畫人像…

雖然話喜歡畫畫，但都有些東西不會常畫，或者唔太擅長畫…一路以來畫的是漫畫類型，久而久之畫什麼都帶點漫畫化，自己弱項都算係畫人像，以前養鳥就會畫鳥，但人都是天天見，但人像畫又未必會掌握得好，可能跟專注唔專注有關，有日見到某商場有些畫畫班，見到人家的人像畫畫得好好，當然啦有番咁上下先會放出來作生招牌，吸引想學畫的人…

人像畫要畫得好唔易，如果畀森伯畫分分鐘畫到卡通化，不過畫一張正統的人像素描平時就唔多需要，素描係畫畫的基本功，所以素描都要時時練…不過自己真係冇咩恆心…幸好今個課程樣樣有關美術的東西都可以掂下學下，阿Sir正示範人面比例的畫法… 

 學習素描感覺以為好奄悶，殊不知好笑在後頭，阿Sir要兩個學員一組互相對畫，畫完的作品由導師畀評語，當然學生唔會畫得好專業，而且時間不多，畀評語的時候只能用爆笑形容（不過大家放心，森伯幅傑作冇被爆笑…）明明森伯都好認真畫，到最後的評語都係好漫畫…

人去留畫...

喜歡畫畫的，很自然就會有留意有關方面的事情！！

亦都相信很多喜歡畫畫的人，總想創作一些作品讓人認識…讓人知道…

當然自己也不例外，但作品能不能注入人們的心中，相信是不容易的！！最近就有兩位出名的畫者逝世，真的感到有點婉惜…

阿　虫

阿虫的作品冇記錯應該是90’s已經見到他的作品，一向都喜歡看畫之餘還有些人生哲理可以學習，亦都好欣賞作品當中有水墨畫的感覺，而水墨畫又會畀人輕鬆隨意的一種感受…一路以來也有留意阿虫的作品，記得好耐之前有買過他設計的書簽卡，但忘了放在那裡，唯有找到才影畀大家睇睇… （網上圖片）

 或者有人會覺得哲理性的意思來來去去也差不多，當人冇事的時候就只係一幅畫，但當人唔順心的時候，幅畫就會畀到人好大的能量， 亦都係阿虫作品的價值所在…

櫻桃子

小丸子的作者，小丸子呢套卡通相信陪伴唔少朋友成長，亦冇記錯都係90’s才知道有小丸子呢套卡通片…其實唔係人大了無留意卡通，只係發覺現今新製作的卡通完全唔知講什麼，所以都冇睇…卡通片的角色能夠入屋，相信都好睇卡通片的主題是什麼，最好睇的卡通通常都係跟生活有關，容易有共鳴…（網上圖片）

小丸子，蠟筆小新都係呢個種類！小新純粹睇下卡通輕鬆下，但小丸子卡通得來又有個意義在背後，小朋友睇幾適合…或者亞洲人的卡通，亞洲人睇較易有共鳴…

有日去某大型商場裡面的小丸子餐廳，見有趣就拍下來，相信在香港小丸子的確受歡迎…

現在讀美術才知道，藝術作品可以好廣泛，總之作品跟人民生活有關都可算是一種美，一種藝術，畫作當然包括在內，或者作者唔可以永留，但作品卻可以長存…

袋裝日規...

日子快過年年過，完全唔覺唔覺一年又差唔多過了一大半，有時真係覺得時間快到得人驚...
唔怪得時光就係隱形小偷，靜靜雞偷走我們寶貴的光陰，一向都很喜歡與時間有關的物品，例如鐘、錶、計時器、沙漏等...

唔知其他人會否這樣，我時時都會留意住時間...現在的人冇了手機會周身唔聚財，但森伯睇唔到時間就會唔舒服，好似時間停頓了，跳到一個靜止的空間裡~~~異常不安...唔好話誇,係真架~~~

有日見到呢個日規形的鎖匙扣，原來都有佢的實用性所謂的 functional art，藝術品得黎又有實用性！可以說是一個袋裝日曆卡，蠻有傳統特色，造型似個古時日規，買來送給人就最好~~
日、月、時間都可以自己手動調校，而且又係不鏽鋼有排用啦...呢個包裝唔拆，因為要送給人，日後有機會再見到都要買番個自用。

警惕下森老伯要珍惜當下時間......忽然間有啲唏噓......

種善因；得…動物旗仔～

我諗對於大家來講，周未賣旗已經再沒有人理會賣的是什麼旗…因為有時都未必係為人熟悉的大非謀利機構，好多時賣的旗乜會物會都有～至於森伯又有冇幫手賣過旗呢？！又好似未賣過喎…在森伯小學生嗰個年代（數算下應該係白堊紀年代…XXD）比喻年代久遠啫…因為小學生會幫手賣旗，都算係一種生活體驗…

好似過去的周末就是動物愛護協會賣旗日，其實好早我們就知，因為有親人申讀賣旗…現今的父母親，很想有些活動可以同子女一齊參予，當作親子活動，目的都係想小朋友多些參予一些課外活動，閱歷都可以有點東西寫下...

通常有咩籌款活動，親朋戚友梗係第一浸贊助架啦…若然好似上周六咁，撞啱落好大雨，賣旗的都幾辛苦，街上冇乜人之餘兼且要人攞錢出來又唔方便…原來可以在商場門口賣，但唔可以入商場內賣…我都係現在屋企人講先知咋，唔怪得好少見人在商場裡賣旗啦…至於賣完的旗袋可以在附近銀行交還，又幾方便喎…

記得前陣子有人提過賣旗用（發達通）捐款，最後又唔知有冇實行到，想像中都唔係太方便啦！反正拎銀包出來又唔係太麻煩，或者只係自己井底森的愚見…

 今次愛護動物協會的旗又幾特別，張張都印有不同的動物圖案，賣旗之餘又可以揀你喜歡的動物旗貼，又幾有諗頭喎…

森話家常之－－夏日炎炎吹吓水…

俗語有云夏日炎炎正好眠，呢句說話可能係以前的人所講，以前的夏天都冇咁熱喇，炎夏涼風當然訓得舒服…可惜今時今日真係熱到訓唔到，仲話正好眠喎～～

好多人都覺得今年的夏天來得早，早幾個月前日日都係三十幾度，但香港都尚算OK，反觀世界各地都熱到黐晒線，有些地方的溫度更是歷史新高，受著熱浪侵襲…

天時暑熱，畀著森伯出去行一行就成身濕透，眼見都有幾多人會帶埋把風扇仔出街，我唔會帶太多東西出街，若太熱都會走到遮陰處避避，大家都知森伯呢類長者好易中暑架嘛…不過必要時都有把類似叮噹的竹蜻蜓風扇仔帶出街既~~

雖則話凍野傷脾胃，但炎炎夏日都唔會理得太多，本應要吔吓應時食品…雪糕，但暫時都係要忍吓口，遲下先買啦～～不過仲有年年夏天都必吃的消暑聖品西瓜，呢排真係時時食，本來都想一瓜兩味，除了食之餘仲想打杯西瓜汁消暑下，不過唔想大熱天時搞太多野一於就咁食算了…

講起西瓜，忽然又令我諗起冬瓜，以前的農村人怕細路仔太熱，就會搵個冬瓜畀個細路仔攬住訓覺，話有消熱降溫的功效！！不知是真是假，森伯都想想地效法…

 總之呢一刻，有咩好得過捧著個西瓜慢慢嘆呢…

從休養中出發…

其實都休養了好一段時間，人都尚算OK…之不過在這段期間都有幾大的無形壓力，幸好工作方面唔需要太緊張，有醫生寫假紙證明就得喇…但至於上堂就係最大的壓力來源…個課程唔會因自己休養而暫停，所以時時都問自己OK未？！...當然去到見醫生都唔會建議返工返學啦！最主要怕傷患未固定未復元，但自己覺得可以應付…始終想想返工返學都係坐為主，又不是擔擔抬抬嗰類…兼夾諗起四個字，忽然令森伯振作起來點都要返一返工，至於嗰四個字當然唔係咩努力加油，就係手停口停囉（呢句原動力大啲！）…在有醫生紙的情況下，都要返工…最主要都係要適應返工節奏～

至於講到返學方面，有人話不如退學…我當然不想前功盡棄，如果呢個是興趣班之類，我諗會考慮退學…因為始終壓力幾大，現在唯有見步行步咁啦…

在工進修都唔容易，反而讀書壓力唔大，本身都算有少少美術底子，問題就在於能否順順利利完成整個課程才是重點…

森記糖水之簡易芝麻糊…

早前同人講返舊時住的附近，有很多路邊美食檔，當中總會有檔賣糖水，雖然不是有名店舖，但用料味道都係好好，相對而家就算店舖食，都總係差很多…

不過講起糖水，港人都唔會陌生，以前的人飯後會煮些糖水大家食，相對現今個個聽到糖水都耍手擰頭，都唔想吔太多甜東西…既然現今個個都怕太甜，包括自己都係啦…所以森老伯介鉊個既簡單又健康的糖水喇~~

材料甚簡單…蕃薯粉，芝麻醬…

先用適當份量的蕃薯粉開水，用煲煮成杰撻撻的薯粉糊，跟住拔兩匙的黑芝麻醬放落薯粉內一起煮，雖然兩匙份量以為少少地，但已足夠……一放落之後就要不停攪拌，直至麻醬溶掉為止，糖可以不落，因為芝麻醬本身有糖…熱騰騰的一碗芝麻糊搞掂咯！！

  

至於用的芝麻醬在普通超市買就可以，本身用來搽麵包果種…

你諗下…傻男森伯都識煮就知幾簡單啦～～