濕森記...

上回就講到森伯Dry Dry地......個荷包，今回就講到濕晒身......

話說...
近排同人傾偈，首要話題總離唔開講天氣，講溫度等......
無辦法喇，五月份天氣就熱成咁，未食五月粽都已經早早將寒衣收埋晒～其實一年四季最怕就係夏季，無奈現在的夏天好似特別漫長...

所以背心一年四季都可以著，可能森伯特別怕熱兼且汗多，出到街走一走已經全濕...有時真係諗下要唔要好似d細路仔夾條毛巾仔響背脊汲下汗...哈哈哈
家下五月都有成三十幾度，去到七，八月就可想而知...現在反而期待冬季，始終都比較乾爽涼快！！

望到外邊景色好晴朗，但酷熱的陽光總教人有點望而生畏（忽然覺得森伯好有文采...），呢一刻反而想落下雨降降溫... 講開又講，唔知大家有冇覺得近來比較少落好大場雨，就算有落都唔太大...好在香港$$多可以買外來水，如果靠從天而降的甘霖，真係唔知我地港人飲乜...哈哈哈

相：是我朝早返工途中所影的...太陽的光已經好似正午~~~

五窮月…

唔想呻窮都唔得，本來都唔想個Blog成日有太多負能量，一唔係就講年事已高，左痛右痛之類，一唔係就講窮到燶…貧,病,老,樣樣講齊～畢竟呢個先至係森伯嘅真實生活嘛～

踏入呢兩個多月，生活上的開支比平時多了，而收入又少梗截…幸好森伯份人又唔會太大駛，或者少出去行街消遣，駛錢的誘因就自然少了…兼且先駛未來錢又唔會係森伯個風格，其實都係跟平時差唔多啦，又冇咩改變，可能慳慣…

曾經有人講過，駛了的錢才是屬於自己的…諗深一層都未嘗冇道理，認為用得其所，值得的…都冇咩所謂…千金散盡還復來嘛！！更何況森伯本身冇千金咁多散呢…

 

銀根短缺，唯有撳住幾舊水頂住先啦～哈哈哈

俗語有云：五窮（而家已經係啦）、六絕（下個月更坎坷...）、七翻身（Yeah!!!!）希望在明天嘛！更期盼可以順利完成呢個課程，唔駛白捱…

街頭小食--雞蛋仔

近排雖然忙忙碌碌，但仍舊工要照返，堂要照上，飯要照0也，涼要照沖，Blog要照寫...
香港人擅忘，費事隔太耐冇寫又唔記得森伯伯係乜水...><

上篇先講完集體回憶居住篇，相信都勾起大家唔少回憶，可能老人家常常懷緬過去，乜都回憶一番...
記得早陣子附近商場先開了一檔雞蛋仔，有好幾種口味可以選擇...其實綜觀咁多口味，始終原味都係最受歡迎...其實數算經典的街頭小食，相信大家都會即時諗到雞蛋仔，對大家來講呢種小食都冇邊個未食過...現在有很多口味都係為創新而創新，新口味得來又夾硬...

見到有椰香芝麻味，當然係首選啦~~雖然食落都係差唔多，對森伯來講都算有少少新款～眼見雞蛋仔材料簡單，製作器具又唔難搵，玩下手成set野幾百蚊可以淘返來...岩晒森伯退休後搞D小生意～～

而家都係時候諗下有咩新口味...準備定先嘛~~~

時光倒流幾廿年之──居住…

香港地方細，對於一般升斗市民來講，居住都係一個生活大問題，為了有片瓦遮頭就算點樣辛苦都在所不惜…當然唔係肯捱就有個安樂窩啦～因為現今的樓價或租價都已經係非一般人所能負擔…

或者每個人對自己個安樂窩都有要求，回想返以前每個上到樓的市民來講有如中了六合彩咁開心，呢種心情對現今的人來講也是一樣，只要有個地方住就已經安樂晒…這個希望也是今時今日一般普羅大眾的心聲…

 以前的人感覺有份知足常樂的人生態度，最主要唔會同人比較太多，自得其樂就算…相中就係以前香港人的居住模式…森伯嘅年代應該屬後期，有記憶以來家中已經有彩色電視機…

比起板間房…木屋區…有獨立一間屋已經好好，以前的人放工回家聽下電台廣播，與屋企人閒話家常，生活雖然艱苦，但已經相當之滿足…

認真…

對於一個想：活到老；學到老的老人家來講，業餘進修都真係幾吃力，尤其森伯果類成日左痛右痛的人，仲諗去業餘進修，真係好似一場大挑戰～

其實呢個課程本身係喜歡，因為喜歡先會容易讀，起碼讀書壓力都少一半啦！亦有感呢個課程對工作、對興趣有實際作用，所以就算吃力都想去試試…

直到返學前，都辦了很多很多的事情…詳細就唔細講嘞！！總之唔易…

馬不停蹄的節奏對森伯來講，都未必係一件易事，所以呢個時候，可以爭取到時間抖抖就要休息，因為勞累都可能會誘發痛症，就因為這樣無形的壓力都唔少！！一個星期唔係返工就係返學，唔係放工就係放學，唔係做工作就係做功課，所以都幾充實，呢種情況仲要維持以後好一大段日子…諗下都唔知能否捱到讀完…

嗱！我唔敢話多，相信都總有一個、半個博友會錫住森伯伯，所以唔常常巡博都要請大家見諒，有留言者就去巡啦！！因為少了活動，都怕冇乜東西可以寫，能夠維持一周一博已經好好…

有時進修要考慮的時間、金錢都是其次，最主要是否有一顆認真的心去讀書，現在不去讀，到將來老了更加沒有動力去讀，所以進修都要講Timing，就好似現在上堂，眼見個個同學仔都係０靚仔０靚妹～因為我初時都以為有些中年人士會讀…不過無論如何都希望可以順利完成呢個課程…

每次返到學校都好似玩迷宮咁，成日要搵唔同的課室…一來老人家冇記性，二來可能仲未適應…

懷舊習作──森伯張換衫公仔紙…

大家又唔駛咁驚慄…放森！當然唔係真正森伯的換衫公仔啦~~

只不過係Q版森伯啫！相信大家都唔會抗拒…哈哈哈

時下興懷舊，舊有的一事一物都變為有價值！價值在於新不如舊?!!舊的比新的好?!!又或者只是緬懷昔日情而已…

有日無意看到一個討論區，見有人發題問：現在還有換衫公仔紙賣嗎？！其後就見有人回答有些地方仍見到…我諗可能在一些舊屋邨的舊式文具舖仲有，其實呢款紙版換衫公仔大家又有冇見過…記得以前仲有種紙飛機，用個長方形的紙袋包裝，裡面是紙飛機的紙組件，很簡單容易就砌到隻飛機，相信都係幾經典…

兩樣紙玩意都是用紙來做，但對當時的小朋友來講也是個好玩的玩意，直到現在更變成經典的回憶，森伯記得不知睇什麼懷舊展覽亦有見過…

睇下呢款Q版森伯的換衫公仔，又唔知會否鈎起大家不少回憶呢？如果你話冇，就可能係…少年你實在太細個喇…

背心+孖煙囪…麻甩版的換衫公仔好少見，算是懷舊得來又有少少創新～～哈哈哈

誠誠退休…

當大家仲諗緊退休要幾多錢先夠的時候，李超人就正正要準備退休嘞…相信李超人對絕大部份的港人來講都唔會唔識～只要一提到香港首富，相信個個都會up得出李超人個朵…或者李超人誠誠真係香港的代表，連有次去睇蠟像館都有李超人個蠟像…

其實對錢銀的價值觀，相信人人都唔同，不能否認現今世代，錢銀等同人身的安全感，當然可以直接認為錢越多安全感就越多，呢個都可以理解，試想想當你帶住十幾廿蚊出街，搭車，食嘢，購物…統統都提心吊膽，怕有咩差池唔夠錢畀；但當你帶住幾萬銀出街，忽然間心胸都挺左，行步路都大Ｄ，就算傻間間摏左入名店都夠膽睇下摸下扮買…哈哈哈

古語有話：大富由天；小富由儉…做唔做到大富都唔由自己講啦～對於森伯伯來講，可以的話做到小小小富都已經好滿足，至少可以有點閒錢用就夠！不過要做到小富…對森伯伯來講都係發夢階段，暫時都係處於憂柴憂米的時期…或者最好的做法就係學習知足，因為知足者；貧亦樂嘛～森伯伯成日都係攞呢句說話勉勵吓自己…><

後記：

參觀蠟像時，好多蠟像背後都有個貼題佈景，可是李生就冇佈景…或者就正如所講的除了大把錢之外，其他已經沒什麼可代表……真係好值得反思~~

為配合篇Blog文，專程摷返幾年前去蠟像館的相出來~~真係唔經唔覺……