第一次去A商場…
有時港式商場來來去去都係差唔多,不過有時對於長者森伯來講,逛下商場又係一個唔錯的選擇,或者你認為香港的商場冇咩特色,裡面的店舖熟口熟面,呢個我都認同,入到去你總會見到超市、連鎖藥房、家品店、服裝店…等等
個商場名就時時聽到,去逛都係第一次…可能森老伯腦退化,之前踏足過都未定,不過就冇乜為意…
第一次行A果店…
蘋果店就聽得多,本應之前都想去下中環總店見識,但山長水遠兼且又冇乜要買,其實在官網買都幾方便,而且佢大部份產品都係包送貨…
但實體店都係第一次去觀摩,當日就有售貨員講解ipad點用,唔係一對一喎,係一對十幾個小朋友,小朋友就坐晒地下,講解員就好似老師教書咁!
可能有些家長在場睇啱就買,咁做生意都係第一次見…
第一次飲S咖啡…
其實偶爾都會在便利店買佢的樽裝咖啡,記得有次堂食都係買杯凍飲,真正試佢調配出來的咖啡都係第一次,本來都有意堂食,但當日午飯時間顧客實在太多太多,而且我仲要趕時間走人,所以不得不即時決定帶走,冇法都要排隊,終於等到就叫杯焦糖咖啡…殊不知要用英文落單??!!森諗唔係呀!!即時點知焦糖咖啡係乜英文名@@…大家都係港人,講乜詭野英文丫…你地都知森伯外表斯文,內裡粗人…當時真係想爆粗,爆一個字的粗口……最後點埋麵包就拎袋外賣拿拿聲走人…
要焦糖咖啡當然唔想咁苦,不過呢杯咖啡就真係幾好飲喎…反而有少少似鮮奶咖啡…
不過下次去買咖啡前記得要去個官網學定D英文叫法:焦糖咖啡Caramel Macchiato…鮮奶咖啡Caffe Latte…意式特濃奶咖啡Ristretto Bianco…叫老人家點記得咁多丫~~> <
同一個時間,在同一個商場,就有三個第一次!都叫抵行卦…哈哈哈
啱啱開張去過幾次, 唔多就腳, 之後冇去囉!
回覆刪除A店冇去過, 因為我支持國貨HW。
S 咖啡冇飲過, 我飲奶茶會上癮,飲咖啡會成日上廁所, 而家飲朱古力粉 同 H白色飲品。 鍾意朱古力陣味,而H勁加鈣,係老人補品,話老人一斷髖關節,就係咁大,聽落都吃手手。
其實香港好多大型商場都係差唔多,梗有一間響左近…買嘢都好方便~~~
刪除去A店都係睇下,暫時都冇咩想買,買呢類電子野我著重佢的售後服務…因為好怕佢壞~~~
H勁加鈣?!!...咩牌子呢??啱森伯副老骨頭飲吓…查實成年人正常地吸收鈣就得,唔好額外加呀………你食完鈣一定要加埋晒太陽, 人體先會吸收~~~
茶餐廳叫『可立』。
刪除上過中大個網計算我每日食到幾多鈣,係唔夠1000毫克,又唔得日日食硬豆腐同罐頭沙甸魚,又冇每日飲牛奶食芝士、 乳酪嘅習慣,最後發現H飲品好高鈣,又好方便一冲就得,咁我早餐習慣食穀物溝麥皮,咪加羹入去補吓身子。
出埠外遊 咪好多第一次囉!我又分享我 香艷嘅第一次
刪除去韓國 剝光豬🍑 🍆🍒🛀浸溫泉,仲走出戶外池,周圍有雪架!好似睇電視旅遊節目咁樣,唔覺凍,又唔覺好享受。仲浸咗一陣就頭暈要上水。
我又冇計算鈣的份量呀~從普通食物吸收便可…不過對於年紀越來越大,多點吸收鈣質都係應該嘅!!我冇食額外添加高鈣的產品,更加冇食鈣片之類,若果吸取太多好易腎結石架?!(據講…)最好都係多啲曬太陽幫助鈣讓身體吸收…
刪除我諗若果出埠旅遊,我諗可以寫幾十篇第一次…哈哈哈
你香艷還香艷…外邊落雪凍(血管收縮)浸在溫泉熱(血管擴張),即刻又凍又熱,血管好易出事…年輕時就冇咩所謂~~年紀大咁做好易泉上風……下次唔好咁做~~
漏咗唔記得講:可立嗰隻飲品,以前覺得好飲好特別,到現在出品的產品完全冇咩味…都冇買好耐~~~你有冇覺得?!!…
刪除根據香港流行病研究中心喺2014年
刪除進行的一項研究,發現香港人每日平均從食物攝取的鈣含量僅為684毫克。我喺『膳食鈣計算器』計過我係得660,我研究過自己嘅飲食,真係正常嘅香港人飲食習慣係唔夠鈣,除非,好似外國人有每天早晚都飲杯牛奶嘅飲食習慣,(2杯牛奶有554毫克鈣),又或者日本人每天都喺早午晚三餐麵豉湯內共加入¼磚硬豆腐(421毫克鈣),及早修補骨頭漏洞,估計森兄都係一個正常嘅香港人,一樣食唔夠鈣,做人唔好估估吓,遲到好過冇到,快啲入去網站查個真相。
趁勢補鈣先讓我重新認識「可立」,原來佢含維他命A B C D E 鈣 鐵 鋅 葉酸,包羅萬有,1杯「可立」嘅鈣等同2杯牛奶嘅鈣。可能佢喺變身做營養飲品時改過配方,所以,健康嘅就係冇咁好味,無細路時飲嘅咁好味。
森兄真醒目,識得加上曬太陽吸收埋維他命D先至能夠補骨,缺一不可,多謝暖男森提醒。
泉上風……估不到森伯都有小小鹹、多多趣,笑死我。
我去嗰時仲係小鮮肉,年少輕狂,有嘢趁嫩試,老來不後悔。 雖則我依家好多皺紋面皮冇乜彈性, 不過 ,我嘅血管保養得好似後生仔咁有彈性,用過世都冇問題,依家嘅上壓係低過110(炫耀中),比起高血壓指標140仲有好大段距離,浸温泉都唔會泉上風,重點係我唔覺浸熱水浴係好享受,應該唔會參與呢啲身體極限嘅危險挑戰,當然,聽森一夕話,勝讀半年鹹書,點都要跟隨森兄教誨。
咁我又冇去計住計住吸收幾多毫克的鈣…飲奶都係唔錯,但時下的牛奶很多有激素,抗生素之類…講真唔敢飲太多,好多養生達人都唔鼓勵飲太多奶,芝士間中都會用來夾麵包食,現在就會買些可以連骨食的白飯魚,唔錯架!易食又唔會哽親…遲D可以在網誌講吓魚仔飯喎!豆製品就會時時食…不過唔會太刻意,食東西隨意而且著重健康就最好…調查報告照聽,不過當中有幾多成啱自己呢!就要憑自己去衡量囉,唔會盡信…
刪除你講到可立咁好,都想買返來飲…不過最怕佢飲咗冇耐, 就結到一嚿嚿~~~不過我有買黑芝麻粉,同樣都係補鈣食品,而且可以造多種食物幾好架…
而家嘅健康資訊咁發達,唔駛暖男森都好多人知啦…
我諗住講泉上風一爺兄會易明啲嘛………XXXD
以一爺兄所講有嘢趁嫩試…相信都試過唔少嘢嘞!!!!你的血壓好標準,呢啲就可能你注重健康的回報……聽森一夕話勝讀半年鹹書~~~乜咁睇得起森伯呀!!!!!
好驚三XX化學假奶,乜仲有藥材奶咁嚇人,我又冇諗過喎!好彩我唔飲,揀好ㄨ克、朱古力粉同自己打豆漿。
刪除森至叻,識得食有骨魚同芝麻,不過,豆制品係得用石膏整嘅硬豆腐至高鈣咋!軟豆腐少好多架。食魚乾仔當零食都得。
青春真好,隨森食就得。
唉!我呢啲老人係好麻煩,飲食要小心,要計住計,食少又唔得,食多都唔得,真係好難服侍,咪畀人嫌棄,要做獨居長者。
一直都好睇得起森兄架啦!(名方面)
一不小心,今次又畀我覇晒成個版面,都係要計住計住,太長氣老人院都唔收。😁
咁買鮮奶飲都會揀些香港的大牌子,較保障…攪豆漿真係要有時間才可,都唔會時時整,近排森老伯好懶……:P
刪除其實豆製品都唔係因為含鈣先會食,只是在單調的素食中多個選擇啫…
成日要計住計住梗係辛苦啦…平時食得清淡,間中又可以食啲邪惡東西,攞個平衡囉~~
好睇得起森兄……乜咁多謝呀!!!
大家都係講下健康嘢啫,就算霸晒成版都冇所謂,都可能畀睇嘅人有得著嘛…
對呀!大家都係港人,講乜詭野英文丫…
回覆刪除不過,我很少幫趁,因為都幾貴,最重要我冇咖啡癮!
可能呢間咖啡店扮有格調,唔飲開邊個識佢啲英文叫法丫~
刪除間中飲吓係幾好飲,時時就…正如你話齋幾唔抵~~我暫時就唔係太大癮…
原來三個第一次都是在同一地方,如果你唔趕住走,可能還有四、五、六、七…次的第一次呢?
回覆刪除咖啡文化,就要喜歡飲的人才會知道,比著我還是簡單的,喜歡港式茶餐廳咖啡。
哈哈哈…駛唔駛講到咁誇呀……對於森伯呢啲大鄉里來講,行一個普通商場分分鐘有廿幾三十個第一次都冇咩出奇……
刪除茶餐廳我多數叫奶茶,因為茶餐廳的咖啡多數苦……
森伯伯,你啲第一次…
回覆刪除唔知仲有冇下集架呢?:P
森伯可能腦退化…唔記得又係第一次…哈哈哈
刪除冇下集架嘞~~下集留返畀KaKa講佢嘅唔知第幾次…XXXXD
之前見過有個亞伯原來佢個腦退化到只有三分鐘記憶,佢三分鐘之前答應過你做嘅嘢,三分鐘後已經失了憶,見佢那麼可憐,又不能夠怪責他。哈哈!
刪除Ka Ka 自小就唔喜歡數學,所以逢親同數字有關嘅嘢,我都唔會記住!哈哈哈……
你講的好似森伯…隨時都有可能唔記得嘢~~哈哈哈
刪除一個長者唔記得事都可憐,都唔會仲怪佢…更何況Ka Ka有一顆善心呢~~~
呢樣又有好處,唔記得數字…年齡又可以忘記,食肥咗腰圍數字又可以忘記…簡直係理想啦…哈哈哈
如果可以選擇性只記得開心嘅事都好喎!
刪除我…其實無乜善心架!
只知曾經是童軍,要一行一善咋!哈哈哈…
(都唔係咩善心嘅,我覺得惻隱之心人皆有之,
能力範圍內,都會盡棉力嘅!)
但,Ka Ka一定唔會忘記銀行月結單上結餘嘅數字!咔咔咔咔!
能夠選擇性記憶, 真係冇咁理想, 有時記唔好的事都可以令自己有個教訓唔好再犯~~~
刪除做人太氾濫的善心又唔需要, 適當便可...老土講句,做好人冇咩回報,但半夜有人叩門都唔駛...
KaKa個月結單結餘咁多數字, 要記真係有排記~~~~
能夠選擇
刪除性記憶
咁理想
ykk都係第一次聽到咁多咁開森第一次!
回覆刪除咁又唔係咩開心事…對於森伯來講普通事都變冷特別的事啦~~
刪除哈哈! 一個小森去旅行. 一杯二件. 三次第一.
回覆刪除ykk第一份工作,也是在觀塘,SC染廠,當時巧明街好近舊碼頭!
在apm開張至今去過一次.因是港島人,少到觀塘,兼且無親無故!
第一次聽到,在Starbucks order 飲品用中文!
其實行商場都係睇就唔就腳,好似森伯係西九人,附近區的商場比較行得多…而且香港商場度度一樣,行邊個都係差唔多啫…
刪除星巴克我諗分地區,以前買凍飲都係用中文落單…呢間商場多office白領就用英文囉…
Starbucks我麻麻哋……
回覆刪除咖啡口味好個人,可能有啲人喜歡茶餐廳的口味...
刪除