好在有佢…

近排真係半夜扎醒都諗起新冠肺炎幾隻字，生活就仿似乜都同個疫症有關，不過又好難講，事實生活就離不開這個話題嘛，因為疫情關係，自從農曆年後就有一段時間home office，但見到現在情況加劇，怕有越來越多感染個案，就唯有再度home office…

所以今篇都轉一轉話題，講下做功課，呢個話題仲悶~~~XXD！

講起功課，如果只係用電子檔交就相當方便，但係有些功課就需要現兜兜一個作品呈現出來，其實對於學生來講真係幾麻煩，有時不是用畫紙顏色筆就可以，要印刷作品出來，就一定要靠印刷公司幫忙，市面印刷公司就有好多，不過可以少量印刷兼有些要求就唔係太多，其實有些細舖都可能接呢類生意，但始終未有搵到兼且有些功課真係趕住完成，所以都幾頭痕，幸好都有些舖頭會接，用來交功課又邊會一印就幾百幾千，寒寒地幾本仔就得嘞，對印刷公司來講可能印量少冇乜肉食，要印大量…不過現在這個時勢，印刷公司都唔會太揀大客定細客，有生意就做~~

所以今次好在有這舖頭，否則要OutPut功課都唔係咁易，若然日後自己有少量書要印，都會選擇他們幫手...應該仲有一份習作要完成，不過家陣呢個時勢，學都某得返，仲話交功課…

近來森聞一二事…

香港人可叻出國際…

今周最大新聞都非新冠肺炎莫屬，是全世界的大事，當然搞到人心惶惶啦！當感到香港疫情略受控制時，世界各地又有蔓延趨勢，身在外地的港人很多都想回來避疫，自己也有親屬留在外地，都會緊張她們的現況，雖然香港有緩和跡象，但不是可以放鬆防疫的時候，昨日看到新聞話外國可以學習香港的防疫模式，忽然間覺得早前港人的盲搶乜，盲搶物變得好有意義，但最少起碼個個都有戴口罩…

呢個口罩在公司已經收藏多時，如非必要都唔會用佢，因為戴了等同戴了豬咀鴨咀…

遺忘很久的街坊情…

面對增多的確診人士，政府都徵用好多地方作這種臨時隔離居所，當然十八區有地方就會徵用，森伯住的區份都有些地方會用作隔離營，當然有些別有用心的人覺得這是個搞分化的好機會，叫區內的居民簽名反對，我當然沒有簽，一來又唔知街站擺響邊鼠，二來又會將心比己，現在疫情大流行，自己都可能隨時中招，若然要隔離的都想有個地方可暫住，所以我唔反對，結果審查後簽反對的人大部份都唔係本區的居民，令我覺得我們居民有昔日的街坊鄰里情…如果個個太自私只獨善其身，齊心抗疫就只會得個「講」字！

養生食材潤下個肺…

有時車程上都有機會聽到廣播，有日無意間聽到介紹一堆中藥，對病毒肺炎有幫助，據主持及中醫師講，這個藥方是國內當年莎士期間，供給當時照顧莎士病人的醫護飲，說他們飲了藥加上有裝備就可以減到零感染，講到咁神級，森伯即刻竪起耳仔聽聽，聽到都冇用，藥方的藥材好偏門，一般人唔會識，不過就知道中藥在抗疫有一定的作用！

森伯一向都有睇睇與食療有關的資訊，想幫個肺打下底就要多食白色的食材，杏仁、銀耳、梨、生蓮藕、蓮子、蜂蜜等…其實在這個時候，最簡單飲些蜂蜜，多食個梨都幾好。

森記「芝」味…

之前好似答應過博友要講下芝麻糊，差點又唔記得，呢個時候大家都係多在家中整下東西食，唔知今趟森伯呢類簡單食物，又適唔適合大家胃口……

正如上篇網誌提到，我會不時要買一些五穀類食材，常加在飯內一同吃，有機穀物最常見都係有機黑芝麻，可能比較普通會較容易買到，買一包都有排食，而近來改食現成的黑芝麻粉，要買都相當方便，漸漸取替了原粒黑芝麻，見樽黑芝麻都放落冷宮(雪櫃)好耐，所以都要認真處理佢，於是搵出部攪拌機攪攪佢…

 撳個掣三兩下就磨出大半樽芝麻粉，可是有機芝麻粉都冇現成咁香，不過都有麻油成份…基本上要食得黑芝麻的營養就一定要攪碎食比較好…

忽然間又挑起森伯鋪老闆癮，即刻想臨時開間…森記冰室！

分別兩個唔同的早餐，一樽芝麻粉可以分幾次整~~~

早餐A：黑芝麻豆漿

偶然都會飲下豆漿做早餐，在豆漿內放些黑芝麻粉，送個包，又係一份唔錯的早餐！！

早餐B：有機黑芝麻糊

加有機兩個字，碗野當堂買貴幾蚊雞，唔好話森伯冇生意頭腦…

材料最主要係薯粉+黑芝麻粉，糖就隨你喜歡，當然甜些少會比較好吃！！

看落芝麻糊杰撻撻，而且又用有機芝麻粉，唔駛問梗好味啦！如果呢碗野真係攞去賣肯定蝕晒本~~~~

仲有米糴！！

近排部份港人的搶購行為，真係「柒」出國際，特顯港人蛇龜的一面，但疫情傳到別的國家都一樣有人去搶購貨品，正所謂患難當前，人的本性都可能是一樣……

森伯上周要去超市買東西，順便睇睇是否真的冇米賣，結果正如自己所料，都不知幾多米賣，我懷疑就近呢間超市根本冇斷過貨，但眼見都冇咩人去睇去買，可能班人之前買落的米仲囤積在家中，仲有排食！

其實森伯最主要來買穀類，今次森伯都係要糴米，係糴小米，因為本身五穀都食得七七八八，唯有買包小米頂住先啦！！

聽講我們常食的米稱之為大米，當大米磨去糠皮後，白米就變為精製了，屬於酸性食物，而小米就是鹼性食物，常吃會令身體常常處於鹼性狀態，就冇咁容易病，所以多吃也無妨~~

今趟呢個帶飯餐就係咖哩薯仔雞肉飯，呢個飯小米淪為配角，而主角當然係咖哩，而佢包粉的包裝都印明「印度咖哩」，食住個勢！呢個時候幾適合多食，唔講咁多，嘆完個所謂印度咖哩飯之後又開工……

森活中的點點與滴滴...

近排都有很多人呻悶，可能人們大部份時間都要留守家中避疫啦，聽講話學生哥可能留到四月份先至考慮復唔復課，亦有很多人要Home Office，森伯過完年後都有兩個星期的Home Office，不過近來都要復工，一返就已經幾個禮拜了。

當然近排最唔慣就係成日戴住個口罩，口罩的存貨唔係多都要慳住用，可以發揮森老伯的慳家本領，因為平時都慳慣，森伯的森活格言就係...慳得一個得一個嘛!!總之就一個布口罩+一個外科口罩，咁就出去"打扙"，仲兒戲過乜!!哈哈哈

呢個時候都要多謝科技的進步，用個Apps就可以同人溝通，都用慣，是因早前的黑暴大鬧尖東，所以迫住要網上授課，家陣就係公司的同事間，因為怕聚集所以都要用Apps搞會議...一個Apps見證住兩個社會事件，而且仲係相隔兩個月的時間內...

有日晨咁早又要返工，見到個晨光初現，相當之美隨手就拍下來!!寓意晴朗日子將不遠矣!!

簡簡單單吔吓葱...

記得以前過年的恭賀說話，一見面就不理三七二十一就會講：恭喜發財!!通常大家都好樂意回應番句：恭喜發財!!時至今日，大家都講的恭賀語都莫過於，身體健康！想身體健康唔會齋講就可以，幾時都要身體力行去做，當然尤其是在這個疫症流行的時刻...

所以唔係講笑，森伯比平時都食多了葱，其實在眾多的辛辣料中，比起蒜頭，辣椒我是可以接受葱的辛辣味，尤其肉粥放些葱花，簡直神來之筆~~特別能夠提出肉粥的鮮甜味！
生的葱除了好味之外，還可以當為一個食療...因為據講葱實在有太多好處，尤其當你見到葱裡的透明汁液，黏黏滑滑的就是最有益處...

懶蟲森有個食法都好方便，先把方包塗上牛油或橄欖油，再在其灑上一些葱花，夾起來吃就已經好好食，我今次呢片包就用了牛油，或者你可以先把包烘熱，再加上牛油葱花就更好味！這個都算是最簡單食生葱的方法...

我諗最基本葱除了可以預防流感之外，對增強抵抗力，免疫力都好重要，尤其是現在的環境...

0拿住支野當係寶...

近來社會事件真係一波未停一波又起，當社會接二連三有重大問題發生的時候，會相信是偶然發生的嗎?!!當然不會！我們只能硬住頭皮去迎戰...繼之前沙士一疫後，數算都已經十七年前......乜咁耐!!@@時間雖然過得快，但記憶猶新，要我們再一次面對這場戰"疫"~~

還記得之前的人盲搶白醋，盲搶板藍根，盲搶鹽，今天的人搶的是口罩，米糧，消毒水，消毒抹手紙，廁紙，廁所水...呢種真係可算是：有心人裝無心人，有心人發放消息；而無心人就瘋狂地搶買...感覺上造成一種社會混亂的現象！！當然森伯冇參予呢種搶買大行動，亦都冇份排隊買口罩，夠用就算！但上班仍需要戴上口罩，雖然侷促少少，但諗諗都有好處，朝早太趕時間可以唔剃鬚，口罩冚住某人知...嘻嘻

仲有必備一支噴噴火酒，因為本身有，所以都冇搶住買，呢個時候有支消毒水，忽然好似冒出一個光環咁！yeah...........森伯真係好膚淺~~

現在生在香港的我們，甚老實地講，疫情不是去到重災區的地步，有部份人已經去到瘋狂失控的搶這個，搶那個，對真正患病的人從沒有什麼的關問，只見有人借題發揮去發災難財，有人借題發揮搞政治，有人幸災樂禍...顯盡人性的醜態，醜惡~~

我都有時跟人講，疫情並不可怕，皆因人間有情，但人間去到無情、無義、無理智的時候，先至最可怕......幸好坊間仍不乏正能量的聲音，森伯都唔執輸，講番句：香港加油，中國加油，武漢加油!!!

仲有病者加油，因為能夠康復過來才是真正有希望!!