情森DIY之－黑豆漿

個Blog題直情掂啦…好有呢個情深說話未曾講feel呀…哈哈哈～～入返正題先…自從搬咗新居（Blog）咁耐，都好似冇咩講過健康飲食…點都要寫返篇嘅～～

平時買到的所謂健康食品飲品，話雖健康，其實有冇添加自己都唔知，不過如果係自己整，咁就吔得百分百放森嘞…市面上都有幾多包裝黑豆漿，好似維他Ｘ都已經有出…但未買過！其實要整都唔太難，做法同普通黃豆一樣…感覺上磨豆漿好麻煩，但若然份量唔多兩至三人都唔算艱巨…

先將黑豆浸泡，粒粒好似森伯啲黑曜石咁款…

跟住就去用攪拌機磨，每次磨完都好多豆渣，以前睇過一本食譜話可以加麵粉煎薄餅，森伯又未必有心機再整餅，最主要驚豆渣唔熟食壞…不過製作黑豆漿最麻煩都係洗隔渣袋，黑色的豆皮碎都幾難清除，所以攪黃豆較方便易潔…

將隔完渣的豆漿煲到滾，就可以飲！自己整…落幾多糖都可以隨個人口味！呢份早餐都幾豐富，有蛋白質又有纖維，齋睇都已經夠晒健康！

初時以為黑豆漿係偏黑色，原來攪出來的黑豆漿只係淺灰色而已！我個人唔係太啱食黑豆漿，所以日後都係整普通豆漿比較適合！

慳嚟搭的士…

雖則唔係成日要搭的士，不過的士加價或多或少都有影響…感覺上的士都時時加價，對上一次加都唔記得幾時…其實都明白，只要樓價租金貴民生各樣就一定加加加…有時都唔敢奢望薪水都加，唔炒魷都偷笑啦！所以點加都唯有硬食，有人話已經加到麻目晒，作為升斗市民的森伯伯，唯有慳慳慳…

其實到今時今日，Book車的渠道都多了，有時都未必需要坐到的士，只要車費較平，個個都樂意選搭…好似近來甚興的白牌車「U爸」都有見過人約，而且用部手機約，就相當方便，聽佢地講車費仲平少少，唔多唔少都搶走的士啲生意喇…我就未搭過～～

不過的士司機的態度有時都畀人唔係太好印象，有啲又濫收車資、禮貌態度又差、拒載、兜路等…當然唔應該一竹竿啦…不過若然路程太短就唔多願載，呢類情況真係時有所見！自己一個搭都冇咩…但多一兩位上車就多數黑面兼藐藐咀！XXD當然都有遇過好好喇！

新車費咪錶未裝，但新收費表就有一張，數目分明兼且一目了然…睇睇下原來加幅都唔少喎，不過始終都有一班的士客，加加吓都慣晒…

「煩」事兩面睇…

最近留意到一個電視廣告，內容都幾正面架！！主題大約係講…凡事要多面睇，用另一角度去睇每一件事，心態唔同結果都唔同…我覺得而家的人諗嘢大都係比較負面，可能或多或少都與生活壓力有關…如果能夠放鬆一啲，人就可以冷靜看到事情的另一面，其實呢種正向思維唔係今日的人需要，以前的人都一樣有，唔係就唔會有──塞翁失馬呢個成語故事…正好比喻凡事有兩面睇…無論遇到好與不好的事都以平常心去看待！ 

其實人的意念好重要，好與壞、正與邪都只係一念之間，當然若要人生過得豁達，人就應該多啲正面的思維！事情或者唔到我哋去選擇，但心態就應該可以…森伯本身都係悲觀派代表，有時負面嘢都一籮籮，所以都好應該培養多啲正向思維，個人都可以豁然開朗少少～～

認領…

唔知大家多唔多遺失物品，相信有啲大頭蝦都成日有機會遺漏東西…但對於森伯來講，自己的物品都會睇得緊，除非腦退化突然發作啦～咁就另當別論…

有日在公司的接待處檯上見到有張$100蚊喎…平時最多就係同事們的手信小食，仲以為今趟有錢攞添…哈哈！再睇下張字條原來有人跌咗錢，擺在接待處檯面最好，出入一定係必經之路個個都睇到…銀紙呢家嘢又無咩記認，其實人只要一有貪念都可以據為己有…但每個人都係憑良心，唔係自己的東西就唔會貪！結果到放工的時候依然冇人認領… 

其實公司出入的人多，唔係同事跌都有可能其他人，雖然最後唔知佢地點處置張銀紙，亦有可能會買埋郵票寄信卦…

另一日就係超市買完東西，出超市門的時候，見地下有張$10紙幣，再行前幾步又見一張…肯定個大頭蝦跌完又跌…哈哈！因為這間超市在商場內，所以地面的東西好易見到…最後趕住走都無理有冇人執起啲錢…

相信唔見錢都可能時有發生，至於執到錢都時有聽聞，而家多人用電子貨幣，執到錢的機會都應該越來越少…我諗執到失物最多係公車司機，林林總總都有…貴重的就有人認領，至於濕濕碎碎的就應該冇咩人會領回嘞！

靜態觀賞搶包山…

雖則話快活不知時日過，但原來營役中的時間都好快過…若然唔係有人提起都唔記得五一勞動節係假期…對於打工仔來講今周都唔錯，返吓工放吓假又一周，五一過後又係一年一度的太平清醮，本來以為太平清醮在六、七月，原來咁早…雖然未到正日，但聽聞話長洲已經迫爆，人山人海，始終太平清醮都係有地方特色的節慶活動，梗係多人去參觀…

對於住開市區的長者（森伯呢類…）總覺得長洲係山長水遠，而且更加怕人來人往，去到都唔夠人迫啦！而且搶包山又係零晨舉行，老人家可能一早就訓咗！既然去到都係睇唔到啲乜，倒不如靜靜地睇吓包山算嘞…

其實係歷史博物館一個展區，介紹香港有什麼特色的節慶，相信太平清醮對於港人來講都唔會陌生…不知是否按真正比例，但這座包山都約有四層樓高，都幾壯觀，如果要訓練搶包山，第一先要…唔怕高！當中亦有展板介紹太平清醮的由來…

太平清醮除了聯想起搶包山之外，仲有飄色，舞獅巡遊…當然唔少得一個個脹卜卜的平安包啦～外表有少少似以前茶樓的蓮蓉包，應該食落都唔錯，最主要取其「平安」的意思啫！

兒時玩味之－玩車車

人大了，越來越覺得玩具好似唔關自己事…不過近幾年，偶爾經過一啲大型的玩具店，都會順道逛一逛…可能係種心態問題，至於人老了，反而唔會有什麼忌諱，想睇就睇；想買就買…以前細個買的玩具唔多，所以每件玩具都有很深印象，唔似現在的細路每樣玩具都係三分鐘熱度，玩兩玩就唔玩，大人都要把部份玩具轉贈！皆因物質太充裕了…

以我記憶所及，車仔都係森伯常玩的玩具，記得細時有款小巴的玩具車，見處處玩具舖都有得賣，相信當時都幾普遍，我諗而家在一些舊式玩具舖都可能搵到（好似在葵涌廣場都見過），是塑膠製的！唔知點解細個好鍾意小巴的顏色，而且又係縮細版，當然愛不釋手啦！！之後就玩合金車仔細細架！至於現在見到有靚靚嘅甲蟲車都會買～

 當然可遇不會求（皆因唔係太熱衷嗰種），唔會網上搵見到先買…雖則現在的玩具車跟以前都沒有太大分別，但手工精細了！尤其是以真比例做的玩具車～車身的漆油都好少會甩色，相對較耐擺…

細時的車仔只會當玩具玩，但到人大了就會將車仔當一樣擺設，現在潮流興玩地道，懷舊！有很多模型車仔都有復古版，好似見過貨車仔同雪糕車都幾有懷舊味道，再見到都會買嚟擺，至緊要係細細架唔阻定……

開新一頁…

自從由Y-blog搬回到這裡的PChome已經又有好一段日子了，在PChome這裡令我諗起很多最初寫Blog的點滴…由以前以小品文形式為主的網誌，通常都係短短幾句，又冇乜相片…至到現在呢一刻的網誌篇篇都好似水蛇卵咁長，或者由後生仔寫到變阿伯，個人經歷唔少兼且又長氣唔少喇！！哈哈～

以港人的性格而言，有時喜歡獨處，但又害怕離群…點都要一班人齊哇哇，先稱得為同一船人…經過諗諗就想在Google Blog呢個平台寫吓日誌…在PChome寫博雖然跟大家唔同平台，也十分感謝好幾位博友（真森話）常常到訪…

Google Blog已經建立了好一段時間，本意都係方便在各位的網誌留言，可是間唔中都會收到Google Blog管理話個吉Blog好耐都冇郁過（即是冇寫過任何網誌），唔知佢會否隨時Cut Blog…怕到時申請返又要搞一餐…咁就不如在這裡試下寫森Blog！！而今次亦為這裡做了個簡單新Banner，當中有熟悉的森伯舊作品，夠晒親切喇卦！！

嚟探森伯請到以下網址：

http://sumyuenblog.blogspot.hk/