森情小品文

2019年1月30日星期三

一帆風順…

早前都跟大家提過今年第一日返工，就有奇遇…看到自己位的白掌開花，真係完全估唔到，因為全是水種…據知有些本來會開花的泥種植物轉了水種後就會冇花，其實對於森伯來講，純粹觀葉植物都唔錯，放在電腦側邊眼累累就可以望一望綠葉，對眼睛都幾好，所以一直打理都已經有好幾年了…殊不知今年突然開花，初時仲以為點解個位有朵花，再看個究竟才知原來棵白掌開了花，個個同事看到都話幾得意…

我認為都市人，無論在屋企或辦公室裡都應該種番些少植物，個個人都話冇時間打理，其實有些水種植物好易照顧，因為水栽種物又稱為懶人植物，諗諗下真係想搜集多些資料寫本書，介紹人種下水種植物，間中換水、施少少葉肥、噴葉，就已經相當簡單…

一上網睇資料，原來白掌又可以稱為白鶴芋，又叫一帆風順，因為白色的花就好似白色的帆船一樣，驟眼看真似一隻小帆船迎風飄揚，個寓意都唔錯喎！原來它的開花期在夏季，何解會在呢個時開花呢？我諗佢會保持到農曆新年期間…

2019年1月23日星期三

森話家常…唉～～

越來越發覺自己有鋪勞碌癮，點都要忙來忙去先覺得耆英生活充實…不過人窮就要忙…所謂的窮忙族嘛～～唉～～

霎吓眼又快到農曆新年，似是仲有排其實已經迫在眉睫（忽然覺得目不識丁的森伯好識運用四字詞…）因為收到舊博友的一張新年賀卡，真的很有心！！節日裡都不忘祝福森老伯～

祝福詞幾時都啱聽，由其是當你唔舒服的時候…近排唔知做咩?!!好似畀人落咗毒打降咁，周身好似畀人打完咁…有人話係虛火原因，都有可能架！忙極都要休息，乜都做唔到又恐怕耽遲了各樣各樣…迫不得都要因為臂背痛而見見醫生～～

呢排忽冷忽熱又加上潮潮濕濕，都有人中了招咳及感冒…自己平時食得清啲健康啲都冇咁易中招，偏方就冇乜，不過有同事話用啲青檸仔切片浸熱水飲會幾舒服，所以每人贈一粒青檸，森伯伯怕酸唔敢飲，變咗粒搓手香薰，就好似有些過年甘桔咁，搓下搓下就有香味，夠晒天然幾醒神！！

我都唔知家陣年廿幾，冇睇個月曆，都係時候去執執個丐幫look，眼見個個都話要剪髮，近排臂背痛搞到人唔似人，或者都要靠剪髮沖喜下…哈哈哈～今個過年靚唔靚仔就真係靠呢鋪…唉～～

2019年1月9日星期三

森伯話當年之－糧油雜貨…

踏入新一年已經過了好幾日，當然有新就有舊，家陣潮流興懷舊，無論食得唔食得的東西，加上「昔日情懷」四隻大字就變得有價值…有時都會諗諗舊的東西有實質的價值，還只是一種生意價值呢？！

對於新一代的人要買米，當然會去超市，我見過油站都有米賣…不過對於上一輩的人來講買米當然去米舖，要買米就要帶個米袋去買，夠晒環保…查實米舖唔單止有米賣，還有很多糧油雜貨，而米舖都有送米服務，咁當然要買得多才會送啦…

仲有雜貨店，見到有售賣文具，玩具，糖果…而呢種幾合一的舖頭森伯好似冇乜印象～～記得細個有辦館，買糖果…而文具店就買文具、玩具、運動用品，係類似現在的中南書局類型…

畢竟無論有很多事物怎樣眷戀也好，始終時間個巨輪都不停地轉，今日的事物很快就成了舊物，而記憶中的舊物又成了大家的集體回憶…

趁新年就等森伯伯好好去愐懷吓…

2019年1月2日星期三

Warm Warm早餐…

先祝願自己和眾Blog友2019年，諸事順暢，森想事成！！

相信好多人最怕就係放假後的第一個返工日！假期時訓到日上三竿自然醒…昨晚都係訓到自然醒，不過係自然早醒啫～呢排真係幾寒凍，要離開個暖暖被竇真係唔容易，而且清晨時份仲好似晚黑，少點意志力都好難起床…

呢排咁凍都好想食番多點暖東西，所以都會沖一杯熱的朱古力飲品為早餐，簡單而又不費時，而且飲完真係好暖架！！早餐為一日的開始，呢個已經算係個唔錯的早餐…

題外話…

今早一返到公司，即刻見到個位有支花突出黎既…??!!唔通森伯伯老花加深!!!...哈哈哈～原來係擺在公司棵水種白掌開花，奇特一：種左大約四、五年未見過佢開花，奇特二：據講泥種白掌才開花，水種唔會…我目的水種植物打理容易，所以冇理開花定唔開花…奇特三：平時花冧都唔見個，忽然元旦時份有花開?!!...即時諗起元旦Ｂ…XXXD…或者遲下影張相再同大家分享下！！

其實都唔錯，有個暖暖的早餐迎接新一天，個人都特別醒神兼且夠晒溫暖，即刻諗起四隻字好啱用「暖意窩森」不過要醒神都係飲杯熱咖啡先啱數…

2018年12月26日星期三

年尾溜溜講森事...

聖誕過後就代表差唔多一年就將要過去，新聞都有回顧的節目，一年時間說長唔長，說短亦都唔短…都有很多事情做過，會記得的又有幾多樣呢?!!

呢個時候出街感受一下市面氣氛都幾唔錯，不過出街就會預左人多，見到都有些食肆有人排隊，若然在旺區相信度度見人龍~~~反而在室內搞下私人派對會好些，食物都可以很簡單，試過似到會形式，不過食物就要自取，問題就係食剩的東西很難食清…最理想當然係每人帶些輕食來啦!!不過人少少就唔需要搞咁多，大薄餅加炒飯為主打，已經夠晒飽…