區區有節慶?!!…

其實踏足了沙田區咁耐，真係恕森伯個老頭子孤陋寡聞，完全唔知沙田有個沙田節，有屋企人在那區住當然要問問，原來連地膽都唔太清楚…XXD我諗又係政府方面宣傳不力果類…其實對於森伯來講，節唔節都冇咩所謂，因為森伯唔係沙田友…

香港有十八區，查實每區都搞個節日又幾好，既有特色之餘又可以令到市民對住的區份有更多的認識，以及政府時時講的香港是我家，呢類區節一定可以增加大家的歸屬感…而且每區都總會搵到些特色景點，好玩好吃的東西，都可以順勢推介一下嘛，咁當然如果住的居民有一日假期慶祝就更加好啦！

 可以代表沙田的地方，事物，食物真係數之不盡…即時會諗到火炭的雞粥，有文化博物館，中文大學…又唔知賽馬活動又會唔會即時令大家聯想起沙田區咁呢?!!

有個湯做早餐…

平時對早餐真係冇咩要求，越簡單越好，到假期周末才可以整一個較好的早餐…以前的人會食早飯當早餐，唔知何解，一諗早飯就會聯想到梅菜肉餅飯或者薑絲蒸雞飯之類，晨咁早真係陣陣飯香…不過我又冇食早飯的習慣，至於早餐飲湯就更加少，除非配些西式類型的食物…例如麵包，芝士，炒蛋等…

既然有剩湯，就不如留少少當為早餐，有個薯仔蛋湯就梗係配些麵包，如果有時間整個麥包蛋治都唔錯，若加片芝士生菜就更正喇！！不過我冇準備太多，搽少少牛油都已經OK，當然最重要翻熱個湯，湯一定係熱先好飲！

 今個醒神早餐都幾飽飽，加上滾湯首選的薯仔蛋湯就perfect！下次若然可以加多個炒滑蛋整個三文治咁就豐富晒啦…

偷閒…

有句說話真係好啱森伯講：光陰似箭，日月如梭…感覺上只係幾個星期冇寫Blog，一睇番上篇Blog的日期，竟然成個月冇寫…而事實都未必有時間寫啦…尤其森伯個Blog咁認真～點會求其hea寫呢！！

唔好話森伯一返嚟就口花花，我當然有掛住個Blog同大家Blog友們啦…好在忙完一大輪之後又可以歇一歇，話晒老人家都要抖下氣…畢竟寫Blog好隨意，又唔係受人二分四，想寫就寫啦…

雖則話大地回春，但春天仍未感覺到的時候已經轉了夏天，呢幾日都幾熱…都未著過春裝就已經要換上Summer Look…平時懶懶閒閒都覺得時間快過，更何況呢排要做的事又多，時間過得仲快，不過還可以忙裡偷閒做下其他事…有時森伯都會諗下提早退休又幾好喎，可以樂得清閒…時間可以屬於自己，起碼唔需要太趕，而且見些博友的生活都幾爽喎，呢度去下，嗰度食下…最最最難得就係唔需要記掛工作嘛！森伯都冇得羨慕太多，只因仲要儲個退休錢…

呢張相唔記得邊個朝早影，總之就影得唔錯，甚有晨早feel，朝早人就訓唔夠，靠張相沖喜吓～哈哈