家陣市道...

相信到現在，仍有很多人都唔敢周圍行行逛逛，會因疫情關係留在家較穩陣，所謂避疫…我之前上課就少了外出，到現在卻因個疫情就更加少出，因為就算你願意出街，外邊的店舖都未必開門做生意，店員顧客都有點避忌，好似話銀行、食肆都要量體溫，食野帶晒口罩乜mood都冇喇，有些食肆避免客人太貼近仲隔塊透明膠板，所以都係遲下先~~

當然遲下收到政府派發的一萬元，都應該有點消費意欲，雖則話慳得就慳，但政府的原意都係想大家促進經濟，其實對森伯伯來講都唔會話突然有錢就身痕痕，要使要用的都一早買定，未來要使的都要使啦，就算唔派錢吟自己荷包都要~~

有人話出面的市道麻麻地，見很多店舖都變吉舖，難免會使人人心徨徨，就好似自己樓下的商場都有間有名的店舖話執就執，由搬來住都已經有，到某日行過就已經整間吉舖…商場成日行，轉眼間都執得一乾二淨，真係好似人生咁無常…不過旺區的生意應該唔會太影響，差唔多日日經過的荃灣都見有不少人流，相信又未必會太差……

生機飲食之--疫情下，小補身...

到這個時候，抗疫已經有一段長時間，除了防疫措施要做足之外，仲好應該要為自己副偈(身體)好好打下底...

唔健康的食物都少食，它會削弱人的抵抗力，所以要食就食多點有質素的食物，生機飲食都流行了很久，都巿人食開熟食，尤其是喜歡煎煎炸炸，或太濃味的汁醬，呢個時候真係好應該食得盡量簡單，盡量清淡，增強自己的抗病力~~今次就等森醫師幫大家執番劑...抗病養生藥！！

食物都有分五行，白色食材補肺，山藥都係白色自然係這段期間的養生食材...
一包都有幾條淮山，一些做餸菜(今日帶飯餸)，一些用來整養生糊~~

先把淮山及小蕉切一小段一小段，然後拎去攪拌機攪...

攪拌之前放些蜂蜜(隨個人喜歡)增加甜度及味道~~好耐冇食過，清清地當早餐送個包都唔錯，平時食開麥皮的朋友，可以間中用呢個淮山糊代替麥皮~~

都市人平時除了水果之外，甚少食生的食物，而呢個糊仔幾好味易入口是個唔錯的生機餐！！

近來一首歌…

對於港人來講，留意疫情都是每日會做的事，總希望疫症可以快些受控，不過仍是反反覆覆，聽講限聚令都要延遲…唯有大家再等等~~

其實疫情期間，如非必要真的不想到太多人的地方，留守家中就最安全不過，就算平時森伯都係宅伯一名，影響不大，宅在家都有很多東西可以做，我諗呢排很多人都想出多種在家消遣的活動，有人煮野食、有人打機、睇書、睇電視等等，在這個疫情期間，我留意到一首歌又幾唔錯，初時都唔知哪個歌手唱，現今樂壇新面孔就多，但冇個有深印象，以為又是新歌手，就算睇到MV都未知，後來睇清楚才知道是莫文蔚，又Keep得個外貌幾好，初時仲以為邊位後生歌手，可想而知森伯的認星能力有幾唔掂…哈哈哈，或者真係要有些資歷的歌手，才會唱出比較有水準的作品喇，因為不是我一個認為好…後來在網上尋尋，才知這首歌叫《呼吸有害》，大家都不妨留意一下~~

雖然話聽歌都算是呢排留守家中的好選擇，但自己又甚少聽歌，可能要趁有些空閒時間摷返部陳年MP3出來聽下歌仔，唔好等佢封晒塵……

剛剛看到一則G Blog消息，初時仲以為要Cut咗G Blog服務，後來好似話可以換個新介面，話方便手機或平板用，如想換都可以即刻換，我諗森伯遲些少先喇…

畫堂習作...

隔一陣子就要執一執電腦上的檔案，順便要做一個backup，現在電子化，就算進修期間做的習作功課，大部份都是電子檔，方便用電郵傳送~~電子化的好處就是方便，但不好的地方，就是容易修改，例如畫一幅畫，亦可以在電腦修飾，實實在在的一幅畫作反而可以看到它的筆鋒，上色技巧等等...

今趟的進修課程跟設計美術有關的，課程內容都幾多樣式，差不多樣樣有關美術的都會接觸到，始終時間有限，樣樣都涉獵到但未必學到最精，若然要取個高分，學生就要項項叻少少才可...

在備份檔案期間，見到這幅功課是一幅素描，其實素描我都有偶爾練習，在學習期間要練的更多...這張素描唔想太過公正，有種隨意的感覺較好，最後導師雖然評語多多，相信評語也是一種改進，要好好記著...這位導師唔錯，起碼畀森伯有個鼓勵分數~~~~

因為種種原因，學期也拖長了，上到最後一堂，感到如釋重負，聽來很誇張，但事實這個期間都相當吃力，與及之前要辦的事情實在繁多...

預防……

在這個有疫情的時候，講句預防勝於治療都冇錯，我覺得現在人們漸漸對中醫藥比較信任，認為冇咩太大的副作用，而且天然草藥類，食就會比較放心，但中藥都係一門很大的學問，人有分體質，藥都有分藥性，現在人乜都要講求方便快捷，睇中醫都變為現代化，以前就要煲藥，現在只攞幾包沖劑就搞掂，好似沖一杯即溶咖啡那樣，有冇藥效真係要試過才知道…

有日在某間老字號百貨公司的網站裡，無意間見到有樽預防新冠肺炎茶賣，又幾配合個搵銀時機，其實都有列明藥材名稱，佢唔係沖劑見到有真正的草藥，呢種據佢所講只係預防用，不過唔知靠唔靠得住，都係那句，當打下底的涼茶都OK，不過遲下要去買些東西，順便留意下…

記得早前看過一齣外國製作的記錄片，主要講一些西方食療，佢話外國人濫用抗生素都好嚴重，想病快點好，食兩粒藥丸就冇事，結果病菌都有抗藥性變得冇效，身體的抵抗力削弱了，變了無論病菌或者病毒引起的疾病都難以抵擋，所以有什麼傷風感冒，或者今次肺炎都會死很多人，就可能呢個原因，唔好忽視這個問題的存在……

圖片：來自網上

「安拉」填Form…

現在乜都電子化，遲下又話有5G電話，相信呢個世代同電子網絡都係分唔開，所以現在有好多表格都要透過網上遞交，其實都冇壞可以慳返唔少紙，環保D都好，近排要填的東西實在多，有實體表格，又有On-line填form…

「安拉」畀評分…

完成埋最後一堂的課堂，終可以放下森頭大石，在未收到成績之前都可以鬆一鬆…當每個單元完結的時候，都要學生們填一份問卷，最主要評評導師，課程的滿意分數，可是在疫情中，呢堂的問卷都要響網上填…

「安拉」填問卷…

森伯可算係包痴，好多時候肚餓都想食個包，簡單、好味、肚仔又飽飽…某日有人在美X麵包店買包，竟然可以抽到張優惠問卷，只要在網上填好張問卷，抄下號碼就會得到優惠，雖然優惠的銀碼不算多，但要讚間包店又幾醒目，只要畀少少利誘顧客，就會乖乖幫佢填份問卷，抵讚！

「安拉」攞口罩…

在疫情底下，早排都鬧過口罩慌，好多人都要排長龍去買口罩，雖然森伯家中都唔係多，不過慳慳地都夠用，當想慳得一個得一個的時候，政府又話派口罩，據講又話可以重洗，合晒老人家節儉的河車，一於攞番個，網上填完表格後要等兩星期，至於口罩的評語唔好多過好…不過親身試過最準確，現在就等收件…唔知有冇博友收到用過呢?!

聽錯書...

森blog最主要都係主打生活日事，統統都係環繞與生活有關的事情或者從一些事中講下睇法感受，若然要將森blog歸類，應該係處境blog，等同處境劇嗰類…

今周相信最惹起大眾輿論都應該係有位所謂老師，自編個歷史情節去教小學生，相信個詳情都唔駛森伯講…其實就咁聽都已經夠晒不可思議啦，眾所周知森老伯雖然係粗人一個兼且目不識丁，但鴉片戰爭都知道係什麼一回事！所以以前常常聽人講，小學生睇多些課外書是有益的，記得小時，屋企人在圖書館借了很多圖書或兒童刊物給我們看，雖然細個大多以睇圖為主，但也會順道看看文字，從中也會識多一點點，反觀，現在無論大朋友或小朋友都少了看些課外書，一向認為香港是文化沙漠，都唔出奇，對日常百科都認識多點，分析或判斷力都會強點…

有次到歷史博物館參觀，當中都有講到鴉片戰爭呢段歷史，塑像人物就是大名鼎鼎的林則徐，經過呢幾日的了解，初時文盲級的森伯以為是虎門燒鴉片，係用火燒鴉片，原來正字係銷(毀)鴉片，將一箱箱的鴉片倒落海...都總算識多個正字同歷史啦~~