2018年6月20日 星期三

搽藥粉…

可能森伯老人家啦,總會有些藥品放在家中睇吓門口,有咩唔舒服都可以即刻有得用,當然唔會乜藥品都買來放,對自己合用就會當係家庭良藥…而最近的撞傷,難免又瘀又腫,眼見好幾日都進度不大,就想起田七粉,本來呢隻粉用來外傷止血用,後來加點白酒混田七粉搽,又唔錯喎…本身用開雲南白藥,但變了藥丸裝就好少買…
呢隻田七粉係國貨,亦都相信呢種藥粉係國內先似樣…所以在大型的國貨公司買有保證些,本身田七粉係內服,但自己又唔敢亂食,所以就當為外用了…

我發覺現在有很多傳統的家庭良藥都賣少見少,好似買田七粉之前係想買止血散,舊時的止血散真係好駛得,就算去一些舊式藥房都話冇,梁財信的跌打酒都唔乜見啦…有時覺得呢類藥對一般損傷都幾好用…唔知大家又有冇一些好駛好用的藥係家居必備,而又好似絕絕地跡咁呢?!

2018年6月6日 星期三

休養中…

的確有很多事情係意料不及,因一個小意外,撞傷隻手,其後已經感到隱隱作痛,頂到做妥要做的事先去醫院,因為跌傷都可大可小,照過X-ray後,醫生話有骨裂,以我記憶所及我都係咁大個第一次打石膏,據講係半石膏(暫時性),最後要再整個固定手托先出得院,護士仲嚟問我左搲定右搲,幸好我係右搲,仲可以寫下字畫少少野><…

擾擾攘攘都成個禮拜,其實都不能打電腦,寫blog都係用電話,希望可以盡快復原,唔駛對返工返學影響太大…

2018年5月30日 星期三

「換」然‧一新



煥然
既然一早都濕晒身係熱到出晒汗!!都唔駛再等到端陽佳節就要馬上換季,雖然森伯唔係肥人,但都好怕熱尤其時冷時熱的狀態,個人好易病,所以趁呢個時候換換季,清涼一點,而且順便來一個斷、離,清一清都好既森伯果類老人家,唔會時時掉東西,但容納空間又唔夠,清得幾多就幾多~~
相信呢類毛布衫可以放入衣箱,以前的人興放臭丸,一到冬天換季就會索到陣陣臭丸味,真係幾嚇人,相對現在就多了選擇,森伯都用了炭包好多年,覺得幾好無味無毒兼環保,只要隔一排拿出來曬一曬炭包又可以再用,幾唔錯


一新
一向森伯都唔係咩走在時裝界尖啄的人,買衫慕求平實款(俗稱阿伯款),硬係覺得呢種款式先適合森伯伯個style…呢刻都冇咩閒情逸致買新衫,著返舊衫都OK!外面衫唔買新啫,裡面冇話唔買喎哈哈哈~買左兩件高領的白底衫,目的都係著面衫時見到底衫的白領,咁著睇落醒神少少 
其實呢類高領無袖的白背心好難搵,所以搵到就買,其實佢可以當背心就咁著,如果操有一雙麒麟粗臂,著起應該唔錯要操都唔係一時三刻操得到,當住底衫先囉~~哈哈

2018年5月23日 星期三

濕森記...

上回就講到森伯Dry Dry地......個荷包,今回就講到濕晒身......

話說...
近排同人傾偈,首要話題總離唔開講天氣,講溫度等......
無辦法喇,五月份天氣就熱成咁,未食五月粽都已經早早將寒衣收埋晒~其實一年四季最怕就係夏季,無奈現在的夏天好似特別漫長...


所以背心一年四季都可以著,可能森伯特別怕熱兼且汗多,出到街走一走已經全濕...有時真係諗下要唔要好似d細路仔夾條毛巾仔響背脊汲下汗...哈哈哈
家下五月都有成三十幾度,去到七,八月就可想而知...現在反而期待冬季,始終都比較乾爽涼快!!

望到外邊景色好晴朗,但酷熱的陽光總教人有點望而生畏(忽然覺得森伯好有文采...),呢一刻反而想落下雨降降溫... 講開又講,唔知大家有冇覺得近來比較少落好大場雨,就算有落都唔太大...好在香港$$多可以買外來水,如果靠從天而降的甘霖,真係唔知我地港人飲乜...哈哈哈

相:是我朝早返工途中所影的...太陽的光已經好似正午~~~

2018年5月9日 星期三

五窮月…

唔想呻窮都唔得,本來都唔想個Blog成日有太多負能量,一唔係就講年事已高左痛右痛之類一唔係就講窮到燶,,,樣樣講齊~畢竟呢個先至係森伯嘅真實生活嘛~

踏入呢兩個多月,生活上的開支比平時多了,而收入又少梗截幸好森伯份人又唔會太大駛,或者少出去行街消遣,駛錢的誘因就自然少了兼且先駛未來錢又唔會係森伯個風格,其實都係跟平時差唔多啦,又冇咩改變,可能慳慣

曾經有人講過,駛了的錢才是屬於自己的諗深一層都未嘗冇道理,認為用得其所,值得的都冇咩所謂千金散盡還復來嘛!!更何況森伯本身冇千金咁多散呢
 
銀根短缺,唯有撳住幾舊水頂住先啦~哈哈哈

俗語有云:五窮(而家已經係啦)六絕(下個月更坎坷...七翻身(Yeah!!!!希望在明天嘛!更期盼可以順利完成呢個課程,唔駛白捱

2018年5月2日 星期三

街頭小食--雞蛋仔

近排雖然忙忙碌碌,但仍舊工要照返,堂要照上,飯要照0也,涼要照沖,Blog要照寫...
香港人擅忘,費事隔太耐冇寫又唔記得森伯伯係乜水...><

上篇先講完集體回憶居住篇,相信都勾起大家唔少回憶,可能老人家常常懷緬過去,乜都回憶一番...
記得早陣子附近商場先開了一檔雞蛋仔,有好幾種口味可以選擇...其實綜觀咁多口味,始終原味都係最受歡迎...其實數算經典的街頭小食,相信大家都會即時諗到雞蛋仔,對大家來講呢種小食都冇邊個未食過...現在有很多口味都係為創新而創新,新口味得來又夾硬...
見到有椰香芝麻味,當然係首選啦~~雖然食落都係差唔多,對森伯來講都算有少少新款~眼見雞蛋仔材料簡單,製作器具又唔難搵,玩下手成set野幾百蚊可以淘返來...岩晒森伯退休後搞D小生意~~

而家都係時候諗下有咩新口味...準備定先嘛~~~

2018年4月18日 星期三

時光倒流幾廿年之──居住…



香港地方細,對於一般升斗市民來講,居住都係一個生活大問題,為了有片瓦遮頭就算點樣辛苦都在所不惜當然唔係肯捱就有個安樂窩啦~因為現今的樓價或租價都已經係非一般人所能負擔

或者每個人對自己個安樂窩都有要求,回想返以前每個上到樓的市民來講有如中了六合彩咁開心,呢種心情對現今的人來講也是一樣,只要有個地方住就已經安樂晒這個希望也是今時今日一般普羅大眾的心聲


 以前的人感覺有份知足常樂的人生態度,最主要唔會同人比較太多,自得其樂就算相中就係以前香港人的居住模式森伯嘅年代應該屬後期,有記憶以來家中已經有彩色電視機
比起板間房木屋區有獨立一間屋已經好好,以前的人放工回家聽下電台廣播,與屋企人閒話家常,生活雖然艱苦,但已經相當之滿足