相信一上網就大把健康資訊任你睇，尤其飲食方面，相信大家或多或少都會留意下，聽到的多多少少你都會查證還是照單全收?!!
感到這些資訊有時似一陣風，都會帶風向......以前就話多菜少肉，當然有很多所謂的專家，營養師走出來話肉類的唔好處...之後陣風又吹到有機與冇機...再之後又吹到超級食物...再吹向碳水化合物糖和澱粉質身上...到現在陣風已經再吹到無麩質那處...遲下唔知又吹乜~~~~有時覺得如果真係信這些所謂專家，營養師講乜就信乜，就真係咩都唔可以食，最可笑就是呢類所謂學家專業人士就話咩都唔食得，但又冇一樣可以替代的食物，所以我咪話得個吹字0羅...
既然這些資訊都有帶方向的嫌疑，好可能背後同商業利益尤關，而我認為如果太驚就變得什麼也吃不得，好危險...睇完咁多資訊反而令我得出個結論，就係飲食適可而止就可以，大吃大喝就會壞肚皮，呢句就係真既!!!!!
南瓜雖然係澱粉醣類蔬果，但呢排吃多了，蒸熟的南瓜蓉，用處多多，撈飯送粥，甚至做個南瓜糊都一流...
相信大家的消費券都用得七七八八...更有些人券一到手一兩日就駛晒，本身我冇咩特別需要買，所以慳慳地都用到好幾個月，呢陣子疫情又緊張起來，晚上已禁堂食，不知稍後會否有其他措施，所以現在就少出街，好在之前疫情大致緩和，就可以出街消費一下~~
因為之前我想雕個圖章，但現在雕圖章的地方不多，少人需要就少人賣...知道國貨公司有雕圖章服務，所以順便去逛逛，而且要買其他東西...
雖然見到些寶石雕件都想買，但見有些寶石一粒都已經超過成份消費券，而且對貧窮人家的森伯來講都算奢侈，而且仲要攞消費券糴米...哈哈哈哈
本來都想買一件半件工藝品在家中擺擺，可是實在太「高貴」了，森伯副身家實在高擧唔起~~以為豬仔擺設比較貼地，但都要成千元架!!!!
相信很多人都看不起國貨，認為古舊又老土，其實這裡的國貨很多都是手工藝品，呢份價值不是人人懂得欣賞...
文房四寶，紙、筆、墨、硯...每樣都是一種學問，相信用得著的人也越來越少...數百元一支毛筆，都總有它的價值!!!
後來雕了個圖章，等了兩三個字左右可以取，而雕圖章要逐個字計，個名三個字就要幾百蚊，相對雕一兩個字就會平D...而且仲要揀舊森水石!!我估最低消費要五、六舊水左右起!!我揀的是墨綠色壽山石，都唔敢要咩花款之類~~哈哈哈
查實都冇認真大購物，真正純粹貴精不貴多...哈哈
平時有留意開森blog，都會知道森伯有儲石仔，當中不一定是名貴的，只要有特色的石頭，森伯也會收藏起來，早前上課也曾試過以拉長石作為期考功課...
不知那時開始，喜歡了石頭，它們不但可以長時間保存，正所謂海枯石爛是比喻長久的意思，所以送人送寶石是最好，而且石頭平貴也有，最重要是可以把這份森意長久保存...
今次想介紹這種綠色的寶石---綠眼石，特色是綠色有大黑點，看起來就似是 顆眼睛，所以叫綠眼石...森伯不會長時間把它們暗藏起來，間中也會拿出來看看，有日見到這塊天然的綠眼石出現一幅畫像，畫像就仿似一隻帆船在平靜的海中航行，就正正是一帆風順的意思嗎!!不知大家看到嗎??
經森伯畫一畫，大家會否覺得呢??!!咁你都可以話森伯畫乜都得既~~~哈哈哈
當然新年第一篇blog要來個好寓意才行!!!!
霎眼又到新一年，希望新一年大家都有新景象，過去時間實在太鬱悶，大圍方面就有疫情，經濟，甚至社會政治方面都令人感到困惑...而我個人過去一年，就有不順的事情，當然跟身子弱有關，可惜就並不是財多，所以望新一年身子強，財旺兼且事事都旺!!
至於今個年假就真正可以休息抖抖，可以訓到自然醒，食到自然飽...始終假期都要過去，之後又要回復忙東忙西的日子~~
現在可能是日短夜長的關係，收工時候都已經天黑黑，反而有種放鬆感，又因為接近聖誕又感受到呢排很有放假氣氛，對很多人來講一上到車，都會頭耷耷玩手機，但森伯儘量都唔會睇太多手機，通常都會望下窗景，又加上現在天朗氣清，感到天色很舒服...都已經發覺了一段時間，清空下除了見到皎潔的月亮之外，仲見到有一顆如大光燈的星星，顆星星很大很亮，而且閃亮了夜空，車子去到哪裡都會見到那顆星星跟到哪裡，仿似與星同行一樣，相信這個時期，大家也能看到的，而且見到月亮就應該見到那顆大星星在附近，又唔知大家有冇留意到??!!
不經不覺又到年尾了，聖誕都越來越接近，今年本想影些樓下的聖誕佈置放上blog，殊不知竟然乜都冇，而最叻叻就係出年又話要加管理費......真係唔知咩玩法!!!!
其實市面都唔太多聖誕氣氛，一來還是疫情關係，二來相信聖誕經濟都是一般，商家就好似森伯果類慳得就慳，所以唔會大手筆搞什麼大型佈置...有日行到某間生活百貨公司裡，都有少少聖誕佈置，順便影來增點聖誕氣氛，而且用新過一排的"拿唯"手機拍，看來質素都OK，基本上現在外出吃東西都要掃安心出行，所以智能機都要跟身，至於長者機就未必時時用到...
森伯同森blog都要放下假抖抖，祝願各位節日愉快，新年進步...
相信現今身處的地方，都會以兩文三語為基本，上一代的人懂得一種外語已經很吃香，冇錯，的確以前的港人都會當普通話係外語，但時至今日香港回歸祖國的日子都已有多年，普通話自然都成為香港的基本語~~
基本上森伯最流利當然係廣東話，母語關係，至於英語、普通話要講的機會唔多，所以都好一般啦!!發覺公司最為看重的，都係英語，其次係普通話，廣東話更次要...有時都好怕廣東話被邊緣化，不過現在始終都係大勢所趨，很多公司也是一樣...
其實我覺得港人都幾著數，著數在兩邊語言都可以涉獵到，基本上殖民時代會著重英語，到現在反而看重國語，現在一打開新聞，都係兩個大國對峙，相信日後呢兩種語言都是大眾必學的大熱，早學就早撈到油水吧!!!!
都順便問問大家有識之士，國語跟普通話有什麼分別，以前聽人講國語係指台灣的語言，而普通話係指中國的語言......這講法又不知對嗎??
