五穀豐收賀鼠年...

家陣仲係新正頭，多點正能量，思維正面，運氣都會好一點!!!!

時時覺得吃得健康幾時都係有著數，過年期間吃了不少糕點，很多人認為傳統糕點好肥膩或者好甜，對健康麻麻地...既然新春好意頭，就整番個好意頭的五穀豐收糕啦~~~聽個名都感覺到相當健康!!!!

因為現在間中會整些饅頭作為早餐，街外饅頭多的是，為什麼仲要自已整，因為自己整可以配搭其他有益食材去整些養生饅頭...

其實正確的五穀係有米、豆、麥、粟、小米等的穀物類，但森伯臨時都沒有預備太多，總之有益的食材都放在內...

當中包括麵粉(小麥)、扁豆、蕎麥、芝麻粉、黃豆粉...呢五穀養生食材!!

當然冷冷的天氣要預早發酵，搓好麵粉後，可以把所有材料加在一起搓搓搓~~~最後就蒸佢幾個字就完成!!!!

蒸出來的糕賣相都相當靚仔，奢望奢求今年可以靚靚仔仔...當然最緊要係正如養生糕咁健健康康!!!!

森伯同大家拜年...

今日大年初，祝大家事事如意，大吉大利~~

過去一年社會充斥著幾多瘴氣，直至今日過年期間大家又要注意衛生健康問題，昨晚的外出團圓飯不時見到有幾多人口罩隨身，令人有少少的憂慮，不過新一年來到，新景象來臨，祝願各人都有個好的開始，心存(念力)孽瘴總會隨之而過去，正面一點吧!!!

話雖如此，但見年夜飯的市道都唔差喎，大家亦真正開開心心食餐團圓飯，OK唔錯!!!!對森伯伯來講，過年都有慣常的節日活動，畢竟都係過時過節嘛!!!

如果大家對葱，薑，蒜沒有忌食的話，呢排真的要吃多一點增強抵抗力...森伯要食多D葱，一來想個人聰明D(好意頭)，二來可以打下底!!Yeah!!!

再祝大家新一年，身心康泰，身體健康!!!!

過年記趣…

既然過年將至，本來想好似一些舖頭準備收爐，但忙裡偷閒又可以寫番篇blog，寫些過年話題就合時宜啦!!!

講講現在過年前夕，相信對很多人都比較忙碌，我諗以前的人會對過農曆年比較重視，有很多舊有的習俗都會謹守，臨近過年一定要買新衫新鞋新底底...現在的人買新東西隨時都可以，唔會等到新年才買，所以以前的人會準備些錢去過年，過年關好重要架嘛!!買乜買物添置新東西都要錢架!!!相信現代人都冇邊個會在意了，覺得又同平時差唔多，只不過多些氣氛而已...

唔知大家blog友過年前夕有冇咩舊有習俗守呢?!有一樣我最記得就是在年卅晚要洗碌柚水，寓意將舊年的穢氣濁氣洗淨迎接新一年，還記得阿媽會煲定一煲碌柚葉水，到沖涼時拔一杓碌柚水，到差唔多沖完的時候，用來淋身，以前的冬天特凍，淋一杓的冷柚碌水簡直肉體的一種磨練...

所以諗到碌柚水都同個凍字扯上關係~~時代唔同，要洗碌柚水都方便很多，一大支有排用，又唔知呢類沖洗法靈唔靈呀!!!

森伯又冇買，反而覺得用真碌柚葉水仲有一種天然的柚香味，都幾醒神，醒醒神神迎接大年初一咪仲好!!!!

果效...

電視節目好少時時睇，不過耐不耐就會發現有些電視節目都幾唔錯，一講話同健康有關，都會睇一睇，講醫學就可以知多0的，講養生就可以活學活用，講食療到有需要時就用得著，近來有些東瀛製作的節目幾好，內容都幾實用，收看的時候介紹了兩種常見水果，對身體都幾有好處......


一向都有食牛油果，不過做早餐多，平時都會把牛油果肉+蕉蕉+鮮奶或淡豆漿，一併攪拌為果糊而且好好味!!!!!但自從節目裡介紹牛油果的好處後就吃多了，就咁食都唔需要搞太多，吃出食材原味道，據講牛油果對於關節靈活有著微妙的效用，平時常常聽人講覺得關節咯咯響，呢種情況就最適合，只要定期適量食用就會有幫助，有效地治療這種關節退化...
今次冇時間慢慢攪糊仔食，用匙羮把蕉仔同牛油果肉壓成蓉，搽下餅乾麵包當果漿！

活在草根的森伯，餅乾上加pat牛油果醬食，格調當堂提升左~~~XXD

而另一種常見的水果就係奇異果，佢對於嚴重的便便唔暢通係勁有幫助，有人親身試過都話OK好好，若有此煩惱的人可以一試...

森伯寫奇異果最主要係一般綠色的奇異果較為酸，幾廿歲人都未試過正式食一個奇異果，講到點好都冇用就因為酸唔食得，但之前都有聽講金奇異果好甜，可是沒有嘗試，既然講到咁好點都會試下啦，估唔到真係幾甜...

唔係講笑森伯真係第一次食整個奇異果咋，總之多點食水果都係好！！

年又過年~~

人多事做，特別覺得時間快過，今年有冇咩做過呢?!反而覺得每日都係差唔多，要數今年自己的十大事件簿都唔易，日日月月都冇咩分別，霎下眼又到年尾~~

好多人都會今天定下一些個人目標，希望來年可以向著目標前進，稚嫩的森伯以前都有，但到新一年漸漸都忘記了，所以今年都唔會定咩大目標!!可能人漸漸老邁，反而每日可以充充實實已經係最大的願望!!

入冬時節天朗氣清，晚上更顯得很舒服，在橋上看看夜景都相當寫意!!!

初時以為個假期都幾長，但放下放下又差唔多放完，今個假期都不外乎食、食、食，都冇咩所謂啦!!新一年對於森伯伯的森願都不外乎老當益壯，身心康泰，更望早日脫貧，不過脫左咁多年都脫唔到~~~~~XXXD

所以今年都唔求什麼，唔尋什麼...總之樂在其中就好了!!!!

年尾流流講森事...

霎一霎眼又到年尾，一年真係好快就過去，本來都唔想動手去打日誌，不過睇睇日子，都要講講年尾的回顧，始終到這個時候返工都自在很多，好多人都會清假期，當然森老伯都唔例外!!明天開始有假放，所以趁今日都應該打番篇日誌!!

今年對我來講都係營營役役，又工作又進修，都尚算充實，起碼都唔駛成pat爛泥咁，哈哈哈!!今年不能不提就是有關社會事件，對森伯呢類長者來講，可謂一等良民，過境都特別安心，唔搞政治又唔會搞破壞，反而畀政治搞番轉頭...哈哈哈，我諗呢段時間好多人都有同感...

國與國之間的鬥爭，做人民始終都會首當其衝，影響最大，無論平民百姓又好，做爛頭卒又好，所謂萬事自有定數，再緊張再激動，都只不過是浮生空自忙!!!即是話做人輕鬆面對一切，不用杞人憂天地過活~~這一刻有些人與其，要千方百計去找政府錯處來咒罵一餐，倒不如化咒罵為祝福，幫大家港人做點實事吧...經此一役後，反而個人的民族意識強咗!!!都係好事嚟嘅!!!

森伯忽然好有藝術家脾氣，玩即興，這篇是即時寫...放假前都喜歡逛一逛超市，執下有冇什麼想吃的東西，現在都凍了，明日唔需要早起可以暖在被窩中，又食又訓仿如一條大懶蛇，準備冬眠...森伯老人家梗係想喇!!!!!

在此祝大家Merry Christmas and Happy New Year...

森邊事...

見    識~~

近來每日的生活都可以用營營役役來形容，總是有很多事要做或者等著要去做，相信大家都知森伯老人家唔可以勞累太多，所以適當時候都要好好抖下...
常常聽人講生活太過緊張，就會忽略很多身邊事，為了不被忙碌所蔽，都要留一留意身邊的事與物...

早前同大家講過曼德拉效應，唔知大家又有冇真係去留意呢個效應有冇做成什麼改變呢...所以每每經過錶舖都會去睇睇羅馬數字錶，發覺真係好奇怪，所有羅馬數字錶的四字都改變了...
以前好記得羅馬數字4係IV，但現在就變成IIII，有日經過錶舖刻意去睇睇，真係第一次見識~~~




閉    關~~

如無咩特別情況，讀呢個課程都接近尾聲，正所謂臨別依依﹝忽然覺得平時冇乜文化兼且粗人一個的森伯，識得用呢個四字詞，文化水平又提升少少XXD﹞，所以有晚放學後都四周睇睇，呢排涼涼地在晚上就更加舒服，尖東的晚上繁華又有迷人燈飾，記得在上年聖誕都有走到這裡拍過幅燈飾相，因為平時甚少晚上去到尖沙咀區，不過這一段時間就時時去，夜景很美！

現在應該係埋尾的階段，亦是應該全森全意做埋份final project的時候，唯有這個令月唔出Blog，不過有閒情時亦會覆留言跟拜訪各位留言者！