誰說…時間片刻變陳舊～

耐唔耐都要執拾一下個公司位，唔想積存太多唔等駛的東西，個位企理工作時都舒服一點…執下執下又畀我發現，原來上年有個坐檯小曆未有用過，差唔多原封不動某開過，雖然時間已經過去，但都貪得意砌一砌…

 就算用心機去砌都冇用，時間都過去，呢一刻才知道咩叫Timing好緊要，錯過了就錯過了～～最後個月曆仔當然去堆填喇……今年就冇個月曆仔要砌，因為有個坐檯曆睇…唔知點解就算自己唔買月曆，都自自然然有個月曆出現在我檯頭喎，所以年中都慳唔少…

少少印花...

現在買東西的時候，好多時都會搭過小小的印花，有時都會有幾個…尤其超市最興，我對這些玩意真係某乜興趣，可能要換領的東西一點都唔吸引～但我知都有不少捧場客都會儲印花去換東西…佢地仲幾神心…

我都係覺得小時候的換禮品形式比較好，無論買什麼，多數汽水好興，一揭個蓋腌，有奬就有奬，冇獎就算，起碼唔需要逐個儲…我諗都係商家出的招數，想換到心頭好就要陸續幫襯…

對森伯來講都未儲過這類印花，覺得得意就會當貼紙周圍貼…哈哈

齋口唔齋森之作…

雖然今年是豬年，過年時人人都講句豬年平安，豬年順暢…但事實今年的豬仔就相當可悲，只是有隻豬發現了豬瘟，要淪落到幾千隻豬都遭到宰殺消滅，現在才明白什麼叫豬九族（誅九族）…或者這些豬本身都難逃被宰一劫，但起碼都為人類填飽個肚，也算有功德…但這些豬未到人個肚，已經無謂犧牲了，現在做牲口生意都冇咩人道可言…

平時唔講就當冇事，一旦發現有問題就樣樣都唔食得…我諗港人都慣晒…所以森伯平時一日裡起碼有一餐是全素，即使長時間冇肉食都唔會口淡淡，其實口味都係講習慣，慣了後就會覺得冇問題…

 食素的人相信好多都會揀豆製品作為餸菜，豆製品的花樣都幾多，隨口講都可以講好幾樣，尤其呢種佢名為素燒鵝，只要加少少調味，就算唔識煮清蒸都好好味！因為佢本身有五香味，也有簡單的鹽糖調味，拆開個包裝袋後用熱水灼一灼，就可以蒸煮來食，相當方便…呢個森伯推介~~

唔同大家講咁多，老人家唔餓得，快些攞返碟（素）鵝去送飯先…

畀部相機食先…

既然學習有關拍攝的東西，好自然份習作也跟攝影有關，今趟個題目就是講解有關常見的拍攝對象，當中包括了形狀，在日常中有關形狀的東西真的很多，本應要影得好，影得靚都唔難，但是亦有難度…至於個難度就係要高仿網絡媒體的相片，細節就唔詳談，之後我選了跟形狀有莫大關係的三角朱古力…因為容易搵，容易買，容易影…

一向都好少買朱古力食，都有個疑問，呢隻朱古力仲存唔存在？！去到超市糖果嗰part，要搵三角朱古力原來都好易，而且仲有好幾種口味揀，記得好耐以前得一種，所以有時自己唔食就以為唔存在，其實就一直存在只係平時自己完全冇察覺…呢隻三角嘜原來唔貴，鍾意食朱古力的人應該覺得幾抵食…

買完之後就等一個適當的時候就映…映…映…其實影朱古力跟雪糕差唔多，就係要保持個靚靚形狀唔容易，好易溶…影食物除了要保持個完好形狀之外，仲要抵得住為食，因為朱古力一溶就想即刻擺落口，一路影一路食…發覺森伯其實對朱古力都係麻麻地，因為食了好幾粒後，真係好難再食落去，實在都幾甜，人老咗平時都唔敢食太甜…諗諗下咁樣算唔算為藝術而犧牲呢?!!...梗係算啦！！哈哈哈

  

影完份高仿習作之後，都頗滿意，這幅不是高仿作品，只是用來放上blog，到最後當然整排食晒，到現在見到相片都覺得滯滯地…唔關朱古力事，本身係牛奶朱古力都係好好味，只係個人唔受得吃太多，補返少少飛先！！！

學攝影…

不經不覺讀呢個課程都有成年，或多或少都估唔到森伯仲可以頂得住，繼續捱讀下去…唔好以為用個「捱」字好誇張，但對森伯來講又確實貼切喎…因為初時有導師講過，都有課程讀到一半就走了一半學生，幸好暫時又未出現這樣情況…

呢個課程可算係大包圍，乜東東都會學下，就好似輪到家陣的攝影堂，感覺就幾好玩，始終時下的人喜歡拍攝，都想自己的相片拍出來有美感…

本身對影相都唔會太講究，總之拍出來的相不過不失都已經OK！經過學習一些校快門，校光圈的基本知識後，感覺影出來的相都係同平時差唔多XXD，可能正所謂工欲善其事，必先利其器…未上堂前都有考慮過要唔要買部新相機呢，咁當然要上堂後睇睇導師有冇呢個需要先…

其實要的相機都估到係比較專業少少，導師就推薦我們買相中那款，佢話呢個大牌子既好用，而且呢個型號經濟實惠，最緊要係個鏡頭可以換…本身有就唔需要花錢買過喇，查實簡單一句悉隨尊便就可以…

我平時用開普通的DC就算，只因一個原因，就係攜帶方便，而有部壞壞地，所以都係時候買部新DC，用來上堂又好，平時影相都可以…

最好就係學校有得借用，純粹練習一下點樣操作，如果要影些相就要帶備記憶卡，但只供課室裡使用…

夜靜麵包店…

對森伯來講，只要個人有事要趕，有事要做的時候，通常好少覺得肚餓…所以真係好少因為肚餓而掃街（橫掃街邊食檔），儘管香港到處都有得食…

雖然有時上堂已經入夜，但係通常會在之前食飽，因為總有時間可以提早食，若然有咩延遲阻滯都唔駛怕，而且落堂後都幾晏，唔會再去周圍食…

所以每到放學時候，好多食肆都半打烊，唯獨最直接可以買個包頂下肚，而且最方便啦，又唔需要點菜等整，即揀即買即食…而每次經過呢家包店都給我一種入夜的感覺，配合返自己的森情：咁又一日喇！！因為佢都差唔多要收舖，顧客都只有一兩個…或者對麵包都可算是情有獨鍾，雖則不可能時時當正餐，但都可以話係百吃不厭，早陣子課堂有個習作要我們構想一個品牌去設計，我第一時間諗到麵包店，當然喇，揀個自己喜歡的題材，做起來都容易得多… 

 

見了這間麵包店都好一段日子，暫時只幫襯過一次，因為要買定個包當第二日的午餐，lunch都要吔包，真係好有呢種貧苦學生feel…