其實森伯刻意買零食的機會就唔多，不過有時經過都會入零食店睇睇，市面售的零食大都很多添加物，就算唔係咩化學東西，太甜太鹹都係一個原因，現在多了吃些果仁，乾果之類，不過乾果比較酸所以少食，唔酸的乾果真係唔多，杮餅、蕉乾、無花果乾、還有一種名為白桑椹都係甜...如果有博友好介紹都不妨告訴森伯~~
記得有次買了包雜果仁本來請人食，結果因疫情關係就冇送出，唯有自己食，而每日食過晚飯後就口痕痕，通常食些少呢類果仁幾好，變成一種偶爾的飯後習慣~~
呢類雜果仁幾好，有幾款堅果，腰果、杏仁、花生、夏威夷果仁等等~~一路食，一路嗒番杯...茶幾好！！漸漸發覺呢類堅果小食，無論是送禮或自奉都唔錯，送畀人又唔驚食壞人，送唔出又可以自己吔返~~~~哈哈哈
我很喜歡吃果仁，下次你送畀我就行了（講笑咋）！😂🤣
回覆刪除果仁有益，每次不超過8顆是很理相的營養吸收，多吃致肥，甚至上火。
如果唔名貴的禮物都唔敢送畀Stella啦~~~哈哈哈
刪除我都認為呢類烤焗過的堅果，都幾熱氣，所以一次唔可以食得太多，適可而止就OK......
營養師都建議每日食果仁，加有益油同礦物質，咁好食我當然唔會放過啦！
回覆刪除不過，加工過果仁落咗唔少鹽，所以，我喺藥材舖買剝咗殼帶紅衣花生，$11斤(600g)好抵食，自己整黎食當然要好健康啦！只食原味道唔落鹽，用微波爐烤4~5分鐘就酥脆可口。
我會買整個南瓜黎食，裡面南瓜籽都會放埋落去一起烤，不過，逐粒剝瓜籽都好花時間架，食得唔好嘥。
間唔中都會吓買原味杏仁同核桃黎食。
食完飲杯高鈣好立克同食番隻香蕉。呢個有益小食餐都唔錯架。
其實呢類堅果類的小食，很多地方可以買到，相信都係大眾的選擇，冇留意營養師講乜，總之每樣食物都冇食過量~~
刪除真係未食過去藥材舖買的花生，通常這些花生衣用來當中藥用?!!現在個個都怕太高鹽高糖，所以一般都唔係太多鹽，除非你刻意選擇鹽焗果仁~~~
市面都有剝了殼的南瓜籽買，一包包但價錢偏貴，但勝在方便唔花時間~~
有時都見到有殼的合桃買，不過都貴而且包埋殼唔划算！！
自從現在的好立克味道不似以前，都冇買好耐，你覺得嗎??
西梅、提子、甘草檸檬、嘉應子、飛機欖啱唔啱森哥呢？食苦藥甜品。
刪除好立克係小學時期早餐飲品之一，仲有好立克糖都好食，跟著青年、成年、中年都冇飲過，覺得呢個係小學雞飲品，唔襯我身份地位。係直至老年睇咗篇鈣質文章發覺我每日吸收量太少，原來，隨正常飲食外要多飲兩杯奶才夠，與牛奶同等鈣質量又平過奶就係好立克呢隻營養飲品，呢個係我飲番嘅目的囉！
好立克以前冇加鈣同其它維他命礦物質，得陣味道，後期改咗配方變成營養飲品，唔同咗好正常啫。
事隔多年，個味道已變得好模糊。就算變咗都唔緊要啦！最主要有益抵飲。細路仔時，一定要加花奶和砂糖，近期飲原味，乜都冇加，味道都夠，好飲喎！每次買2kg大罐裝$109。
你講的很多都酸酸甜甜，可能山楂餅較為適合，呢類小食係細個送苦茶時一個小小安慰獎~~
刪除現在很多人都講奶類或奶類製品都不宜食用太多，所以都儘量減少食用，雖然好立克未必同奶類有關，但要奶一同沖調...有款黃色的阿華田飲品，類似好立克都幾好飲~~
或者將來有機會再買加鈣的好立克試試!!乜你都覺得好立克糖好食?!都幾好食不過現在還買到嗎??都好耐某食過，我都鍾意不過都幾甜!!
嘩，買大罐裝...相信唔敢買太大罐，呢種即沖飲品隔耐一排好易結成粉塊，硬得濟要將其餘的報銷，買細罐容易飲晒~~
現在有時間，多數整薯粉做早餐，加什麼都可以，尤其呢排時勢，整些杏仁糊吔吔，潤肺補肺又護喉，不過要到休息時才會整，好易整......
呢個兒時傳統習慣，到我咁老都冇變，必定食甜嘢驅走陣難頂嘅苦澀味。
刪除『奶類或奶類製品都不宜食用太多』 有咩壞處呢？係指花奶同煉奶有高飽和脂肪酸係無益，牛奶、芝士有益呀！不過，我唔加淡奶和糖冲黎飲呀！
『黃色的阿華田飲品』 佢都好有營養同好飲，貴啲架，但冇加鈣喎！我老咗食嘢更加留意營養，打造健康身體。
我日日飲2杯都唔厭，2個月清1罐，無結塊問題。要天天新款就唔啱買家庭裝。
我整過龍皇杏、腰果、花生、合核，最香至愛係黑芝麻糊。
果仁真係有益又好食，唔似森哥咁好自制力，我一發不可收拾，每次都食好多，真係知易行難。唯有安慰自己 健康嘅地中海飲食都係好多好油。
現在會煲涼茶的父母應該少了，而且煲藥要睇火，很多人都寧願食兩粒藥丸就算，都好少人飲完苦茶要搵涼果送口~~
刪除現在的奶類製品大都係畜牧工廠生產的牛奶，把母牛圈養，目的專用來榨牛奶，正常的母牛要生了小牛才有奶，用人工把母牛的產奶期延長，儘量加激素使牠們不斷有牛奶分泌，不人道兼且這些牛奶都有激素在內~~~
你日日飲2杯，使唔使咁搏呀，我認為幾好都唔會飲太多...黃色阿華田貴?!好立克仲貴過佢，可能分一區區啦，你地富豪區乜都貴過人...
整皇龍杏糊?!...聽個名好有氣勢~~係乜東東!!現在有隻阿記出五穀粉幾好，方便快捷，煮糊仔落佢唔錯~~
森哥又講得好有道理喎！時而世逆，舊有式微，苦茶已冇生存價值，佢嘅 配偶 凉果因美味而幸存。
刪除講到咁恐怖，好在我冇飲奶習慣。但英國……會補貼某啲基礎食物如牛奶、雞蛋、方包……等窮民用超平價就買到有營養食物唔會餓死，咁咪政府想毒死佢哋，唔使花納稅人錢養班窮鬼。冇食安中心規管咩？
一啲都唔誇張，老人每日攝取1000mg鈣才夠，每杯約200mg， 剩下600mg要拼死命喺其它食物吸取。香港逾九成人缺鈣，逾八成人缺鐵，逾六成人缺鉀，當然，逾九成人都缺錢啦！好多人唔理，唔會計吓每日食得夠唔夠，當呢啲標準係透明，喜歡食咩就咩！缺乏呢啲營養係冇病徵，要經長時間後才會發病，好多人覺得冇事咪唔理囉！明白大多數人群會覺得我呢少數人群唔正常、好過份，我感覺良好就夠了。
有一排要飲想買畀人嘅好多3合1咖啡，那時，指甲易斷裂、有白點和黑點，清倉後飲回好立克才可解決呢啲問題。
唔好質疑我格價能力喎！睇低我。我食米知米貴架！
杏仁糊係用佢黎打，會混少許南北杏提升杏香味。
森哥都好鍾意食糊仔，真係好似無牙老人家受軟唔受硬。
苦茶的功效並非一些藥粉沖劑可以代替，想康復過來要做些功夫捱吓苦都要架啦~~經過一輪辛苦的過程，康復後都會加倍愛惜身體~~哈哈!!講開醃製涼果平時好少食...
刪除對呀，不要忽視現在的奶製品問題，西方人乳腺癌，前列癌都與激素有關...咁當然偶爾食吓或者不要飲用過量都無妨~~當地政府有佢的政策，若話奶類有健康的隱憂，當地的畜牧業又鬧政府啫，你做人民的就唯有自己執生，聽多點有關資訊自己再分析一下!!!
港人較為缺鈣都唔奇，大多數時間在室內冇接觸太陽光...乜你有缺鈣問題咩?!!其實除了吸鈣之餘還可以多點戶外郁動~~
逢是三合一的飲品或食品都係麻麻地，係人貪方便才會購買，飲些要自己用奶用糖調配的較好~~
每個地區或者唔同的商舖買的價錢都唔同，我一般去超巿係樽裝好立克貴過黃色阿華田喎...
森伯幾時冇話自己唔係老人家呢?!!唔好年齡歧視，老人家一定冇牙要食糊仔，早餐糊仔當為一般的牛奶或者麥皮，晨早起身，身體臟腑開始運作，輕飲食較好...發覺一爺兄越來越唔順森伯的養生智慧~~~哈哈哈
病好一排後又唔記得，故態復萌呢！
刪除消息封鎖咪唔知道囉！
森哥講嘅係缺維他命D，想做白淨靚仔唔曬太陽，可以食冬菇都得。健骨唔簡單，仲要加鎂，豆類最豐富。我計過係夠鈣 (好立克、硬豆腐、罐頭魚骨、蝦皮、堅果、豆類)。
年青時都有3合1，老咗戒了。
我日日早餐都係燕麥片加隻蛋/片芝士，好多人都覺悶食唔落，要天天新款。
『發覺一爺兄越來越唔順森伯的養生智慧』 係呀！我唔做應聲蟲/跟尾狗，要建立一套適合自己嘅養生方法。
我諗一爺都係啲富貴病，病完又再拆(大食)過~~~~
刪除有得做白淨靚仔我都想，最緊要係一白遮森伯三樣醜處~~~哈哈哈
現在含鈣質的食物都會食，最多係芝麻粉，加在食物裡幾好味，用來夾麵包，製作芝麻糊都得...蛋殼研磨細末，少量加在食物上補鈣~~
燕麥片加隻蛋芝士，都幾豐富，芝士係奶製品間中會食，唔會日日食~~
森伯豈敢叫一爺兄做跟尾狗，應聲蟲...絕對唔敢將一爺比喻狗仔加蟲仔，一爺天生玉樹臨風，成個風流才子咁款一定有自己一套必煞的養生方法~~
森哥真係食蛋殼！！好意外呀！網上係咁寫，我唔信有人食，呢個人仲要係森哥添。咁食蛋殼有咩感覺，似食蜆時嘅沙粒嗎？
刪除為達標，我每日飲好立克，咁森哥係咪每日都食4湯匙(≈450mg鈣) 芝麻粉/蛋殼？
包芝士貴咗$5蚊雞唔買，轉食7毫子隻雞蛋，燕麥最近又貴咗$個幾，平民手緊，一個幾毫都要算住。
食蛋殼唔係好似食薯片咁，要將佢研磨成粉末，少量灑在食物上一同吃吧，咀嚼時會感覺到...因為唔知是否適合，所以偶爾兼少量食用~~因為之前整親手時，都有博友提議過，而且蛋殼粉可以直接使用~~而芝麻粉就幾茶匙份量，看看配什麼?!!鈣質不能吸收太多，適用便可...
刪除貴咗咪買其他牌子，有時見有些食物貴了就吃第二個牌子，除非是獨家出品或者個人偏好，否則選擇較平的~~
果仁 : 腰果、杏仁、花生、夏威夷果仁、合桃、白果
回覆刪除乾果 : 元肉、杏脯、甜話梅、芒果乾
你講的杏脯，話梅，芒果乾都幾酸，所以一般都好少食...
刪除我每天用10粒杏仁放在麥皮內作早餐，為單調的麥皮加少少質感，果仁最好選原味呀﹗
回覆刪除加杏仁在麥皮一起食，都很有益，以前試過在麥皮裡加些乾果都幾好，不過麥皮現在都冇食~~
刪除我屋企一定有零食。
回覆刪除見你每次去超市都入了很多零食~~
刪除我喜歡食零食，果仁是其中一個考慮，但我有一個壞習慣，無論甚麼零食放在櫃桶我都忍唔到口，短時間內消滅哂佢先至安安樂樂。
回覆刪除相信絕大多數的人一食就未必停到口，要拼力食晒為止，幸好自己都算忍得口，食了一定量就收口，很有趣我買零食不是純為口痕，有時都要飽肚，當煮唔切飯都有野食~~
刪除零食我好少食，間唔中就先會食下。
回覆刪除你的飲食習慣都幾好，零食食吓就算，唔會做成零食癮~~
刪除為免肚餓起來冇嘢食，我都會買定啲玻璃樽裝果仁在家。
回覆刪除通常是腰果或花生雜果之類。覺得原味都好鹹，要拿來浸浸滾水減鹹味。
有時一口氣吃得太多會吃不消，所以要忍口不吃到飽。去弄些其他的食品慢慢吃。
我只是偶爾買這些即食果仁，多數買些餅乾類充饑，很多餅乾都唔錯，食開的麥餅可以當埋早餐~~抵食又飽肚~~
刪除你買是鹽焗嗎??我買的果仁唔鹹，只是少少鹽花，我認為都OK~~對呀，每樣零食都唔好貪口癮，能適可而止最為重要!!
餅乾充饑也不錯，我只愛吃兩款的餅乾吧了。
刪除原來我一時看錯了，現在檯面上已開的一瓶果仁，不是我自己買的原味果仁，是美國牌子的，味道特別鹹。這個也是白色塑膠瓶，不是玻璃瓶。
原來我買的本地蜜蜂園的蜜糖，也不是玻璃瓶，只有醬園的醬才是玻璃瓶。
有些專家說：用塑料袋來裝食物，也不是那麼好。塑膠會釋放出致癌物質，污染食物，對人體健康不利。無奈，現在都是塑料容器充斥。
餅乾容易儲存，只要保持乾爽就很少機會變質，咁當然越早食完才好，麥餅在天時熱都會變味唔新鮮~~
刪除對呀，玻璃瓶好過膠瓶，但膠容器收納方便又冇咁易打爛，所以兩種都有好處...塑膠料的用品容易釋出有害物質，基本上酸性食物一定用玻璃儲存，
我有時見到超巿或者巿面濫用塑膠的情況好好好嚴重，現在的都巿人每人每日都會棄置一兩件塑膠垃圾，有些可能好幾件，望到都怕，最終塑膠走到海洋，魚食了又被人吃了，惡性循環...
果仁類我不大喜歡，餅乾則狂喜，不過零食不宜多吃。
回覆刪除歡迎你的到訪...
刪除餅乾款式多，可隨口味選擇，果仁來來去去幾款，有些人可能怕熱氣就不敢吃得太多~~