在眾多食材當中，森伯都頗喜歡豆製品，相信在這個博裡都時有介紹，最多食會是支竹、素雞、素鵝...
至於豆製之王的豆腐，至少都會每星期食一次，最好食就係用來蒸，尤其是一道雞蛋蒸豆腐，我認為是開胃餸，用來送飯一流，基本上雞蛋同豆腐都幾夾，用蛋煎豆腐都一樣咁香滑好味...
不過太稔身的豆腐就覺得麻麻，比較硬點會較好，如什麼硬豆腐、板豆腐、冰過的蜂巢豆腐...至於有新鮮豆腐當然好喇，但若然沒有，包裝豆腐也不錯，但市面上的盒裝豆腐，感覺豆味沒太濃，而且太稔一碰就散...
而今次買這盒豆腐反而唔錯，佢聲稱有機豆腐，姑且一試無妨，吃過後也覺不錯，若然沒新鮮的，買這個也可以~~它都有好幾款豆腐，有機會也會試試!!
可能時時食豆腐的關係，森伯煮豆腐餐都有一手...豆腐除了經濟，易送飯之外，仲係一種算健康的食材，算是一種清淡的滋味!!
聲明先，大家唔好以為森伯伯買過期食品，只不過相片是幾個月前拍的...
很多人都認為無論是世界經濟，或是本地經濟都係麻麻地，有時食個飯可能都會慳住慳住，你睇連外賣平台Deliveroo，都要撤出香港，講真森伯又冇乜叫過外賣平台，因為森伯可以食得好簡單，自己蒸個五穀番薯飯都可以食得飽~~所以現在經營飲食最緊要係平靚正，你睇什麼兩餸飯，幾十蚊自助餐就知喇~~
市道唔樂觀，用個錢都要慳住駛...可是現在食個早餐，買個包都要十幾蚊!!!很多食材不覺間加了又加...不過世事無絕對，眼前的一包餅仔，卻加幅不大，可算是慳家者的恩物...記得呢種餅仔，正名叫嚤囉酥，真係由細見到老，其實一般大超市唔見，多數在一些小型雜貨士多，街坊超市仔可見，例如什麼家興超市、什麼祥興、友誠等等有機會買到...其實回想起這類餅還有很多其他款式，有大白餅(乾酥餅)、香蕉糕、炒米餅等等，越數越餓~~哈哈
價錢都十分親民，真真正正在物價高漲的珅境中益街坊，等一些老人家(如森伯伯果類，唔捨得買高級的榮華奇華唐餅...)都可以實實惠惠地吔幾個餅仔當早餐!!!
不知不覺踏入三月了，正正是一年之始的春季，其實經過寒冬後，春天是代表溫暖的，但在香港這地方就會顯得比較潮濕，查實森伯伯都幾怕太過濕立立的潮濕天氣~~
可能與潮濕天氣有關係，人都特別容易濕重，尤其朝早似是訓不夠，這些都或者同春困有關~~~
最近這幾個月以來，一直都受手患的困擾，畫東西，寫東西都減少了很多，也不想亂動太多，而且有閑適的森情就話作畫習字啫，沒森情就什麼事都放低，今年蛇年就真真正正應了做了條...大懶蛇，既然不畫蛇便寫了個蛇字，當為應吓今個蛇年~~
過去一年都算幾多"濕滯"(麻煩)事，但春天已經來到，望事事平安，事事順暢...今天又適逢驚蟄，蛇蟲鼠蟻都抖完，係時候唔好再做大懶蟲!!!!
想想森愛歌這個環節都冰封多時，好耐都冇寫過什麼森水歌，一來近排又冇什麼聽新歌，聽來聽去都是什麼老年好聲音(老歌)，但最近在網上不為意下聽到首唔知是舊歌定新歌，曲風就好似久遠年代，但試問若然真的是首舊歌，冇可能完全未聽過...而呢首歌好易上口，聽好幾次包你識哼一兩句...當然首詞都十分有意思!!!
以下是歌詞 (粵語版)~~
誰亦有過盛開心裡希望，
亦曾滿載信念追趕於遠方
名利叫我迷惘，現實多骯髒，
漸把真心去換成偽裝
笑道生死都有命，別理他風聲雨聲，
紙醉金迷也終於一天冷清
人在世 半是運氣 半是註定，
成王敗寇歲月證，不過一刹似流螢
雪月風花中進睡，彈指間光陰似水，
誰曾年少，春風得意，舍我有誰
無奈我，半是大醉，半是眼淚
情仇恨愛裡徘徊，醒覺以後皆夢碎...
其實呢首歌有國語版和粵語版...本人較喜歡粵語版
而粵語版又有男唱版及女唱版...本人較喜歡女唱版
若想聽，可點以下連結：
https://www.youtube.com/watch?v=1ifh3z9fW9M (粵語男版)
https://www.youtube.com/watch?v=lKIZSPHwhpw (粵語女版)
相信這首歌也是當人年青時，未必會懂得欣賞，但人漸長，有一番歷練的時候，或許你便會懂得欣賞這首歌~~
有日經過某商場，發現裡面有個名為"香港樂繽紛"的攝影比賽的得獎作品展，內裡有多幅的作品，很多都甚有代表性，很不錯~~相信也是「開心香港」的其中一項活動...
其實主題要同香港有關，又要具特色，相信亦不難，尤其是家陣人人手上一部相機(手機)，有些拍攝功能亦相當專業，容易拍到較為專業的一面~~
不過可惜這比賽已是上年的事了，若今年度又搞，唔知大家又有冇興趣參予呢!!!如果畀著森老伯去參加，相信都會影吓尖沙咀的晚上景致，因早幾年常常都有機會去到尖東，發覺寧靜又帶熱鬧...真的既有香港特色，亦有樂繽紛元素...
得獎作品中的相片，很多都有香港的特色，亦有喜樂元素，可能標題為繽紛，很多作品的顏色都很豐富多彩...
正所謂有森唔怕遲，十月都係拜年時，既然新正頭都係講講有關新年的東西~~
唔知大家blog友家中仲有沒有擺放攢盒呢?!!其實當中的食物都很少食，很多時都係做吓樣~~不過現在都算好，很多糖果都有少少賣，足夠就可以了...大家過門都係森伯的客人，順道都要講句：搲銀，搲銀...
過年都係講意頭，食糕都係其中一樣，寓意"步步高升"，今年吔糕都吔到肚仔滯滯，唯一消滯都係要做吓運動，散吓步行走15分鐘都唔錯~~今年基本有的糕都食過，不過有兩款糕想介紹一吓，我今年都有買返棗茸糕，食過的人都話唔錯，蒸完後熱熱軟軟，勁好食，睇過佢用料都OK，而且保存期至1月底，當然未必太快食晒，結果都係搞到發髦髦~~~即是防腐劑落得比較輕手~~~
另一款是自家制發糕，與新年有關都莫過於將賀年食品加在內，今趟就做了個開心果椰子發糕，厡味，不甜，而且冷藏就放很久都可以，今個年頭仲唔發、發、發!!!...
森博再祝大家今年有個...發大財、發展好路數、發放好心情...的一年~~~~
一年裡都有好幾個節日，我認為最有節日氣氛都莫過於農曆新年，今年就沒有年三十晚，只得年廿九...自己今年只能作個好簡單的辦年貨，睇視頻就感覺出面的氣氛跟人氣都比較好，而家附近的商場超市都算唔錯，覺得人流都多了...
今年都買了些應節食品，如果博友還記得的話，呢款棗茸糕上年都有買過，再買算唔算”翻撻”?因為真係唔錯，因好食同抵食，今年很多應節食品都加了價...叧一種是角仔，印象中過年未買過，今年是第一次買，又唔知角仔在新年有什麼寓意，可能角仔似元寶，添財添福之類...有博友知都可以告訴森伯伯~~
在此都祝願大家蛇年行好運，好事連連，身體健康，如靈蛇般矯健靈敏，順森順意!!!
