生活充滿政治化...

自從上年中的所謂社會運動起，多了人關注社會時事，亦多了人傾關於政治問題，一向對政治冷感的港人，以前好少聽人談論政治，家陣幾乎時刻聽到有人講「政治」，而且時下乜事都變得同政治扯上關係，遲下去唔到廁所都可能與政治有關！！

一些唔可能同政治聯想起的事物，但這一刻不用幾秒已經即刻聯起來了...哈哈哈

還有常常把人分顏色(政治取態、立場)，聽講有些家庭講明，在家中不會講政治，查實我們只是普通平民百姓，真係講政治怎輪到我們，正確應該講為傾談時事而已！！

都明白每個人骨子裡都總信自己的一套理論，當人家只要發表什麼唔同己見的聲音時，就會聽不入耳，講說話反駁，你一句，我一句就好容易有爭執磨擦，所以話有親人、朋友因此而拍檯反面~~~~

其實大家都應該理性些，政治議題本身就很複雜，我們普通市民只能當茶餘飯後傾傾就算，都冇需要太認真...有時同人講開呢方面的話題，都有遇過「發爛渣」的人，亦都有遇過講完傾完就算，對！就算大家立場想法唔同，都不唔應該以鬧交收場...

留家工作…

呢段日子真的隨時上班，又隨時要留家工作...或者從豁達的角度看，留家作工就當為一個休息~~

大家都唔好以為呢排森伯好嘆，轉天氣的時節，又撞正風濕發作，真係痛了很多日，不過好就好在唔需要請病假...所以大家都要小心身體，呢排真係時冷時熱，記得上周好似發冷，今周又可以穿件背心，今日又感到涼涼地~~

這段風濕痛的日子，以藥丸和鎮痛膏布為伴，雖然都未必百份百有用，但有舒緩都已經好好~~

又開始要上班喇，希望自己可以頂得住啦！老人家就業真係辛苦...

香港的疫情開始有點緩和，都係好的！但眼見歐美多國的疫情都幾危急，但外國人仲可以叫當地政府撤消居家令，完全同香港人兩回事...不過都希望疫情可以快些過去，他們可以重見曙光...

自製懷舊格仔餅...

時下的人樣樣都講衛生，很多人都認為以前街頭小食的那種風味，己經找不到了，昔日的街頭小食已經移到舖頭內，感覺就當然截然不同了...

要數數以前的街頭經典小食，相信唔同人有唔同的經典，對森伯來講格仔餅都可算經典，小時不是街童，所以不會掃街樣樣食，可以食到口的，就成為今日的經典小食，通常以前的格仔餅會先搽些牛油，再搽上煉奶再會搽些花生醬，新鮮熱辣的格仔餅，把夾在內的塗料溶掉，肚仔餓真係幾吸引......

雖然呢個格仔餅現成在舖頭買，但家中都有花生醬，煉奶，今個下午茶餐一於來個懷舊格仔餅，可惜個餅身較硬，如果軟熟就比較似樣...

今時今日格仔餅口味多多，但總覺得原味簡單都係最正!!!

有風險……

除左大家呢排成日關注疫情之外，仲有冇留意其他大新聞，就係一間港人熟知的銀行，將會唔派股息，又唔知呢項財經消息對大家有冇影響，因為相信呢個時候都有幾多人係靠股票收息過生活，而呢間銀行亦是眾多股民的選擇...

經濟下行，大銀行都要行到這一步，的確時下的經濟環境真係好差，附近的新酒樓都準備開張，可惜遙遙無期一拖再拖，都唔敢想像平時旺區內的商舖，當然最受害是有些長者股民，其實銀行總有白紙黑字寫明，投資總有風險，有時真係喊都冇用~~~

對於慒懵懂懂的森伯來講，投資生息都唔係太啱我，都係平時慳返個錢最實際……