年又過年~~

人多事做，特別覺得時間快過，今年有冇咩做過呢?!反而覺得每日都係差唔多，要數今年自己的十大事件簿都唔易，日日月月都冇咩分別，霎下眼又到年尾~~

好多人都會今天定下一些個人目標，希望來年可以向著目標前進，稚嫩的森伯以前都有，但到新一年漸漸都忘記了，所以今年都唔會定咩大目標!!可能人漸漸老邁，反而每日可以充充實實已經係最大的願望!!

入冬時節天朗氣清，晚上更顯得很舒服，在橋上看看夜景都相當寫意!!!

初時以為個假期都幾長，但放下放下又差唔多放完，今個假期都不外乎食、食、食，都冇咩所謂啦!!新一年對於森伯伯的森願都不外乎老當益壯，身心康泰，更望早日脫貧，不過脫左咁多年都脫唔到~~~~~XXXD

所以今年都唔求什麼，唔尋什麼...總之樂在其中就好了!!!!

年尾流流講森事...

霎一霎眼又到年尾，一年真係好快就過去，本來都唔想動手去打日誌，不過睇睇日子，都要講講年尾的回顧，始終到這個時候返工都自在很多，好多人都會清假期，當然森老伯都唔例外!!明天開始有假放，所以趁今日都應該打番篇日誌!!

今年對我來講都係營營役役，又工作又進修，都尚算充實，起碼都唔駛成pat爛泥咁，哈哈哈!!今年不能不提就是有關社會事件，對森伯呢類長者來講，可謂一等良民，過境都特別安心，唔搞政治又唔會搞破壞，反而畀政治搞番轉頭...哈哈哈，我諗呢段時間好多人都有同感...

國與國之間的鬥爭，做人民始終都會首當其衝，影響最大，無論平民百姓又好，做爛頭卒又好，所謂萬事自有定數，再緊張再激動，都只不過是浮生空自忙!!!即是話做人輕鬆面對一切，不用杞人憂天地過活~~這一刻有些人與其，要千方百計去找政府錯處來咒罵一餐，倒不如化咒罵為祝福，幫大家港人做點實事吧...經此一役後，反而個人的民族意識強咗!!!都係好事嚟嘅!!!

森伯忽然好有藝術家脾氣，玩即興，這篇是即時寫...放假前都喜歡逛一逛超市，執下有冇什麼想吃的東西，現在都凍了，明日唔需要早起可以暖在被窩中，又食又訓仿如一條大懶蛇，準備冬眠...森伯老人家梗係想喇!!!!!

在此祝大家Merry Christmas and Happy New Year...

森邊事...

見    識~~

近來每日的生活都可以用營營役役來形容，總是有很多事要做或者等著要去做，相信大家都知森伯老人家唔可以勞累太多，所以適當時候都要好好抖下...
常常聽人講生活太過緊張，就會忽略很多身邊事，為了不被忙碌所蔽，都要留一留意身邊的事與物...

早前同大家講過曼德拉效應，唔知大家又有冇真係去留意呢個效應有冇做成什麼改變呢...所以每每經過錶舖都會去睇睇羅馬數字錶，發覺真係好奇怪，所有羅馬數字錶的四字都改變了...
以前好記得羅馬數字4係IV，但現在就變成IIII，有日經過錶舖刻意去睇睇，真係第一次見識~~~




閉    關~~

如無咩特別情況，讀呢個課程都接近尾聲，正所謂臨別依依﹝忽然覺得平時冇乜文化兼且粗人一個的森伯，識得用呢個四字詞，文化水平又提升少少XXD﹞，所以有晚放學後都四周睇睇，呢排涼涼地在晚上就更加舒服，尖東的晚上繁華又有迷人燈飾，記得在上年聖誕都有走到這裡拍過幅燈飾相，因為平時甚少晚上去到尖沙咀區，不過這一段時間就時時去，夜景很美！

現在應該係埋尾的階段，亦是應該全森全意做埋份final project的時候，唯有這個令月唔出Blog，不過有閒情時亦會覆留言跟拜訪各位留言者！

窗外有藍天…

現在正值秋季，氣溫也沒有暑熱天的酷熱，氣候也漸漸清涼乾爽，一向香港的氣候都比較潮濕偏熱，所以秋季的來臨也覺得特別舒服，唔冷亦唔熱，通常美好的時節只維持一陣子，所以真係要好好享受這個片刻。

當人大了或者老了，就會漸漸明白人生不如意事常八九…講得起呢句說話十居其九都係年事已高的長者！當然森伯是也~~都費事扮後生喇~~哈哈哈！！好多時人會把問題困難都放到最大最大，反而忽略了身邊的好事好物…所以平時都唔應該太過自怨自艾，內裡總有力量可以給自己一個支持！！

這一日忽然望上天空一片藍，再加上綠綠的山坡，十分舒服，這一刻無論怎樣也好，都要駐足看看窗外的景致...

夠薄...夠貼身...夠靭...仲要防水...

無論是真正受傷，一或情緒的傷害，都總想可以快捷的得到治療...所以現在有些產品名稱都會加多個什麼佛系或療癒之類...好似畀心靈得到一種精神上的安慰~~
所以話家陣的商家真識做生意，本來一疊老土的格言卡，只要改名為療癒卡就即刻有商機~~

只不過森伯今次講的就係真正的療傷，唔知大家平時出外會否帶定幾片膠布仔，萬一有咩損傷，都有塊膠布貼一貼!!我就睇下記唔記得啦，就未必成日袋定!!
早前收到些救傷包，輕輕便便就是方便人攜帶，但相信好多人都未必有危機意識，普通的出街邊會諗受傷這回事呢!!但如果帶定有什麼事都可以應急~~內裡只是基本治療用品，消毒紙，膠布，膠紙，紗布綿花等~~

這些救急袋只是贈禮，收到就無咩所謂，要自己買就未必會，因為內裡的物品有期限，過期就要更換，都幾麻煩，反而袋幾片膠布仲方便得多...

講開膠布，近來發覺用開的膠布，有個很好的改良，本身都已經唔錯，改良後仲夠晒薄、而且都幾貼皮膚、夠靭之餘仲可以防水，貼了洗手沖涼都無問題~~聽落唔好以為森伯賣乜乜廣告，只係講膠布咋，雖然有咁多好處但價錢都唔貴，真係幾好用~~因為有買過其他，但係差得多而且又貴，唔划算!!!

平時森伯都好少會無端端整損，但來的秋冬時節有可能指頭爆拆，所以買定看門口都幾有用!!

很匪夷所思呀...

最近有個熱門話題，而呢個話題聽落都十分匪夷所思，用匪夷所思來形容都冇錯...
在生活裡，間中都會遇到一些奇異事，通常可能只是自己遇到或一班人或一個社區的人，但今次這件事卻是關乎全世界的人，就是最近的新興話題——孟德拉效應!!

唔知大家有冇聽過?!!...而呢個理論最為人知就係關乎孟德拉，孟德拉係南非總統，據講絕大多數的人認為孟德拉死於八十年代，所有人的記憶就是如此，但原來孟德拉的死確實是在2013年...你可能會話是一群人記錯，但奇怪的是記錯了的人很多...而森伯對此的印象真係好矇糊~~~~

其實奇異的孟德拉效應例子仲有好多好多，都唔想講得太遠，不如講些近在咫尺的本地例子：

最經典就係蔡楓華有句名話：剎那的光輝唔等如永恆，呢句說話相信很多香港人都會記得，但係孟德拉效應的出現，變了：一時的光輝唔等如永恆~~~就算你在youtube搵番所有蔡楓華的呢段說話都係變了一時的光輝唔等如永恆~~~呢句森伯唔可以考究，因為當時冇咩深印象，只係靠現在網上的例子來講!!

據講仲有李小龍的經典對白：我地唔係東亞病夫，相信好多人都會記得咁講，但孟德拉效應之下，變了：我地唔係病夫，聽起來有點怪怪~~不過呢D太耐我更加無咩深入考究!!

而最最最不可思議就係......羅馬數字的4字，記得寫法應該係IV，呢個係百份百肯定，但現在係IIII...咁離奇?!!!據講尖沙咀鐘樓已經見到IIII代替IV~~~~你可以看看家中的羅馬數字鐘錶有否改變?!森伯記得都好似有隻羅馬字錶，返去睇睇先...
( 註：相片是來自網上，再合成一起 )

如果仲唔明咩叫孟德拉效應，我就再講得簡單一D，森伯常自稱森伯伯，所有Blog友都已經知道，但有日忽然見到內文中的森伯伯變森叔叔，唔好以為森伯想扮後生D多手改了，可能係孟德拉效應都唔奇~~~~

如果想知得詳細一點可以在youtube搵搵有關資料，尤其某個教會的視頻，有人認為是神秘力量改變?!平衡時空產生出來的效果?!真係百思不得其解喎!!!

阿伯"味"力...

正所謂：江山易改，本性難移...

森伯一經過藥房都會來一個Window Shopping，可能總有些東西會用得著，尤其藥油類，始終年紀大隨時都可能呢度痛，果度痛，都想搵番一兩支藥油旁吓身...唔知點解，坊間有很多西藥膏都唔係太適合我，因為唔覺得太有效用，用慣藥油又會習慣，不過都要揀一些夾自己先好!!!

其實藥油除左有冇實質效用之外，仲要計算佢唔好太大味，不過出街一定唔會用喇！費事畀人話呢個阿伯一陣藥油除~~

所以無論去什麼藥房都會睇下有冇咩藥油可以試試，外旁人聽落都幾誇張，但森伯真係會留意，當然啦好多藥油都估佢有冬青成份，呢類就唔會買，不過講到最後好多時都係得個睇字，真正拎到上手買又未必買，因為一唔合用就要掉，都幾浪費~~所以用開的知道可靠才會買!!!

藥油好多種，幾古怪都有，蜈蚣蠍子的藥油都有得賣，不過敢唔敢用又係另一回事~~~

森活的點點與滴滴...

相信最全城熱話係昨日的大事件，見面時大家都會問下你昨日有冇出街...早一日已經聽有人講安排定些節目安在家中消遣渡過，我都認為如非必要都唔會出街，除非買食糧，早上見人紛紛分享手機裡的資訊圖片，搞到人心惶惶，又發覺常常搞的地方，除了港鐵之外，仲有某些地區，感覺住那些區分的的街坊都幾滋擾同驚慌！
森伯伯算好彩，常搞亂的地方唔關事，而且好日又唔需要坐港鐵，否則真係喊得一句又一句~~



講起食糧，相信麵包都係其中一樣，對香港人來說麵包雖然不是主餐，但早餐或下午茶餐都會常吃，近來又話方包含鹽又高，所以都好少買鹹包，都盡量試下附近包店的包是否過鹹...試好就會常幫襯，日日有機會食都唔想有問題，買方包就好少買白方包，多數買麥方包，價錢都係差唔多，而且喜歡有麥味唔似白麵包咁寡口，麥方包都食了很多年~~
又唔知大家有冇揀食白方包定麥方包哩個習慣呢?!

現在已經算入秋，有時天氣還很熱，通常呢種轉天氣的時候，自己個人點都會病病地，先係喉嚨痛，跟住就有幾聲咳加埋鼻水，當然希望這些只是小毛病，正常應該過幾日情況會好少少，亦有可能會搞半個月都唔奇，不過最近有親友送來桔仔茶，亦有人親自試過咳時飲唔錯，相信若果再有大咳都會試試，呢種桔仔茶外型幾得意，一個乾了的桔仔裡面放有茶葉，要沖泡的時候一同放在熱水裡，跟平時泡茶差唔多，當一樣茶療幾好...

搓、圓、撳、扁...

都係繼續講下功課，有不斷的功課就足以證明森伯有幾勤力，老人家雖然一把年紀，在有森無力的景況下都要去完成每份功課~~~講到功課有些可能幾奄悶下，但有些可能都幾有趣味性，不過最緊要係有冇靈感到而已！

這一次要做的是一份立體模型，其實作品內容、材料都好隨意，只要你創作出立體和有意思就可以...純粹諗下都會認為幾有挑戰性，不過要諗到個主題才能諗下一步做什麼~~佢主題有兩大個，可以擇其一，一係做個代表自己的作品，一係就做與社會時事有關...

當諗到個主題後，要買材料：我諗用陶土最好，比較易做，唔做唔知時下的陶土都幾方便，我當然買免燒制啦！今云真係搓圓撳扁乜都齊，做出來都幾滿意~~

又畀大家估下，純看這些材料，你認為森伯會做咩主題呢?!!

如果懶得諗都無咩所謂，可能認為森伯的idea實在太低B...哈哈哈

............................................................................................................

附    註：
其實作品主題與走飲管的環保問題有關...這條小魚兒不是這份作品，只是剩餘物資做的，不過作品都同海洋生物有關~~~

三點透視~~~~

讀下讀下唔經唔覺已經一年有多，今次要學的就是有關透視的課堂，聽落去都好似好悶，但剛好相反，上堂最主要係講解畫透視圖，所以返學就只是畫畫畫，視乎徒手畫定電腦畫…一向對於立體畫我真係冇咩觸角，畫平面東西就可以，但係畫立體的畫都冇咩把握，今個單元只好硬住頭皮去完成！相信壓力大都來自要交的習作~~

課堂上講解有關的立體透視的概念，唔同形狀所指示用多少點就能有透視的立體感，現在的上堂都唔旨意大家抄低Note，認為有用的就用手機影低，就算影唔切都有老師的pdf檔做後備~~森伯份人老土又守舊而重點又冇記性，點都要用筆用紙寫低才會加深印象！

個名就叫透視學，初時以為幾深奧，但認識後又唔覺...最主要講解平時的畫像可以分幾多點透視而已，一點、兩點都有透視，不過最多接觸係三點透視，因為好多畫建築物的畫像都會用上三點透視法，呢排趕完一份功課又來第二份，所以萬分之累，上到車都不時釣下魚﹝恰眼訓)..........

在打呢篇Blog的時候正好是三點，真係好想三點鐘透視一下，冇人見到靜雞雞去訓番一陣晏覺呀~~~~

人月倆圓賀中秋~~

自古有云：一年容易又中秋，感覺還有些時間才到，誰不知今個週末就已經來到，都係果句：忙裡不知時日過~~~慨嘆時間過得實在太快...

都沒有閒情四周去視察一下今年的中秋氣氛，可能又因為近排的社會問題，所以就唔多覺有乜中秋佈置，商戶們連幾個燈籠仔都慳番~~

正所謂，節日在森中幾時都有好時節...中秋就會即時諗到食月餅，傳統月餅都有得食，森老伯因為年紀老邁都唔敢食太甜，所以買些簡單的有五仁餡，就可以當為五仁小月餅，咁當然唔少得一年一度的豬仔餅，可以話係"賣飛佛"果類~~呢種餅平時唔會有，屬於中秋限定...

一見到都會立即買，而且充滿懷舊味道~但有趣的是，睇來睇去都唔知呢舊餅係咩造型，當佢以經典古籍山海經為藍本，製作出不同的奇珍異物，十令蚊就買到一個字"抵"!!!!哈哈哈

祝大家人月倆圓，過一個有歡樂的中秋佳節!!

芝森饅頭...

既然有博友話想我講下做饅頭，冇問題都可以講下...其實森伯整饅頭不是太長時間，當然仲要慢慢摸索，不過當中的過程又會幾有趣...次次蒸完出來的模樣都一樣就可算是成功!!每個人的整法都唔同，認為OK就可以了，一路整，一路鑽研，漸漸做到一條森伯的秘方出來~~哈哈

其實買都相當方便，不過如果想整些養生饅頭，就要自己動手，起碼都真材實料，絕無加料﹝添加劑﹞太多工序又咪搞森伯，做饅頭其實都唔太複雜，主要材料：中筋麵粉、酵母粉、少少水，糖，油就可以~~

其實一路以來中國人的飲食文化都著重簡約養生，饅頭就完全乎合這個飲食原則~~
我整饅頭真係要用些時間才能製作，搓完粉糰仲要等佢發酵，發酵一次或兩次也可以~~

見雪櫃仲有一片芝士剩了，就做些芝士饅頭，好簡單將片芝士捲起，切一粒粒當餡料，包在饅頭裡就可以，整好了便拿去蒸，蒸約廿分鐘就有得食!!脹卜卜，圓碌碌...賣相都算OK靚仔啦~~

平時好少用芝士配饅頭食，不過味道相當唔錯~~~

其實仲可以整多些款式的饅頭，不過要完全熟手才好嘗試!!!

成語典故...

又到森伯講故仔的時候，有興趣不妨擔張凳仔來聽聽~~

話說：秦朝有位丞相--趙高，一直想篡奪皇位，但他不知朝中有幾多大臣是聽從他，有幾多大臣是背叛他...於是他想出一個辦法，去試探他們~~

召人領來一隻梅花鹿，就對秦二世(年少皇帝)說：陛下，我獻給您一匹好馬。
秦二世看了便笑：丞相搞錯了，這怎會是馬呢，明是一頭鹿...
趙高：請陛下看清楚，這的確是一匹千里馬，說完又指著眾大臣講，如果陛下不信我的話，可以問問眾位大臣...
眾大臣當堂搞不清，只見趙高臉上露出陰險的笑容，眾大臣從趙高的眼神已看出他的用意
一些膽小卻正義的大臣只好低著頭
一些正直大臣直言說出牠是一頭鹿
一些擁護趙高的大臣就說是千里馬
這時，趙高就分辨清楚，哪些大臣是順從他，哪些大臣是需要對付的...

近來這句--指鹿為馬--的成語不其然時時都會唸起~~當只得一面聲音不停在身邊響起時，你又會否憑著良知說出另一面聲音呢？
你會是屬於膽小卻正義的沉默大臣，還是一個敢說出自己看到實況的大臣，還是應聲付和跟著大隊走的大臣呢??

每次見到大遊行的時候，都會有記者訪問一些遊行人士，他們總會有人講，我們遊行不是為我們而為我們的下一代.........聽起來真是有點遙遠，可是真的這麼遠，那麼近...日前被拘捕的暴動人士當中就有個得十二歲的小暴徒了!!!唉~~~

塞一塞…

可能返工的路程唔需要兜太多路，所以都尚算暢順，但係有時都會遇上塞車...

記得好耐以前返工每日都要經過龍翔道，很多時都會碰到大塞車，朝早遇到就好容易遲大到~~

可能咁多年來路段多了或者新的路有改善，所以塞車的情況比以前少很多...

這一日又遇到塞車，平時行開的城隧通常都係走馬看花，都冇咩風景可看，但今日又可以停下來，睇一睇風景原來唔錯~~

塞車期間，無無聊聊可以用手機影下相，其實塞車時都冇咩可以做，現在有手機就最好可以上網，睇下睇下時間又會快過少少...嗰日都要塞成個鐘……

吽住在車都係其次，反而最怕的不是遲到，而是人有三急~~~~

拜會大公司...

雖然個人都唔會好崇尚牌子，之不過有牌子的東西又較有質素，就算要換零件都可以有地方可以更換~~

話說森伯伯都幾廿歲，但係D鬚都幾快長出，上晝剃完，到下晝又可以長出，至弊就係未去到濃密地步呢，所以電鬚刨都不能少...

對於小麻甩的森伯來講，鬚刨基本上日日都需要，除左假期...所以用得多刀網都快玩完，當然有得換一定換過，唔通成個鬚刨丟掉咩...

睇下個地址都唔算山長水遠，而且極近返學個地點~~
真係好少走到呢間公司的寫字樓，當郷里森參觀下囉...

一邊係辦公室，一邊係陳列室兼銷售部

基本上佢品牌的電器都可以有得買，我諗多數係小型家電，一場來到都要睇下D電鬚刨...

平時都可以上來買東西，不過除左怪怪地之外，而價錢都唔覺得比出面平~~
呢隻牌子一向感覺耐用，但近來就覺得D貨品越來越唔襟...塊刀網再爛可能換過個鬚刨~~

人老左真係又粗又鞋...D鬚，否則都唔駛次次都係爛鬚刨網，唉~~~~

唔係葱油餅...應該係葱油包~~~

可能自己係老人家的關係，有時食下粥都係幾清腸胃，尤其夏季時候食碗白粥都幾唔錯...好多時食粥最好就簡簡單單買些包點、腸粉一齊食，附近有包點舖要買個包都唔難，但現世代乜食材都話有問題，所以自己整就最好不過...

最近不時都會整饅頭，整整下都有些少做包點的經驗，所以今趟都想整番件葱油餅佐粥...耐不耐食些少辛味食材幾好，例如薑、葱、蒜、辣椒等，其實辛辣料中我係比較可以食葱，多吃葱可以預防感冒傷風之類...

正常整葱油餅應該用煎的方式整，唔需要落酵母，搓完麵團後加葱花便可，將它壓成餅狀煎就可以~~但可能近排整得饅頭多，乜都整到好似個大包狀，而且蒸熟冇咁熱氣，大家都知森伯平時幾燥火架啦，所以蒸熟就可以...出來的樣子好似大包，切開有四件幾襟飽又0岩味道，用來佐粥又幾適合，日後有時間都會整！

不過用真材實料整，難免成口葱味，不過對我來講好過蒜味，如果怕呢類味就要注意！！

長又長…

今早又聽到世界新聞講，香港人又可以繼續保持世界之冠，皆因港人夠晒長...壽！好似話男的平均有82歲，女的就平均有87歲，如果有錯就請指正...

又完全估唔到香港人會跟長壽有關，香港住的地方狹窄，有時想做個伸展運動都唔易，而且生活緊張，時時都感到忙來忙去，講到食，都有很多人有三高問題，而且空氣都幾污濁下...所以話都好難想像香港人係最長壽的一群~~~

人一老了，最現實的問題就係要用幾多錢用來養老，相信呢個都係好多人的問題，有時為免將來要駛錢，而家真係要為未來籌劃一下，我又唔知大家有冇咩安排，總之森伯慳定個錢，又注意一下養生，而我覺得保持返個輕鬆心態好重要，雖然大家都知森伯幾廿歲，但都會有份稚嫩的純真...幼稚的思想…XXXXD

都總算為到年長階段而開始準備定，有時見到一些與長者有關的廣告，都會不其然想抄抵個電話問定先...唉~~~~

出門招風雨…

踏入大暑時節，都應該是雨季的來臨，本身對雨季又不會抗拒，反而幾喜歡…但是當外出時遇到雨天又會有另一番感受，不過近排都幾有趣，連續好幾個星期的上課日也是下大雨，而且天聞台報導仲有雷雨，心諗一落雨都會幾濕滯，隨時變落湯阿伯都唔出奇，唯有帶備定雨具，輕便雨衣總比把遮慳位，收了都唔覺啦…而有趣的是，出門前已見大雨，但一出到門後雨都停了，最多都係雨粉粉，起碼都自在點吧~~

一落雨交通一定會塞塞地，所以都會預早少少出門 ~~

講開返工返學，呢一兩日真係要講講，近日的白衫幫事件，見到、聽到都人人自危…昨日就聽人講住某D地區的職員可以早放工，有D商舖亦一早落閘，本身就唔太驚，但環境側跟的人們就搞到你都好似要驚埋一份，而且諗都冇諗過唔駛返學…事原有D同學收到誤傳訊息，搞到個個同學仔都唔想出夜街，紛紛都話唔上堂，森諗唔係呀…尖東同那些可疑有事發生的地區差成一大截…因為自己已作好準備返學，而校方有職員打來問我會上課嗎?查問之下似是得我一個返，不過導師亦很負責，就算得一個學生佢都會去教~~不過冇咩同學上堂時間會縮短，森諗返去上少少時間堂都冇咩作為，最終都要屈服唔返…真係估唔到咁都有假放…最後總結就係…成班大懶蟲，除左森伯之外!!!!不過我都明白人身安全都好重要!!!

近日的新聞其實對森伯的感受或者影響唔太大，只因我唔會全心放上去，的確仲有很多自己事要等住做，總相信風雨過後便會有平靜…

速食自家飯…

只要有緊急的時候，就會迫使自己想出很多點子出來，所以我會深相有危就有機…

話說有個下午本來會外出食飯，但計算總會有偏差，唔緊要森伯食野可以好求其，隨便食飽就冇問題，就算平時有要事外出，食幾片麵包都可以當一餐，一來夠晒慳家，二來更加慳時間，快快趣趣就有得食，加上森伯伯老人家在煮方面又懶惰呢…講得好聽就話簡約飲食有助養生，兼且老年生癪又要襟飽，所以太花巧的烹調森伯就應該唔會整，簡簡單單又飽飽先切合森伯個原則...

因為又沒有預備送菜，見到家裡有什麼就煮來吃，見有蛋就整蛋啦，本來蛋都有幾多食法，簡單整都好好味又能送飯，但時候都晏，速食好過！兩樣一齊蒸咁又食得…本應加兩條菜比較好，冇菜就唯有加些蒽花代替，蒸蛋的時候加了少少鹽，又幾好味喎…可能當時肚仔餓……

本來住家飯唔應該速食，係應該慢慢品嘗，不過凡事總有例外…唔知各位又有冇一些自家速食的等閒事講來聽聽咁呢?!!...

越邪惡；越吸引...

呢排天氣真係幾熱，幸好較早前買多一把風扇在房間降降暑，否則真係唔知點頂...炎炎夏日最好有些消暑的應季食品就更加好，最大路的消暑品都離唔開雪糕、雪條之類...其實太過霜凍的食物都一律唔可以食太多，不過天時暑熱就冇咩所謂，始終逃唔過雪糕的魔掌，以前可能會吃的較多少少，但人越年紀大就要適可而止，始終雪糕又甜又凍...若然將雪糕當成奬賞食，偶爾間食就會變得大條道理...

這個牌子的雪糕見得多，都未買過來試試，要食就要揀未食過的新口味，佢稱之為芝士蛋糕味...真係唔知乜味?!!只知幾甜，至於所謂的芝士蛋糕味就唔覺...都冇咩所謂就算極普通的雲呢拿雪糕都已經森足...

其實夏日的消暑品何其多，水果都有不少，人就係認為越邪惡﹝無益﹞就越吸引﹝想食﹞，同越快樂；越墮落Feel差唔多...哈哈哈！！所以呢個悶熱的夏季都係要豁出去...

撐...原來都要好大勇氣~~

近排的新聞真是聽到有點膩，打開傳媒、報紙統統都是講同一新聞，茶餘飯後都是講同一話題...或者現時香港就只有這件事情最令全城熱烘~~

本應我今天的博文不是寫這個題目，已經寫好了，不過這段期間，都有些有感而發的感想！首先我對事件是保持中立態度，最初要抗議的事情都總算叫做有個交代，但衍生出來的枝節卻鬧得熱熱烈烈...事情不想再多加發表，只見近日有兩位資深歌手去支持出席一個聚會，就被人鬧得狠狠，有人還跟森伯講，報導話有年青人拿起黑膠唱片毀掉，森諗聽得兩位資深歌手而且有黑膠唱片，相信都算資深樂迷，為什麼行為那麼稚嫩...

感覺有時做名人要走出來去支持一樣事情其實都不容易，就好似早幾年前的一班歌手去撐或支持一場政治事件...某黃歌手、何歌手、謝歌手...統統都已經幕前沒有他們的蹤影，連歌唱事業都差不多要放棄，感到很可惜...

更有早前的藝人偷食事件，一出事，所有曾經跟女事主好朋友的一律劃清界線，每個被訪的都說跟女事主不熟或者完全不太認識，怕被牽連到自己身上，最後只有女事主的家人出來撐她，說點好說話...

或者這個社會你去撐一些人與事可不容易，你去撐的是大眾或者會比較好一點，若然撐的是小眾，更加遭人唾罵...每個人能走出來都可能經已深思熟慮，因為大家都不是小朋友，總會權衡過利與弊，若果大家要自由的話，更加要包容不同的聲音，因為每個人都有權發表自己的思想意見，亦同時也要專重他人的感受...

表情符號Apps...

唔知大家對下載Apps(手機應用程式)熱唔熱衷?!其實用得到的Apps真的唔太多，我又甚少下載手遊程式，可能最多都係有實用性的Apps...

一直以來都好想畫一些屬於個人的表情符號，但要畫得好都要有心機同時間...唔想自己花心思去諗去畫，倒不如睇睇有咩Apps可以代勞。

只要輸入自己一張相，程式就會自動幫你的相片化為漫畫，森伯都要揀番張相輸入程式裡，出到來的漫畫表情就是這模樣...我覺得表情插畫大致上，面形都差不多，但每個人面形都一定有唔同，所以似樣都可能係巧合...

幅圖像話晒都係由森伯張肖像顯生出來，睇睇下都有幾分似，至少森伯一定冇幅圖咁後生，幅圖好似十八廿二咁款...以後可以當作個人的表情符號用，但係D人又知唔知果個就係森伯呢?!!

講起就想食...

其實人生又有幾多樣食的東西，只要一提起它你就會想食呢？對於森伯來講認真喜歡的又不會太多，相信包點都算是其中一樣，以前記得荃灣有間包點先生會常常幫襯他們買饅頭，糕點等...不過近年來屋企附近都開了間賣中式包點的舖頭，所以間中都會買些來送粥，尤其是周末時候，天時熱熱地就最好不過，有碗清清地的粥加個蒸包，簡單得來又夠飽肚...

除了包點之外，佢都有賣煎餃，其實所講的煎餃即是鍋貼，我覺得要吃鍋貼，除非去上海菜館，否則都唔容易找到，這舖的包點有這麼多的選擇，而且味道唔錯，所以都幾多人幫襯...

對於好多人來講，無論是湯餃或煎餃相信個個都鍾意，尤其肚仔餓的時候...

冇回應事件...

事件一
今周社會最大件事相信都莫過於有關反修例大遊行及抗議事件，一開新聞都大部份環繞呢件事，個個都在討論，森伯就算幾唔關心政治議題都好，始終都係身處的地方，亦都會有感而發，當見到成千上萬的人上街遊行，個個都係同一個目的，但政府班首長們卻冇露面，冇回應，試問港人又可以做些什麼呢?!又可以對政府有什麼希望呢?!!...


事件二
呢排真係幾黑仔，唔係因為太熱曬到一身古銅色，係正趕著一份功課，而且仲要做到七七八八等埋尾的時候，部電腦不時彈出冇回應...
森知都有少少不妙，殊不知今早部電腦直情冇反應，而裡面的檔案未有及時搵另外的裝置儲存，真係瓜得嘞...因為距離要交的日期越來越迫近，所以作最壞打算都係重新做過，而且用部冇乜軟件的電腦做，未知做唔做到呀!!所以而家唔講咁多，開工喇......

暫時都要閉關做好去...

塑膠彩…

其實時代進步，畫畫的模式都可能有所改變，傳統中畫畫一定要有畫筆、畫紙、顏色…仲記得小時候美術堂需要有盒粉彩，通常用粉彩畫畫一般都比較污糟，尤其是小朋友難控制，通常都會搞到張畫紙邋邋遢遢…到人大了才知粉彩都有分油粉彩同乾粉彩，油粉彩就是小朋友美術堂畫畫那種，至於乾粉彩就是較常見街頭畫家幫人畫肖像那種，兩者我都用過…不過今時今日用電腦上色，都已經慣了…

因為今次的進修學習，讓我接觸到一樣陌生的顏料，就是塑膠彩，它跟廣告彩，水彩的性質差唔多，但畫像的顏色保存得較穩定…

呢幅就是畫畫單元的功課，畫一片紅葉，深色的葉襯托灰色的地，葉子就會顯得突出，跟導師給我們參考的畫作仲差一截，始終不是對實物來畫，而且亦是第一次用塑膠彩畫畫…

水彩跟廣告彩我們見得多，而塑膠彩的性質也是差不多，但比較大支而且比較貴，買的時候不是整盒買的，需要的顏色才買，因為主要是可以溝顏色來用…

要熟悉一種顏色的運用，並不是一時三刻可以做到，需要時間練習鑽研，可惜現代人講求效率快捷，用軟件上色好易而且錯了可以修改，最重要出來效果亦不會遜色，所以用在商業上多會用電腦製作，傳統的顏料多用以個人興趣，或是畫一些藝術畫作、藝術創作等…