我的 2020…

二零二零終於到尾聲，很多人對今年流年都認為很差，的確從大圍去看又幾差，一個疫情搞到環境差，經濟差，民生差...終日惶惶恐恐怕染上瘟疫，搞到人人都罩不離口，其實無論哪一處華人都比較自律，就算外國的華埠區，唐人埠感染的人數都較少，所以口罩基本上都可能要繼續戴住...

對港人來講，除了對疫情有所關注之外，中美的角力都一樣天天上演，外使的制裁聲不絕於耳，聽得多都有點膩，當然任何角力都是領導層的事，我們作蟻民的就只有天天剝花生睇好戲，其實中美爭鬥好睇過TVB的劇集......哈哈哈

至於今年的自己，屬於一般般，因為很多時間都處於平靜中，都總算平淡的渡過，早前有幾日睡得不夠，所以導致頭赤與喉嚨痛，初時都幾驚自己染疫，當睡夠這些症狀便緩和了~~來年願望都係望自己老當益壯，呢場戰疫仲未打完，隨時都要作好防備!!!

我都祝大家新年有進步，今年比往年好!!!!

做時做節…

近排天氣都比較凍，本身感覺越凍就會越有過節氣氛，尤其冬至，聖誕，新曆年...就因為凍凍地，才會份外感覺節日特別有暖意~~可是疫情嚴峻的關係，過時過節都要將就一下...

今個冬至都冇得外出食一餐，記得過往都會舉家去食自助餐當做節，相信今年都冇咩可能，突然間自助餐變得遙不可及...今年唯有食盤菜，用呢種盤菜做節森伯都係第一次，當為試下都好~~

既有麵又有甜品，飽就好飽，不過食材一般......

冬至過後又到聖誕，今個聖誕沒有見過什麼特別的聖誕佈置，而自己家中都冇搞些什麼佈置，因為只擺幾日，懶得都費事擺...哈哈哈

在此祝大家節日愉快溫馨，望新的一年事事理想!!!!!

行街街，挪靈感~~

有時上到街上，都會留意一下有沒有一些不錯的圖案，設計或者有特色的東西，都一定會用手機或相機把攝影下來，這些有可能可以用在工作上，對設計構思亦有很大的幫助~~

記得初初工作時，市面都有很多所謂素材的光碟賣，多數在一些賣影碟唱片的地方也會找到，但現在多數在網上購買，雖然方便，但要逐幅影像買價錢也是成本，若然隨便拿張圖來用，也要顧及版權...所以都好喜歡這類素材光碟，可惜買少見少~~

只睇這個櫥窗設計，可能你會認為是什麼法式食肆等，其實是間普通的港式茶餐廳，唔需要太花巧的設計，簡約便是美~~

森記湯麵

有時假日或者週末都喜歡食個麵，都唔一定要煮飯食，若然冇咩時間煮又要外出的話，食個包都可以飽，你話森伯平時除左口水多多，奄奄尖尖，麻麻煩煩，老老土土之外，森伯都幾易養......哈哈哈哈

在這個疫情期間，就未必日日上街買食物，家中能夠儲些食糧都幾方便，要食都可以隨時拿來食~~麵相信是其中一種，買定些乾製麵餅，又可以存放很久~~

其實煮麵最麻煩是個湯底，白菜加些肉片就會好好味，當然要加些豉油，雞粉調味，這樣便可以做個清湯麵，到食時加些麻油就唔錯~~

成日聽講，簡單就是幸福，現在森伯活到幾廿歲先明瞭，簡單煮唔駛太辛苦就有得食，總好過太複雜煮一大餐才食得少少，所以在森伯本食譜裡，簡單就是關鍵詞~~~

唔講咁多，麵擺凍了就唔好食，食麵先!!!!!!

近排一二事...

累了街坊...

早前才有人講戴口罩也不知要戴到何時，有可能遲些少到聖誕唔需要戴呢...但估唔到迅速又到第四波疫潮，真的一波未停又一波，其實今次的疫情是有迹可尋，據講是一班人跳舞引發...

跳舞的舞池不只一個而是遍及港九新界都有，所以呢一波的疫情都擴散得很快...但估唔到附近商場的酒樓都有做呢種舞池，自從講有人確診後呢間酒樓都冇再開門，最慘就是連累到商場人流少了，就算去到都唔敢入舖頭買野，食野~~~其他的食店當然都見有食客照食...

其實都唔係太明白，疫情爆發期間，仲有人膽搏膽周圍聚集，最佩服他們的勇氣是群玩群跳，兼且群體唔戴口罩，老實講呢種環境下就算戴口罩都難逃一劫~~「樂」在其中的人染疫都冇話可說，但傳去其他人就真係十分無辜...

據專家所形容今波的疫情「來勢洶洶」，都知幾嚴重...香港很多重要節日都在年尾，睇怕想盡興唔戴口罩都唔駛旨意~~的確都有抗疫疲勞架!!!你知老人家森伯伯戴親都雙重口罩，唔染疫都有可能隨時侷死，今次又整單第四波，完全唔敢講口罩戴到幾時...長者的抗疫路途都幾坎坷~~~~

冇電視睇?!!

如果仲用舊式電視的話，相信踏入今年的十二月一日起已經睇不到舊電視，除非有接駁機頂盒一或早已換了數碼電視機，雖則話森伯落後人十幾廿拍，但換了數碼電視已經有一段長時間，這次基本上都冇乜影響，我相信香港都大部份人已經一早換了電視，不過都想讚讚政府的援助計劃，若然有些人未換新電視，只要打電話聯絡有關部門，就會按照所需者的情況前來為他安裝機頂盒或新電視，但當然主要服務對象為基層巿民，初時諗森伯都屬於基層長者，可能受惠到，但可惜一早換了新電視，不用申請了~~

基本上現在絕大多數的人都會睇到高清電視，我諗若然來一部舊式電視可能會睇唔慣，但是舊電視都陪了不少港人電視送飯的日子，自此什麼有雪花，有鬼影，收唔清的畫面質素，都可能成為大家的集體回憶~~~

圖：相片是網上搵圖合成的...相信以後都唔會在舊式電視看到疫情現況lu~~~~

森伯擁有一間迷你便利店~~

有日見到這些模型有間幾有趣的便利店，於是就買來砌，森伯自小對砌模型都係麻麻地，記得好細個都有些小型車或機械人模型砌過，但大型如航空母艦那種當然沒砌過，

一來對沒有太大興趣的事情，好難集中精神去做，二來大型模型切件又多又濕碎，萬一唔見兩三件就成副模型唔駛砌，三來咁大副模型砌成後都冇咩位置擺放...所以砌些細細個就最好.....

一拆開濕濕碎碎，感覺有排成型~~~~~

睇住砌模型份藍圖，逐舊逐舊砌，不久後又有番少少滿足感...

砌下砌下又咁快手，成間"些粉"又搞掂...

都做得頗仔細，內部的貨品及收銀機都有齊~~OK，可以做生意lu...XXD

擺低少少錢，你要邊間舖就邊間...

其實一間便利店對大家來講，會聯想什麼呢??掃零食?!!發達窿增值?!!叮叮點心?!!

我反而會想起...現在的醫院大多數都有間便利店，儘管雖然是間便利店，平時又未必感到好特別，但對住院的病人或者醫護人員來講，它的意義都幾重大，去買些小食幫精神上充下電，留院對很多人來講都十分沉悶，可能唯一能夠去鬆鬆都是去便利店睇睇，揀些喜歡的小食，或者對病人來講算是樂趣~~這就是森伯的聯想!!

逛街街 (模型版)

都唔好話去旅遊咁遠，就算連在港行街街都好似隔了N個世紀咁，對於近排疫情都反反覆覆，好多人都寧願留家的多，當然有很多人仍無畏無懼，照常多多外出~~

對於森伯伯來講，買些少東西，返工都算是外出，基本上接觸的人都算有限，不過相比其他地方，香港都算幾安全，因為天氣開始冷流行性感冒又煞到，不過以小學生居多...

有日在同事的檯上見到條模型街，全是你我熟悉的商店，不過硬係有唔同，唔通又係曼德拉效應?!!，森伯呢條友乜都賴曼德拉效應，其實人家名店的商標都有版權，呢類小模型邊會取得人家的版權用呢?!所以間間商舖都係AA貨版...不過都可以藉此當一種街頭的情景!!!

其實呢類模型森伯之前都有砌過，而且難得仲砌到一間便利店，可能要下篇網誌才讓大家睇睇~~呢類模型的砌法都幾簡單，價錢又冇真正的lego咁貴，揀一間喜歡的店舖砌砌都幾有趣...

都想問大家，假設有你喜歡的商舖模型賣，你又會揀選乜商舖?!!呢條商店街睇來睇去都好似爭D人氣，某程度上都好配合現況~~

包店...

對於港人來講，每日除了主糧米飯之外，還有麵包都不可缺少，所以每個住區基本上都搵到一兩間包店在內，麵包款式多，森伯都算包痴很多出爐麵包都啱口味...

不經不覺附近的包店開了好一段長時間，初時都以為做唔掂，不過顧客都幾多，生意都應該唔錯，當然做生意都要諗諗計，價錢算走中低位，而且售的麵包多以買二送一，抵食就總有人幫襯~~

記得初期的麵包好似手工麵包，森伯形容得太好聽，其實就大細不一，脹扁又明顯...不過可能其後生意唔錯，包的賣相都好得多，而且加插很多懷舊唐餅，是西餅店少有，而佢其中的切餅都唔錯，如果不想買整個蛋糕來吃，切餅都唔錯，價錢唔貴但質素都唔差，整體都算幾好希望佢長賣長有，有間麵包店的確方便很多屋苑內街坊~~

得閒冇事搞Pat野...

每個早上基本上都會食麵包，但都想塗少少果醬，花生醬之類，但自已可以做到就只係牛油果醬，之前都整過係幾好味，不過逐次整就會幾麻煩，一次整埋就唔好易變壞，基本上都可以放一兩日，自已做唔會落防腐劑，即整即食~~~

生油果肉加蕉肉攪，最後放上果仁碎，可算增加口感...

加了牛油果醬，真的可以食多幾件，森伯至高推介~~~

講講鞋~~

在眾多的衣履服裝當中，相信鞋唔會有太多人會關注到，反而把視點放在衫與褲比較多，若果平時唔係對衣裝太講究的人來說，買鞋求求其其就可以~~

但鞋對森伯來講都幾重要，舒服的鞋真的行得舒服些，所以要買都大多數係懶佬鞋，穿出穿入比較方便...男裝鞋最好，不用太多款式選擇，因森伯有選擇困難症，買什麼都要諗很耐...

森伯的鞋可以著很久，有時要著一段時間鞋才舒服，慢慢適應返對腳形才叫好著...森伯伯係長者一名大家都知，平時著鞋都係斯斯文文果類，又唔係日日越野長途賽，都唔明點解著的鞋不是爆線，就係穿鞋底...好不容易走去買鞋了，今次都幾好...一睇就試，一試就買~~完全冇試其他，男裝鞋薯薯嘜嘜就OK喇~~

至於相片中的型佬鞋，就唔多襯森伯，平時幹粗活兼且粗人一名，俗語話：著起龍袍都唔似太子...呢句說話用在森伯伯身上就形容得淋漓盡致~~~XXD

疫巿奇葩...

一向都幾喜歡住宅樓下就是一些街巿或者菜檔，買食物都應該幾方便，但有時又會諗諗如果街巿菜檔打理不好，會惹很多老鼠蟑螂，到時樓上住宅都幾頭痕~~所以現在買食物都迫住去超巿，雖然超巿貨品一般都比較貴，但地方逛得舒適兼且貨品任你摷，任你揀，暫時自己又唔需要買太多而且就腳......

近排城中熱話就是連超巿都要向政府申請補貼，初時聽都已經想講句唔係呀!!至於超巿拿了補貼後就話會回饋市民，抽獎，領現金券...方法好唔實際，而且未必人人都受惠~~而事實上疫情期間，反而覺得超巿仲好生意，都有很多人怕去街巿唔衛生而轉去超巿買東西，曾幾何時還有些人去超巿掙米掙廁紙掙到斷晒貨...

查實無論有冇疫情超巿在收工時段都有人排長龍畀錢，我就近這間已經算唔係旺區的超巿，但顧客都唔少...

唔怪之得，有錢的就越有錢，基層的就越基層，森伯當然係基層果part啦~~~~

又攪嘢...

話咁快中秋又過了，話明喜歡中秋節，當然不想氣氛太快過去，就畀森伯呃多篇Blog，都同月餅有關，通常節日過後的應節食品都要清清佢，幸好月餅自己鍾意食，多些來就密些口，但可能森伯燥底食得太多就會熱氣...

最簡單可以配杯烏龍或者香片就可以，不過見有些剩餘物資就更加好...這些黃豆都存放了好一段時間，記得在上課期間用來拍攝用，數算都有年多前，應該冇變壞...

其實黃豆的食法唔多，對我來講唯一做到的就有豆漿，而且又可以佐月餅食唔錯，既清涼又好飲~~有部小型攪拌機幫手就快好多，隔去豆渣便可，自己整唔落太多糖......

淡淡地伴幾甜的月餅食~~都可以話是種簡單的享受!!唔需要太多時間，就煮好了豆漿，餘下一半可以再攪多次~~

今個中秋...

正所謂一年容易又中秋，在節日裡中秋都可算是喜歡的節日，一來是個大節，二來又是由暑熱走到清爽清涼的時候，很舒服~~

以前細個一定有兩個燈籠，所以記憶很深，而且在很多節日中，中秋節是唯一一個節日可以玩火，不過相對現今就不行了，人口稠密地方又狹窄，玩火真係好危險...

現在好少留意燈籠的市道，不過早前就見到家品店出售新款燈籠，遠睇簡直硬膠車仔玩具，再睇真原來係個燈籠...完全感受唔到任何中秋氣氛~~好在自己個玻璃紙兔仔燈籠仲健在，算可以畀森伯老人家緬懷一下~~~

過時過節月餅是必需的，所以今年都買了很多月餅，傳統又有冰皮又有，既是送禮又是自奉，較健康的伍仁月成為大家的首選~~

又因為疫情關係，做節都可能未必外出食，是因外食要分兩張檯，長輩們認為這樣不似吃團圓飯，所以在家吃也會一樣~~

森Blog祝大家中秋人月倆圓，節日愉快~~

上鏡...

自疫症開始，相信都有幾多人要留家工作，留在家工作也要一段日子，分分鐘都可能成個月，不過好在科技進步，可以透過webcam算是同公司有個簡略的聯繫，不過在家中用這種視像，都留意了些事情，但又唔知大家有冇同感...如果在公司用都冇咩問題，整裝待發隨時ready，但在家中可能著得求求其其，背心加睡褲，當然唔OK啦~~過到班同事們都未必過到自己，當然要換件肆正少少的衫，有時就算唔係返工都要剃剃鬚，梳梳頭...在家裡通常都比較散漫，唔會準時開始，公司都冇太嚴謹，遲了一兩個字都好等閒，唔會著緊...XXXD

都有發覺有時放Cam的位置都幾緊要，要睇睇屋企有邊忽可以出鏡，太多雜物唔得，太多私物都唔得，冇整理過更加唔得啦，仿似狗竇...不過通常這些應用程式，都有項功能可以化走個背景，或轉為虛擬背景！見好多人都用，但我冇用兼唔知點用~~哈哈哈

相信這種webcam無論在家或在公司，都要再用多一段時間，這都算是運用到科技帶來的方便！！

口痕痕...

其實森伯刻意買零食的機會就唔多，不過有時經過都會入零食店睇睇，市面售的零食大都很多添加物，就算唔係咩化學東西，太甜太鹹都係一個原因，現在多了吃些果仁，乾果之類，不過乾果比較酸所以少食，唔酸的乾果真係唔多，杮餅、蕉乾、無花果乾、還有一種名為白桑椹都係甜...如果有博友好介紹都不妨告訴森伯~~

記得有次買了包雜果仁本來請人食，結果因疫情關係就冇送出，唯有自己食，而每日食過晚飯後就口痕痕，通常食些少呢類果仁幾好，變成一種偶爾的飯後習慣~~

呢類雜果仁幾好，有幾款堅果，腰果、杏仁、花生、夏威夷果仁等等~~一路食，一路嗒番杯...茶幾好！！漸漸發覺呢類堅果小食，無論是送禮或自奉都唔錯，送畀人又唔驚食壞人，送唔出又可以自己吔返~~~~哈哈哈

為馬桶而自豪...

我估自有人類歷史以來，相信只有森伯伯係第一人proud of...個馬桶~~哈哈哈

常常聽人講現今的港人真係越住越細，但樓價就越來越貴，其實都完全明白，買樓可能是一生人的注碼，仲要是間細細房子也說不定！！

現在所講的納米樓相信內裡的間格都要儘量偷位，每寸空間都要用到盡，例如廚房變成開放式，入了睡房兼且上埋床，洗手間就沒見有淋浴地方，真係完全唔知點沖涼，唔通又開放式用廚房水喉?!...

忽然令森伯想起以前住過的地方，雖然不是有什麼特別，但是有兩個廁所而已，現在回想起都算十分奢侈，雖然是曾經的事，暗地裡都可以講得proud of呢兩個廁所，不過對大部份的人來講(包括森伯伯)有塊瓦遮頭，都已經算好好，其實都唔需要理會是大房子還是小房子，無論一間屋、一個房...都是屬於自己的一個小天地~~

圖：一間裝修公司的陶瓷小廁所擺設~~

行行逛逛 (下)

今次逛國貨公司，見到的都是小型工藝品，大型的藝術品擺設就不多見，其實除了工藝擺設之外，不能不提還有很多家品，如果喜歡古色古香的傢俱，這裡都有幾多，如果一屋中式傢俱真係幾有氣派，但現在港居趨向納米型，相信都好難擺放太多中式傢俬...

在這裡還見到久違的米通碗，相信以前香港有很多家庭都有用米通碗，這裡都幾多，森伯記得以前有隻純白的米通碗，小時很喜歡在燈光下照個米通碗，看看是否可以透光...

如果說到要買些中成藥，外邊買總是沒有太大信心，所以買些與中藥品有關都會到這裡買，好似之前介紹過的田七粉，現代人喜歡養生，所以有很多中式保健茶選擇...

今次就冇買藥品只是睇睇，還有我之前有篇網誌介紹過的防新冠茶，果然真係有得買，不過去的時候係冇本地確診個案，所以都冇買，不過買左都唔知點煲~~哈哈

時間都幾趕，買完要買的都已經不能再慢慢看其他，唔緊要，下次預些時間再逛過！！

行行逛逛 (上)

久不久就會去逛逛國貨公司，可能現在的商場太過家家也差不多，每個商場總離不開屈人寺，扮零，麥當當，士打筆之類...反而國貨公司有不同之處，其實都要去買些日用品，順便睇睇有冇咩工藝品係森頭好~~

可能疫情關係好多人都怕出街，包括長者森，但去的時候未有第3波的疫情，當時仲係每日本地0確診~~

一些虎頭工藝品，很有民族風...

另一種好耐冇見過的動物模型，細細個在店舖廚窗好常見，以為經已絕跡，但國貨公司仲有，似是用來裝飾!! 見到小老虎造型唔得人驚，反而厚QQ~~

一種名為景泰藍的工藝品，每隻獨一無二，造型相同彩紋也不同...

今次去冇太多畫睇，有喜歡的水墨畫及國畫花樽~~

玻璃飾物打理得好，色彩可以永遠保存，睇價錢也不是太貴，勝在每樣得一件，唔怕撞款~~

一般人認為所謂的藝術飾品是種奢侈品，不是生活所需，但家中若然擺放一兩件，閒來賞賞也對心情有種調劑作用，這種便是所謂的藝術價值!!

出門兩件事...

 以前人的生活純樸簡單，但出門都要七件事，唔知大家記唔記得邊七件事呢?!

咪就係柴、米、油、鹽、醬、醋、茶...查實都唔係太知何解，有識之士不妨答答森伯~~

至於今時今日，出門又有邊兩件事一定要做呢?!

我諗大家都唔需要諗就講到答案，就係口罩...銀包唔記得帶唔緊要，鎖匙都冇相干，反而冇戴口罩，啲人見到即刻彈開十尺遠，車唔畀上，餐聽唔畀入，差啲連茅廁都冇得去~~哈哈

講真今次的疫症，政府其實都做了很多，無論你是否認同都好，正如人家都話，有福利就舐盡，把口就數政府這不是，那不是...

記得之前政府每戶派十個口罩，親耳聽到有人話又唔早啲派，這個時候派多餘...估唔到冇幾耐又有第三波嚴重的疫情，這些人再唔敢出聲~~

而呢幾個口罩就是公司給予的，所剩無幾...

見第三波疫情咁嚴峻，乜法寶都要出齊，平時都好少帶支搓手液出街，但這一排都要帶定，之前買了一支啲香味麻麻，都唔敢再帶出街用，今次買到呢支又唔錯喎，至於咩味道，一睇就知係香橙味，淡淡的橙味幾醒神，用後又唔會黐立立，其實都係不時之需，唔會多用~~

下次見到都要買多支後備~~~

森之鹵味...

對於懶人飯菜來講，鹵水食物都算是幾唔錯的一種烹調做法~~

對有些人來講，呢排都好怕日日都要去市場買送，所以做些煮一次可以食幾日就最好~~

粵菜中就有鹵水菜式，呢個時候煮就最適合不過

森伯伯初時覺得整鹵水食物好複雜，但清楚個做法後又會好簡單...

今云都可算森伯伯的第一次，初時買些現成鹵水汁最好~今次整麵筋!!

只要把適量的鹵水汁加水煮，再放入材料炆一會便可...比想像中簡單。

煮完後脹卜卜，又OK喎~~

但可惜呢隻鹵水汁冇咩味，下次試下另一牌子，或試下鹵其他食材...

鹵水食物隔了一晚就會比較好食~~唔講咁多，開飯先！！

森之集郵 - 港產篇

集郵對於森伯伯來講，並非一個熱衷的嗜好，只不過公司又有幾多郵票，而同事也將少量的郵票畀森伯，於是就把這些郵票儲起來~~

港產郵票……

這些港產郵票當然不會出什麼就買什麼，視乎有沒有喜歡的，十分隨意~~

這套郵票以區旗款式的設計，以香港有名的地標為題~~

建國紀念郵票，以三角形郵票款式，少見而特別~～

這個不是港產郵票，只是在公司信上的圓形郵票，見特別形狀所以拍下來~~幾特別!!!

一講到食，港產的美食都唔少，當然能成為郵票主題~~

屬於港人的經典漫畫--老夫子，都唔駛森伯介紹太多啦~~

所儲的郵票當然不只這些，還有其他，等有機會再同大家睇過森伯的私珍藏~~

滋潤…

呢排見個疫情反彈，日日都有幾多確診個案，雖然可以做個森居宅男，暫且唔需要擔心上班，減少染疫的機會，今起政府為了防疫措施禁堂食，相信對有些返工族都有影響，森伯本身都係帶飯族，食晏就唔成問題！

既然家陣疫情期間，尤其是森伯伯果類老人家，更加要飲些潤喉又潤肺的湯水，唔需要講咁多，拿拿聲煲個羅漢果荼，呢個時候相當適合…
用乾羅漢果，以及九製陳皮…煲幾個字(廿令分鐘左右)咁就得，超簡單…

飲剩還可以放雪櫃，大熱天時是個唔錯的消暑品，而且煲一次飲幾日都可以，可算懶人食療！！

換車仔...

相信有睇開森博的友好都知，森伯係屬於文初時代的人...XXD，一些舊有的玩意好似只存在於森伯的古老年代，就好似以前買東西，換購呢種行銷手法都好興~~例如：買牙膏換套杯、買洗潔精就換餐具等等

時至今日，雖然換購這玩意都少了，但偶爾都見到有些商品會贈送什麼，或換購什麼...相比以前應該會欠缺一點吸引......

好可能都要睇睇所換購的是什麼，就好似近排某間超市的換購車仔，都好似幾踴躍~~
本來森伯幾廿歲，思維又接近古稀之年，都冇諗住換車仔，但見到有幾部甲蟲車仔幾靚，便刻意去留意換領日期，已經在換購的第一天下午去買去換，問過都話已經換晒.....吓~~咁快！！我當然唔會走到另一間，冇就算...又估唔到，現在的換購行動都幾踴躍…

記得上世紀有間快餐店，要儲齊咁多隻史落比狗仔，啲人為了去換，買了個漢堡包食到唔食都要掉了，呢次換購都算經典，睇到當時古板的森伯都搖頭嘆息講句......真係世風日下...XXXD

呢架厚得意的甲蟲車仔唔係森伯，是問人借來影影，佢又幾好野換到心頭好~~

森伯就唯有觀賞自己一架靚靚的甲蟲車仔...唔知大家又有冇換到車仔?!!

烤多士……

基本上森伯唔太尋求複雜事情，尤其在食方便，越簡單越好，通常平時返工的早餐，求其就算，留待到周末才食個有營早餐~~

呢個悶熱的時節，麵包好多時擺幾日就發霉，所以都要放在雪櫃裡保鮮~~若果有些麵包好似餅乾狀態應該冇咁易發霉，今個早餐就有這種麵包餅乾，正確來講應該是烤多士...

呢款烤多士最主要係幫人清食物，並非自己買~~不過若然喜歡吃香口的食物，呢款烤多士幾啱胃口~~脆口之餘又有點焦香味...即時諗到配個羅宋湯應該幾夾，可能現在肚仔餓餓地，諗到都想食~~

今個早餐我配了一杯黑芝麻飲品，是自己製作~~但配起來都唔錯，搽少許牛油再烘一烘會更好味...

積少成多…

時至今日，相信都有很多用電子錢包去付款的渠道，感覺都應該方便，但會否普及就不得而知，記得曾經看過篇報導，越用得多這種電子貨幣，他們的理財能力就會越差，因為他們會不知不覺用多了錢，結果就需要貸款渡日……

對於森伯伯D古代人來講，理財方式全用電子化，相信都冇咩可能， 好怕就係電子失靈，交易記錄唔可靠，就好似最簡單的”發達隆”，有時都冇計過嘟了幾多次，講真唔會常用，但就時時要入錢，奇就奇在D錢咁快用完?!!......所以電子交易唔太穩陣，更何況咩電話理財，電子銀行之類……

用返現金交易最穩陣，之不過就會製做太多神砂，搞到森伯伯可以升呢做神砂王子，現在神砂都好少用得著，有些舖頭都會用，尤其某些店舖的標價仲用XX.90 / XXX.90果類，唔明點解唔減$0.90，或者加多$0.10，化整數就好計……

毫子森伯都照收，積少成多嘛，至緊要就係森伯個褲袋夠大夠實淨，唔怕袋穿隆~~

炎炎夏日，耆英隨想…

端午節過後，漫長的炎夏正式開始，其實暑天都一早開始了，又代表著雨季風季的來臨，想想都很久沒有見過雨景，早前都有個令星期落雨，不過就唔算太長，若然香港人只靠本地的雨水過活，相信水價比樓價貴幾倍…

呢排都有幾多天聞現象出現，早前有人影到雙彩虹、又有人見天空出現火彩虹(據講有七種顏色的雲彩)，上周又有日蝕…又唔察覺，無論怎樣，天朗氣清的晴空已經相當舒服，不過一到正午就熱到七彩~~~唔知各位的博友們，在以上的種種香港天聞奇觀中又有冇親眼睇過？！

所以一向都對天時暑熱麻麻地，尤其香港天熱又濕又侷，若然不是間中有冷氣，相信夏季都不易熬過，不過凡事都總有兩面睇，正所謂：等森伯吟一吟首詩先……春有百花秋有月；夏有涼風冬有雪……即是無論什麼季節，都總有些地方係你值得欣賞~~

經過一場過雲雨後，路上的花花葉葉都顯得特別翠綠，賞花賞草都唔一定要到公園、花展之類…..就算生長在路旁的植物也同樣吸引……

適逢今天出Blog是回歸日，在過去一年香港都發生很多事，感想當然有很多，不知大家又有沒有特別感受，有的都可以留言講講…

粥、粉、麵、飯、「糕」….

每逢周末都會食下其他雜糧，唔一定要餐餐食飯，雖然森伯成個飯桶(遲鈍人士)咁款……不過話時話森伯平時又唔會食太多飯，總之都係適量…

講開粥，對港人都唔會陌生，在外邊食很少會食粥，而食粥很多人都認為要油條、牛脷酥先至係絕配，的確係…好似睇電視劇，逢有早餐的場境，唔係煎腸蛋就係白粥油條，試問現在香港有幾多個人或者家庭是這樣的早餐，通常都係食個包就返工返學，包括森伯自己都係……

不過自從森伯識得整饅頭後，就多了自整糕點配個粥，而且自己整落咩料或餡料都可以，真正隨自己喜歡，呢句先係我整饅頭的原意……

今趟就整個香蕉饅頭，平時香蕉蛋糕食得多，香蕉做的糕點有個特色就是有一絲絲的香蕉纖維，自己整都有架…平時奉行少糖，少鹽，而呢個香蕉糕餅，有香蕉本身的甜味就唔需要落太多糖，剛剛好，清甜而不膩……

習俗話：過了端午就開始熱辣辣，相信大家未食粽就一早換晒夏季衫，所以天時暑熱的時候，午飯食個花生豆粥，再配個糕餅都幾好！！