剪剪煩惱絲…

睇開森Blog的友好們都知，森伯個人平時都幾有丐幫feel…未到最後一刻都懶懶閒閒…梗係啦！仲有幾日就過年~~所以的起森肝去剪髮…以前就有話年廿幾理髮舖就會雙計，到而家已經唔係雙計，直情加價…都冇法喇！到年尾人人都想靚靚仔仔，靚靚女女咁過年～

原來都有好多人留到呢幾日先去剪髮，一見多人我就唔剪住，查實真係日日都咁多人…

附近只有兩間理髮店，森伯又唔想跨區剪髮，迫住近近地就腳！較經濟實惠果間一定多人剪…貴果間冇咁多人剪，不過就手勢好啲…查實剪森伯個頭就最簡單，唔駛洗頭好快趣就可以剪完，根本平貴都係一樣！眼見平果間真係日日都咁旺場，於是一向拮据的森伯，都要幫襯加到離晒譜的理髮店剪髮過年…雖知都係明屈！唯有出年真係要早些少剪定過年…

趁過年前夕去修修煩惱絲都好，平時煩惱事都唔少，趁新年清清佢係好0既，起碼個人都醒神啲…

森春辦年貨…

睇森Blog有咩好呢?!!...就係貪森Blog夠懷舊…辦年貨呢類傳統活動都會講下～～農曆年將至，以前的人興除舊迎新，買新東西都有一種好意頭的含意～～
對於森伯來講為新年準備就可能只係剪番個靚頭，因為平時太唔得...至於傳統吉祥物紅底底要唔要買呢?!!寓意由裡旺到外嘛，見到先算啦！

相信最有feel的辦年貨地點都非國貨公司莫屬，傳統擺設，傳統食品都可以搵到…
平時一般超市就行得多，國貨公司的超市就冇乜幾何行…
話明國貨超市，十居其八都係國貨，原來有機食品仲有幾多選擇…

以前家家戶戶都有臘味過冬過年，臘味當然係年貨之一，一行去已經聞到陣陣臘味味，臘腸，臘肉，金華火腿，臘鴨脾一定唔少得…講起臘鴨脾只要少少就可以送一碗飯…呢個天時有佢送飯就至適合不過～

有人客來拜年，糕點茶葉肯定唔少得，茶葉好唔好都可以試試，見到呢度有張樹檯，有杯可以沖來飲！不過就冇人敢坐落去嘆茶囉…

 而今次逛國貨超市最主要目的都係買呢種藕粉，只是當一種食療…

相信而家好多人都對國產貨或食品冇咩信心，睇到國產食品都會卻步，或者係對一間老字號的公司的商譽仍然不失信心，上得架的貨都應該有驗証～國內都總會有些良心商家，如果下下標籤了那就真係對好的公司唔公平…

可能森伯近年來老成左，間中都想去國貨公司睇下野，最主要係睇下有咩森水工藝品，當係逛下藝術品展覽都唔錯，睇啱仲可以買…

要寫好一封信…唔易~~

時下新世代，究竟仲有冇人會拎起支筆，真真正正去寫封信給人呢？甚至聽過有人講要寫信…寫報告…咪搞我！森諗：乜要寫封信真係咁難為咩？！

最近森伯都要為某些事情寫封信，與工作有關…現在用電腦打就方便得多，有錯就即改，內容用了些時間就鬥好…反而最難就係要寫一些所謂敬辭、稱謂語、啟封詞…好怕寫錯，分分鐘森伯有幾多墨水都畀人睇出…

寫信時稱對方的敬辭：

通常要寫呢類信係好正規，但現今香港地又有幾多人真正理會呢？當然最快捷的方法一定是在網上查閱，唔查由自可…一查就發覺自己好多可能用錯…
就算我們以為寫中文信好易，原來要寫封似樣的中文信都係一門學問…

 唔同對象場合有唔同寫法，我諗唔係咁多人識寫…

平時我只識寫敬啟，收啟，台啟…原來唔係人人都可以咁寫，有分別…唔睇唔知~~

當然喇！現代社會都唔會咬文嚼字，最後唯有用較常用的詞彙就算…

森伯個龜密好友…

近日睇到有單元朗八鄉的新聞，搜到一間村屋有很多的珍稀動物，相信大家都可能覺得有趣…其實森伯好耐以前真係有諗過自己住的地方養好幾種寵物，不過就唔係咩特別寵物…當人越大越唔敢亂咁養，始終養寵物都要有一份責任感…

其實同大家Blog友認識咁耐，都好似冇真正介紹過森伯隻龜密好友，數算一下呢隻龜都養了五、六年…買的時候是小型龜，到現在都係小型龜…我懷疑係唔會再大，可能係品種問題～～

養開龜的朋友可能會認識，但冇留意開就感覺跟普通龜一樣…其實佢有名堂…叫西非側頸龜…來自非洲的一個龜種～咁又何謂側頸龜呢？可能會諗到蛇頸龜，但側頸龜係冇長頸架！！普通龜來講：龜仔個頭伸出伸入成直線…但側頸龜就做唔到，龜仔個頭只能打側，就算睡覺都係一樣，所以無論點樣你都能夠睇到龜仔個頭同眼，因此而得名…呢度真係要長氣咁講明龜仔個頭，冇得簡稱，費是又聯想起其他東西喇…XXXXD室內養要注意日照需要，間中要晒下十令分鐘的太陽燈對健康有幫助…

因為本身係水龜，都好易養冇咩持別需要，我會用魚糧餵飼，若然自己食開白飯魚都會給牠一些，蝦及白飯魚佢都鍾意食，夏季活躍期，冬季在港有假冬眠，唔需要點理！！所以都算係懶人寵物…

龜唔可以長時間在龜兜裡面，間中都要放牠到窗台，若然放地上可能易唔見，在窗台就冇走失，佢把窗台當佢自己的小天地，互動性就係可以跟住我的手行過來，可能畀慣食物畀佢…都得意嘅～～

都市人可能需要一些生活調劑，若然自己夠承擔力，養寵物都係一個唔錯的選擇，唔需要著重名種或稀有，就算好普通的寵物也能為你帶來歡樂…有機會再同大家講下龜經…

吔個齋麵...

其實有好多時，食肆個名聽就聽得多，但係都好少機會去幫襯...就好似今日所講的八方就係例子～～
見到荃灣區都好似有幾間分店...呢間舖主打餃子，麵食等...

當日想試下餃子麵，但見餐牌有些餃子類的餡料係誡口食物，所以同侍應講可唔可以走乜走物...森伯個老人家真係麻Ｑ煩...哈哈哈

侍應話所有餡料已經一早溝好晒...既然都走乜走物就不如叫個齋餃麵...緣色餃子皮好易認，素鍋貼都係綠色不過長長的，雖然話係素餃但食落似有肉的口感，唔錯既...幾個人食埋單都係百幾蚊，畀想像中又唔算太貴，都食得過...

呢類粥粉麵食，森伯都ＯＫ架！如果出去只係食個晏，通常都係揀呢類...

長者森...講低講高～～

大家唔好有歧見，以為長者講高講低一定指血壓，查實高低都可以講下其他...

低  溫...
近排的氣溫真係幾凍下，有日仲係七點幾度...唔知仲會否低處未見低？！
其實每年的一、二月係全年最凍的月份，在香港點都唔會去到零下幾十度又落雪，若然係咁，我諗森伯會冬眠...只係食同訓～無法啦！太凍老人家D骨頭都未必郁得到...><
早前有報導話有很多老人家冬天跌斷盆骨！！之前好少聽，原來著得太多厚衫褲都會造成障礙，容易絆到跌親...
 
咁森伯都會注意下...天寒地凍，相信森伯都係攬住個暖風機最實際...索性做番個如假包換的暖男～～

放工時候天色已經近夜晚，雖然燈光火著，但仍感到陣陣寒意...

高  收...
講到高，點都要提下樓價，不斷的升幅真係得人驚！一層普通的樓都可以去到接近成千萬...
以前聽到一千萬真係成幢獨立屋，聽落都幾誇張～升除了係樓價，股票市場近排都大熱，日日都聽到話有咩新高...
有份參予的都必定皆大歡喜，記得以前的人對股票賣買都較為保守，時至今日個個都好似股神，你一句，佢一句，特別多分析...玩股票都係考眼光的投資，森伯冇膽又冇本，邊敢亂咁投機丫...XXD
 
睇人有斬獲都戥人高興，有人話如果繼續有升幅，餐飯肯定冇走雞！！森伯索性做個靠黐男～～

「鴻運當頭」有生機…

今年第一篇點都要攞返個意頭先…諗諗下森伯都好耐冇執支筆筆寫返啲健康嘢，一於今年頭炮寫返個…「鴻運當頭」有生機…
生機飲食已經流行好幾年，最初呢方面的資訊多在台灣的網站，不過香港都漸漸多人認識何謂生機飲食，其實好簡單一切食材都以生食為主，吸收佢最天然的養份，從而令身體壯起來…講就係咁講，得唔得要試過才知！！

其實森伯間中都會整呢個紅菜頭，好少用來煮食因為唔知點煮，所以用來生食的多，而菜葉亦都可以煮來食，完全冇浪費…切了的紅菜頭最好趁新鮮食晒！！
紅菜頭當然要飽飽滿滿，呢個就唔錯…

材料全部可以生吃：包括紅菜頭，蕉仔，黑芝麻（未經炒過…），蜂蜜，開水…

懶人養生法…全部放落攪拌機攪勻即可～製成品個賣相好紅…
森伯伯多數用來送麵包當早餐～初初食唔慣，或將開水改為豆漿會好好飲！！推薦…

紅菜頭小知識
呢個小知識係聽環保達人周兆祥講，就是食紅菜頭可以測試你的腎功能，很多人通常食完紅菜頭都會排出略帶紅色的尿尿…至於越淺色代表你的腎功能唔錯，能過濾紅色素，若然是深色就代表腎功能可能麻麻，就係中醫所講的「腎氣虧損」簡稱「腎虧」…
對男人來講真係唔講得少～哈哈哈…其實男女都唔講得少啦！！唔長氣講紅菜頭有乜好處，自己上網搵啦...

正如在眾多的新年祝願中，首推都係身體健康…相信呢句都冇邊個話，唔like卦…