講講現在過年前夕，相信對很多人都比較忙碌，我諗以前的人會對過農曆年比較重視，有很多舊有的習俗都會謹守，臨近過年一定要買新衫新鞋新底底...現在的人買新東西隨時都可以，唔會等到新年才買，所以以前的人會準備些錢去過年，過年關好重要架嘛!!買乜買物添置新東西都要錢架!!!相信現代人都冇邊個會在意了，覺得又同平時差唔多，只不過多些氣氛而已...
唔知大家blog友過年前夕有冇咩舊有習俗守呢?!有一樣我最記得就是在年卅晚要洗碌柚水，寓意將舊年的穢氣濁氣洗淨迎接新一年，還記得阿媽會煲定一煲碌柚葉水，到沖涼時拔一杓碌柚水，到差唔多沖完的時候，用來淋身，以前的冬天特凍，淋一杓的冷柚碌水簡直肉體的一種磨練...
森伯又冇買，反而覺得用真碌柚葉水仲有一種天然的柚香味，都幾醒神，醒醒神神迎接大年初一咪仲好!!!!
有冇碌柚葉成份㗎？
回覆刪除我冇買冇睇到成份標籤，我估佢有柚的提取物卦……
刪除自從沒有跟父母同住，除夕夜已沒有用碌柚水沖涼了。
回覆刪除呢類傳統習俗，上一輩人會這樣做，到新一代人嫌麻煩通常都係可免則免~~
刪除我住徙置區係去公共浴室用桶冲凉，加少許柚葉水落桶內熱水，唔凍嘅茶浴。避開人潮會喺中午4點冲凉，可快啲著新睡衣/運動套裝。初一早上換套新衫靚靚見人𢭃利是。
回覆刪除年卅晚阿媽又會蒸蛋糕、年糕同蘿蔔糕同其它祭品 搭正十二點拜祖先。年糕面插幾粒紅棗。
年卅晚阿爸會開大鑊油炸好多嘢如角仔、蝦片、咕嚕肉、煮齋嘅粉絲和腐竹，熟油留番黎日後煮餸。
初一中午食齋，晚黑才食開年飯。人多要分兩圍台食，阿爸一個人煮咁多餸真厲害。過年好多嘢做。
過年街市唔開，會買2隻活雞自用，食時由阿媽做劊子手操刀，有雞紅食。試過有雞生蛋，咪食到最新鮮雞蛋。
我陪父母去買年貨， 要幫手拎囉！唔好睇少我小學雞，幼稚園、小學要日日撐8層嘅天台學校。屋企個大油桶水缸由我和對上一級個阿哥兩人負責，見冇水就要去公共水喉房擔水，手力、腳力、周身都咁有力。
接細路財神。
每逢過時過節，有一爺兄的留言講回憶，特別覺得好睇…細心睇過，總係覺得以前或者上一代的人，過年有氣氛很多，最少起碼到現在我們仍有些回憶記趣與人講下分享下，相比現在的小朋友，日後大了，過時節都冇咩可以講，頂多都係聽下賀年歌，去出面買糕返來吃， 再遲下就更加唔似過年……
刪除你現在大了，在過年期間有冇幫家人煮些賀年食品，餸菜孝敬返家人呢??睇完篇野，就覺得要感謝父母輩過去所做過的，到今時今日才有一個回憶~~~諗諗下以前的人雖然新年忙忙碌碌，但係開心勝於一切，時至今日森媽仍然會整好多糕畀我哋親戚食，相信到下一代人，買糕回來的多…不是太多人會自己整，或者識整，以前的人自己唔整就冇得食，變相什麼都會去學做，而家周街都可以買到， 甚方便~~
記得以前總會把檯放賀年食品，檯上什麼都有，包括煎堆，碌柚，糕點等
等，過年期間張檯列為重地，檯面唔可以放利器，包括刀具叉具等…中國人的社會，就一定有啲禁忌架啦~~
係呢!!!點解你細時過年要著運動套裝?!!
唔買睡衣，運動裝就係睡衣，平時落街買嘢著住運動衫好過睡衣啦！
刪除祝 森哥 新春如意 身壯力健 財源滾滾來 好快揾到另一半 百子千孫。
保証雙親食足一世，照顧一世唔入老人院，陪伴一世。唔可以 承諾三生三世，下一世要等投胎後至算啦！
刪除相信一爺兄細個，著住件新的運動套裝，醒醒目目，得得意意去拜年，實得到大人長輩們歡心，利是都大封啲……
刪除身壯力健，百子千孫……好似同老人家賀壽咁款…哈哈
我都祝一爺鼠年行好運，事事如意…
你都好孝順喎，多些陪伴老人家，呢樣才是他們最想要的…
約係我嘅中學時期家庭經濟狀況好啲，又興著運動服當睡衣，大量生產又平啲，要個滿青春痘青少年扮得得意意有難度喎！😁
刪除森哥哥唔係1月份生日咩！ 咁預祝啦！新年流流祝福語講多啲。
謝謝！我滿足現狀，覺得生活尚算順利。
年輕時係讀好書、打好工、賺多錢，中年後思考人生意義，立定決心要做一件偉大嘅事情，令我今生無悔，都為我自己咁嘅行動而驕傲，剛好兩老係時候需要多多貼身照顧。咁森哥現階段嘅生人最大意義係咩呢？
著住運動套裝訓覺會舒服咩?!!……記得我有一段時間都好興著運動服，當便服著!!!有暗瘡可能仲得意呢!!!
刪除想查探森伯的生日，做咩?!!想送份大禮畀森伯!!!!咁好!!!!多謝先~~~XXXXD
現在的人好少滿足現況，尤其是都市人~~~
森伯反而想知一爺兄的偉大事情，最後有冇實現到呢!!森伯人到老年，只係想養好身子，免得老來高乜高物，你話咁有冇意義呢!!!
好好瞓架！森哥未試過去宿營/露營咁瞓，唔通係……祼睡？
刪除我享受做鄉下人易滿足，早食早睡早起。
2個長時間使命已經達成了。
減低患病機率無論任何年紀都係有重大意義。
去露營求其啦，鬆身衫褲比較舒服，呢個時候裸睡好易冷親，尤其家陣非常時期……
刪除使命已達到……咁咪幾好，向下個目標進發!!
很多習俗我已不依了，但在年卅晚要洗碌柚水，一定要！
回覆刪除森源收爐前，先祝賀新年快樂！明年再會！
當然喇，很多舊有的習俗，現代人都不依了…我現在都沒有洗碌柚水~~~~
刪除我都祝Stella明年事事得意快樂，旅遊學習都事事稱心~~
通常年三十晚，屋企係用碌柚葉煲水沖涼，所以唔會買上面的沖涼液。
回覆刪除