一條小懶蟲...

一條小懶蟲...
正所謂夏日炎炎正好眠...可能呢句說話唔係今時今日的人所講，若然比著現在的夏日相信都冇人講得出，有時唔好話訓覺，甚至平時做少少野都熱到周身汗，或者森靜自然涼，唔做就唔熱~~搞到森伯伯都變左條大懶蟲咁...

大懶蟲定大懶蛇好呢?!蛇個名聽起來都威猛少少喎...不過為配合張相都係小懶蟲Q得多...哈哈哈

外表有幾懶都好，骨子裡都係勞碌命，點都有要做的工作！！一年四季都幾怕夏季，又熱又濕最怕悶熱，有時寧願落下雨冇咁熱...



入廠...做嘢！
近排流感都幾得人驚，除左迫爆急症室,病房之外，仲話會奪命...所以大家真係要小心，雖則話森伯伯屬長者類，但都唔驚得太多，因為都好少去人多的地方，希望減少感染機會~~講開醫院，相信平時冇乜大劑事都唔想去，但最近都要去一去醫院，係與工作有關！

咁大個人都係第一次入院做野！對我來講都算幾有趣~~雖然入院的性質唔同，但唯一相同的就係想快D收工出院~~~~

COMIX一遊（下）

這個地方除了可睇睇漫畫之餘，其實仲有很多小型展覽參觀，雖然有些展覽好似跟動漫冇咩關連...不過與藝術，本土文化都相關的...

展示一些以鈔票款的設計版畫...

而在另一角又有：名為城市閘誌的相片參觀，介紹店閘前的有趣塗鴉設計...

你亦可參觀當中的放映室，我去當日真係幾清靜，室裡的椅子人影都冇個，影片只不斷放映翻新綠屋的過程，偶爾見到一兩個人坐在這裡，有婆婆似是街坊...坐在影片前都恰著！！盛夏時候都係一個唔錯的避暑地方，婆婆真識揀...

可惜森伯住得太遠，唔係偶爾來訓個晏覺都幾好...哈哈哈

有關紋身刺青的介紹...

時間都差唔多，最後睇埋個塗鴉作品...

後記：

其實活化後的綠屋改變為動漫基地這個構思都唔錯，而且改建後地方很時尚很舒服，又不失當中的舊有特色，不過主題就唔得連貫好似有些零零碎碎，我認為可以做得更理想，主辦單位真係要諗諗仲有咩有關動漫的新意念可以搞搞...
不過唔同人有唔同的感受，點都要你親自來睇睇或者會有你唔同的睇法...

COMIX一遊（中）

話明活化舊建築，或多或少都應該保留少少原有的面貌，參觀漫畫的同時，亦可以看看以前的建築風格...以前的建築特色通常都會用到一磚一瓦，所以一般都較為實淨，在這裡都不時可以睇到~~

這個窗框已經相當有懷舊feel，再加上一些舊擺設，當堂感受到一股懷舊氣息~~呢股懷舊氣息，跟森伯形象真係入型入格~~哈哈哈

據旁邊資料所講這個是廚房灶位，我們這一輩的人都好少看到，可見當時的設計除了實際之外亦很美觀！

為了配合返少少動漫主題，就加插了紙板老夫子人物，呢個影相位唔影唔得啦！！

仲可以在其他展館內看到舊有的建築格局，翻新加入新元素變得時尚，屋內天花部份仍保留舊貌...

動漫基地亦設有一個小型的漫畫圖書館，有很多漫畫書，有書架書櫃，亦擺放了一張懷舊書檯，配合返舊有建築的感覺！

檯上有留言便條，畀參觀者寫低少少說話...
沒有在圖書館內影相，一來唔知可唔可以影，二來有讀者靜靜看書，費事打擾啦！不過可以拍拍當中的特色設計~~

置身其中就好似在舊宅裡看漫畫...

COMIX 一遊（上）

近年來，又好似多了出香港區那邊，間唔中都要過一過海～～今趟都唔例外...
一直都想去睇睇動漫基地那個地方，就咁聽個名都好似跟動漫很有關係，但事實上又有冇想像中咁好睇呢？

本身動漫基地的前身係綠屋，我相信佢活化了唔太耐，若果想睇佢活化前的模樣，只要在google map，打灣仔茂蘿街7號動漫基地，就見到一座綠色建築，那就是翻新前的動漫基地舊址...的確活化後改變很多～美觀及時尚得多...

動漫基地比我的感覺是好有地道色彩的一個展覽場地，有很多展品都好地道，好香港，當然重點都係放在港式漫畫裡...所以佢當中有個漫畫的小型圖書館，內裡都有幾多新的港產漫畫可供借閱...

我諗佢翻新後仲係新階段，感覺上港產漫畫唔止咁少，其實仲有很多歷史，漫畫人物，漫畫家可以畀人認識下...但唔係咁多囉...

呢個牌就係畀一些有名的漫畫家留名，我見到黃玉郎和上官小強個名，仲有佢地真跡的墨寶～有些唔認得名都認得個公仔卦...

呢度間中都會有些關於漫畫影片播放，呢期就有希臘動畫70年，晚上時段才播放，所以無緣睇到...

把舊建築活化，仍保留很多舊貌，再慢慢參觀下先～～

忙著幹...

近排公司的地方真係亂七八糟，周圍都係已入滿箱的紙皮箱，其實做了咁耐都好少遇到徹底的大裝修，不過今次遇到又係一個工作體驗，所以呢排都係執執執，每個人都有很多物資，自己的私物品當然拿回家暫放，通常都係私家杯，擺設等～至於唔要但丟了又可惜的，就放到當眼處等有人領取，都係環保做法…以森伯嗰類人就一早已經準備執拾，唔會臨渴先挖井嘛…呢點都要讚一讚自己呀！！

工作實會有點刻板，所以很多同事都會放些個人擺設緩和一下身心，森伯就會擺放植物，可是到呢個時候要逐盆拎返屋企打理…而呢個模型就係同事的擺設幾得意…外表好似一個紙模型，摸落係似膠製好硬淨！都幾型…

至於公司裝修都不外乎有幾種方案：1‧逐個部份來裝修…2‧搬到第二度辦工…3‧安在家中辦工…
三個方案，最終都係揀第三個～～相信呢個選擇大家都會拍爛手掌！yeah！唔需要日日準時返工已經當放假，因為近年來真係感到相當之疲累，在這段時間可以洗滌一下心靈，再諗諗未來方向怎樣已經唔錯……忽然間森伯好文青～～～哈哈哈！

大裝修都要一段時日，要交代的事情都交代清楚，忙完都可以抖抖，又或者呢段時間可以作為一個某年後的退休預習…哈哈哈哈

買森衫，過Summer…

食過五月粽後…炎炎的夏日終於到喇！！對於森伯呢類老人家來講，又要將啲冬季衫收落櫳底，攞出夏季衫…每年都總有啲舊衫覺得霉霉哋，可能係時候要換換…其實森伯平時出街好少睇衫，除非要買就會刻意去買～～想當年…年少的時候多數去服裝連鎖店買，啲款比較年輕大路而且價錢又大眾化！但人大了，想要的是成熟穩重款…望落比較合襯～～

買衫都唔想周圍去，最好就腳而且多款可以選擇…呢個就係新場，啲衫都OK喎！閒日嚟仲唔係咁多人，呢類款都幾平實，簡約得嚟又幾型仔…但著起森伯身上就打晒折扣…！唉～><

時下好興網上買衫，但始終要親自試過先知好唔好睇，單憑睇相當然唔得，相拍得靚但著上身都可能係兩回事…而且呢度試身都幾自助型式架！試完再試，試幾耐都得，可能係閒日啦！！不過當然森伯快快手喇，好睇與否一著就知喇！

 

 唔同大家講咁多，試身先……

簽名CD

演藝界的明星歌星，的確要用時間去打做，可能以前的歌迷聽眾比較有耐性，而歌星亦有機會慢慢貯歌貯粉絲，當日子耐了就已經可以上位。現在樂壇新星可能出幾首歌就唔見，慢慢就已經被聽眾遺忘......

一向買歌的原則都係有啱聽的歌才會挑選，而呢隻李克勤CD都係啦...其實一向對李克勤的歌都好一般，唔會特別鍾意，至於麻麻地又會有隻克勤的簽名CD?!!....咁就要想當年喇～XXD

想當年...家中新買了CD機，點都要開下綵，屋企每人都揀些心水唱碟來買，而呢隻克勤唱碟就係森媽買的，因為是精選碟，所以有些歌都不會陌生，記得以前時時聽，而當中有首紅樓夢唔錯～

至於個簽名，就係當年克勤去某學府演唱，而那時候有屋企人在此讀書，所以順個便搵到克勤簽呢隻CD...事隔都一段相當的日子，真係唔想當年都唔得...

昨日有如今日，霎吓眼克勤都搞周年紀念演唱會，佢應該都有幾多手本好歌，至於對森伯來講最熟最喜歡都只係紅日咋...