相信現在看著森博的每一位，都應該有生日的時候，在眾多食物中，你們又會選些什麼慶祝生日呢!!!這個話題都幾有趣，都可以講講...
以我記憶裡，這四樣食品都最常見來慶祝牛一...
生日蛋糕
我諗最先講是生日蛋糕，亦相信生日都總要有個蛋糕才像樣，而且今時今日牛一蛋糕也多多花款，不似很久以前的奶油蛋糕，超膩，食一小件已經滯滯地，而且油酥味很重，反觀今時今日的忌廉蛋糕，相對易入口得多~~
紅雞蛋
舊式家庭，多數仔女生日就會做些紅雞蛋，當為一個小小的慶祝，最為不同就是染了紅色的雞蛋，至於那些紅色染料是什麼，我亦不太清楚，以現在人乜都講究健康衛生，都唔會亂用染料放在食物上，所以現時都甚少見到紅雞蛋，森伯伯的印象中都未試過用紅雞蛋慶生...
壽桃包
以香港來講，中西文化都相互影響，若然話生日蛋糕代表西方，而壽桃包可能是中方的代表，之前都有看過壽桃包的真正意思，查實生日就唔應該吃壽桃包，回想古時的陶瓷工藝裡，壽星公的造型通常都是捧著壽桃，所以現在酒樓就以壽桃包來作一種生日宴的食品，至於生日食正宗的壽桃(水果)，都好似食過一次!!
長壽麵
細時候去街市的時候，總會見到一大包的壽麵，通常一諗起麵都會想到長長的，若然在生日裡吃便代表長長壽壽!!據講壽麵十分油膩，森伯當然不懂泡製...以今時今日的麵食，也有很多替代品...
其實對森伯伯來講，認為生日有蛋糕就最好，當然不是什麼孖寶蛋糕或什麼紙包蛋糕之類...正宗圓型大蛋糕才似慶祝生日!!
又唔知大家博友，鄉下又興什麼當為慶生食品呢?!!以大部份港人來講，生日蛋糕都應該係No.1選擇!!!!
祝森哥生日健康快樂！
回覆刪除呢D傳統嘢咁老土唔啱天蠍座森哥，應該係食炸蠍子啦！造個勇敢中國人。
藥材舖買花紅粉染雞蛋。舊時生仔派紅雞蛋架！扮老𡃁仔森哥一定唔識，係我呢D真係老餅才知。
我係端午節出世，細路哥時，年年紙龍舟內會多隻烚蛋。咁我係巨蟹座食炸軟殼蟹或且零食蟹仔都得喎！
我細路哥時畀電視荼毒，兒時生日最恨有生日蛋糕，阿哥話發音唔正講咗彈弓，唱歌吹蠟燭許願三步曲，不過就無咁嘅財力，長大後揾到錢試完覺得呢D形式嘢好多餘，我變得無咁物慾化和儀式化。
壽桃包係同雙親去酒樓慶祝生日才有，咁鬼老唔啱我啦！
長壽麵未見過人食，因為慶祝都係一大班人，壽星仔獨食好似唔係咁好，人哋充撐場面要開心些牙嘛！
依家D人喺甜品大碟上如小忌廉、水果、雪糕、餅干、朱古力、窩夫、燉蛋…寫上字和放洋燭就得啦！
森哥大畫師大筆一揮，順手畫卡通人像，仙鶴壽龜壽桃…天下只得佢一人才有，你話幾咁珍貴呀！
仲未到...唔好咁快又講定，又老左一歲.........
刪除生日跟傳統，唔會食炸蠍子，寧願養番隻蠍子當寵物...做個勇敢中國人，唔係食吓蠍子就係，YT大把KOL大大聲幫中國講好說話，咁先夠晒勇敢~~~~
原來花紅粉染紅雞蛋...又學到野!!!查過維基資料，紅雞蛋生日都可以食，生仔唔係派薑醋咩?!!!
係呀係呀，以前細個逢端午都有紙龍舟，可能當時小朋友當玩具，其實原意是用來祭祀，燒左去...
乜一爺係巨蟹座，據星座資料，巨蟹座同天蠍座應該好夾，為何又成日寸來寸去，窒來窒去，大家唔妥大家.........
人生活在時下社會，難免受物慾支配，很多節日都是儀式化，過年派的利是，森伯收的利是都係儀式化，聖誕又要掛聖誕樹...公式化都冇所謂，鍾意就得喇~~
你唔好低估壽包的市場，超市隨時搵到有賣，不過據講壽包唔係畀生人食，所以都唔會在生日食~~~~
以前的人們，邊會好似年青力壯的一爺咁多閨密好友，通常屋企食飯，長壽麵煮來給壽星，我諗多數畀老人家享用，祝佢長長壽壽~~~
可能森伯伯係老一輩的人，生日點都要個蛋糕像樣一點!!!森伯伯找不到紅蛋，壽麵來影相，所以畫幅插圖既簡單又啱個主題~~~~~~
咁我講多D，再老多…多D明益愛認老森哥。祝森哥福如長江 壽比阿爾卑斯山。
刪除年年一樣好悶，無乜新意，新鮮感衝擊腦細胞好爽呀！
阿媽畀得我玩紙龍舟應該唔係衣紙咁大吉利是，都係玩爛咗扔掉，未燒過。
我哋真係格格不入，思想南轅北轍，多拗撬好正常，係歡喜冤家，大家都無放入心。如我係森哥一樣嘅複製品，咁就無嘢可以留言啦！
我想支配森哥都唔得，原來，我仲衰過低人一等，輸埋畀死物。
拜祭通常用紅色包仔和黄鬆糕。
係不同包，壽字包係白色圓扁形喺頂部蓋上紅色壽字，外觀類近平安包，係白事用。另一種係壽桃包，形狀尖頭桃狀，頭頂紅色，包身白色如森圖，係紅事用，不可攪亂禮節。
南方人食白米唔興，而北方人主食麵、饅頭才興長壽麵？
從小就習慣無蛋糕，而且屋企傳統只為長輩才會一家人團聚食飯慶祝生日，後輩無架。我愈老愈愛『清淡』，過節生日無須咁多，感 累贅、負擔。
祝賀老人家，森伯又唔會抗拒！！森伯都係覺得福如東海壽比南山好啲，聽慣左！！
刪除你都幾喜歡新鮮感，好在你有班閨密友伴常常給你新鮮又刺激又爽的玩意給你！！森伯呢類長者靜靜地都OK……
伯有當年見你玩得咁開心，無謂燒左去，免得一爺又扭計要買第二樣玩具！！
你講得最啱係，大家都冇放入心……平時畀一爺激到嘔雪後，轉個頭又唔記得，可能都係有好處嘅！！
我諗我哋都仲未夠老，你講既黃糖鬆糕，應該係現時叫的發糕，發發聲梗係過年食，紅包係辦喜事先用或用來祭祀……你可以網上搜搜壽包的含意就知道……
有時覺得就算冇人幫自己慶祝，都可以自己幫自己慶祝，蛋糕照食，禮物照買……生存在世己經不容易，能過多個生日都好應該慶祝一下！！
現成賀詞造句公整對稱係靚，但我用心為森哥切身打造新詞。
刪除次次都梗扯我嘅虛擬朋友講二級話題，森哥下次要進步升多一級就唔會悶親我啦！
窮人子弟生性識諗，乜都無都有好多遊戲玩餐飽。唔係森哥呢D扭計二世祖咁難湊。
唔一樣好緊要，孩子係由父母基因各半創新品種，相似純貴族血統近親繁殖生白痴仔架！不同和創新係自然進化定律，我更愛不一樣嘅森哥。
阿媽拜神都揾我幫手，由其是七月十四摺大量街衣，所以，阿媽傳人嘅我略識一二架，森哥係睇唔太準嘅網文。
咁樣講，不如森哥每周都為自己慶祝生日，蛋糕照食，禮物照買，能有超多個生日真係不枉此生。人生不要做傳統儀式奴隸而被擺佈，做主人要有態度：慶祝生日邊使等正日，數量也無限制。
現成咪幾好，如果咁都叫用心，就顯得求其左~~~譬如：福如太平洋，壽比珠穆朗瑪峰!!!!好寒貨...
刪除若想升多一級就要你同你班閨中之密慢慢去發掘一吓~~~森伯好正經邊識講二級話題!!!
森伯都屬於窮人子弟，一件玩具都可以玩好耐，絕對唔似現今細路，玩具玩一陣就唔玩，家長隔一段時間就要拎去玩具回收~~~
又想暗寸暗窒森伯...果頭話完森伯白痴仔，跟住又話不一樣!!!!在這裡冇博友會咁樣講野!!!哈哈哈
唔係唔準，可能只不過是各處鄉村各處例，台灣人會整發糕過年，香港人就比較少，通常可能舊一輩的人會興~~紅包應該祭祀用，現在很少見!!!
生日一年一次，唔會慶祝幾百次，香港地就算唔係生日都可以蛋糕照食，禮物照買，利是照派(畀自己...)!!!
傳統節日都有傳統的趣味，完全唔認同你話擺佈，生日、或節慶一年一次你會有所期待，眾人都為這些而籌備，準備...如果日日都有月餅食，變得唔矜貴，唔會期望一年一度的中秋節...
一爺又完美演繹乜野係歪理當真理~~~~~XXXD
真係撕心裂肺，森哥奄尖聲悶難服侍，難為了枕邊人。7号立冬，係時候交寒貨，哈哈！
刪除咩級…唔通……森哥仲係…處…。
森哥有妄想迫害症…成日懷疑我吋你。
森哥如脫疆野馬，能征服嘅人都有過人之處。
都叫蛋，一個健康又平，一個邪惡又豪。一中一西，西化飲食好嗎？都係妖孽勝…失望。
話明老人家梗係難服侍，奄尖就只是對生活仲有要求...一年好快過，秋天來到無幾耐就冬季，下午有時還很熱~~
刪除咁你想咩級呢?!!思想可以無限級，但寫出來一定是一級，老少咸宜...
就係畀一爺的說話搞到森伯擬似有妄想迫害症，估唔到寫博都搞到如此田地~~~~><
老人家你都可以形容為脫疆野馬，你真係有個人之處...
算啦一年一度慶祝生日，畀自己個肚放縱下~~
森哥人見人愛，車見車載，平日對人和善友愛，因為我常頂撞，只係針對我啫！正合我喜歡硬梆梆嘅森哥。
刪除呢種天氣真爽，老人家瞓得好，正正常常健健康康就好幸福。
森話：‘’寫博都搞到如此田地‘’。咁幸苦就唔鬼好寫啦！咁似婆婆媽媽大嬸鬧劇情唔好又不停咁睇，口不對森。
森哥已經好甜美，唔好食咁多cake，太sweet會引人犯罪。
又好少形容老人家人見人愛，車見車載……森伯只想平平凡凡過活就OK！
刪除一年中最好的天時，就是秋秋地呢段時間！
正所謂邊度跌低，就邊度起翻身，應該邊個人搞到森伯如斯田地，就捉佢出黎，森法侍候，用限權唔畀佢入來搞搞陣，呢個才是明智做法！！等森伯研究吓先！！✌️✌️
我食cake會引人犯罪？！呢個邏輯仲有冇荒謬啲呀……😄
家燕姐 修哥 都好可愛呀！
刪除仲睇紅葉美景。
斯文森哥都粗魯，好像快要去施暴人哋！
引人犯罪…見到森哥引起慾火。
難得年紀輕輕的一爺咁懂得欣賞老人家嘅可愛一面……
刪除施暴人哋只有一爺先講得出！
引起慾火，都唔一定同犯罪掛鈎……
聽說鄉下人是在滿60歲，才設宴賀壽的。嬰兒在滿月也設一次滿月宴。其餘沒有在年年也慶祝生辰快樂的。
回覆刪除鄉下人把兒女叫做豬仔、牛仔、乞兒仔、乞兒女，就是希望他們像畜牲一樣粗生粗養，快高長大。
*
香港的小孩幸福的就會嬌生慣養，學前就會入學幼稚園，園方會為他們作分月共同慶祝生日，由此，我們都興起了為孩子，為家人慶祝生日了，也不失是一個喜樂的日子。
這個我也聽過，他們大壽才能擺壽宴...現在人一切從簡，都沒有過於跟習俗，一來怕麻煩自己，二來亦怕麻煩別人來飲~~~
刪除以前農村人認為，牲畜一般都是粗生粗養的，而且古時的人害怕小孩養不大，都會把子女改以動物稱呼，希望他們粗生粗養，快高長大……
因時代不同了，現在的小朋友做一般生日，蛋糕禮物樣樣都有，已經相當幸福！！
想起先父從不肯做壽宴，他說，某某人擺完六十壽宴不久就去世了 ! 所以父親到了八十歲也不擺壽宴。我們家從來不興做生日。 但我感謝母親曾經煮了“雞蛋紅棗” 甜茶給我慶生。
刪除有一年是閏十月，小家庭一家三口，兩個人是十月出生。那一年我們分別定購了五個生日大蛋糕，很誇張。
自小聽從了父親的言論，我不把生日當一回事。這其實是“母難日”，應該慰勞母親。
不是五個，新舊曆合計，三個人應是訂了4 個才是。
刪除就算老人家都未必個個都會擺壽宴，正如我講 ，自己唔想搞，又費事打搞其他人，尤其是很親的親戚，所以唔做大壽宴都沒什麼所謂！！
刪除以前的人認為六十歲己經好老，現代人睇法又唔同！！很多節慶都從簡了，新一代的人結婚都未必擺酒，嬰孩滿月都未必個個派薑醋……總之時代不同了！！
又幾得意，三個人有四個大蛋糕，點訂架！！
我們家有生日蛋糕給生日者，各自都會畀利是，禮物，日子久了，都變成習慣……
梗係一個人去訂啦，分開新舊曆生日，閏月就係多咗一次囉。以前的蛋糕都係大大個，邊會係而咁小型ga.
刪除哈哈，你們新曆生日，舊曆生日都有個蛋糕，而且大家的生日都很接近，食蛋糕都食到滯滯地……😅
刪除以前的蛋糕大過現在的，而且用酥油做蛋糕，未食都飽了，相對現在用忌廉，就美味得多……
後來出的 “栗子蛋糕” 仲滯啦，這本來是我的最愛，可是多吃了真辛苦，搞到我以後都不敢買了。
刪除你以為以前是沒有忌廉蛋糕的嗎 ?
以前喜歡買的水果拼盤蛋糕，基本就是忌廉大蛋糕，是不會吃滯的。 酥油係咩嘢嚟架 ? 聽過餅乾、饅頭是會用酥油做的，冇益ga !
栗子蛋糕算唔太滯，講起以前，栗子蛋糕的栗子蓉很有栗子味，相對現在就只得甜味，而且仲好甜..........
刪除我諗起以前的生日蛋糕，便會諗起牛油酥蛋糕，現在有些花餅都有用奶油來整!!!揀食品都要注意食材健康，最好自己整~~
以前的蛋糕跟現在有很大分別，現在的忌廉蛋糕很多人都鍾意，不過在我來講都認為好好味，但似吃了陣風~~~哈哈哈
老牛細個時，生日有一個雞蛋吃，已經算是最好的慶祝了。那時經濟困難，從沒有「生日蛋糕」一說，大人生日就是一碗「壽麵」；如今在酒樓食飯慶生，若不是在外自購蛋糕，可以在酒樓叫一打「壽包」。
回覆刪除其實活在現今世代裡，對很多人來講，都已經好幸運和幸福……
刪除以前年代，有蛋糕來慶祝已是很好，一般烚隻蛋己算慶祝生日！！看過好位博友的留言，原來壽麵都仲有幾多人會吃的！！
長輩慶祝生日多數食壽桃包、長壽麵，我生日就一定食生日蛋糕^_<
回覆刪除以前上茶樓吃飯宴的時候，都有幾多客人叫壽包，一看就知有人生日！！
刪除我會選生日蛋糕，因為有強代表性，也有時代感。但壽桃和長壽麵我都喜歡，最好是樣樣齊啦！開心D嘛！現代生日不興紅雞蛋啦！食到雙手都染紅。彌月吃紅雞蛋就OK囉。
回覆刪除認同，始終生日蛋糕夠代表性，而且慣了對蛋糕唱生日歌，反而其他幾樣我冇在生日當日食過！
刪除製作紅雞蛋唔係個個人都識，由細到大，屋企都未見過整紅雞蛋……
無可否認，生日蛋糕是現今香港最普遍的生日食物，但我卻不太熱衷，因為太貴，性價比低。現在很少人自己煮壽麵了，但到酒樓擺生日宴的話就一定有。紅雞蛋是細個時的最佳生日食物，那個年代，生活艱難，生日一隻紅雞蛋已經非常滿足，反觀現在，物質豐富，沒有人會看得起一蚊幾毫的紅雞蛋了。至於壽桃包，哈哈！本來很久沒有吃的了，今年生日時兒子請我出外食飯，飯後待應奉上一個有蓮蓉咸蛋黃的壽桃包，可能他知道我不喜歡生日蛋糕才作出這個安排，突然之間又覺得壽桃包好好食。
回覆刪除對，所以我認為生日蛋糕應該是很多人的首選，雖然有些名牌餅店所售的蛋糕一般都比較貴，但個人認為都冇咩所謂，基本上每個人生日都係一年一次...記得好似peace兄自己整都一樣好的，起碼與別不同，口味都可以就生日者，但需要時間和心機...
刪除印象中紅雞蛋是沒有人賣，通常都是自家染，其實為家人染紅雞蛋也是一份心意，都會開心的...不過正如你講現在物質豐富，拘拘一兩隻紅雞蛋會覺得有點兒寒酸...
外出吃生日飯，都會把壽包留到最後，拿出來都是熱騰騰的一定好好味，而且菜館的壽包，通常用料較多較好，比起超市的壽包就細細個......
好記性！記得我自己整過生日蛋糕。正因為我自己整過，其實成本好低，所以就孤寒啲，覺得餅店賣的價錢過份貴，覺得唔抵。
刪除冇記錯蛋糕是你為你家人而做，通常自己整一般都較為經濟，但有些原材料也不平宜，而且需要心機耐性，溝粉、烤焗、唧上忌廉花紋...樣樣都好講功夫，不過心意就攞足分!!!
刪除我首選生日蛋糕 , 覺得食過生日蛋糕好似才算是生日 .
回覆刪除完全認同!!!可能大家都習慣了，會認為生日最好有個蛋糕才像樣~~~~
刪除