仲係新正頭，內容點都要同新年有關，今年反而食的糕點比較少，最多食的是紅豆糕，紅豆被譽為養生好食材，多吃一點也好的!!
今個新年同啲魚都幾有連繫，無論擦什麼新年奬賞卡，係魚!!!甚至影相的新年裝飾都係魚!!!...其他相唔係爆光，就鬆郁矇~~結果得條魚可以post出來!!
寓意森伯如魚得水；漁人得利；大魚大肉......
森伯今年都有少少技癢，畫完幅兔仔畫，又想寫個兔字，本來都想拿起支毛筆即席揮毫，不過新年流流就唔想搞到通地墨，於是用支所謂科學毛筆，寫個兔字就當為應應節...
森伯一向都有整饅頭，見有些少的糯米粉，於是再加麵粉...本來想整個煎餅，貪佢有煙煙靭靭的口感，結果即時諗起可以做些兔仔饅頭，蒸完出來好有茶樓點心師傅的水準...哈哈哈，正所謂新年流流食過兔仔饅頭，一定就鴻運當頭!!!......
個新年氣氛一直留到新十五元宵佳節，整個人都懶懶地!!!哈哈哈
再祝大家兔年旺相，兔年行大運，兔年安康!!
新正頭，一般都係Hea住過年，所以今篇網誌都係簡簡單單寫些有關賀年的東西...
以下屬於森伯個人的快問快答...
最喜歡的賀年歌?!!
森：恭喜，恭喜!!(原來搜尋過才知呢首歌的正式歌名)
最喜歡的賀年食品?!!
森：馬蹄糕
最喜歡的賀年祝福句?!!
森：森想事成
最喜歡全盒內的食品?!!
森：糖馬蹄
最有氣氛的過年日子?!!
森：年三十
最有氣氛的過年活動?!!
森：舞獅
最要守的過年習慣?!!
森：初一初二唔掃地
最有代表性的賀年物?!!
森：全盒(攢盒)
最關心那個生肖運程?!!
森：當然係.........哈哈哈
唔准話森伯呢篇Hea，只係想大家可以享受傳統節日的歡愉!!
在此，畫一隻精伶森兔來祝願大家：兔年心想事成，身體健康!!
上篇是講新曆年，今篇就係講農曆年...咁快?!!!
就真係咁快...今篇都來一個農曆年雜記!!其實一年裡面，有兩個節日自己會覺得有氣氛，一個係中秋，另一個就係農曆新年，因為有很多富節日特色的食品吃，以前細個對過節食品很一般，有種俗套的感覺，但人漸漸大才發覺，原來傳統的過節食品都好好味...之不過有很多過年食品也是森伯的「禁物」，看來過時過節，都好應該讓自己「解禁」一吓!!!
在香港眾多的節日當中，唯有是農曆新年才會有一個長長的預備時間，因為一踏入年廿幾就已經要「做嘢」，年廿幾開始辦年貨...年廿幾開始大掃除俗稱洗邋遢...年廿幾要做定糕點...年廿幾開始買賀年品揮春等佈置...年廿幾開始買餸煮團年飯，或者Book檯食團年飯...相信以前的人更忙，至於現在的人們寧願一切從簡，不需做那麼多...至於睇緊森blog的你，今日年廿幾又做緊咩呢?!!
其實對森伯來講，都沒有什麼特別要辦的年貨，只不過新年期間不會有太多的商店營業，所以都要買定一些東西在節日假期裡吃，若然要新年買新的用品來用，就應該冇這個習慣，至於講到過新年剪頭髮，以往都需要，當然喇，新年剪就計雙倍，或者比平時貴，就算貴都唔係問題，之不過自疫情以來，已習慣自己理髮，架生都買定，自己怎剪都可以控制，暫時都OK!!
下班時已經入夜，夜景十分舒服，尤其荃灣這裡，充滿著節日氣氛，對面不遠就是有名的沙咀道年宵市場，當日還未見花市，但自己就沒有逛年宵的習慣...
過年祝大家動如脫兔，生生猛猛，健健康康!!
新的一年又開始，正確來講這篇是2023年第一篇網誌，寫些什麼?!一於寫篇新年雜記...
新年大禮?!...
一年之始，算唔算政府畀市民一份禮物?!!我指是通關以及大部份的防疫措施放寬，當然好壞的回響都有，但見市面的確熱鬧了很多，聽講個個人都走出來買東西，吃東西...在呢班人的心裡認為放寬等同病毒已經遠去~~
一向森伯都唔會人云亦云，話晒每日都有上萬個案，近年來都慣了!再睇睇情況怎樣再算，又唔一定要外出食東西...至於壞的情況就是人流多了確診數字會舉升，不過現在都有很多人中招，包括身邊識與唔識都一大堆人...
新年有計...
有晚無意中去到某個公眾地方，竟發現有自己的畫作貼出來，當為一個公眾的溫馨提示，初時看到都已經熟口熟面，再看清楚是自己畫的，因為見到我N世紀前的森字印章(係森blog的插圖)，我相信這些畫作是他們在網上下載打印出來......
因為這張圖片都是用作提醒大眾，唔會追究什麼版權之類!!不過能在公眾地方見到，都很高興，亦對我是一個鼓勵，在新年開始，都好應該執番支畫筆畫下東西，可是自己創意唔夠...不過也可以成為本年自己的一個plan!!
新年特飲...
一到年尾年頭，節日多就自然食得多，就連自己都會被節日氣氛所帶動，買多了又食多了，等自己森魔好過點就是節日冇所謂啦...無論有咩聚餐飯局，都會傍住一支飲品，現時多買了椰水，食得熱氣東西多都想飲番支清清涼涼的東西，椰水自然是不二之選...
