都好耐冇試過有一個電視節目，能夠成為大家茶餘飯後的討論，尤其是一個歌唱比賽節目!!
先是，現在的歌與曲都很難令人有深印象，而且歌星的歌藝屬一般，驟耳聽好似個個把聲都差唔多，唔見有突出的作品，所以很多電視台的音樂節目，都留到有咁夜得咁夜播，而且播放時間都縮減了~~
而最近呢個"中年好聲音"的歌唱比賽節目，她的參賽者主打係中年人士，所以都大條道理可以唱返為人熟悉的"老"歌，這個也是賣點，若年青人唱的新歌，都未必有多人去睇~~自問所有的什麼"星夢"或什麼"全民造星"一集都冇睇過，可能已經唔啱自己channel，所以無乜興趣...
而今次電視台出的gimmick，原本理念講出來就好好聽，中年都可以尋夢...但若果有睇的朋友，節目有冇帶出呢份訊息呢?!!我覺得娛樂成份多於一切...
對今時今日的社會，無論中年人士或老年人士，都可以追夢，夢想能否成真，相信不是年紀問題，而是講自己仍有沒有這團火去追尋自己的夢!!
「中年」、「老歌」、「追夢」是這檔節目的賣點，這樣的賣點也吸引「中年」以上的市民收看。鼓勵「追夢」是有正能量作用的。
回覆刪除係呀，比賽目的就好冠冕堂皇，為的是中老年人仍可追夢，但實際都是商業目的掛帥...反而外國的got talent節目，較公平冇咁多商業考量!!!
刪除對參賽者來說的確是一次追夢，追不追到是另一回事，起碼有得追。我平時唱K最多得幾個人聽，但他們有幾十萬人聽(我的估計而已)，更何況幾個名列前茅的參賽者更開了演唱會，很有滿足感。另外，龍婷以前在旺角街演時只得二三十人圍著她聽歌，最近她在沙田街演，圍著她的有二三百人，這個夢，成功了！
回覆刪除或者可以講大家都互惠互利，因為一個歌唱比賽節目有多觀眾，就可以在大台幫自己賣廣告，本身廣告費都要幾十萬，無論將來紅唔紅，都起碼自己賺了，好似你講仲可以開演唱會，是很多人的夢寐!!!乜龍婷現在都有在街頭演唱咩?!!我仲以為人紅了都冇再在街頭演唱，對很多人來講，認為自己都OK，都可以參加吓搏一搏......哈哈
刪除我在youtube看到的，龍婷街頭演唱陸續有來，"利是"滿袋，據說是向康文處署申請許可的，而且不是她自己單打獨鬥，有一大班工作人員策劃及安排的，似乎已經發展到近似一間"有限公司"。
刪除聽你咁講佢都幾懂得捉緊機遇，所以攞到名聲，做起事來都事半功倍……最緊要係有聽眾給予打賞！
刪除以佢為先例，可能日後有更多人會在街頭獻唱都唔定，自己好少遇到這些街頭表演，所以都唔知佢地的規模有幾大，我諗請隊band伴奏都要！！
公開表演：肥媽新年紅館演唱會，中年好聲音沙田馬場造勢表演，中年好聲音九展演唱會
回覆刪除電視節目：中年好聲音紅白鬥
各媒體個人訪問：有啦！
簽約藝人：龍婷話佢有大把青春樂意簽長約。
接廣告：157曾 話 大強已有廣告商垂詢。
總決賽收視率近27點，該周冠軍，可能係全年最高收視節目，年終必得電視獎。
造星要谷人氣，佢哋已有人氣。見工作佢哋已半隻腳踏入歌手夢，星途如何？能否唱劇集主題曲、出唱片要睇個人星運。
我嘅印象
大強：胡楓(跳老舞)
李佳：無
小龍女：唔夠靚嘅過期玉女路
英國豪：關正傑(性格內歛)
厨師恒：夏韶聲，唱快歌都得
吉吉：行鄭俊弘條歌星路
支：靚女
先多謝一爺的資料補充，真係冇留意太多參賽者的動向，你話能唔能夠繼續在娛圈上爭一席位，可能要比後生的來得艱辛，好似鏡仔就已經不同，因為重有很多機會等著他們...兩者感覺不一樣~~
刪除用心搜料以事例支持才有說服力，馬虎會畀森哥窒。
刪除娛樂圈要走紅好飄忽，無特定方程式。就算有首好歌，都會紅歌不紅人，近來紅爆中港台嘅國語歌『說散就散』竟然好少人知原唱者係香港人，靚過容祖兒嘅同期出道何嘉莉都係陪跑，郭富城因台灣電單車廣告拍到又靚又型，反而由台灣紅回香港，李克勤拍住周深參加國內唱歌競賽節目，釋放港星特有個人魅力而彈起。鏡仔後生大把本錢燃燒青春，中年有經歷，更易唱出歌味觸動歌迷，娛樂圈都係因緣際遇啦！。
森伯好少窒人，一爺更加唔敢窒，費事畀一爺抦一鑊！！老人家森伯好委屈😔
刪除唔好話娛樂圈，人生際遇都係無定向，唔聲唔聲畀你隨時行大運都唔定，所以有句老土話講，幾時都要裝備好自己，等機會一到便可乘風而上……
人生每件事都係因緣際會，難得一爺小小年紀都咁識諗，森伯啲老人家都老懷安慰……
想答番你以上留言，何嘉莉的歌藝同容祖兒差好遠，記得冇咩成名作品……後者紅都係有道理，容祖兒唔靚，啱晒佢唱啲苦情情歌，初期的歌好啱佢！！
難得你受委屈…終於出翻啖氣，令人有食雪糕後冰爽感覺，前爽未有。
刪除森哥感同身受，歌唱同插畫一樣要撼動人心，個人感覺太主觀，如雲霧能遠看，但伸手卻捉唔到。
好在我工作能數字化去主觀。舊時係做手辦去批核產品外形，如手柄握手感…但技術上不能100%複製，偶有實物不符手辦。自從晶片運算能力不斷提高，衍生真3D繪圖軟件，加上3D立體打印技術，繪圖 複辦 做模 可以一條龍100%無縫接軌，除卻錯誤發生。
『難得一爺小小年紀都咁識諗，森伯啲老人家都老懷安慰……』黑頭森向白頭爺咁講好搞笑。哈哈！霸道森哥蝦我又踩我低B。
唔使聲色藝倶全，當年，偶像派橫行，美色搭夠，實力派難出頭。
感慨呢班『遲到』準歌手爭取最後機會，拼命要鑽進歌星行列，而周六嘅港台金曲獎卻有幾多歌手唔攞獎，點解唱片業為傾唔埋欄嘅版權收入而令樂壇支離破碎。
昨晚睇紅白鬥似翡翠歌聲賀台慶咁熱鬧。
森伯受委屈已經慣左，難得一爺仲有前爽未有的感覺，點都好過全無認知，心如止水~~~~~
刪除講得好啱...一件作品最緊要有撼動人心的感覺，這才能叫做好的作品，可以引起大眾共鳴!!!希望森伯每每創作一幅畫作，都會試試想這個能否撼動人心!!!
3D科技現在已經成熟了嗎??相信很多零件都要靠佢打印出來...記得早前話有個國家的太空站講用3D打印支火箭，結果升空不久就解開...咁化學?!!
不過手辦公仔應該做得幾好，反而想問它用什麼物料去打印出來呢?!!有時見個手辦模型仲好粗糙，唔算好細緻...擺唔得耐就自動溶化咁款!!!
森伯可能大你好多卦...哈哈哈，話你小小年紀都啱既...唔需要講到咩黑頭人，咩白頭人咁難聽...
乜而家仲有樂壇頒獎典禮?!!...真係唔知有咩歌好頒，講得白就係冇歌星認識，冇靚歌熟悉...尤其你睇什麼叱吒樂壇頒獎典禮，冇咩可能捱到十分鐘...現在稍有名氣的歌手，他們有壓力，驚年紀越大被頒獎典禮淘汰，所以個個都話唔攞獎，去到又同些不知名的新人一同爭，不如索性話唔攞獎仲好~~~
時下的中年好聲音夠熱話，仲唔趁機搞旺佢地，最主要係唱番老歌，如果佢哋日後有自己新歌，未必多人會喜歡...
人無感覺就好慘喇！
刪除森哥收人哋心動價。
80年代大型電腦(mainframe)才有3D繪圖，3D打印80年尾已有，都咁耐，乜都熟晒啦！高温位置或者承受高力度當然唔用得啦！
材料有塑膠同五金可揀。佢係吐絲，逐層逐層咁疊上去，以前好『狗牙』，依家細緻咗好多，列印件可直接裝工程辦去測試功能/安全，不過，派客嘅外觀辦你都要打磨 或 跣灰加工後才夠光滑，要大量可倒矽膠模能複製廿/卅拾個派街坊。
「森伯可能大你好多卦...哈哈哈」 你邊度大？作大咋！
80年代起，香港係搶全球最悅耳歌曲，賣碟賺大錢，所以，好多作曲家創造好多靚歌。自從翻版碟後，靚歌少咗好多。
做嘢要打鐵趁熱，一鼓作氣。
無靚歌實紅唔起。
都未必好慘，冇晒感覺可以解作，痛與苦都不在意......
刪除咩叫心動價?!!好似啲網店昆人買野!!!
3D打印我仲以為呢幾年才盛行，見可以將人的手辦公仔打印出來，記得十多年前好興將個人的相片畀一啲製作手辦模型的店舖，幫客人訂造一個手辦公仔，現在冇咁興，不過如果有3D打印相信會平宜少少又夠真實...
首歌夠紅就可以分紅，就因此大家都畀心機作好歌，寫好歌，現在不是沒有好作品，不過真係寥寥可數...可能連個歌名都唔記得!!!
半年間我偶然看過兩、三集，因為覺得不吸引，總决賽有睇，我較喜歡龍婷的歌。
回覆刪除我現在的唱歌比賽都好少睇，呢個節目反而想看它怎樣搞 ，而且參賽者唱的歌大都認識，唔會太多冷場！
刪除人各有志，並非人人都喜歡追夢。不過，自甘淡薄的人比較稀少。
回覆刪除喜歡在人生的舞台上打滾，都是一個表演者。
有時拋頭露面在眾人面前表演，都唔一定為名為利，他們只想把自己的技能得到大眾的肯定，也同樣有滿足感，認為自己為此做的無白費……
刪除其實越睇越覺得商業味重。
回覆刪除哈哈，始終電視台也是個商營機構，所做的也要有商業考慮！
刪除而家啲藝人成日話賣努力，但又從來冇感覺佢有努力練歌練舞，每次出親嚟就唱到成pat屎咁，咁唱得唔好又如何呢？咪賣善良囉！但係好奇怪，乜善良有得賣㗎咩？刻意去營造出嚟嘅形象，又真係真心善良咩？
回覆刪除可能佢地真係賣努力，不過資質有限，所以舞藝歌藝都差啲啲...相信你都清楚，一首歌的成功與否，未必全是演繹者的問題，還有作曲人、作詞人的配合...
刪除哈哈哈，善唔善良真係未必個個知，對一個樂迷來講都係首歌的質素好重要，啱聽的就聽，唔啱聽半首都未必想聽......