2025年3月13日 星期四

慳人恩物...

很多人都認為無論是世界經濟,或是本地經濟都係麻麻地,有時食個飯可能都會慳住慳住,你睇連外賣平台Deliveroo,都要撤出香港,講真森伯又冇乜叫過外賣平台,因為森伯可以食得好簡單,自己蒸個五穀番薯飯都可以食得飽~~所以現在經營飲食最緊要係平靚正,你睇什麼兩餸飯,幾十蚊自助餐就知喇~~

市道唔樂觀,用個錢都要慳住駛...可是現在食個早餐,買個包都要十幾蚊!!!很多食材不覺間加了又加...不過世事無絕對,眼前的一包餅仔,卻加幅不大,可算是慳家者的恩物...記得呢種餅仔,正名叫嚤囉酥,真係由細見到老,其實一般大超市唔見,多數在一些小型雜貨士多,街坊超市仔可見,例如什麼家興超市、什麼祥興、友誠等等有機會買到...其實回想起這類餅還有很多其他款式,有大白餅(乾酥餅)、香蕉糕、炒米餅等等,越數越餓~~哈哈

價錢都十分親民,真真正正在物價高漲的珅境中益街坊,等一些老人家(如森伯伯果類,唔捨得買高級的榮華奇華唐餅...)都可以實實惠惠地吔幾個餅仔當早餐!!!

9 則留言:


  1. 我足足等左24小時才有新帖,怕條蛇又入番洞,春眠不覺曉,令我望穿秋水。
    聽說川普係想關稅戰整到衰退 增加失業 引致通縮,就可減息,以減低高額政府債要付人利息嘅重擔,所以,未來世界經濟會更壞。精明森哥帶飯一啲都唔驚,素比葷更慳。我係以前打麻雀才叫外賣PIZZA,依家自煮又平又健康。
    早餐包係唔平,我食便宜麥皮$15/kg,仲夠錢加隻蛋。奇怪啦!我食過一口酥,味道有花生 杏仁 芝麻,唔識嚤囉酥。平到幾錢磅?我覺得呢個係零食,下午茶餐可以。

    回覆刪除
    回覆
    1. 咁你留住言先,唔好等森伯……呢排忙到甩轆……

      侵侵回歸,都知經濟有排好,唯有在市道逆境時,自己能慳慳地過生活,呢種餅仔見到,兼且有人買,先食到!!
      打牌仲食pizza,梗係食糊好過啦——一向自己甚少叫外賣,常諗送來的食物唔衛生,自己煮,帶飯比較可靠!!

      呢種餅仔唔係散裝賣,係一包包,一包有六個,以前買幾蚊雞,現在都係唔過十蚊……一爺揀開貴價包點,邊有留意!!唔會當零食,當早餐茶點都得!!

      刪除
    2. 慳人恩物,森哥咪做咗人哋 “恩客” 呀!哈哈!
      未發文留言先~拍得住 "唔好空肚食早餐" 金句,証明係忙到甩轆。
      貴人事忙,公司重用,恨死隔離。
      係打餐飯,贏牌畀錢,飯錢唔夠才夾。
      我細過食街邊檔長大,烏蠅橫飛,無理課本話唔衞生,最緊要夠平,窮人有 "那渣" 腸護體。
      好大隻蛤乸呀!應該深水埗區平通街價!
      直徑和高度約幾多?似叉燒酥咁大?食幾多個才飽?
      咩饀?
      森哥同我一樣成日幻想有朝一日暴發會…當太子爺日日食豐富酒店自助早餐,但舊時我識老闆仔係去就腳快餐店。
      乜華雙雄走高檔路線,目標係幾千萬遊客,信心又有體面(貴)嘅手信,客量多過幾百萬港人,好似舊時上水藥房唔多騷港燦,眼望北上水客。

      刪除
  2. 外賣平台執笠,我都要負啲責任,因為我從未幫襯過。我一向三餐好簡單,喜歡自己煮,萬一有乜特別原因不能夠煮,也會落街在食肆即場食,因為覺得外賣送到嚟已經唔熱,完全唔好食。

    回覆刪除
    回覆
    1. Peace兄又唔需要太自責,都有大把人唔多叫外賣食物,包括森伯伯,如果不能煮飯,買個包都可以一餐,外賣食物最怕係唔衛生,夏天更甚……

      刪除
  3. 哈哈!外賣平台執笠,我也要負啲責任,因為我也從未幫襯過。

    回覆刪除
    回覆
    1. Stella成日出街食好嘢,邊使叫外賣平台!!相信都有好多人未叫過呢種平台!!

      刪除
  4. 我有一位親人也很喜歡吃中式的餅食,拿來充飢很方便。
    至於全白色的餅有種「光酥餅」,也叫做「西樵大餅」;因為它沒有餡料,所以用上「光」這個字。
    我孤陋寡聞,可沒有聽過「亁酥餅」。請問還有濕的酥餅嗎 ?

    回覆刪除
    回覆
    1. 現在有很多其他小食,很少用唐餅充饑……

      對呀,光酥餅沒有餡,只得乾乾甜甜,記得以前仍住青衣時,有檔餅家,佢既乾酥餅幾好食!!

      基本上很多稱為餅的食品都比較乾身……老婆餅,雞仔餅應該算濕濕地……

      刪除