時光倒流幾廿年之──居住…

香港地方細，對於一般升斗市民來講，居住都係一個生活大問題，為了有片瓦遮頭就算點樣辛苦都在所不惜…當然唔係肯捱就有個安樂窩啦～因為現今的樓價或租價都已經係非一般人所能負擔…

或者每個人對自己個安樂窩都有要求，回想返以前每個上到樓的市民來講有如中了六合彩咁開心，呢種心情對現今的人來講也是一樣，只要有個地方住就已經安樂晒…這個希望也是今時今日一般普羅大眾的心聲…

 以前的人感覺有份知足常樂的人生態度，最主要唔會同人比較太多，自得其樂就算…相中就係以前香港人的居住模式…森伯嘅年代應該屬後期，有記憶以來家中已經有彩色電視機…

比起板間房…木屋區…有獨立一間屋已經好好，以前的人放工回家聽下電台廣播，與屋企人閒話家常，生活雖然艱苦，但已經相當之滿足…

認真…

對於一個想：活到老；學到老的老人家來講，業餘進修都真係幾吃力，尤其森伯果類成日左痛右痛的人，仲諗去業餘進修，真係好似一場大挑戰～

其實呢個課程本身係喜歡，因為喜歡先會容易讀，起碼讀書壓力都少一半啦！亦有感呢個課程對工作、對興趣有實際作用，所以就算吃力都想去試試…

直到返學前，都辦了很多很多的事情…詳細就唔細講嘞！！總之唔易…

馬不停蹄的節奏對森伯來講，都未必係一件易事，所以呢個時候，可以爭取到時間抖抖就要休息，因為勞累都可能會誘發痛症，就因為這樣無形的壓力都唔少！！一個星期唔係返工就係返學，唔係放工就係放學，唔係做工作就係做功課，所以都幾充實，呢種情況仲要維持以後好一大段日子…諗下都唔知能否捱到讀完…

嗱！我唔敢話多，相信都總有一個、半個博友會錫住森伯伯，所以唔常常巡博都要請大家見諒，有留言者就去巡啦！！因為少了活動，都怕冇乜東西可以寫，能夠維持一周一博已經好好…

有時進修要考慮的時間、金錢都是其次，最主要是否有一顆認真的心去讀書，現在不去讀，到將來老了更加沒有動力去讀，所以進修都要講Timing，就好似現在上堂，眼見個個同學仔都係０靚仔０靚妹～因為我初時都以為有些中年人士會讀…不過無論如何都希望可以順利完成呢個課程…

每次返到學校都好似玩迷宮咁，成日要搵唔同的課室…一來老人家冇記性，二來可能仲未適應…

懷舊習作──森伯張換衫公仔紙…

大家又唔駛咁驚慄…放森！當然唔係真正森伯的換衫公仔啦~~

只不過係Q版森伯啫！相信大家都唔會抗拒…哈哈哈

時下興懷舊，舊有的一事一物都變為有價值！價值在於新不如舊?!!舊的比新的好?!!又或者只是緬懷昔日情而已…

有日無意看到一個討論區，見有人發題問：現在還有換衫公仔紙賣嗎？！其後就見有人回答有些地方仍見到…我諗可能在一些舊屋邨的舊式文具舖仲有，其實呢款紙版換衫公仔大家又有冇見過…記得以前仲有種紙飛機，用個長方形的紙袋包裝，裡面是紙飛機的紙組件，很簡單容易就砌到隻飛機，相信都係幾經典…

兩樣紙玩意都是用紙來做，但對當時的小朋友來講也是個好玩的玩意，直到現在更變成經典的回憶，森伯記得不知睇什麼懷舊展覽亦有見過…

睇下呢款Q版森伯的換衫公仔，又唔知會否鈎起大家不少回憶呢？如果你話冇，就可能係…少年你實在太細個喇…

背心+孖煙囪…麻甩版的換衫公仔好少見，算是懷舊得來又有少少創新～～哈哈哈

誠誠退休…

當大家仲諗緊退休要幾多錢先夠的時候，李超人就正正要準備退休嘞…相信李超人對絕大部份的港人來講都唔會唔識～只要一提到香港首富，相信個個都會up得出李超人個朵…或者李超人誠誠真係香港的代表，連有次去睇蠟像館都有李超人個蠟像…

其實對錢銀的價值觀，相信人人都唔同，不能否認現今世代，錢銀等同人身的安全感，當然可以直接認為錢越多安全感就越多，呢個都可以理解，試想想當你帶住十幾廿蚊出街，搭車，食嘢，購物…統統都提心吊膽，怕有咩差池唔夠錢畀；但當你帶住幾萬銀出街，忽然間心胸都挺左，行步路都大Ｄ，就算傻間間摏左入名店都夠膽睇下摸下扮買…哈哈哈

古語有話：大富由天；小富由儉…做唔做到大富都唔由自己講啦～對於森伯伯來講，可以的話做到小小小富都已經好滿足，至少可以有點閒錢用就夠！不過要做到小富…對森伯伯來講都係發夢階段，暫時都係處於憂柴憂米的時期…或者最好的做法就係學習知足，因為知足者；貧亦樂嘛～森伯伯成日都係攞呢句說話勉勵吓自己…><

後記：

參觀蠟像時，好多蠟像背後都有個貼題佈景，可是李生就冇佈景…或者就正如所講的除了大把錢之外，其他已經沒什麼可代表……真係好值得反思~~

為配合篇Blog文，專程摷返幾年前去蠟像館的相出來~~真係唔經唔覺……

粒粒皆…甘甜～

睇開森Blog的友好們都知，森伯間中都會介紹下有益健康的東西，今次推介一種唔錯的小食，當你試過後可能會再買…
記得以前細個食乾果只係當零食，但現今講求健康飲食，有很多以前唔起眼的食物，到現在被推崇為健康聖品，尤其果仁類、乾果類…聽講葡萄乾係好有益，偶爾食下都幾好，但葡萄乾對於森伯來講比較酸…都好耐冇食過～其實好多乾果都同新鮮水果一樣含有果酸，所以唔係咁多乾果食得…

其實桑椹子記得以前有人送過，在記憶裡都記得好食而且又甜…但事隔多時都沒有刻意去搵，可能呢類乾果分季節性，所以不常見不普遍…
其他店舖唔清楚，但某間有機連鎖店就間中會搵到，呢種乾果冇咩特別果味，勝在夠晒甜甜潤潤～～
而且粒粒顆粒好有嚼口，據知料所講桑椹子有益脾胃、生津止渴除燥熱、促進新陳代謝（呢句好啱森老伯果類長者…XXD）它的好處唔講太多，自己上網睇睇！！買一包間中食下，都可以慢慢嗒…

原來桑椹子係出自桑樹，至於桑葉就是以前養蠶蟲的必要飼料，唔知大家又有冇玩過養蠶蟲呢？！早前記得有博友都介紹過樹上的桑椹，有紅色有黑色，不過呢種桑椹乾果係白桑椹…雖然顏色唔同但營養價值都係一樣，而家基本上見到都會買來食，本人覺得真係幾甜（天然甜），有血糖問題的人士就唔可以食太多…

映相…晒相…睇相…

自從電子產品的普及，要影相真係隨時隨地乜都映得一餐，回想以前映菲林相真係會隆重少少…一幢菲林數目有限，每一張相都會諗真先去映，通常有咩特別事情才會拎部相機出來影，而映出來的影象都要等到沖曬完才知道映得好唔好，所以每次映完相都會有種期待感…

映　相…

森伯伯從未擁有過菲林相機，首次買的相機都係數碼相機，正確來講都未感受過每張相都要諗過度過先映的時候，不過菲林相對於好多人來講都係一個集體回憶，菲林相機現在都可以買到，但又未必多人會買，而買的多數係攝影發燒友，至於一般普羅大眾（森伯都係…）用數碼產品會較為方便…

擁有的菲林相底已經成為一種有紀念價值的珍藏…

晒　相…

映相方便了，所以有一些值得保存的相都會拿去沖曬，或者已經有人覺得放在電腦手機看看就算…仲邊會去曬相咁麻煩呢～而我要沖曬的相唔多，以前好多地方都有沖曬店，家中附近都有間小型曬相檔，但維持不久就關門大吉…所以而家曬相都係幫襯呢間連鎖曬相店… 

據聞佢有保証，唔滿意的可免費重曬，唔知是否屬實，但我未試過，又有冇人試過?!...

睇　相…

可能森伯個人喜歡實實在在，點都要有些相片拿在手上慢慢睇先得…用螢幕去睇雖然畫面靚少少，但唔會睇得好仔細，通常納納就算，除非要執相…

老人家喜歡懷緬過去…閒時拿些相片睇睇都可能係一種樂趣… 因為有好多相過了去就冇可能再映過，就好似2017年的森伯同2018年的森伯都差啲啲啦…哈哈哈

小小森意；唔成敬意…

相信送禮大家在過年時候都送唔少，其實而家去一趟超市或者便利店都有很多選擇，送禮畀親朋戚友都唔算難，送禮都不外乎朱古力、曲奇餅等小食…送食物基本上都冇錯，人人都鍾意食啦…我覺得反而送用品，未必人人合用，所以送些大路的食品基本上都冇咩唔啱…

平時都收人唔少小食利是（你話森伯幾細個仲逗人利是…XXD）之類，趁新年呢個時候都係還禮的好時機，既然一場去到超市買禮盒朱古力，都唔爭在買少少食品還禮，一向有選擇困難症的森伯，左諗右諗，左度右度送咩最好…其實送畀親戚友人好易，通常可以買些大方得體的禮盒包裝，但送畀同事唔通買一罐二罐餅乾朱古力…太勞民傷財～本來想送些健康果仁類，但當日見就唔係咁新鮮嘞…最後又畀森伯發現到一樣唔錯的選擇，輕巧得來又唔貴，少少地又唔失禮，又可以當為健康飲品又唔駛食滯人…簡直perfect！

 之唔係顆粒沖劑，是關小食有好多人都怕食多會肥，而沖杯野飲大家都好接受，而且花款多多唔同人送唔同口味都得，對森伯來講算係幾good的選擇！！