今年對我來講都係營營役役，又工作又進修，都尚算充實，起碼都唔駛成pat爛泥咁，哈哈哈!!今年不能不提就是有關社會事件，對森伯呢類長者來講，可謂一等良民，過境都特別安心，唔搞政治又唔會搞破壞，反而畀政治搞番轉頭...哈哈哈，我諗呢段時間好多人都有同感...
國與國之間的鬥爭，做人民始終都會首當其衝，影響最大，無論平民百姓又好，做爛頭卒又好，所謂萬事自有定數，再緊張再激動，都只不過是浮生空自忙!!!即是話做人輕鬆面對一切，不用杞人憂天地過活~~這一刻有些人與其，要千方百計去找政府錯處來咒罵一餐，倒不如化咒罵為祝福，幫大家港人做點實事吧...經此一役後，反而個人的民族意識強咗!!!都係好事嚟嘅!!!
森伯忽然好有藝術家脾氣，玩即興，這篇是即時寫...放假前都喜歡逛一逛超市，執下有冇什麼想吃的東西，現在都凍了，明日唔需要早起可以暖在被窩中，又食又訓仿如一條大懶蛇，準備冬眠...森伯老人家梗係想喇!!!!!
在此祝大家Merry Christmas and Happy New Year...
希望係新的一年，人與事都以和為貴喇。
回覆刪除以和為貴……我諗呢句說話大部份的人都希望……
刪除長歎到2020新年？！真爽！
回覆刪除我挑戰過讀夜學，知道自己能力界限，依家崇尚自由進修，上網睇吓飲食、健康、科技、護膚同現在及未來生活上嘅小知識，喺各方面去充實自己。
唔好自覺讀書時年年考第一就絕頂聰明，有時，一子錯滿盤皆落索， 不要太自負。
森港留港做大懶蛇？休息係為咗來年行更得穩妥。
其實一個人到社會生活，每日都不停學習進修，只是不在學校而已……
刪除而好多生活智慧都可以在四方八面的途徑去學習，可是要取個肯定或成績，到現今都要在正統學校上課考試~~~~
乜你睇網學到咁多?!!你唔寫BLOG浪費晒，畀大家學下你的心得都好……
我諗呢個世代都冇人敢太自負，因住畀人玩番轉頭~~~
留港消費都好應該，可惜森伯的消費力弱，唔及一爺兄消費咁疏爽，分分鐘可以帶旺番個零售業!!
森哥又死心不熄勸我寫 blog ，我有一顆反叛少年心， 偏偏要拗頸，所以，管人最困難。不過，我係唔會阻止森哥繼續推動人人都要寫博文嘅偉大理想。
刪除我係學人哋心得，唔係自己心得，為乜要重複抄襲人哋喎！森哥做網上特搜咪知囉，我唔想做多餘嘅嘢！
啱啱第一次見到有絲瓜布賣，有個阿婆話好好用，佢會專登搭車去大埔買，我又上網睇吓乜冬冬，唔用洗潔精都可去油，又好環保喎！會買塊試吓。我呢啲師奶嘢唔啱森哥架。
我又點止帶旺香港個零售業咁水皮，誓要衝出香港，做到自己全球化，仲要推高全球經濟增長幾個百分點添，學美國傻瓜侵侵死都要作大。😁
做咩一爺兄，年尾流流CC聲……都冇話死心不息，只係森伯伯唔底得你舒舒服服去人留言，自己又唔寫Blog啫~~~而家唔係青少年先包拗頸，好多長者都好固執好硬頸~~~~
刪除你咪當白老鼠，試下網上的資料真定假，有效定冇效，在網誌裡發表一下測試結果~~~
絲瓜布真係未用過，記得用過類似絲瓜囊，講到咁好你可以介紹一下，婆婆專登老遠都去大埔買，應該會係好野，森伯自己飲食都奉行少乜少物，都好少發現碗碟有油漬，平時用清水洗都好乾淨...
咁全球的經濟增長，就要靠一爺去帶旺……無法啦，一爺平時唔聲唔聲，可能係世界鉅富!!連侵侵都要畀番幾分薄面你……
森哥咁講有啲農曆新年氣氛喎！大人會嚇細路亂講會提早開年。不過， 我鄉下喺新正頭才會有避違，平時冇規範咁拘束 喎！喺封建古代，好多文字獄嘅寃案，累全家誅九族真慘。仲有煲劇話主人婆叫明欄，個奴婢叫明月會衝喎，即時改叫秋月，冇人權。森哥思想好古雅。
刪除我曾經寫過幾篇架，揾唔到樂趣咪停咗囉！
即係絲瓜囊。我都話我啲師奶嘢唔啱森哥。
好在森哥只少乜少物冇X人咋！好險。
人體細胞結構上係有脂肪，神經弱電流傳播一定要脂肪絕緣，因人體有70%係水，冇咗會漏電 shot 咗架。另外，皮膚報滿油脂分泌線，人體化工廠會用到油。『少油』宣傳會錯誤引導，真係要食適量油脂。擔心😰森哥飲食碗碟滴油不沾會缺乏咗咁重要嘅營養而shot咗！😂森哥平時食乜加油架？
我喺高科技 VR (virtual reality) 嘅鉅富，好似玩大富翁遊戲咁滿足己欲。
無論新曆新年或是農曆新年都同樣有氣氛，都唔需要太執著咩時候才講好說話，森blog主打正面，都唔想太多CC聲咁負面!!相信以前一爺兄細個口多多，年廿幾就畀大人同你開年，提早打到pat pat花開富貴，好彩一爺兄生於當今世上，誅九族可能誇張咗，但撑咀刑罰一定有排你嘆~~~😁
刪除你講既典故真係未聽過，呢個故事帶出咩訊息呢??
森伯本身斯文有禮，古雅純樸，就係覆得一爺兄的留言多，變得庸俗粗皮，毫無內涵，唉~~真係學壞三日咋!!!!少乜少物爭啲想少埋一爺，都唔知森伯幾時變得咁粗皮~~
絲瓜囊來自天然，本來唔錯，但用一段日子會藏污漬細菌，所以都好少用……我只係少油冇話唔食油，多數揀植物油，橄欖油，芥花籽油果類~~~
森伯好少玩大富翁，所以冇鉅富命~~~~😓
官員分黨派好嚴重，會互相抹黑、小事化大，盡力拉倒對方就大權在握撈好多油水。
刪除名字係跟族譜起，好似親戚，下人名字相近，主人身份被拖低，撞衫都大忌，更何況撞名呢！
係添咗幾分粗獷更Man。
仲有食椰子油？
小時候係玩乜棋呢？
森伯伯只是蟻民一個，人家做官有冇撈油水就唔知，不過食得鹹魚就要抵得渴喎…
刪除我諗而家的社會都唔同，李超人府上打工的工人唔通個個都唔可以名裡有個家,加,嘉字?!!
粗獷同粗魯係兩回事~~
一向冇食椰子油，椰油用來搽手搽臉，冇咁易暴拆~~
小時最興玩鬥獸棋，康樂棋，飛行棋…你呢??!!
原來，Omega 3主要分為ALA（植物中性）、DHA 和EPA（海洋生物性如魚油）。ALA是EPA和DHA的前體，當ALA進入人體後，身體能夠將它轉換成EPA及DHA，只是這種轉化的效率並不高，估計約5%到25%不等，而速度也會隨着年齡增長而降低。即使高劑量的ALA能夠轉化成少量EPA，DHA卻受到嚴重的轉化限制，所以我們首選是以魚油來攝取及補充EPA及DHA。森哥咁大年紀會退化到得5%好嘥料，每周要食2~3次海魚。
刪除養殖三文魚 啲飼料內冇海藻類引致Omega3低過野生三文魚好多，都分辨唔同養殖或野生，以為食咗，原來係冇嘅。網搜獲益匪淺。
仲有波子棋、蘋果棋，最憎象棋同mastermind棋，前者係棋屎畀人剝光豬好冇癮，後者要玩超多行才估到，我好似蠢到隻豬咁，好挫敗抬唔起頭做人。😁
一爺呢個回應簡直係一篇醫學論文，叫目不識丁的森伯點睇呀?!!😩
刪除森伯本身對食魚真係麻麻地，好少會買魚食，齋舖的芋頭魚或者煎香食都會，食魚都只會食白飯魚加葱花煮飯，或食無骨的魚塊……🐟
你講的EPA和DHA唔係孕婦先需要咩?!!話咩會對胎兒的腦部發育有幫助?!…你都識講啦，森伯咁大年紀食唔食個腦都退化緊啦，差D連一爺兄係邊位博友都唔記得喇……
其實生活在香港的人已經好好好幸福，仲可以揀三文魚要野生或人工飼養，住在一些低漥或山區平原地方的人，離海洋都相當遠，要食魚都唔容易……他們都會想法子去吸取不同的營養去持續生命~~~
你憎象棋?!!我仲諗住約一爺兄去公園捉下象棋添?!!初時學識象棋就係諗住年事已高的時候去公園搵D伯伯捉棋，殊不知家陣都冇乜伯伯捉棋，唯有現在幫部手機捉啦~~~~
廣告宣傳力量真大，影響森哥啲思維，EPA和DHA咪即係動物性Omega 3油，人人都需求。
刪除退化梗森哥腦內冇我位置唔重要，大家傾得 happy 就夠。
我食開史上最有益喺罐頭一茄汁沙甸魚。三文魚有1800靚油，而沙甸魚都有1400，算好豐富啦！ 老男人最怕前列腺癌，茄紅素幫到手。 做人唔好食人唔lur骨， 食魚就要 唔lur骨，條條罐頭魚都中咗化骨綿掌，100%保証冇害，90g有骨沙甸魚等如1杯牛奶嘅鈣質。 仲有優質蛋白質呢！ 所以，我叫佢係 super can。
我食佢係貪平，胃糠某牌子215g罐頭茄汁沙甸魚每隔2個月就賣$10罐，我會上胃糠網追蹤價錢，一到價位就去超市大手入貨，買佢10罐8罐。每周分2餐食1罐保持均衡營養。
唔係要操控森哥飲食，只希望呢個開心大分享提供有用嘅資訊。
所以，計劃永遠趕不上變遷，地球轉得比以前快好多，要時不時調控。
其實平時飲食又好少諗佢有咩營養成份，大概有益處就會多食，少食冇益的……
刪除咁一爺即係話就算森伯完全唔記得邊位博友係一爺兄都唔緊要啦，果然係大方得體喎XXXD
你講的罐頭平時都可免則免，如果要吸收茄紅素，可以蕃茄配其他食材煮熟，例如蕃茄煮蛋，經濟又有益……想吸收鈣質就買全條小魚例如白飯魚，銀魚仔乾(當小食)食較好……
有時你見超巿都有南瓜籽賣，你可以買來吃，據講都係幫到中老年男士~~~~
地球轉得快都唔等如要時時改變自己，活出自己就最自在，食物總之食得開心唔太傷身就算~~~
早幾年森哥咪讀過有關營養學嘅課程，要學以致用，素食者同老人好易偏食，更加需要注意營養補充。
刪除我講優質Omega 3 油，萬千營養集中於一罐，一開即食好方便，你要分開幾樣嘢黎煮。
多謝森哥等我重振雄風，鋅又講吓啦！
100g 南瓜子 要 $10 有 10mg鋅
100g 蠔豉 要 $14 有 30mg鋅
想攝取10mg鋅 只食33g蠔豉 花 $4.7，你話邊樣化算呢？
睇Jetso網資料話年尾盞記割價賣細蠔豉$128/2磅，已入咗貨，平時放飯面蒸番2隻，真係男人唔補好易冇。
每周有2日輕斷食都食南瓜，所以襯百佳特價$8.9買成大大個回家食，我都會晒乾南瓜子剝黎食，以前係會掉咗佢。
幾年前讀的營養學是理論性，重點講熱量的吸收，營養成份不能樣樣食物都會讀得到，有時我覺得想身體好真係唔懶得，
刪除世界上都冇話憑一樣食物就可以有齊所有營養，食物最重要係多元化……不過一爺兄貴人事忙又兼且要應酬情人們，所以都冇咩時間食得太花時間，一罐搞掂最實際，一爺兄對重振雄風特別有心得，應該信得過~~~~~XXXD
一爺兄府上就話啫，有個大陽台，食完的南瓜籽可以晒一晒，森伯唔通拎落公園晒咩!!!
依家我係目標為本嘅學習，對切身有用嘅，能解決我嘅問題或有興趣想知道嘅，就上網去學，唔會好似學校讀書咁學完一大堆冇用嘅，為咗應付考試同沙紙而硬塞，過一排啲記憶消失，學咗等於冇學到咁冇义用。
刪除營養密度高嘅食物咪可以食最少份量就能吸取到當日所需嘅各種不同營養素嘅攝取量。
例如，南瓜子100g有446卡路里。蠔豉100g有卡路里163。當日要攝取10mg鋅，食100g南瓜子就有446卡路里，食33g蠔豉才55卡路里。營養密度高嘅食少好多，熱量少好多，可能用錢少啲，咁可以有空間食其它營養素嘅食物，易於達到當天均衡飲食而熱量冇超標。顧得熱量唔超標又會缺乏某啲礦物質、維他命。唔通飲豬骨湯補鈣咩，咁要每日飲1000碗至夠。
好多情人~~~森哥唔好睇咁多八卦雜誌，某某明星生活淫亂，好似安森偷情案~~~想抬舉我變成抹黑我嘅人格，森哥哥……😱
森哥都唔會賣成個南瓜食，不成問題。好多阿公阿婆都拎落街曬野(曬床單衣物)，森伯係非一般阿公。 西斜屋就陽光滿滿啦，森哥住向南靚樓啦！
刪除學習係知道基本理論，正所謂一理通就百理明，當你有學過營養學，就會好易明白養生的道理或者保持體重的方法，既然一爺兄對營養學方面咁有興趣，
都可以不妨認真去讀一讀，當識多d基本理論都好，都可以學以致用~~~~
森伯就一定唔會為吸收鋅專登去食蠔豉，因為本身對蠔豉都係麻麻地，所以森伯唔會好似一爺為食物計來計去，可能一爺兄個數口精，特別對數字有興趣~森伯最怕讀數學!!!!
乜一爺兄睇八卦雜誌會信到十足既咩?!!睇過就
算唔駛太過操心，森伯唔會抹黑人架喎，你好似講到森伯伯又諸事又八卦又鍾意抹黑人，似你抹黑森伯多D喎!!!
聽你講又話唔補好易冇，又話要重振雄風，所以覺得一爺兄係多多情人又愛好夜生活果種，唔係身子點樣應付呢!!XXXXXD
森伯經過超巿已經可以買到南瓜籽，唔需要在屋企自已晒，香港天氣潮濕，乾燥的日子不多，食物容易受到潮濕，所以奉勸一爺都唔好自已晒南瓜籽，發了毛又會影響身體~~~~
有得同森哥天南地北、無所不談真係好開心。
刪除祝 聖誕及新年快樂 ！
乜今次回應咁慳水慳力!!!仲以為一爺兄有排談天闊論~~
刪除等森伯仲斟定杯水，坐定定~以為有排打，殊不知一爺兄咁快就up完………
我都祝你聖誕，新年快樂，雄風再湧現~yeah!!!!
想八卦吓森哥嘅桔仔茶試咗未呀？ 伯虎係飲茶喎！點解會飲水架！你係咪作嘢架。😁
刪除桔仔茶通常有咩咳或感冒初起，才會飲用，冇乜事又忘記了……
刪除森老伯唔識作嘢，只係五行欠水，咪飲多啲水補補囉……😢
仲記得我細路哥時睇科幻片時係講2020年，飛船環飛，無線通訊，智能電腦，摩天大廈，自動門窗，機械人群，無人駕駛。依家外形設計唔同電影內場景道具服飾嘅，其它好多方面又實現咗，眨吓眼已經係2019除夕，今晚倒數後明天就係2020，科技發展爆炸式推進，真係估唔到2050世界會有乜變遷，中國同美國位置是否互換，非洲發展成點，亞洲在中國印度印尼帶動下又能否奪回世界中心嘅地位，世界通用語言已係國語，人工智能同機械人取代了好多工作，少子化問題將老化國家又有乜後果，我是否已灰飛煙滅 不問世事…………都係拉回當下，食餐好嘅……唔得，今日剛好排到我嘅每周2個斷食日之一，為咗健康獲得舒適過活，做人要有決心和毅力，唯有留番明天2020新年才擦餐勁嘅。
刪除時間過得好快，早前聽人講起千年蟲呢個名詞，數算都已經二十年前，真係昨日如今日，科技都不斷進步，環境每日都不同，一爺兄對社會國事都幾留意，森伯只是草根蟻民，好多事都懶理，尤其科技的東西更加冇得理，到2050那時可能坐車都唔需要司機，家中都隨便有個機械人做工人，不過或者並不是森伯果代看得見……
刪除森伯有大食癪果類，如果要斷食都可能未必會做得到!!!
新一年即將到，祝願一爺兄食得健康，斷食都斷得有營過人~~~
森兄年輕力壯新陳代謝快唔會肥得去邊嘅^^
回覆刪除肥字一向都唔係驚，只係怕食得太多，壞肚皮啫!!
刪除近排天氣不錯
刪除忙之餘森兄也可去公園仔跑個步^^
通常近冬至的天氣都會清朗舒服，有時都會落公園吸下清新空氣兼運動~~~
刪除提早拜年,新年進步wakakaka...
刪除下周聽說會下雨了,跑步就趁這幾天天朗氣清^^
多謝溫馨提示，我都祝願gael兄有個開心的新一年……
刪除普通運動啫，邊有跑步咁激丫!多數在家附近，見到下雨就唔去~~
年尾仲以為gael兄同啲知己友好出埠旅遊……
大懶蛇森源
回覆刪除大夫唔會攞大懶蛇浸酒補身呀……哈哈
刪除祝願香港回復秩序，森源生活愉快!
回覆刪除經Stella祝願過，相信香港好快回復平靜有秩序…
刪除願你生活安逸愉快~~~
休息一下，放鬆一下，再戰江湖！
回覆刪除祝你心常存平安喜樂！
我諗呢個假期都未必能好好休息，只是放低工作壓力而已~~~
刪除祝Amour新一年事事順心順利……
明日唔需要早起可以暖在被窩中....放大假？
回覆刪除通常年尾都要清晒所有假~~~
刪除原來森少已經放假好輕鬆，睡到自然醒，真係好Happy!
回覆刪除聖誕節快要來臨，相信節目已經排到滿瀉，人生一樂也。
雖然放假但都唔輕鬆，平時都係訓到自然醒多，老人家醒左就訓唔番嘛~~哈哈哈
刪除假期裡節目唔算多，冇失約就最重要，相信秋葉節日都忙搞家庭派對，在此祝秋葉有個開心的冬至及聖誕~~
現在都唔喜歡太熱鬧啦，越來越怕過年過節，因為扛破了平時的清靜。
刪除都係要督促自己多出外走走了。 那一陣時勢唔好，悶起上嚟畫公仔。原來要這樣才逼得自己做一件艱難的事。
都有同感，不過都喜歡節日當中的熱鬧氣氛，為何畫公仔都是件艱難的事?!!興趣多數是隨意的，唔需要有壓力去做………
刪除有機會，能看到秋葉的畫作就好了，希望你分享吓……
刪除森少放了假之後，快活唔知時日過，都冇去舍下一逛，我的卡通畫已經po上了。今次因為被社會多月來的暴力事件影響了心情，竟然生出這麼大的耐性，可以忘記多年前畫那條魚的事，終於可以完成戲作。
刪除*
難得看到森少執筆談時事感想，十分之正面與正確 ! 如果每一個人都多所反思，不那麼功利，世時就和平得多了。 這幾個月市面的食肆生意淡薄，街市和超市卻暢旺得多。選購食物，真是一個好節目。
請秋葉見諒，放假時候都少了探訪各blog友，而睇blog覆blog，只能用手機……多月來的社會問題相信不只秋葉影響，還有很多人受到或多或少的牽連，包括生活或心情，近排的事件相信都觸動了不少港人，本來都有東西想發表，但在這裡始終不太適合，謝秋葉的讚賞，我沒有秋葉的關注時事動態，所講所思你一定比我多，比我精彩……相信事件稍有平靜後，大家又會樂意出來購物和消費……
刪除既然你有公仔漫畫post了，我現就去睇睇……yeah!!!!
森少言重了! 秋人微言輕，請勿介意我反反複複說那麼多的時事感想。都是為了作一個紀錄吧，在這年終之前，都會再寫一兩宗未曾紀錄的亂事，明年就少談這個了。 謝謝來敝博增光，真是班門弄斧了喔 !
刪除不好意思，一時大意打錯字：應是“反覆”。複是“重複”。
刪除南宋陸游詩中句：「山重水複疑無路，柳暗花明又一村。」
秋葉真謙虛，怎算微言呢?!!……我都不時會留意秋葉對社會事件的個人睇法!!!
刪除或者今年的總結大事都離唔開這些社會政治事件!!!
明年就是新開始，舊的不好的希望快些成過去，迎接新景象吧!!!
秋葉幾時都咁客氣，你怎算班門弄斧呢!!你畫的插圖作品很好，多些畫給我們欣賞吧!!
柳暗花明又一村，呢句真係好適合現在的時勢，期待會變好~~
謝謝森兄不嫌秋的長氣累贅，寫起社會時事來就是長篇大論!好噚氣。
刪除都知道一般人多喜歡看較短的blog文，可以省時又省眼力。但是社會問題總是有些複雜，總讓人多所推測。真難得森少有對拙文有這個耐性去看。
寫時事文章都是苦中作樂的事，因為有時要花時間去參考，是正確的才好，並不能老作。但我也視為一種樂趣。
當然，能夠輕輕鬆鬆地寫些俏皮話，倒也是養生之道。
我也希望來年比今年安定繁榮!
今午終於把一篇關於時事實錄的文章處理好了，因為在編輯上的疏密間隔，有時不大聽使喚，曾經使我有點兒氣餒，不想再搞了。可是寫博文和放照片已經成為習慣好多年，不寫就是不安樂似的。
刪除我寫畫就是一曝十寒，怎及得上森兄駕輕就熟哩!所以我只能說是「班門弄斧」。
其實生處在香港的港人見到如此境況，正常都會有感想，都會想發表一下自己的己見，只不過大多數的博友不敢觸碰這些敏感的政治問題而已~~
刪除我都很認同你所講，凡政治事件都不能老作，起碼有憑有據才可以發表出來，免得被人誤為發放假消息，相信每個有良知的港人都總希望件事快回復安定~~~
你客氣，我也不能說畫東西能夠駕輕就熟，畫自己想畫的，畫自己滿意的就好了!!!
祝森伯：聖誕快樂！
回覆刪除多謝Man Man我都祝你聖誕新年快樂～寫多點旅遊網誌給我們看！
刪除聖誕快樂！
回覆刪除多謝狂小子，我都祝你有個開心的聖誕及新年～
刪除森少新年好！新年新希望，祝君安泰，順心如意，萬事大吉！
回覆刪除希望社會可以在未來浴火重生，安定與和平。
謝謝秋葉，我都祝你新年事事如意，生活寫意又少煩惱~~
刪除有秋葉敢言發聲，靠著大眾的念力，相信總有天得到和平與安定~~~
在下人微言輕，不過是心中有言，不吐不快而已。也希望承你貴言，有和平與安定的一天。
刪除不可以以為言輕就唔發聲，有時可能使到不敢出聲的人都一同出聲，壯大正面聲音的力量嘛
刪除