾既可當零食，也可以當為食糧，尤其是飯餐之間有少少肚餓都會是不錯的食物...

又因為易於存放，相信家家戶戶都總會有些餅乾，隨時都可以醫下肚~~

有時去到超市有林林總總的餅乾任你選擇，在眾多餅食中要揀自己喜歡都唔易...

我就揀了三甲最喜歡!!

第三位~~~~

克力架，呢種餅記得好細個就會浸煉奶食，直到現在間中都有這種癖好...哈哈哈

第二位~~~~

椰子餅，天生椰子控，自不然椰子餅走唔甩啦!!!!最近買了一隻椰子餅幾特別都唔錯!!

登登登凳，第一位~~~~

牛油酥餅，逢親牛油餅都喜歡，據講係純牛油製所以都OK，偶爾會買來當早餐吃吃~~

諗吓細時真係幾多餅乾款式，有煙仔餅、肚臍餅(有窿水泡餅)、花占餅、威化餅、動物餅、夾心餅等等，本來以前的麥維啦消化餅都好好食，不過現在完全走晒味，似另一種餅乾，所以要跌出三甲...

講左咁多餅都有D肚仔餓，吔返塊牛油餅餅先!!!!

冇得問......

前日收到雅虎一封電郵，內裡大致話...Yahoo 知識+ 到下月就停止服務，唔提起都唔記起了，一話停止服務就諗起曾幾何時的雅虎Blog，相信大家都記憶猶新，現在有很多Blog友都係在那個時期認識...但講到Yahoo 知識+又有冇人知道呢?!!其實呢個Yahoo 知識+的原意係幾好，當有人對些事情唔知道的時候，都好想搵個人解答，當然係上至天聞，下至地理的問題都可以答，但又容不容易有人答到呢?!...當時係唔錯，問的問題好快就搵到人回應，但時至今日有很多唔明的事宜想了解，都第一時間摷摷網上資料啦，仲等人回答咩?!!久而久之這個Yahoo 知識+ 都放埋一邊...完全忘記了!!

唔知大家Blog友有冇玩過...?!!

講開又講相信現在很多人的免費電郵都轉晒用G-mail，因之前上課見個個同學仔的聯絡電郵都用G-mail，只得森伯仲用Y-mail，可能用了好耐都唔捨得無故去轉，都習慣了~~現在實在太多要登入的乜乜物物，記login名同密碼都有排記，唔想太多勒，用返舊的好吧!!

濕到漏~~

發覺間屋的問題，時時都同水呀濕呀有關係，早前天花有水氣，搞到要大整大維修，今趟又同水氣有關，廚房的收納櫃無故的木板發黑兼且漆油剝落，而且外面都濕濕，打開一看原來個櫃裡的隱藏喉管漏水，一滴一滴水滲漏到櫃內，搞到裡面的東西都濕濕，好在就發現及時，但櫃邊都唔要得，可能都要執一執~~

右邊圖是正常的較位，左邊圖已經成個櫃門較已濕到甩了下來......

我認為住所裡最怕就是有什麼唔妥要維修，真係幾傷腦筋，好似前排的天花燈壞了，要整都好麻煩，真係唔好以為換一個燈膽咁簡單，燈的型號要在網上搵，可能燈款已經過時，就算買到都要有人識裝，好在有人識裝可以慳番筆，聽講若冇人裝搵師傅都要成千元去換，而拆出來的燈罩好特別就成個小型大光燈咁~~~~~

所以唔好睇少家居的小小壞了的東西，要搞到搞餐慒，如果有公司可以幫人一條蟲服務維修家居瑣碎問題至大型維修，相信會幾好生意，不過最緊要係價錢經濟實惠啦!!!

呢啲時勢，大家豪一豪...

常常聽人講有什麼抗疫疲勞，其實都唔奇，始終在疫症期間做什麼都好似唔多暢快，多多限制，相信大家都明白...

這一刻能使港人有一點精神安慰或實質安慰都係好，最好就係有得食，有得shopping等等~~繼上次政府派錢後，今次又有舒困方案，就係派$5000元電子消費券...其目的除了鼓勵市民多些消費之外，仲要所謂振興巿面經濟......森伯作為市民當然好啦~~據講電子消費券會放入四款電子錢包內，森伯果類原始人只有發達窿，其實遲下都可能會用支付佬網購，其餘兩樣完全唔識~~

暫時就話會將$5000元分五個月發放，每月入$1000元，月尾用唔完就冇晒，真真正正要用這些錢去促進經濟，順便打擊埋好似森伯果類老人家，諗住儲個錢傍身唔願駛的人士~~XXD

既然要「月月清」，就要諗諗點駛，反而我會諗諗有什麼小商舖可以用到電子支付...既然冇得留起儲起，森伯呢個老人家都要豪一豪去促進下經濟!!!!

最緊要...發!!!!

當你玩開烘焙(製作麵包糕點)，就會更加愛上這玩意，雖則話玩，其實內裡都要認真做，才可以做出可口的糕點，森伯整糕點好簡單，唔會太講究，又唔會用太多工具電器，做出來的糕點最簡單、最原味就可以了!!

事實呢個世代，買個饅頭鬆糕都好容易，而且比自己整更省時方便，而且味道好好，自己做就可能要點時間、心機，不過做出來有種自然的味道而且健康一點~~事實上自製糕點唔算麻煩，我認為最關鍵就係發酵問題，如果麵糰、麵糊能夠好快發酵，這樣便會得心應手易做得多...早排因為天時冷，要麵糊發酵可能要等一些時間，所以放低一排...

見這陣子天氣回暖，於是整些鬆糕做早餐，可能換了隻新酵母，擺相同的時間已經發到撼撼聲，有很多發酵泡泡，酵母菌幾活躍...見到呢個情形就開心，意味著糕點容易成功!!

蒸出來的椰汁鬆糕有幾多隆隆，而且夠晒彈性，口感真係唔錯...

記得初時做蒸饅頭，那天回看舊相片，已經是十年前的事，不經不覺做了包點都有十年了......@@

...........................................................................................................................

補充：可能啲酵母+發粉勁得滯，舊鬆糕好似粗海綿狀，之後識用新酵母，再調整份量，做出來的鬆糕似樣好多，這次用蛋整，望落好些吧~~

齋口唔齋森...

感到現在食素的人越來越多，只視乎係得閒食吓素，還是食全素咁呢?!...以前食素的人多數有些因由才選擇食素，但現在都巿人吃素大多是為健康著想，又或者被身邊人們所感染~~

聽來都幾奇，在公司反而常會接觸素食，因為有什麼聚餐的時候都會見到些齋口唔齋心的素菜，基本上森伯都幾接受素菜，現在每天都總有一餐半餐食素，慢慢養成一個飲食習慣!!

若然話要食全素，我應該不會，營養均衡最重要!!少少森得奉勸各位要長期食全素的人，素食的種類好多，要食多種多樣才是最理想，我認為奉行蛋奶素最好~~

今次公司叫的素食到薈又唔錯喎，賣相都幾得，味道就一般始終都是素菜為材料嘛!!當日剛剛帶了私家飯，唯有食住咁多先...

搞到華人...

如果大家冇好似森伯伯咁間歇性腦退化的話，應該重記得不久前的「 黑人的命也是命 」Black Lives Matter，當時鬧得熱哄哄，森裡都估到爭在遲定早，實搞到華亞裔人，大多數亞洲人都是黃皮膚，在外國人的眼中都當為華人、唐人...近排外國接連發生多宗白人襲擊華人或者亞裔人個案，都有發生命案，所以引起大眾極度關注~~

其實外國人歧視華人的事件一向以來都存在，以前曾經有句說話從長輩口中所聽，中國人與狗不得內進~~憑這句說話，都已經感受到外國人對華人的一種歧視，甚至敵視...當然不能一竹桿打一船人，不過住在外國的中國人，好輕易都曾經遇過唔同程度的歧視經歷~~~~

無論聲音有多大，你有你嘈，我有我依然照舊，就好似早前的黑人的命也是命，到最後聲音都越來越小，至於中國人、亞裔人被歧視事件，最終都可能不了了之，想反抗也抗不到什麼...

一向以來華人的性格好聽就話內斂，查實就怕事，畀人欺侮一般都會啞忍要面子唔敢出聲，人在外地更加唔敢大聲疾呼，形成了被欺侮、被歧視的對象!!

饅頭仔...

有時未有預備早餐，就可以食些饅頭，其實我認為饅頭係一種幾唔錯的粗糧，用料簡單...麵粉，水和少少油和少少鹽糖，幾合乎現代人的健康飲食原則~~

一般的西餅麵包，最怕係酥油和糖，相對饅頭較為健康~~如果自己冇整饅頭，就多數會買，需要食時就拿出來蒸蒸就可以，相當方便，而且饅頭的用料唔多，變壞的機會不大，連同包裝袋放入雪櫃內可以擺幾個星期都冇問題...

麥饅頭比白饅頭有麥香，吃起來都較可口，以前唔太多地方有饅頭買，現在要買來吃都好容易，最簡單超市都可以買到~~基本上饅頭蒸熱都好好食，如果嫌太齋口，可以搽些花生醬，芝麻醬都好適合好夾，而且買定隨時話食就可以食!!!

森怕個「金叵籮」...

 一般稱為「金叵籮」是指最疼錫，在你眼中最矜貴的人，大都是指初生子女或孫仔孫女，或者人生中總會有些人你會當他們如珠如寶...

查實「金叵籮」的原意是酒杯，出自古詩!!

真實的「金叵籮」只能是可遇不可求……雖矜貴但都畀森伯伯遇到好幾個...金菠蘿~~~乜菠蘿都有分金定唔金，第一次聽!!!

不過都唔貴，廿令蚊就有交易...喜歡吃菠蘿的朋友可以試試，只是森伯大鄉里，可能大家都已經食過~~~

近排台灣的菠蘿都成為政治炒作，外銷變內銷台民話可以哽晒咁多菠蘿，仲講笑說一日可以三餐食菠蘿...哈哈

長輩們都話菠蘿唔可以多食，怕濕熱，但日日食就算冇濕熱，都恐怕胃酸過多喇~~

森伯一向都好少食鮮菠蘿，只因怕太酸，罐頭菠蘿較甜都間中食，不過就適可而止~~

搵足大半日……

因為有些事，需要聯絡同事們班whatsapp群，而且有新加...在此發現到幾有趣，雖然這類聯絡社交帳號係個人的，但很多頭像照都是以物品代替，群組當中都沒有人用親身照，問題就是有whatsapp來，就一定要看回之前的留言訊息才知邊位發送，有時又要新增聯絡人，送出後又唔知有冇錯，有親身照應該就包冇錯~~

森伯自已雖然都冇用親身照，是用漫畫化的自己作頭像，但起碼我send畀人，人家都會知道，我認為這樣會較好，唔知各位Blog友，你們在這類社交或聯繫平台，多數會用什麼作頭像相呢?!!唔敢放真身照又是什麼原因呢?!!都想知知...

諗諗下都要摷返張屬於自己靚靚仔仔的照片出來，作個人帳號的頭像相，不過搵足大半日都搵唔到~~~><

2021過年點滴~~

其實過年都不外乎食食懶懶，不過大時大節都預了食得多，當然唔介意，尤其早陣子更覺得自己需要食多點，所以食多都唔怕~~

過年時節糕點都少不了，眾多的糕點中馬蹄糕都係首選......

今年逗的利是雖然少了，但利是最主要是著重意頭，多少並不是重點~~有時見到設計精美的利是封都會把它收藏起來，不過就唔多~~

至於買利是封都會趁過年買，比較多款式，自己姓氏是首選不過今年冇周圍搵，通常有需要時用得著~~

事先聲明，森伯伯唔係心虛，只不過逗得利是多都要作番少少回禮...哈哈哈

幸好超市選擇多，行一轉就可以買齊晒，唯獨最麻煩好多都太甜一唔係就唔多健康，事關佢地仲腌尖咀刁過森伯...