COMIX一遊（中）

話明活化舊建築，或多或少都應該保留少少原有的面貌，參觀漫畫的同時，亦可以看看以前的建築風格...以前的建築特色通常都會用到一磚一瓦，所以一般都較為實淨，在這裡都不時可以睇到~~

這個窗框已經相當有懷舊feel，再加上一些舊擺設，當堂感受到一股懷舊氣息~~呢股懷舊氣息，跟森伯形象真係入型入格~~哈哈哈

據旁邊資料所講這個是廚房灶位，我們這一輩的人都好少看到，可見當時的設計除了實際之外亦很美觀！

為了配合返少少動漫主題，就加插了紙板老夫子人物，呢個影相位唔影唔得啦！！

仲可以在其他展館內看到舊有的建築格局，翻新加入新元素變得時尚，屋內天花部份仍保留舊貌...

動漫基地亦設有一個小型的漫畫圖書館，有很多漫畫書，有書架書櫃，亦擺放了一張懷舊書檯，配合返舊有建築的感覺！

檯上有留言便條，畀參觀者寫低少少說話...
沒有在圖書館內影相，一來唔知可唔可以影，二來有讀者靜靜看書，費事打擾啦！不過可以拍拍當中的特色設計~~

置身其中就好似在舊宅裡看漫畫...

COMIX 一遊（上）

近年來，又好似多了出香港區那邊，間唔中都要過一過海～～今趟都唔例外...
一直都想去睇睇動漫基地那個地方，就咁聽個名都好似跟動漫很有關係，但事實上又有冇想像中咁好睇呢？

本身動漫基地的前身係綠屋，我相信佢活化了唔太耐，若果想睇佢活化前的模樣，只要在google map，打灣仔茂蘿街7號動漫基地，就見到一座綠色建築，那就是翻新前的動漫基地舊址...的確活化後改變很多～美觀及時尚得多...

動漫基地比我的感覺是好有地道色彩的一個展覽場地，有很多展品都好地道，好香港，當然重點都係放在港式漫畫裡...所以佢當中有個漫畫的小型圖書館，內裡都有幾多新的港產漫畫可供借閱...

我諗佢翻新後仲係新階段，感覺上港產漫畫唔止咁少，其實仲有很多歷史，漫畫人物，漫畫家可以畀人認識下...但唔係咁多囉...

呢個牌就係畀一些有名的漫畫家留名，我見到黃玉郎和上官小強個名，仲有佢地真跡的墨寶～有些唔認得名都認得個公仔卦...

呢度間中都會有些關於漫畫影片播放，呢期就有希臘動畫70年，晚上時段才播放，所以無緣睇到...

把舊建築活化，仍保留很多舊貌，再慢慢參觀下先～～

忙著幹...

近排公司的地方真係亂七八糟，周圍都係已入滿箱的紙皮箱，其實做了咁耐都好少遇到徹底的大裝修，不過今次遇到又係一個工作體驗，所以呢排都係執執執，每個人都有很多物資，自己的私物品當然拿回家暫放，通常都係私家杯，擺設等～至於唔要但丟了又可惜的，就放到當眼處等有人領取，都係環保做法…以森伯嗰類人就一早已經準備執拾，唔會臨渴先挖井嘛…呢點都要讚一讚自己呀！！

工作實會有點刻板，所以很多同事都會放些個人擺設緩和一下身心，森伯就會擺放植物，可是到呢個時候要逐盆拎返屋企打理…而呢個模型就係同事的擺設幾得意…外表好似一個紙模型，摸落係似膠製好硬淨！都幾型…

至於公司裝修都不外乎有幾種方案：1‧逐個部份來裝修…2‧搬到第二度辦工…3‧安在家中辦工…
三個方案，最終都係揀第三個～～相信呢個選擇大家都會拍爛手掌！yeah！唔需要日日準時返工已經當放假，因為近年來真係感到相當之疲累，在這段時間可以洗滌一下心靈，再諗諗未來方向怎樣已經唔錯……忽然間森伯好文青～～～哈哈哈！

大裝修都要一段時日，要交代的事情都交代清楚，忙完都可以抖抖，又或者呢段時間可以作為一個某年後的退休預習…哈哈哈哈

買森衫，過Summer…

食過五月粽後…炎炎的夏日終於到喇！！對於森伯呢類老人家來講，又要將啲冬季衫收落櫳底，攞出夏季衫…每年都總有啲舊衫覺得霉霉哋，可能係時候要換換…其實森伯平時出街好少睇衫，除非要買就會刻意去買～～想當年…年少的時候多數去服裝連鎖店買，啲款比較年輕大路而且價錢又大眾化！但人大了，想要的是成熟穩重款…望落比較合襯～～

買衫都唔想周圍去，最好就腳而且多款可以選擇…呢個就係新場，啲衫都OK喎！閒日嚟仲唔係咁多人，呢類款都幾平實，簡約得嚟又幾型仔…但著起森伯身上就打晒折扣…！唉～><

時下好興網上買衫，但始終要親自試過先知好唔好睇，單憑睇相當然唔得，相拍得靚但著上身都可能係兩回事…而且呢度試身都幾自助型式架！試完再試，試幾耐都得，可能係閒日啦！！不過當然森伯快快手喇，好睇與否一著就知喇！

 

 唔同大家講咁多，試身先……

簽名CD

演藝界的明星歌星，的確要用時間去打做，可能以前的歌迷聽眾比較有耐性，而歌星亦有機會慢慢貯歌貯粉絲，當日子耐了就已經可以上位。現在樂壇新星可能出幾首歌就唔見，慢慢就已經被聽眾遺忘......

一向買歌的原則都係有啱聽的歌才會挑選，而呢隻李克勤CD都係啦...其實一向對李克勤的歌都好一般，唔會特別鍾意，至於麻麻地又會有隻克勤的簽名CD?!!....咁就要想當年喇～XXD

想當年...家中新買了CD機，點都要開下綵，屋企每人都揀些心水唱碟來買，而呢隻克勤唱碟就係森媽買的，因為是精選碟，所以有些歌都不會陌生，記得以前時時聽，而當中有首紅樓夢唔錯～

至於個簽名，就係當年克勤去某學府演唱，而那時候有屋企人在此讀書，所以順個便搵到克勤簽呢隻CD...事隔都一段相當的日子，真係唔想當年都唔得...

昨日有如今日，霎吓眼克勤都搞周年紀念演唱會，佢應該都有幾多手本好歌，至於對森伯來講最熟最喜歡都只係紅日咋...

食肆化…

當很多人都認為工字不出頭的時候，做生意又係咪一條出路呢？！假設現在真係有個機會去做生意，又有邊行生意至好搵？！…我諗一定係食肆！睇吓有幾多食肆開到成巷成市就知啦～～

都有一段少時間冇來長沙灣呢個商場，呢日碰啱有事辦順道要來，以前呢個商場有幾多唔同類型的店舖，點解今日來到發覺有咁多食肆，真係有啲呆了眼，畀我感覺好似食街…不出兩步就有一間，相信嚟掃場都會幾滿足，可惜森伯吔開住家飯，而且掃場都唔係森伯嗰杯茶，不過約人來食就好啱，咁多食肆可以慢慢揀…

其實以前呢度都有很多小商舖，買吓電子產品，玩具模型，衣飾鞋褲…等，有間幫襯開的鞋舖都難逃迫遷，因為有幾多長者款（俗稱街坊裝）的鞋幾啱森伯，所以每次經過都會睇睇，不過以後就變成“想當年”了…

趕走小商戶就當然有些大集團入駐啦！又真係估唔到有咁多有名的品牌會在此出現啵…始終呢度係工廈區，一到食晏見到嘅人流，你咪話唔驚，間間食肆都坐滿人…

現在去到大型商場你都會感到熟口熟面，一式一樣的舖頭…至於小型商場就會見到很多食肆…就足已證明港人加自由行旅客都同樣咁有「食力」！

甩皮甩骨…

記得細個都有試過買些玩具模型砌砌…但當時只係小朋友有冇砌過一件似樣啲的模型都唔記得，因為好多時候砌砌吓當中的散件就會唔見了，人大了真係好少再買模型、拼圖回來砌，一來會認為浪費時間，二來辛苦完成的模型冇咩地方放…所以一不做…二不買…三不砌……但有時經過一些拼圖專門店，都好想睇睇有冇咩森水畫買回家砌，不過諗吓呢個漫長的消遣，未必有咁好森機維持…更何況一件花時間的模型擺設，更加冇諗過要買！

相信如果有些Blog友好記性的話，我都曾經出過呢隻蠍子的post，記得都買了好一段時日，當時砌好後已經好好放在櫃桶裡，免得封塵兼碰散，殊不知…一拎出櫃桶就見到散修修，一碰就甩～可能太耐了模型的嵌入位都好似森伯咁老化～～哈哈！！軟膠模型有個唔好處就係擺耐了會有硬化跡象…

隔了好一段時間都唔記得點砌返，初時張模型藍圖都消聲匿跡…漸漸發覺寫Blog有另一個好處，就係可以搵返post過的相出來跟住砌，又砌又黐…又黐又砌…只能用白膠漿作輔助，唔可以用超能膠黐，黐錯咗就冇得掹～～結果隻蠍子王又再重現～～一個字型丫！！

忽然又學到做人道理，唔理平時點樣甩皮甩骨，畀心機執執，都可以變返肆肆正正…