雖然今年是豬年，過年時人人都講句豬年平安，豬年順暢…但事實今年的豬仔就相當可悲，只是有隻豬發現了豬瘟，要淪落到幾千隻豬都遭到宰殺消滅，現在才明白什麼叫豬九族（誅九族）…或者這些豬本身都難逃被宰一劫，但起碼都為人類填飽個肚，也算有功德…但這些豬未到人個肚，已經無謂犧牲了，現在做牲口生意都冇咩人道可言…
平時唔講就當冇事，一旦發現有問題就樣樣都唔食得…我諗港人都慣晒…所以森伯平時一日裡起碼有一餐是全素，即使長時間冇肉食都唔會口淡淡，其實口味都係講習慣，慣了後就會覺得冇問題…
食素的人相信好多都會揀豆製品作為餸菜，豆製品的花樣都幾多，隨口講都可以講好幾樣，尤其呢種佢名為素燒鵝，只要加少少調味，就算唔識煮清蒸都好好味！因為佢本身有五香味，也有簡單的鹽糖調味，拆開個包裝袋後用熱水灼一灼，就可以蒸煮來食，相當方便…呢個森伯推介~~
唔同大家講咁多，老人家唔餓得，快些攞返碟（素）鵝去送飯先…
轉食素後對身體有乜好變化？
回覆刪除我諗轉全素後，會感覺到當中的分別…
刪除但森伯唔係全素者…
有人會因屋企人病危而向天發誓，如果吉人天相就戒食牛肉。有人因身體健康周一茹素。 藝人為咗減肥保持苗條身材。
刪除驅使森伯1日1素嘅原因？？ 現在係過渡時期，遲啲會轉全素？
你咁正經問，唔答都唔得喇...邊有咁戲劇化，只係唔想食太多肉，身體少負擔希望少D三高問題，你都知森伯伯年事已高架啦...
刪除我諗又未必會轉全素，營食均衡最適當~~你都係一周一日green day,若然一周多兩日咁做就最好...
好彩森伯唔係痛風症或糖尿病，會冇啖好食，算不幸中嘅大幸。
刪除醫生話健康啲要喺吸收蛋白質中有部份係植物蛋白質，但全素又好易會缺乏B12，你呢個好嘅飲食習慣喎！醒目森。
平時，我會間唔中食吓豆腐或茄汁豆，喺輕斷食日食4個蛋同瓜果。
一周多兩日會點好？有冇科研數據支持？假正經咁追問。
預祝森伯端午節平安大吉！ 身體健康！無驚無險通過考試畢業鬆番晒！
刪除咩叫做不幸中大幸?!!...都唔係要有咩事才吃素，老人家都應該間中有幾餐茹素架啦…有時做事都唔需要走極端，食素就一點肉都唔掂，取之平衡好重要…
刪除其實你講的B12基本上有飲奶和食蛋都已經唔會缺失～
乜唔係你話一周只有一日食素，其餘時間大魚大肉…?!!...咁就C得喇!!!!
最好一周多幾日就會菜蔬的比例多點…
真係好多謝一爺的祝福，諗都冇諗過端陽佳節都有人送上祝福…我都祝你端午節快樂，食過龍舟粽行運一條龍……
窮人先至大魚大肉，有錢人係貴夾唔飽。
刪除我每日要食好多蔬果架，唔係第二日就黎唔到，鬱著好唔舒服，除咗朝朝食燕麥片外，日日都食5份菜5份果但求暢通。
森伯潛水幾日，驚遇到不測，咪送上祝福，等你早登新Blog
你邊間學校讀中文架?!...我都未聽過大魚大肉形容窮人~~唔記得你係番書仔ABC果類!!!
刪除日日暢通緊係好，只要平時多D食根莖類的蔬菜包你有得暢通...
寫網誌又唔係返工，唔通冇寫就要遞紙申請放假咩~~不過真心多謝一爺曉得擔心森伯遇不測，將來養老一定要住近一爺隔籬，有咩事都有人叩門問吓...XXD
以前大魚大肉係形容有錢佬，廿一世紀末，啲有錢佬都好醒目知道飲食健康才有命享(咁似森伯)，睇吓城哥、基哥、六叔、燊哥都係身形標準偏瘦，呢啲咪係人証。
刪除貴貴法國菜、日本菜都係量少又精緻，呢啲咪係物証。
喺我細個時都有讚美肥人有福氣，老婆要肥至夠面子充撐場面，瘦人係窮酸代表，依家肥等同醜，好多人窮一生精力去保持苗條。引証價值觀會因時而變。
再講，係啲窮人平時冇啖好食，有得大魚大肉就好喇！唔使好多錢就得啦！中產階級都追求食素，即係，呢個係窮人觀念啦！古代至二次大戰後，大多數人都係一窮二白，少數服從多數，喺呢段時間仲啱。
新時代都係打金融戰、貿易戰、科技戰，刀劍槍炮核子彈都放埋一二邊，得5G能得天下，高科技如人工智能、機械人、物聯網、無人機、量子電腦，冇人駕駛等才是武器，仲係倚天劍、屠龍刀獨覊天下咩！話自己最醒嘅美國人都發展唔到5G，反而佢哋覺得好蠢嘅中國人能領先世界，5G發展 拋離各國幾條街，仲要係最平，一直都霸權別國，攪到其它區域有戰亂影響經濟發展，見自己失勢咪要挫敗他國，阻攔阿二，喺爬過英國後就係蘇聯，90年代嘅日本，迫貨幣升值3倍，等同100%關稅，現在，2025中國， 加稅25%關稅， 不知鹿死誰手。
所以，人証物証俱在，時移世逆，大魚大肉等如富貴已經過時。森伯要與時並進，接受新見解。哈哈！乜都拗。激C人。
以前的社會冇咁富庶，街上瘦人居多，衣食飽足的肥人就給人印象是富裕，餐餐大魚大肉，以前的糖尿病都稱為富貴病啦…當社會繁榮，人的知識多了，知道有什麼食物對身體不好，尤其你講的有錢佬更想長生不老啦，條命咁矜貴，點可以亂吃東西，不過對三餐不繼的人來講，大魚大肉仍是生活ＯＫ的一群，只不過一爺平時少接觸貧困人士，低下階層的老百姓（森伯是其中之一），以為一般人都大魚大肉啫…（覺得一爺好有政府官員feel，不懂人間疾苦）
刪除你讀經濟出身？！…時時都認為這些數字跟森伯都唔認識，有時一堆經濟數字睇過就算…美國一向都係世界老大的地位，點可以失威，相信呢場貿易戰有排打…
森伯咪係(自稱)窮人囉！我成日都接觸你呢個貧困人士架。
刪除我讀工程。有傳我個年代香港大學面試會問你恒生指數幾多點，人唔係要朝向博學多才咩！世界經濟同自己息息相關，點解唔注意。
撩交打係美國本色，就算美加墨已達成貿易協議，啱啱都破壞協議，對墨西哥加徵5%稅，同時，取消印度最優惠待遇，原先因中美大戰而遷到呢2國都走唔甩，醒目都冇用，去非洲會安全啲，呢場大戰唔會停止，除非你肯簽不平等條約，唔發展高科技威脅美國，做人奴隸，叫你食屎屙飯咁唔合理都要照做。
森伯係窮得有骨氣嗰類~~字裡行間都feel得到…哈哈
刪除讀工程犀利喎！！同自己有關的事情就話會留意，跟自己無關就冇謂花精神記住…正所謂事不關己，己不勞心…
近排好興講：誰大誰惡誰正確，面對不公平事你都要啞忍，叫你做奴隸，何處食何處屙，你都要照做喇…鬼叫你係細（國家唔強大）咩~~唉…
講嘢有骨吓！feel到。
刪除我讀乜嘢你都話犀利架啦！冇feel誠意。
世界第二都唔強？自貶得好勁。
日本順從輸得勁慘，必然對抗。
希望唔好哽親一爺兄…XXD
刪除真係架~~讀工程會聯想同工程師，建築等有關…
你講墨西哥加徵5%稅嘛…仲講埋印度…這些國家要追過美國相信仲有一段時間~~
「其實口味都係講習慣，慣了後就會覺得冇問題…」同意呀！
回覆刪除但最重要營養均勻，我都減少吃肉啦。
唔單止飲食習慣，生活很多事都係講習慣，可能適應了慢慢就會成了自然...
刪除對，營養均衡好重要!!
你呢個齋素燒鵝用熱水灼一灼，就可以蒸煮來食，真係既簡單又方便喎！是在超市買的嗎？
回覆刪除但，我多數想食齋的時候去齋舖買現成即食的，
因為齋舖現成買的可以選擇多些款式，
不會自己煮…
呢包素鵝我都係在佳佳超市買，應該很多賣豆製品地方都可以搵到，因為佢本身有調味而且熟了，所以加熱來食相當方便...
刪除齋舖賣的齋,調味比較濃，間中會食...喜歡齋鹵味，講起又想食~~~哈哈哈
齋舖賣的齋
刪除糖精味精染色素
多扼糖多油多盬
極不健康
大夫所言正確，時時食街上的齋滷味就真係唔健康，偶一為之冇問題啦…
刪除我唔明素燒鵝個名點嚟。完全都唔似燒鵝.
回覆刪除你見森伯呢一堆聯想唔到似燒鵝，但有些人會用鹵水汁或生抽炆煮，外皮深了色就會好似燒鵝feel~~
刪除咁有冇食過零食果種齋燒鵝?XXD
回覆刪除食過，不過就唔係太啱我胃口…
刪除食素好呀，我一星期都有一日全素食﹗
回覆刪除能夠有日食素都唔錯, 順便清一清腸胃……
刪除齋嘅"面根"我都好鍾意食架。
回覆刪除有些麵筋都係幾好送飯，我也喜歡…
刪除出去叫齋滷味拼盤，總有有齋燒鵝。有些係齋叉燒，其實其他有些都唔係好知仲關唔關燒味事。
回覆刪除其實我諗每道菜都想有個名稱，如果改為肉食名會變得吸引，而且又使到一班唔慣食素的朋友，嘗試去食……
刪除這類齋燒鵝
回覆刪除簡簡單單放在飯面蒸
就可以了，
真是方便兼好食！
:P
謝謝異鄉人的到訪…
刪除係呀, 若然唔想太花巧, 就咁蒸來食就已經好好味…
今年是豬年，可是年頭話豬隻有問題，已經不開心; 想不到年中不久，搞到來個非州豬瘟大開殺戒! 我都好久沒有買豬肉了。
回覆刪除幸好都有其他的東西可吃。豆奶豆腐、疏菜生果都是很好吃。幸好水產類沒有孔雀石綠，否則只好食全素了。
現在所買的食物都係問題多多, 難免唔知食什麼才是有益…香港人好識得應變, 唔食豬就食雞肉, 牛肉…不過都係大前題, 人類好肉食真係太多, 豬隻密集式飼養都係會出事, 或者借這個時候平時大魚大肉的人去嘗試多點食素, 都唔係一個錯事…
刪除有機會秋葉姨姨介紹一吓平時有咩素食菜式…等森伯學吓嘢~~
等我向森少學吓素食就真 ! 我平時買定多些蔬菜生果，豆類食品，魚或肉之類放在雪櫃，喜歡吃什麼就煮什麼，不過是兩三度板斧吧了。都好耐無po啲食物相出來了。平時最常吃的是：鯇魚蒸豆腐、韭菜炒蛋、時蔬一碟、木瓜魚湯...我沒法吃全素。
刪除都有儲起一些食物的相片和普通資料，遲些都會貼出來看看的。
刪除其實養生之道就是越簡單的烹煮就為最好，豆類魚肉類既簡單又營養好…豆類也是我的常菜，不過魚類就比較少食，怕多骨及魚腥…就算不是全素，也想看看你平時菜餚，肯定好味得來又健康…
刪除是否全素，都好睇個人口味及需要…都唔一定全素等如健康～～