對於懶人飯菜來講，鹵水食物都算是幾唔錯的一種烹調做法~~
對有些人來講，呢排都好怕日日都要去市場買送，所以做些煮一次可以食幾日就最好~~
粵菜中就有鹵水菜式，呢個時候煮就最適合不過
森伯伯初時覺得整鹵水食物好複雜，但清楚個做法後又會好簡單...
今云都可算森伯伯的第一次，初時買些現成鹵水汁最好~今次整麵筋!!
只要把適量的鹵水汁加水煮，再放入材料炆一會便可...比想像中簡單。
煮完後脹卜卜，又OK喎~~
但可惜呢隻鹵水汁冇咩味，下次試下另一牌子，或試下鹵其他食材...
鹵水食物隔了一晚就會比較好食~~唔講咁多，開飯先！！
諗起係八年前超市邂逅佢，最初身價不菲，等待咗三次降價後，[$4XX一〉$1XX] 我就 拿拿林卜鎚同佢贖身，帶佢回家服侍老人家。
回覆刪除我用個鹵水神器係 真空煲，唔使長時間睇火，慳Gas錢，唔驚煲乾水，不過，最初都遇上黏底問題。過年咪食盤菜，我發覺人哋會喺底部放塊金屬窿板，咁我偷師囉！
大和鹵水汁最正，阿蘇都推介，佳寶/家興超市有得賣，喺街市凍肉舖/南貨店買會平啲$15，我第一次買時係$9。亦可上萬事達食品FB問你嗰區邊度有得買。
依家我係空白嘅，好似森哥第一次，心思思有件事，遇疑難話你知，必上網摷吓料才定。
老人家牙力唔夠要食淋嘢，鹵水最啱啦！我好多嘢都試過，如牛𦟌、鴨腎、雞腳、牛脷、雞翼、雞肶、豬肶、五層肉、豬脷、豬腳、乳鴿、米鴨。所以，想過有質素嘅老年生活，趁後生要好好保養棚牙，其實，老人家冇乜邊個部位唔使保養好。
仲有，就算用現成鹵水汁，每次都放二片拍鬆嘅薑，¼~½片片糖或冰糖。
鹵水汁係愈舊愈正。煲完鹵水汁唔好倒，趁熱倒入玻璃樽， 攤凍後放雪櫃，每個月要煲一次，否則會發霉，証明支汁冇加防腐劑。因為我嫌麻煩冇將個樽用熱水樽烚過去殺菌消毒。
第一煲用半支就夠。
煮滾咗試吓鹵水汁啲鹹味，記底咗下次自己加生抽補鹹度和老抽補色水。
睇嚟你真是鹵水達人，我是新手因為好少整鹵水食物，初時以為現成鹵水汁都要幾十蚊支，原來今時今日買一般牌子都是十來蚊就買到，的確好過自己調校，好似話又要花椒八角，桂皮等等……所以買現成會比較方便實惠，而且鹵水食物的味道又食慣，用來做餸帶飯都幾好，唔需要食蒸的飯菜咁單調~~
刪除我整的鹵水食物唔乜需要睇火，只視乎食材是什麼，有些肉類炆的時間就會長些，但麵筋汆水後再炆，時間就唔需要長，只炆三個字時間便可，所以不怕滾瀉，唔會用不鏽鋼的蒸板墊底，除非用來蒸饅頭~~
大和鹵水汁未聽過，有機會會試下，相信你介紹，記低佢~~~~唔知點解超巿買的一般鹵水汁冇咩鹵水味，類似甜豉油，其實森伯有請教森媽，佢方法都好簡單，自家整鹵水汁仲好，有機會再講講~~
很多食材都可以用鹵水方法煮，老人家食雞翼，乳鴿等真係要小心，很多細骨會哽親~~
你仲好後生啫，唔駛咁擔心~~雖然森伯伯都係老人家，但唔食得太多薑去驅風，我食的鹵水汁煮一次就算，唔會留到第二次，怕煮幾次後會產生不良物，你知架啦，現在的鹵水汁添加物都唔少，翻煮再翻煮唔係太好~~你煲好大煲?!!，唔會用半支鹵水汁咁多，我只是用三分之一量杯仔再溝水煮，都已經好夠味……
你都好識煮鹵水，對我來講簡簡單單當識多樣烹調方法~~
刪除蒸嘢太單調，我都係一煲過蒸同烚，唔煎唔炸唔炒，原來，我比森哥更清心寡慾，不過，我有食肉又唔覺悶，懶虫附身，煮嘢要簡單快脆冇油煙。
二片薑咁少都受唔起，太刺激令森哥有反應，平時街外飲食咪要問長問短小心揀擇。
係人都知森哥好夠牙力， 假牙老人係要出過化骨綿掌呢招才食到架，必須更長時間煮食。
魚骨就大問題有潛在危險Call白車，其它骨就冇事，要有骨落地才是有意思嘅精彩餘生，生命已不在乎有多長了。
因為煲多少份量嘅時間都差不多，當然盡量塞滿個煲，一次可幾個人食4餐。森伯獨食又細食係唔同嘅。
嘩！檢驗到巴西雞翼有病毒，我都有食。其實，所有食物都會藏毒，唯有勤於清潔雙手，保証熟透才食。
我諗森伯真係冇你咁清心寡慾，間中都可以食下煎炒煮炸~~煮野食慕求簡單有營養就算，口味就其次!!!
刪除森伯又冇你咁恐怖，畀隻懶蟲上左身，森伯只係懶蟲隨身，適當時候條懶蟲就捐出黎~~哈哈哈
話明唔食得薑就少少都唔得啦~~要薑味都可以!!森伯平時出得街食就唔會問長問短，啱食先叫~~
一爺兄照顧老人家真係體貼入微，要練成軟骨綿掌才會服侍老人家!!畀個讚你~~
煮多煮少的份量可以調校，平時唔想食剩太多隔夜餸，所以適量便可~~
唔駛驚太多，要中招的話做什麼…食什麼…掂什麼都會，保持放鬆心境好重要~~
謝謝兩位的分享，我從中學習了！
刪除哈哈…Stella客氣，我係新手整鹵水，應該多謝一爺的資料補充～～
刪除森哥：
刪除炸 一 哈哈！我自己未炸過嘢。驚訝森哥會食炸物！炸咩食？
好想見證森哥條虫損出黎呢一刻，必大開眼界。
幅相見到好多油？白色麵根勁多油。豆腐卜我會[飛水]減梗啲油。
Stella：謝謝！
一爺兄唔駛大驚少怪，炸物雖然唔會自己炸，但間中也會食炸饅頭，薯片之類…
刪除條大懶蟲捐出嚟一刻?!!費事嚇親一爺啦，況且森伯又唔係太懶嗰類人……哈哈
對呀，呢類麵筋好多油，鹵之前要氽水，去油才能煮，否則成煲油，下次就咁鹵硬豆腐，比較健康啲……
啱啱睇到報導，話新冠病毒4°C存活2周，巴西雞翼係用平又慢嘅船運，通常黎到呢邊都要4周，咁咪凍死晒囉！好安全呀！驗到有毒嘅應該係帶病毒嘅工人或客人感染。
刪除咁我要將新買凍肉喺冰箱內隔離2周才煮食，咪唔會咁易中招。
我喜歡將硬豆腐放上冰箱整蜂巢豆腐，一來很耐放，2、3周後都食得，二來蜂巢豆腐好索汁更好味。
對森伯來講又甚少食巴西凍肉，尤其是雪藏雞翼，現在少了選擇外國進口食物…
刪除隔兩周才煮，我又唔會咁做，最多用清水和鹽洗耐少少，再煮到熟透才吃~~
你又係…哈哈，我都好鍾意食放過冰格的豆腐，變了蜂巢形狀後，特別好食…我諗類似酵麩的原理，一個隆一個隆容易吸收醬汁，所以很惹味!!
唔揀外國進口嘅，香港咁細，本土生產唔多，價錢必貴，我唔多理產地，只睇價錢。
刪除洗傷口就用鹽水，病毒唔係要用梘水咩？
同我永遠對立嘅森哥，難得有一樣嘢咁夾，要慶祝吓，等我食番碗糖水獎勵自己。
今日去買嘢才知道，惠康日日賞積分已被新嘅 Yuu 替代，咁我清埋積分所得嘅現金$26。森哥只要上Google Play 下載 Yuu APP，你個電話就有個二維碼，掃吓就儲分。回贈係0.5%，如果森哥消費$10,000就有$50回贈。喺 萬寧、7-Eleven、IKEA、Market Place、肯德基、必勝客等消費都可儲分。
咁森伯都唔一定食本地農產品，本地可能會貴少少，一般都係國內運來，都冇問題，無論什麼產地買回來都要清洗，後煮熟……
刪除用梘水洗?!!唔駛咁誇張…鹽係天然殺毒物，用少少就OK……
真係好難得有樣嘢大家都話好食，平時大家都明爭暗睥，所以必會包拗頸……哈哈哈
真係好多謝一爺兄提醒，平時去超市康康唔就腳，迫住要去佳佳超市買嘢，有機會申請返張儲吓分攞些著數，除了買食物外，平時shopping機會唔多，你以上的舖頭都唔多幫襯，就算買都係少量，啲積分有排儲………
都係用唔同液體洗，唔算誇張。呢個正確方法係病毒專家袁國勇教嘅，叫森哥跟做，好似叫鬼佬戴口罩，好唔聽話。
刪除我倆截然不同、格格不入，應該早就斷交，咁都傾倒偈可謂奇蹟，當然，森哥好識包容係主因啦！
我呢啲師奶至會貪小便宜，唔啱走型格路線嘅森哥。
森伯老人家邊有你地D後生仔，個胃部咁好，成日用番梘水洗，過唔清真係食到洗胃……哈哈
刪除你形容得好啱呀，截然不同，格格不入，能夠時時傾偈唔係奇蹟，係神蹟!!…XXD，森伯有時燥底未必會常常包容，你小心D呀~~~
森伯感覺走型格路線，實質走赤貧路線~~
鹵味森
回覆刪除鹵味森……好味!!
刪除很方便的烹調方法。不過，我甚少使用。吃得不多，煮一煲要吃幾天，翻熱又翻熱，不太好！
回覆刪除其實煲一大煲食好多餐的，我一定唔會，因為翻煮得太多又唔健康，煮少少一兩餐就食完為原則……
刪除有花椒八角的食物，食得多兩餐，我就會唔多喜歡嗰種味道。
回覆刪除或者用現成嘅鹵水汁，又會有不同的感覺。
都會架……所以每餐吃些不同的餸菜較好……
刪除現成鹵水汁反而味道冇變化，吃多一兩餐可能會厭，但自製鹵水汁可以配合自己口味，多吃也不厭……
森少不但對畫事有興趣，而且對於烹調煮食也很有心得，應該是一個很好的廚師。
刪除人的生活離不開食，要食都要先學懂煮才是，相信秋葉都有很多入廚心得，有機會都要向你請教~~~
刪除哪裡有什麼心得吖? 都不過是些時常在煮食時，自己喜歡的習慣吧了。
刪除我喜歡的習慣也未必是你喜歡的習慣。府上大人們的煮食心得，可能更佳。
比如母親大人等等。
我不相信秋葉一位母親會沒有下廚心得，日常都要煮些餸菜給家人享用，除非多光顧外邊食肆...
刪除至於食物都好講個人口味，不過若然個個人都讚好食，就能夠証明這個人煮的東西適合大眾口味，母親大人都可以煮很多餸菜來宴客，而且也受到各位親友的讚賞~~
自從戒咗啤酒之後，連鹵味都少食咗……😅
回覆刪除有時鹵水食物都幾好味，而且烹調方便，畀我就唔捨得戒……哈哈
刪除