期待新一年2023

俗語有話：世事如棋局局新，過去一年，世界發生很多事都跟政局有關，都不用森伯再詳說，而所身處的香港，每日都有很多事不斷在變化，所以感覺時間過得很快……

但新一年開始，相信世界或者社會都未必可以平靜下來，唯有靜觀其變……

至於過去一年對森伯來講，時間怱怱，都未有時間回顧2022就已經到2023，如果要我為22年打個分數，若以十分為滿分，我畀6分，留番幾分畀自己可以有進步空間，相信每個人都期望有個滿意的新一年……

又到冬至2022

一年容易又聖誕，到聖誕又已經到一年的尾聲，每逢年尾都有很多節日，而是否盡興，可能就是看防疫的管制鬆或緊...

我覺得今年的氣溫相對往年比較冷，都可以增加不少節日氣氛...

可能呢幾年受著疫情關係，唔覺外邊有什麼大型的節日佈置，大型的佈置都要駛很多製作成本，如果沒有很多人消費都係得個桔，所以無論是佈置或買賣的商品，都很淡.....

在森博這裡都要搞少少節日氣氛，無論你這刻是懷著什麼心情看森博都好，都祝大家有個歡樂的冬至、愉快的聖誕、以及充滿期待的新一年......

森伯同大家去Shopping!!

其實久不久就會逛下國貨公司，因為我有些東西需要買，比起現今一式一樣的商場，反而逛國貨公司仲有新意...或者國貨公司都要與時並進，除了傳統古老的東西搵到，她也加插很多新款東西，話就話買國貨，其實都有很多其他地方的產品，都無不對，讓顧客可以多點不同的選擇!!!

今次去多見了這部分，就是買些傳統的護理產品，有些貨品外邊都可能搵唔到，檀香梘相信很多人都見過...

每次來都特定有幾個部份會看的，藝術品部和超市部，去這裡看藝術品都唔錯，若然睇中都可以買返屋企，藝術品類型甚多，就算較平宜的都很值得欣賞及選購!!!!那日是周六晚，藝術品部人流不算多，所以可以慢慢睇...

這盆花是用陶瓷做的，看看也十分美觀，當時沒有留意價目，回來看網站才知這盆陶瓷花要十萬元，而且呢盆花更大更多...森伯影吓就算，掂都唔會掂啦，陣間甩一兩粒花仔，點賠呀!!!!!!

逛吓睇吓時間過得特別快，其實都未睇完就要去樓下超市買東西，有機會下次再來睇睇藝術品!!

先知先覺...

一向對食用西藥都比較謹慎，如知道大多數的西藥，都含有化學元素...食落肚，當然要小心~~

至於醫生開的藥，有時吃了也會出問題....就好似好幾日前睇「東張」，有個個案是一名大年紀的婦人，本身已有三高問題又加上痛風，吃了醫生開的痛風藥後，皮膚發炎潰爛，還延至其他器官，當然最後都不治...聽來都相當嚇人，感覺上醫生為病人開的藥，一定最好的，完全唔會估有問題...到最終的結論是，醫生不明病人的基因反應而開錯藥.......

其實無論食什麼藥，都應該要留意身體有什麼變化，先知先覺，一有唔妥就要去查證截停服用...還有如果初期發現食錯藥，原來都可用一些食物來補救!!

森伯即時諗到有四種十分普通的食物，係可以解除「藥毒」...

分別是：

一. 紅菜頭

紅菜頭出名可以排肝毒，而肝臟又係人體化毒廠，所以用紅菜頭排毒幾唔錯~~用水搗碎來作生機飲食加埋蜂蜜最合宜!!!

二. 綠茶

一向以來送藥丸的水，都只能用白開水，不能用茶送藥丸，是關茶會解除藥的效力...聽講飲綠茶會較好!!!

三. 蜂蜜

蜂蜜其中一項功效就是解毒，所以沖蜜糖水飲都可以解去無名腫毒，不過現在要買真正蜂蜜就不易~~~~

四. 綠豆

呢樣才是我即時想起的解毒食物，所以排到最後講：一句講晒，它可以解百毒!!!!當作綠豆沙咁煲最好，臭草綠豆沙相信很多人都喜歡吃!!!!

正所謂「是藥三分毒」不是無道理，無論食用什麼有藥性的食物，都要小心!!

它來自椰子...

其實椰油都用了很久，用來食的反而不多，主要用在容易爆拆的手，到寒冬時候手部就會容易爆拆，一用上椰油就非常好，可以說是有藥用價值...至於如書上講搽頭髮就會令髮質好，但對森伯來講就不能，頭好易立立黐，所以對我來說無論用在頭髮上、面上都變得反效果...

而早前看到些資訊，認為用種籽製煉的油不好，因為用化學手段來提煉出來，而椰油、牛油果油係由果肉提煉出來，是比較理想的食用油，不過早前見過某間日式超市賣的牛油果油，細細支大約係罐裝咖啡的size，就賣百多元...對赤貧線下的森伯覺得很不划算，或等價格回落才買得過!!!

而見我這樽椰油都很少用到，怕會變質變味，所以也得用來吃，食用過一段少時間，我認為椰油味重，煮出來的餸帶有椰子味，就會覺得味道怪怪地，尤其鹹餸類...就好似煮鹵水食物，無端端有椰子味就極怪~~~~椰油只適宜做些甜味餸或甜味飯，例如蕃薯芋頭或栗子飯!!這個比較配合~~

所以，未必能夠餐餐都用椰油煮食!!其實用椰油來搽麵包都可以，橫掂呢排個個見森伯都話瘦咗，食番多啲油都冇問題!!!!

尋味道...

有時簡單都唔一定求其，就好似食物，越簡單越好...記得以前仲係小朋友年代，通常家中都備有餅乾，威化餅、動物餅、水泡餅等等......不過印象最深反而係最淡味的克力架!!!

就因為是淡味，所以一般都會浸煉奶來吃，不經不覺間已變成一樣簡單的下午茶點，有時唔太舒服又想食東西，呢種食法最好...不過現在買的餅乾多是麥餅，都少吃了克力架，或者現在的克力架已沒有以前的味道，得個鹹字!!!

基本上家中都時時備有煉奶，因為佢用途多多，而且少少地食都不會影響味道，加幾塊克力架就可以了，精髓就係趁熱浸稔佢，除了煉奶都可以用熱豆漿、熱朱古力、或咖啡、薯糊、甚至粥都可以...

不過對森伯來講，用煉奶始終最有回憶的味道!!! 

存心玩野......

本來想寫吓其他日事，但這兩日的新聞都環繞七人攬球賽的播錯國歌事件，呢單事件完全唔需要諗是否有什麼初級人員搞錯了，好肯定是有心人所為，當然都要包括好多方面的「通力合作」...

反而想睇最後邊個要孭鑊，一話係不了了之...有啲傻人仲沾沾自喜，覺得今次仲唔落中國顏面...其實仲落埋你民族的顏面!!!!

聽有些人話要抵制韓貨，其實對森伯作用不大，根本都甚少買韓貨，呢個時候最重要係睇特區政府有什麼後續處理，班官員成日講強烈不滿，強烈譴責，有乜用?!!人地當你唱歌......講番國歌，自從一九年事件開始，反而關注了國旗及國歌，國旗都有些領會，可以日後再講...至於國歌就回歸以來，都有很多年了，仲有些人對國歌存有偏見，親身遇過有些人一聽到播國歌，就轉台...包括電視或電台!!!

這些人以為自己好有"吉士"(guts)，人地唔敢反，我夠膽反...其實做左豬頭炳都唔知，正中別人的下懷!!

不知大家有沒有遇過這樣的人?!!

逆市來開舖...

記得森伯講過，附近的商場一向都唔旺場，人流唔算太多，當中都有些舖開了不久都要執，其實商場裡都是一個競爭，都要看你賣什麼，多人需要嗎!!

自從有家品店同麵包店進駐後，人流都多了，她們甚至在這個疫情中也留得住...算好野!!或者家品、麵包在生活上有需要，所以生意也不錯，總算在沉靜的商場中帶點人氣!!

話雖如此，最近亦有些新店開張，看看原來是熱狗店...做輕食應該唔錯，不過之前都有間Subway開不夠好幾個月就執了，所以做快餐輕食都唔一定十拿九穩!!相信在這個時候開店，都有可能消費券未過，仍想在當中分一杯羹...

在這裡還有一間新開張的藥妝店，眼見貨品不多，可能主要在網上做生意，取貨就去舖面...事實在這個期間，都有好幾間店舖關門大吉，身為附近街坊，如果能幫襯我都會幫襯，因為就腳方便!!!當然未必樣樣都幫襯得到...哈哈

睇玩具...

小時候外出見到玩具店，都會興奮的走進去看看，雖然當時父母未必捨得買太多玩具給我們，但看看玩具也相當高興...

正所謂三歲定八十，直到現在見到玩具店，都有衝動去逛一逛，看看有沒有些新奇有趣的東西...或者會買的東西不多，但見到繽紛的玩具森情也會有種愉悅感......

現在買的玩具大多數都以車仔為主，太大件就不會，砌圖或模型要時間，要心機才可完成...所以也不會考慮~~提起模型，款式也較以前多，記得細路時，都是砌些動物、飛機、船仔、車等...現在都跟貼潮流有懷舊風，加入了舊香港元素，最多就係一些店舖的模型、士多、冰室、街市等等，發覺現時這主題的東西，真的長做長有...

話時話，以街市為題的話，餸菜又做得求其了，完全唔似...

真定假，五歲開始就識砌?!!雖然話銷售對象是小朋友，但相信仍會吸引到大朋友購買...

感到現在的玩具店越來越少見，都可以藉此來緬懷一番!!!

中式芝蛋漢堡

間中都會買些饅頭食，如果有得棟都會買麥饅頭，比較有麥味，饅頭在北方係粗糧，一般人都會當主食，而我們南方就當副食，用來送粥都唔錯，尤其紅米粥等，而我就用來做早午餐！

餘下一個就拿來整個漢堡，因為都幾大個，咁啱家有蛋又有片裝芝士，夾起來都幾好味，本身都冇咩印象有冇在麥記叫過芝蛋漢堡……但呢個自家整理的中式芝蛋漢堡應該會健康啲，起碼唔鹹……送粥送豆漿一流！！只要發揮小創意，在家都隨時嘆到美食……

唔講咁多，要趁熱食，塊芝士溶溶地～～😅

香滑奶茶...

一講到港式早餐，相信大家隨口都講到多種食物，而在三餐之中，早餐真的比較多元化，任你配搭都可以...自家整都大把選擇，至於講到外出食，都不能不提茶餐廳、茶樓、快餐店等...其實森伯都好少在這三個地方吔早餐，多數自己整...如要揀，會揀茶樓，老人家始終都鍾意嘆下一盅兩件~~~

至於提到早餐，大多數的人都喜歡在一份早餐裡，加多杯飲品...可能這樣的早餐才叫完美!!而茶餐廳早餐，點都唔少得奶茶、咖啡、阿華田，檸水等...

多款之中我會揀奶茶，曾幾何時都試過買些材料自家沖奶茶，仲記得用立頓的紅茶包加淡奶，沖出來都同樣好味，不過就唔會產生副作用，咩副作用?!!...事關每次飲完某間茶餐廳叫的奶茶，都係超級提神，飲完多數唔駛訓，功效似咖啡!!我諗係個茶的問題......

反而現在的回味不是杯奶茶，而是不知什麼時候才能不用電子針卡都可以自由堂食~~~~

森伯玩好色...

時間過得很快，霎眼間又到秋季了，氣溫也不知不覺間涼了，但對森伯來講只是涼了些，現在的四季分別不明顯，有人話只有夏和冬兩季...

本應都係時候去換換季，但始終疫情關係都未必能外出太多，在早前就去買些衣服，當時還是夏季尾!!趁秋涼未來臨之際，就買些短袖衣等等!

無論買什麼衣著都是以簡單為主，大致上都會揀淨色的，當然太過老色都唔考慮，淺色就最保險，還有一種綠色，森伯會覺得幾好睇，嚴格來講森伯稱呢種綠為軍綠色，其實有畫畫溝顏色的經驗，都知呢種是淺墨綠色，其實綠色本身都唔多喜歡，尤其著上身，但這種墨綠色又覺得OK，同日都見個軍綠色袋，於是一併買回來...

不止是衣履，就算用品呢種軍綠色都幾好睇，又唔知大家對顏色有冇偏好?!!...

正與邪之間...

好多人都認為正與邪是對立的，正就是正，邪就是邪......

所以很多人都將正念比喻做天使，邪念比喻做魔鬼，每日心中都充滿著天使與魔鬼的鬥爭~~~~

有時正念勝，有時又被惡念勝，其實我們只是普通小蟻民，無論正念邪念都可能係些芝麻綠豆事...若然是國家的領導者，正念同邪念的影響就會很巨大......當然森伯只屬小小蟻民，無論天使與魔鬼的大鬥法都只是小小事，所以每個人都有正邪兩念!!

公司每季都有聚餐，目的為月份生日之星慶祝(還未論到我的月份)，兼且以食來聯誼一下，一向有睇開森Blog都有提到，本身係健康素菜類，正所謂太子都食唔壞，但枱上都設有好幾個蛋糕，見到生菜沙律都有咁多，點都揀舊夠份量兼夠晒邪惡的忌廉蛋糕來調劑下......

所以都好難定奪呢碟野係健康一話係唔健康!!!!哈哈哈

遲來的滋味...

一年一度的中秋，本應都係開心節日，因為現在的節日，很多都大不如前，又加上疫情還未退，所以有個節日都應該盡慶一下......

可是在中秋的時日裡就偏偏中疫，所以都十分掃興...而且有一年一會的月餅，要留待到好些後再慢慢品嚐~~今年都用老餅家的月餅過節，話時話咁大個人都係第一次親自買整盒月餅來過節，本應都諗住散買，結果沒有了!!

雖然現在新出了很多不同口味的月餅，真的隨人所喜愛，但我個人始終都是買些傳統口味就可以，而且眾多口味中，始終蛋黃蓮蓉最好味~~~

今年自己就買雙黃及五仁月餅，兩樣也不錯，覺得好吃的話出年也會這樣買都唔定!!!!現在食月餅除了怕太油，怕甜外，也怕吃得多會上火，所以少量的就OK!!!

似醫不是醫；似藥不是藥...

看到些娛樂新聞又幾有創意，內裡講什麼二線藝人變一線藝人...初時真的以為二線躍升到一線，原來係講這些確診過的藝人，都明白做藝人可以豁免戴口罩拍攝，但相對感染的風險就較高，尤其現在一日裡都有好幾千宗確診個案~~~

在這個多星期，感到時間過得特別快，手環似是戴了不久，原來都已經有十多日，當可以拆下時，便感覺重獲自由了，其實呢個時候除了上班也不會周圍去~~

六合彩就話想中完又中啫，新冠呢家野真係咪搞，不過每日都有幾千個案，都難保唔會中完又中，暫時都係小心為上!!唯獨呢排做快速檢測都多了，撩到兩個鼻孔都大晒...哈哈哈

暫時檢測包仍有存貨，估唔到...早前去家品店買東西都有得送...

無論什麼藥，唔熟悉又唔知是否適合自己，所以都唔敢亂食，都係靠自己的三腳貓食療，杏仁糊...因為白色食物可補肺，就是吃這種似藥非藥的食物來渡過我的隔離日子...

查實杏仁糊對森伯並不陌生，一向有食開，尤其當早餐，呢排可以常整來吃，一碗杏仁紅米糊(不能加糖否則易咳起痰...)，可以當作呢排的食療方~~

特別之秋……

雖則中秋已過，但氣溫仍十分酷熱，其實又是否很少見？！當然不是！現在的夏季相當漫長，睇怕要去到十月中才感到涼意……

特別之秋當然並不是只講氣溫……

今個中秋，暫時都未有食過月餅，只因早個星期前快測陽性，平時已經得閒無事少出街，自疫苗通行証後，幾乎都冇外出飲食，但事出必有因，相信都應該知是什麼原因，既然件事發生了都要繼續生活，一連串的事都要做，先向衛生署申報 ，公司請假等等……

相信有很多人初時都唔知可以點做，但衛生署都有清楚指示，而且有真人接聽電話，有想問都可以問，申報後就收到物資包同隔離令，可以畀我揀，一定選擇家居隔離啦……餘下的時間只好休息。

我沒有吃什麼特別藥，只有多飲水咋！

因為未有打過任何covid疫苗，所以都要隔離兩星期，今週經歷過唔少，很難幾句去交代，現在唯有等快測轉陰……

今個中秋 2022

一向中秋都是喜歡節日之一，不單有過節氣氛之外，還可以一年一度食月餅，但見商場都比較人多，預計去的時候就不能去，結果又係益超市...

森伯食月餅都有演化，之前會選擇淨蓮蓉，後來選擇單黃都好，到最後反而要雙黃，因為黃多可以唔需要食太多甜到漏的蓮蓉...食番傳統老餅家的朋餅夠晒傳統風味，咁大個人都係第一次買整整一盒月餅回來過節............

有些活動平時你唔會做，但過時過節做就別具意義，就好似今年就自己動手設計燈籠，睇睇好似小朋友做勞作...

本身燈籠是無圖案無顏色，是你去構思怎設計，燈籠是人送，所以都不需花分毫就有燈籠過節~~用塑膠彩上色，要分幾次塗，當然最難是寫字，因燈籠不是平面，要一筆過寫，冇得擦過再寫~~~

亮燈儀式...黃色似月亮，圓圓的外型十分配合中秋的人月倆圓!!也是森blog對大家博友的祝願!!!!!

又去逛逛...

數算一下，森伯都好似有好幾個月沒有來過這間日式百貨，在這裡購物很集中，而且層數不多，貨品價格夠實惠，如果不是太過講究，這裡OK，以貨品質素及價錢，我覺得呢間連鎖百貨都算是良心店，疫情期間也不會坐地起價，唔似佳佳.........

每次來都會看看超市，基本上一進場就係超市，都會順便睇睇有什麼賣，的確幾多日本食品，喜歡日本食品的人都可能會滿載而歸~~

這裡最特別就係有鮮人蔘賣，唔識煮所以冇細心睇，應該是日本或韓國產的，可能畀人在家整個人蔘雞煲，但現在日日都三十幾度，加上森伯伯又燥底，燥上加燥流鼻血都似喇~~~~

另外，今趟仲發現有個攤位全部擺放中國的農產品，因它標明是來自中國...內裡的食材很特別，相信是一些京葱、大蒜苗、茭白筍之類...很少見!!可能只是森伯伯大鄉里!!!

這裡算唔錯，偶爾都會來買些東西，得幾層容易逛，而且這裡都有個12元家品場，幾適合森伯呢類慳得一毫得一毫的老人家睇睇，通常買得唔多，是關斗室吉間有限...XXD

見過佢有較大型的鯉魚旗賣，但這個是迷你版...唔知這裡有冇東瀛通，鯉魚旗代表咩?!!成日見但唔知代表乜...

唔知點生存?!!......

近這些日子以來，確診新冠人數漸漸回升，每日都有幾千宗，事實聽落都覺得擔憂，十日累計就幾萬宗......初時大家可能對新政府在防疫上有所期盼，但結果卻是強差人意~~~

一方面來港人士的隔離期越縮越少，又不下禁令，而另一方面就叫人不斷打防疫針，呢種並不是積極做法……我都沒有留意打到第幾針，第四定第五?!!...有日聽人提起就話：而家唔打針，都唔知這些人點生存?!!通常講出這說話的人就一定打了，因為唔打針，連食都冇啖好食，而我諗佢只係想問因乜原因唔打針……其實打針與否都係個人取態，但事實因為很多處所都要疫苗通行証，尤其食肆…

堂食對森伯來講影響唔大，自己可以簡單煮，亦可以外賣自取，唔明點解話冇啖好食…若果話不能去理髮，就可以買定架生自己剪髮…可能現在的人食慣，嘆慣，一落街很多事情都一應俱全，少一樣東西都唔識點生存……

總之到暫時為止，森伯完全冇諗過打什麼疫苗，所以都冇理會打到第幾針，身邊實在太多中招的人都已經打過針，所以對打針冇抱有任何期望，捧著一種心態就是：是福不是禍，是禍躲不過!!!!

現在每周都會做次快測，兼且記低日期……每次都森驚驚，前一篇都講過風扇打孖上，現在口罩都要打孖戴，希望將感染的風險減到最低……

打孖上...

其實立秋都係剛剛過去，並不要以為天氣開始漸漸涼，一般來講七、八月是全年最熱...覺得香港起碼熱到九月，唔知大家喜歡天熱還是天冷，在現今環境森伯較喜歡天冷，暑熱天時大汗淋漓，黐立立都幾難頂架!!雖則森伯唔係肥人，但都好怕熱~~~

至於消暑品都唔會食得多，雪糕雖然相當吸引，但過多的糖份又會引發炎症，所以都要忍下口~~~~改為食些淡貿貿的涼粉都一樣消暑降溫!!

其實大熱天時嘆冷氣真係很舒服，尤其訓覺的時候，不過森伯始終年事已高，冷氣太凍都唔係太好，中醫話什麼邪風入骨，就係指天時熱有凍風吹入身體，會好易有病痛...所以用風扇比較好，房間原本有一把風扇，可是擺放的位置唔適合睡覺開，於是後來再添多一把放在櫃上，所以房間就有兩把扇，不覺間已經年多...

森伯可能燥底，一年四季都會用風扇，就算冬季都唔會收...

斗室農夫...

相信有很多人都想一嘗做農夫的心願，種下菜，養下魚...來過些自給自足的生活，或是過些農耕生活，以前比較多聽什麼假日農夫，或租一塊小田地種吓菜，想想可能會幾好玩...我就沒有這個想法，森知要種到可以食的菜實在有排，不過可以試試做農夫的樂趣，但現在只要你想，就變得什麼事都有可能，就算在家中種菜都可以!!

留意了很久的培植箱，裡面一切的生長要素都有齊，種植物需要充足陽光，所以光源最重要，最明顯就是個培植箱有燈長期照著，遠睇好似金魚缸，相信自己種的水耕菜都應該比較衛生安全...森伯總結：而我認為這種培植箱的的空間實在有限，要日日種到足夠食的菜都唔易，就算用LED燈長期開，始終都耗電費，都係嗰句，買返來食好過!!!!

至於什麼人比較需要，就是需要種些小麥草來調理身體的人士，因為小麥草賣的少，自己種就最穩陣，或有嬰孩的家庭，餵些自種的有機菜給BB，點都好啲!!!!

水栽或土栽也有，不過土栽的培植土粒用完未必搵到買，培植箱的價錢大概數百元至成千元...如果種得靚都可以當家中的室內植物來觀賞!!!!

(圖片來自購物網)

忽然豪一豪......

若要上班的日子，森伯的午飯大多數會帶自家飯，一來方便，二來衛生健康，三來就是不需要傷腦筋去諗食乜，平時一般都係帶些蕃薯，素雞、素鵝之類...強迫自己一日有餐素食~~

但今次都要豪一豪，個午飯盒都絕少機會有帶子，一向唔會帶些海產類，因為隔了好幾個鐘的飯，好易會變腥味，尤其是魚肉一定唔會!!不過晚上做餸的帶子吃不完，就索性留起來帶飯...

煮炒過的帶子，腥味都減了一點，所以就算常溫下吃起來也不錯!!

今餐帶子是主角，計埋都有好幾粒，不過都好過外出點的西蘭花炒帶子，搵粒完整少少都冇...

現在多了機會揀食材，帶子青口做餸都唔錯，總算多個選擇!!!!!

又戴...又除...

除了時事新聞以外，一些花生新聞都有留意，現在網絡世界，想短短時間成名都唔難，最緊要有冇一個talking point畀大眾炒作，就可以成為大眾茶餘飯後的熱話，就好似近排的網絡紅人“豬肉佬威威”想講的並不是呢位威威有什麼魅力能夠吸引咁多人(粉絲大多數係主婦和中女群)，反而係想講講呢位威威未成名時，都跟大家一樣防疫，口罩不離面，但成名後要顯示真面目，個壓力都很大...當初因為一副靚樣型樣才受到大家關注，除低口罩大家又咩反應呢!!呢個才是重點...令我諗起某位女星，是公認的大美人，就算演戲訓病床都要化行個妝，就係驚有一絲的醜態會出現...靚仔靚女的壓力真的相當大!!好在森伯完全冇呢方面的壓力!!!!

在這個疫情間，都認識了很多新面孔，最初個個都戴住口罩示人，但出奇的是他們就算除下口罩樣貎都好自然，暫時都未有一個人除了口罩後樣貌差別很大~~~~正所謂冇期望就冇失望!!哈哈哈

題外話：現在口罩越出越多款式，咩款都有戴過，就算早前咩袁專家的鴨嘴口罩款都有，當然唔敢戴出街啦!!!!始終最襯森伯都係普通的外科口罩(有摺痕的)戴得最好睇，會朝著呢個方向入貨...

路癡...

對於要去一些新地方，森伯都怕會行錯路，而且森伯一向都是認路白癡，所以去搵路之前都會做下功課，以前都會先看地圖，但地圖始終都是橫橫直直的一些路線，而且香港多改路，隔一段時間又會變，所以記憶中都唔多用實體地圖搵地點，幸好，現在有網上谷歌地圖，搵路搵地點已覺得相當好...

都唔記得從何時開始，每到一個新地方都會先睇睇網上地圖，有街景會清楚好多，而且又可以跟住馬路的路線行行，真實你點敢企在馬路周圍睇吖~~~就算去慣的地方都可能有些捷徑更方便，通常你唔會亂咁兜路去視察環境，網上地圖就最好，行錯可以再click過，一日行幾十次都得!!哈哈哈

對我來講，記得有次行程都算幾「驚險」，就是去山頂廣場，因為當時只得自己一人，認唔認啱路都係靠自己，路盲加老癡呆...你話C唔C!!好在去之前都有做功課，在網上搵下路線...所以不致於要差人帶返屋企...XXD，講笑啫!!因為當時走要等人車坐，所以位置不能有錯，最主要香港嗰邊路唔太熟，而且佢冇改錯名，山頂廣場好山頂，除了纜車、旅遊巴都好似唔見有其他車，一話有呢?!!...請有識之士解答!!谷歌地圖越來越細緻，有些室內地點連內部圖都有...

這個谷歌地圖對我來講很有用處，有佢就唔驚變迷途小森羊喇!!!

<<截圖來自谷歌地圖>>

支持裸......買!!

自從有次在街頭簽個電子名後，就不時收到綠色和平的電郵活動介紹...好笑就係已經唔記得當時為什麼而簽名，只記得怱怱行過就被截停要求做問卷......

其實都冇咩所謂，有關環保議題森伯都會支持!!

當然講環保唔係就咁簽個名就可以，真係要身體力行...而且覺得環保不能只做少少，真的要完全豁出去...這樣才有用~~森伯自問要做到徹底環保，都未必可以...因為好多時買東西都會去超市，見到超市的貨品全是包裝物，有部份超市話都會響應減少塑料包裝，但減少得幾多呢!!

買水果蔬菜的濕貨，收銀更加畀多一兩個保鮮袋，好離譜!!!只係減少唔畀客人自己攞~~~~~~所以森伯去買東西時除了一個大的購物袋仲要帶多一兩個保鮮袋..........時下興裸乜裸物，森伯最贊成裸買，即是貨品唔要包裝，倒返去以前買米、買鹽、買粥的年代，拿個壼買完就拎返屋企!!

圖：來自緣色和平的宣傳活動

講下菜花...

講到菜花，希望大家唔好聯想到第二種東西......😆

見一排冇講過健康食材，今次又可以乘機講講菜花這種蔬菜~~

菜花是種自己蠻喜歡的蔬菜，可能有些人會嫌淡口，最主要睇你點煮，如果白烚就真係淡晒口，冇乜菜味...我認為菜花比青菜有味，煮的時候調味跟配搭才是重要~~通常會加普通的雪藏雞柳肉，貪佢方便易煮~~~~

大家又知唔知，椰菜花分兩種，一種如相中球型，另一種菜柄長少少散開，好似話外地種和本地種的分別...但我比較喜歡球型那種，菜味不會太濃!!

菜花屬十字花科的蔬菜，無論是西蘭花或是椰菜花，最難搞應該係農藥方面，又要浸又要摔兩摔!!聽人講話將菜花白烚，塗些麻醬都幾好食，至簡單的做法，都幾啱懶人森整!!

多啲...少啲...

如果呢個標題係填充題，多些什麼...少些什麼...真係相當容易填!!

呢一刻，我會寫多啲感恩，少啲埋怨!!!!呢句說話聽落就相當老土，但卻是事實!!!!

現在大多數的人都只是埋怨多，甚少時候會聽到人說感恩的話...

就好似現在世界各地經濟都係麻麻地，長期的疫情，嚴重打擊經濟，日本二話不說也是立即開通旅遊...另外一些歐美國家更是百物騰貴，小市民生活當然受到影響~~

很多政府都帶頭呼籲市民慳啲，飲食要慳啲，最好笑平時食開兩個包當一餐，現在食一個就好了!!

反觀我們香港都仍有福利派，我即時諗到就係消費券，其實慣常的福利仲有上班交通補貼...樂遊咭乘車優惠...長者生活津貼(加碼...)等等，還有多項，博友記得可提提森伯~~

雖然除了消費券，森伯都暫未合適申領以上提過的福利，至於平時都有很多既廉價又實惠的食物及用品賣，只因背靠祖國的供應，所以港人都算頗幸福的一群!!!

但很多人仍在埋怨這個埋怨那個，一點也沒有感恩的說話......

今年七一回歸已經踏入25個年頭，多年來唯有今年的回歸最似樣，隨處都見旗海飄揚，馬路旁也見很多橫額，頗為壯觀...又適逢新政府班子上場，相信大家都寄望有個新景象!!

學習自"煮"...

近排都多了遊走超市，以前大多數都只去超市買些簡單食物，現在就較多買些可以煮的餸，至於平時的自煮生活多以蒸飯為主，但事實有些食材的確需要煎煎炒炒才保持鮮味，如果只得蒸就侷限幾樣食材可以，如果要蒸煮菜類、瓜類等就不能...

疫情下好多人都變為家中大廚，不過對森伯來講疫唔疫情都係要食，所以都要的起森肝練習下多些開鑊煮餸...森伯奉行簡約，煮得熟，食得到就OK~~唔會要求太高，求其就得啦!!!

平時要買食材都會去附近超市，唔想拎太遠，至於呢間A字頭的超市，就只買些少東西就算，主要到呢間生活百貨買其他東西，但見有超市都喜歡睇睇有什麼特別東西賣!!

A字頭呢間公司好似是日資百貨，所以同場有很多日本食品，咖哩磚都很多，其實咖哩磚用法好簡單，煮定雞肉薯仔，擲一兩粒咖哩磚落去同煮就可以，很方便，諗起都惹味!!呢種日式咖哩該是啡色，不同平時食開的黃色咖哩粉，若果喜歡咖哩菜式，呢度幾多選擇，都想買可惜森伯燥底，唔可以食太多辛辣東西，睇睇就算...

傾閒偈......

擾人清夢...

通常在這些濕濕熱熱的時候，小昆虫就會出來搞搞陣...尤其是在晚間睡覺時候，至怕就是不停有蚊子飛過耳邊的聲音，趕也趕不掉，搞到睡眠的質素都差一大截，雖然遇到此情況不多，只是間中一兩晚，可能現值初夏蚊子較多，又可能窗口近山，大雨過後就會多蚊蟲...雖則家中有放養式的小寵物——檐蛇，但仍然都有蚊，幸好只是偶然所以就沒有刻意去想法子處理...

可能要趁周末時噴些殺蟲水，有陣味點都可以趕趕牠們.....

把口鞋晒...

今日看到篇報導，消委會檢測市面上的方包，當中包括白方包及麥方包，報導所講方包大致上安全可放心食用，唯獨有些方包樣本含防腐劑，呢樣要注意一下，消委會仲講麥方包有較高營養，其實平時有睇開些健康資訊，都已經有講麥麵包好過白麵包，我都吃了麥方包好耐，不講健康與否都已經食慣了，我覺得口感味道都好些，就正如食慣了糙米飯，再食白飯就好似爭了些什麼，點都要落些糙米五穀類一同煮才好吃...

怪就怪森伯把口唔係刁晒...係鞋晒!!!!

心繫香港?!!

傳媒都好喜歡報導一些移居外地港人的新聞，可能是城中熱話，每逢有什麼日子(會以數字作口號)，他們一到十，日日月月都有得記念，森伯完全唔清楚，亦唔會深究...但見個標題寫到人在他方，千名港人依然心繫香港...又係好老土要講句：唔睇標題由自可，一睇把幾火!!

講到心繫香港，但人就走咗...只係遊吓行，做吓樣!!咁樣就叫心繫香港，簡直笑話!!真心愛一個家，唔會畀藉口自己放棄她，而去另覓另一頭家...

同樣地真心愛一個地方，唔會放棄她，而是留守這地盡己之力去維護她，保護她，建設她...

零食店...

相信有很多人都喜歡吃零食，其實講起零食大家都可能數到幾十種，其實又點止那麼少，而且在香港真的隨處有售...可見這裡零食有龐大的市場，但在這個時候，就偏偏有間陪伴港人多年的零食連鎖店全線結業...正如開頭所講，售賣零食的地方實在太多，所以都唔一定會光顧這間店，原來這間零食店差不多已有三十年歷史，當中都有其他品牌的零食店一同競爭，要經營得好都不容易...

我一向對零食麻麻地，所以專登去幫襯這類以糖果為主的零食店真係少之又少，但其實這間店據講是賣涼果!!!記憶中都幫襯過一次半次，相當少~~~一些主打日、韓直送的零食已成為時下大熱，所以要站得住腳也不易~~

如要森伯揀樣現時會買的零食，我會選乾果或堅果類，起碼比較天然少古怪添加，相片中的果乾是芒果乾在餅店買，初時以為是蕃薯乾，相信是餅舖整的芒果蛋糕，餘下的芒果片用來焗乾變芒果乾出售，味道甜甜地唔錯，最好係十令蚊就有咁多塊!!!!哈哈 

農曆五月節...

除了我們常常講：一年容易又中秋...之外，發覺一年容易又端午，對港人來講端午節是否一個大節，記得端午又好少吃做節飯...所以理應端午節又未必是個大節日，通常大家圍埋一起吃粽，睇龍舟，已經是應節活動...

講起吃粽，一向有糯米做的應節食品都甚少吃，不過今年就破晒戒，但是自己冇買粽，最主要都係"靠黐"，不會吃太多，少少地就可以...

記得幾年前，差不多近端午都會見到城門河有人練習龍舟，呢幾年都沒有見，可能關疫情事，相信不設有觀眾席免得群眾聚集...年年都會看電視直播划龍舟，事實也很少專注看，只不過有些塾底聲音又夠晒氣氛，端午過後就踏入悶熱的天氣，夏季都來到了，一年又走到一半了...

香港地中英文化融合，所以特別多有特色的節日，問過新移居外地的人士，外地的唐人圈子都沒有特別慶祝端午節，只是大家夾份做些簡單粽過節，所以今時今日仍身處香港這地方，都要好好珍惜每個節日所帶來的歡樂!!

Show me your love...

現在的餐具真係幾多花樣，有次經過一間大型的連鎖百貨，裡面有隻碟分成幾格，其實都幾好一來可以限制食量，二來餸還餸，飯還飯，食完洗碗都方便啲，有種碟頭飯的感覺!!

外出食碟頭飯，通常都冇咩特別飯菜想揀，都係以粟米肉粒飯為大多數，貪佢簡簡單單沒有太多調味...外出食得多，而在家裡都可以嘗試整呢個飯!!

我今次用紙包的忌廉粟米(因有味道)再加隻蛋及少量雞肉，煮的時間不用太長，所以都算是個懶人餸，幾好撈飯...發覺呢個餸唔單止配飯，配意粉都好好味!!!自己整的顏色賣相好似差少少，因為第一次整!吸收多些經驗可能會較好...

雖然到現在仍未能解釋到，火腩支竹飯何謂男人的浪漫，但呢個茶記熱選的show me your love，原來就正正是粟米肉粒飯的諧音，真係唔知去到茶餐廳有冇人會咁叫!!如果真係show me your love，整個懶人餐，真的不夠誠意~~~哈哈

不過自家整的show me your love味道就非常好，每逢多醬汁的飯菜，都是趁熱食最好，唔講咁多開飯lu~~  

long...long...time no see...

前篇網誌都同大家講開零食，其實森伯對零食好一般，就算要買都係買些果仁之類...尤其人越老就越唔敢食太多零食，家附近都有間零食店，常見到很多小朋友幫襯，都是買些糖、朱古力之類的零食，畢竟他們都是細露仔，森伯諗起自己細個時都有買零食，但又不會太多，至於當時的零食真的寥寥幾樣，「乖乖」該是其中一樣...

今時今日見到都不忘要影張相，見它出現在某個大型商場的台灣食品裡，本身「乖乖」真的不知出自那處，只記得舊時有幾種味道，而現在的「乖乖」都有兩款味道，因實在不能拎住周圍走，所以沒有買下，只用手機拍了相片...可惜沒有再試試味道有冇依舊不變...味道就不知，但身價就升了不少，這個當然喇，以前在士多舖仔出現就不貴，但在這個高檔商場賣就不一樣了~~

相信這個小食也是不少成年人的回憶，不知大家現在有冇見過?!!...

鹹虫森...

一般來講，大家會喜歡吃鹹味的東西?!!或是甜味的東西呢?!!其實都不需要花太多時間比較，一諗起肚餓時，就知道鹹食或甜食你會比較喜歡...我諗我肚餓的時候會選擇鹹食，鹹食會令我諗起湯麵或鹹包之類，夠飽肚...

早前聽人講話有種岩鹽較為健康，粉紅色的顏色是蘊含礦物質，於是就買細細樽來試，就算不好也不浪費，而這隻岩鹽幾好樽頂白色部份有個磨，可以把粗糙的岩鹽磨細，直接灑在食物上，呢種鹽不是精製鹽所以唔係太鹹，比我預期淡得多....一小樽都有排食!!!

另一個想介紹就是呢隻鹹朱古力，未食過之前覺得好難想像味道，食落又真係幾好味，可能不是甜你就不會有強烈的食後罪惡感...本身是買來給不能吃甜的長輩們，後來自己食又頗喜歡，它好吃過濃度高的黑朱古力，鹹味又剛剛恰當，平時對朱古力麻麻地，若要揀我會首選呢隻......

以前飲湯都喜歡加多些少鹽，屋企人就會講食得鹽多就會變鹹蟲...需知是講笑，但湯若然太淡就冇味，反而加多些少鹽就會吊出湯的鮮甜味，所以到現在我飲湯都一定要加鹽......

復工...

當第五波的疫情打到來，相信很多人都感到害怕，公司更提前容許員工在家工作，不經不覺已經過了好一段時間，稍見疫情有點緩和，就需要正式在office上班，對我來講話就話在家工作，而我的工作需要配合其他設備才能做，為免工作進度一再拖延，所以都要立即返去開工...都已經有成個星期了，反而要待適應復工的節奏，起碼要早起整定午飯，但認識的人當中仍有人在這刻要留家工作...

闊別一段少少的時間，大家見到面都即時問句，你有冇中招?!...相信總有些認識的人中了新冠!!!幸存者真有種劫後餘生的感覺，所謂"幸存"的人又唔代表日後唔會中!!總之無論幾放寬防疫措拖都好，自己都要小心，相信要等清零都未必咁快，本港的疫情未清零，自己個荷包已經清晒零，幸好有新一輪的消費券可以幫補吓...哈哈哈哈

這一刻的領悟...

正所謂：活到老學到老，人越大越會體會到人生的無常，當中可能會讓你得到一些領悟~~

就以這個世紀疫症來講，很多人都會把逆境玩食字變"疫"境，其實都沒錯，對很多人來講都可以說是艱難時期，當中有可能因此而沒了工作，苦心經營的生意要關門大吉，甚至痛失親人等等...就是平時習以為常的事情，原來會隨著一些東西的變化而漸漸地沒有了...

訪問人們最多聽到就是，以往大家外出吃飯都沒覺得什麼，但到這時候大家能聚聚吃餐飯就變得珍貴...即時令我想起，日常平凡不過的事情也會有一天可能不再了~~

變幻是永恆，相信沒有一件事是不變的，珍惜現在擁有的...

森伯唔係大隻講！！

上篇都有提到中醫藥，當然無論幾有口碑都好，藥物都會有宜忌，始終要因個人的體質和患病的表徵才能決定食什麼藥，但平時用來保健，或食療的中草藥，一般都好平和，大多數都適合大眾喝……

就好似呢味茶，近排都算係抗疫茶的大熱之作，而這個材料做法都好簡單，合晒這個時勢保健，甚至有人患新冠時都可以飲，而事實上材料都不陌生，有：金銀花，菊花，甘草，就係呢幾種，煲也不需太多時間，30-40分鐘，嫌淡可以加蜂蜜，森伯唔需要加糖齋飲都OK，比一般的菊花茶較濃，味道甘甘地，呢個時候好適合！

所以唔好話森伯得個講字，間中都會飲下涼茶……

自我檢測 + 連花清瘟...

唔知大家在過去的周末有冇響應一下政府的呼籲，一連三日做這個快速檢測，其實做這個新冠檢測之前都有做過，應該是正宗的核酸檢測，至於快速的自我檢測就未試過，可能有些人因為工作需要，每日都要check住，但在我的情況又不適用...既然政府都呼籲各市民要做，都好應該配合一下...

測試都厚驚驚，因為患了都未必有病徵，檢測包內說明話要等15分鐘，結果不到半分鐘就有結果...好在三日都係一條線...

防疫物資包內，除了口罩同檢測劑之外，仲有中成藥，呢隻中成藥本身都諗住買，但都知道政府會派所以就慳番，據中醫講呢隻成藥是有事才可食，它不是有病醫病，無病強身那種藥...所以冇事就唔可以食，現在都係用作看門口，我比較信中藥成份，所以萬一有事都會拿來吃!!中藥成本低，又少些副作用，其實好應該推介...

芝味醬……

唔知大家多唔多買抹醬，其實抹醬係籠統的講法，例如果醬，花生醬都係抹醬，多數用來搽麵包，我通常早餐才用！我試過親自做椰醬，係好好食架！

不過今趟想講呢隻芝味醬，顧名思義主要材料係芝士，唔屬甜醬類，如果講到健康標準，呢隻醬算邪惡，我睇份報告講，芝士類中最健康係茅屋芝士，我都有食過，較淡較稀，而呢隻忌廉芝士高卡指數都三甲之列……不過我唔會塗抹太多，少少地冇所謂，但發現到呢種醬唔襟擺，打開了封口要快快食，因為之前那盒擺約兩三個星期，發晒綠色毛毛，唔食得……所以今次都醒目番次，買後就快點食免得發霉！

芝士味重，反而食唔到忌廉味，它最好係唔甜，亦都冇一般芝士咁鹹……👍

買支"槍"...

呢個時候講買槍，都特別敏感...話說頭來，現在每個人都入定些防疫用品，我最主要買口罩為主，因為逢外出口罩都要打孖上，以及買些保健沖劑，假若有什麼不適，都可以有些沖劑飲飲，遲下都可以介紹下!!

記得好耐之前家中都有支電子探熱針，是耳探形式，用了不久就壞了，都已經好多年前，之後又好似沒有需要用到，相隔至今疫情關係都好應該有支探溫槍，本身都有用過呢種探溫槍，操作亦唔難，現在的人講衛生，一般都會用非接觸性的，而且用法超簡單，嘟一嘟就量到體溫!!

呢個時勢有什麼頭暈身熱都可能要睇睇有冇發燒，正常體溫應該係36.8度~~因為check體溫係檢測的第一步，咁我又唔清楚中了新冠是否一定會發燒?!!

自助售賣機……

其實對香港人來講，要買東西都十分方便，落一落街什麼都買得到，所以售賣機呢行生意都未必做得長久！相對有些外國地方，售賣機好多，亦都好旺，即時諗起日本，當地售賣機咩都有得賣，好似罐頭熱湯都有……

家附近的商場本來都有幾部售賣機，賣的係一些普通罐裝飲品，貴不特止，而且再上一層已經係超市，要買都上超市買啦，結果做唔耐就消失了！

疫情關係，都見到很多口罩售賣機，很多地方都見過，當中包括醫院同商場…

這是某個大型商場的口罩售賣機，裡面有多款口罩！但冇細看它有什麼分別，只知係個韓國品牌……不過買的人不多！！