2017年9月14日 星期四

森伯話當年之...數字

其實數字在我地的日常生活裡幾乎係有好密切關係，每日都差唔多要接觸多種同數字有關的事情～對於現代人來講，一提起數目字，腦海裡多數都係阿拉伯數字字款...

想當年...數目字可能都係跟返中式數字寫...即是壹、貳、叁、肆、伍、陸...當然喇論到筆劃點都比起阿拉伯數字多，但對森伯來講都有機會用到中式數字，就係開支票的時候，要跟正統模式咁寫！其他的基本上都唔會用～

但對於老一輩的港人來講，原來仲有一種數字係日常會用，就係叫花碼字，現在一些舊式茶餐廳,酒樓的餐牌上都可能仲見到，伙記都可能仲用來落單寫價錢...但係真正會睇會知的又有幾多人呢？！據森媽所講，以前做水草生意的時候，都係用花碼字記帳，所以對花碼字都有認識有深印象...


睇過這些花碼字款，記得細個數學教科書裡都有一個篇幅提過這些花碼數字，不過事隔千年乜都唔記得喇～

所以生活裡很多舊有的東西，不常用就會慢慢被人淡忘了！
張貼者： 於

46 則留言:

  1. 秋葉2017年9月14日 下午6:42

    細時跟媽媽去街市，見到啲菜檔插住啲價錢牌，都係用花碼字，我識睇呀!因為在數學教科書上學過，去到街市又有實習課。個五字好似8字，好易會錯意的。
    有很多中國傳統都漸漸失傳了，譬如打算盤。又曾經興起了珠心算這種技術，好似都幾快速。

    回覆刪除
    回覆
    1. 森源2017年9月15日 上午9:56

      你講起街市，我都有印象…記得賣蛋舖會用花碼字去寫價錢，當然細個唔識睇啦………現在的新式街市價錢牌多數打印出來，又少咗一種地道文化…
      睇慣寫慣花碼字應該唔會溝亂。現代人樣樣講求方便，用計算機易用過算盤，所以很多舊物都成為歷史…成為過去…

      刪除
  2. Shu Siu (如心恕也）2017年9月14日 晚上7:23

    「參伯」，吖，我寫錯了呢…係森兄至啱！
    點解我會同你開玩笑，因為你將個「叁」字寫成「參」字呀！
    同時花碼的九字也應該是這個「久」。
    不過我都唔知有沒有錯？
    是關所有中式數字與花碼，都是N年前小時候父親教我的。

    回覆刪除
    回覆
    1. 秋葉2017年9月14日 晚上7:30

      我看到一個“夕”一個“久”，睇睇吓兩個都有d唔多似，兩個都爭dd.
      係嘞! 以上兩個合成就啱了。

      刪除
    2. Shu Siu (如心恕也）2017年9月14日 晚上7:40

      9字應該係呢個「攵」。

      刪除
    3. 秋葉2017年9月14日 晚上7:53

      這個就似了。 也可能以“久”的同音字來做代表9，但又加長了一些筆劃。咦，我好似喺度“喧賓奪主”咁喎。就此打住了。

      刪除
    4. 森源2017年9月15日 上午10:16

      阿恕兄識得叫森伯做阿伯，應該冇錯…哈哈哈，因為我部電腦出唔到個叁字，現在手機可以，所以要用個參字代替…相信你哋一睇就知我唔識花碼字，即刻有字寫錯，也要多謝你哋的指教指教……博圖我是靠些網上資料去寫，當中的玖字就睇唔清楚本字點寫…都係寫個類似就算……
      秋葉唔需要打住了，我都想聽多點點，集思廣益嘛……

      刪除
    5. 秋葉2017年9月15日 上午10:53

      謝謝畀些機會我這些老人家。原來“玖”字是大寫的九字，這個不說也忘記了。開支票若用中文，真係要用這些大寫的。所以有人寧願用英文。 而英文的千百，有些卻不用s,又是錯一個母都唔得的。

      刪除
    6. 秋葉2017年9月15日 上午10:54

      更正：「字母」

      刪除
    7. Shu Siu (如心恕也）2017年9月15日 上午10:59

      森兄，我寫完留言就覺得有些不妥，好似我特登去挑剔你。
      原來唔係你唔識而係電腦問題，不過若用倉頡輸入法，打戈大一（I k m)就可以打到個叁字，又或速成打戈一都得。
      再一次希望你不要介意就好！

      刪除
    8. 森源2017年9月15日 下午2:58

      秋葉咁年輕，點算老人家呢…只係見多識廣而已…
      我哋平常生活冇乜用到的字，慢慢就會遺忘，一生疏就會執筆忘字，寫票給人，無論中或英，我都怕寫錯任何字，所以必定對一對，若有唔確定都會睇字典……

      刪除
    9. 森源2017年9月15日 下午3:08

      恕兄:你真會顧及人家的感受…
      冇呀…我完全一啲都冇覺得你挑剔我，我有錯都好應該提點出來……有很多廣東常用字電腦都沒有顯示，只能在手機打出來，個叁字都係靠速成打，尤其很多口字邊的廣東字……

      刪除
    10. 秋葉2017年9月15日 下午6:02

      秋葉年紀不輕了，但心境年輕。如果肯放眼世界，人人都會見多識廣。
      常懷謙卑的心， 日子就易過些。

      刪除
    11. 森源2017年9月16日 上午9:56

      正如你所講，真正的年紀只在乎心態而已…能夠做人處事豁達一點，謙虛一點，包容一點…世界就會很不一樣，自己也自在一些……

      刪除
    12. 秋葉2017年9月18日 晚上9:23

      好像是佛說的：放下自在。

      刪除
    13. 森源2017年9月19日 上午8:03

      只是簡單的人生智慧, 人若能放得下, 就樂得逍遙嘛...

      刪除
    14. 秋葉2017年9月19日 上午11:19

      森少善哉，善哉!

      刪除
    15. 森源2017年9月19日 下午3:47

      智慧從歷練中學習……

      刪除
  3. 搞一爺2017年9月15日 上午9:41

    老師：寫錯字用毛筆罰抄500次，後日交。😜
    花嫲逝去已久，仲乜挖番出黎講？
    上圖花森碼係用乜中國字體書寫架？
    我要學人扮細咋咋蒂話唔識，所以，森兄寫孬。好聰穎！

    回覆刪除
    回覆
    1. 森源2017年9月15日 上午10:32

      你個一爺老師都幾嚴厲，用毛筆罰抄500次…而家想搵支毛筆出嚟都唔係咁易，不如用原子筆罰抄50次喇……
      請一爺兄見諒，森blog係個舊舊blog多數乜舊嘢都挖出黎講架…
      哈哈哈哈~你唔畀森伯真係唔識嘅咩…

      刪除
    2. 森源2017年9月15日 下午3:13

      唔好意思呀一爺兄，掛住罰抄同扮細~唔記得答你，上面的花碼字係親手寫架…你話森老伯寫blog幾親力親為…

      刪除
    3. 搞一爺2017年9月16日 上午10:50

      識 = 正直嘅森伯
      唔識 = 純真嘅森仔
      扮唔識 = 聰慧而又老奸巨猾嘅森伯
      無論答案係點都好，我係冇權封伯（爵），都係叫森兄親切啲。

      十個錯一個即係玖拾分，森兄咁高分，邊個衰老師要你罰抄，如果我係老師，我會獎1粒星星貼圖🌟。

      刪除
    4. 搞一爺2017年9月16日 上午11:06

      駛唔駛寫舊嘢都要向人見諒咁嚴重呀？咁我都有幾拾年光景，都算係舊嘢，咪要活在歉疚中，好慘喎！

      我本想段文字有啲血肉，添啲温度，加啲情緒，唔想冷冰冰咁直接問什麼勾起森兄寫花碼呢？幻想森兄同情人知己喺舊式餐廳撐枱腳時睇到，充滿愛意嘅花碼有多溫馨美好呀！

      刪除
    5. 森源2017年9月18日 上午9:07

      森伯又好，森兄,森仔又好...都係一句啫！！
      都唔係架...肯叫學生罰抄都唔一定係衰老師，學生咁先學到野！如果一爺係老師相信班學生哥都好幸福，個個當晒K1,K2的學生罰抄貼星星，相當架丫兒...

      其實我應該打森blog係懷舊blog，唔知一爺啲後生仔鍾唔鍾睇太多懷舊野，所以咪好客氣咁講請見諒囉！...
      同情人知己去舊式茶餐廳睇花碼字就好溫馨?!咁你同你啲情人知己浪漫得來又幾另類～哈哈哈

      總之一些舊事物都會係寫森blog的主題～

      刪除
    6. 搞一爺2017年9月20日 上午8:30

      罰抄未必帮助記憶，據專家話，要將佢同不同事情、事物立體地聯繫在一起，才可牢牢記著，例如：森兄同情人喺餐廳食熱狗示愛，喻意腸腸狗狗（長長攵攵），用咗攵攵蚊買單。咁樣至會刻骨銘心，愛得森，記得森，一次偷情意外分手後恨更森。😜

      刪除
    7. 森源2017年9月20日 上午10:49

      罰抄都好睇個人，有啲人肯上心的確可以幫到改正錯誤…

      你就係咁呃你啲情人同你去食熱狗呢……哈哈!一爺果然係情場聖手~~(欽佩中)
      你都好勁喎！創作咁多以森字辭句，幫森Blog起題最啱！可以畀老人森慳番啲腦汁……

      刪除
  4. 基爾2017年9月15日 上午11:32

    小學時有一課有教過,唔知係咪社會科?
    依家我諗只有街市菜檔會用吧,好少其他地方見到了

    回覆刪除
    回覆
    1. 森源2017年9月15日 下午3:18

      係呀！我都記得小學好似有課講呢種花碼字，以我記得好似係數學科……
      現在街市仲用來寫價錢應該唔奇，茶餐廳的點菜牌好似見過……

      刪除
    2. 基爾2017年9月16日 中午12:42

      以前金舖和百子櫃中藥房好似都用

      刪除
    3. 森源2017年9月18日 上午8:06

      這種數字簡單易睇, 所以以前的店舖做生意的都會用到...

      刪除
    4. 基爾2017年9月19日 上午10:36

      至少唔會混淆視聽斤變両....XXD

      刪除
    5. 森源2017年9月19日 下午3:51

      乜用花碼字都可以唔駛畀人呃秤咩？!……
      咁消委會真係要推廣吓……

      刪除
  5. Amour2017年9月16日 晚上9:59

    小學數學有教花碼子，但近年這課已被剔除。

    回覆刪除
    回覆
    1. 森源2017年9月18日 清晨7:59

      原來有很多blog友都記得以前曾經教過花碼字...不過隨著時代改變, 呢種字又少人用, 就會被社會漸漸淘汰~~~

      刪除
  6. ykk2017年9月18日 上午10:30

    森中有數! 花碼字常在心, 好友森.
    just a quick question, 請問用花碼字寫100, 點樣寫呢?

    回覆刪除
    回覆
    1. 森源2017年9月18日 上午11:51

      其實花碼字唔屬於森伯的年代，只係有個題同各位blog友講吓……
      KK兄真係問啱半桶水的森伯…我都想知如果價錢過百又點寫?!

      如果有博友知道，不妨教教小森伯……

      刪除
    2. Shu Siu (如心恕也）2017年9月18日 下午1:03

      呢個我識寫，比如六百七十四元，你可以在六字下面寫個佰/百，七字下面寫個十，而四字下面就寫個元…
      希望我冇講錯啦！

      刪除
    3. Shu Siu (如心恕也）2017年9月18日 下午1:06

      如果單單是一百元，那就更簡單，直寫一佰元就0k，希望都冇講錯就好！

      刪除
    4. 森源2017年9月18日 下午3:52

      哦!原來係咁寫…平時見到的花碼字多數都係十位數，又真係冇乜見百位…甚至千位數，初初以為舊時的社會一般的消費冇咁高，食個飯買餸都兩位數就可以了……森伯真係好膚淺~~

      多謝恕兄用咁詳細例子講解，現在又識多點點……

      刪除
    5. ykk2017年9月18日 下午4:07

      明白了, 謝謝, 恕我直言, 兄好叻.

      刪除
    6. Shu Siu (如心恕也）2017年9月18日 下午4:52

      哈哈…如果冇記錯嘅話？因實在太耐冇見喇！
      你倆也不用客氣，朋友嘛……

      刪除
    7. 森源2017年9月19日 上午8:01

      是朋友, 就更加要客氣啲啦~~互相敬重嘛!!!

      刪除
  7. 狂小子 Time Is Changing2017年9月18日 下午3:38

    很讓人懷念呢！現在都很少在街上看到這些數字了！

    回覆刪除
    回覆
    1. 森源2017年9月18日 下午3:59

      而家間中都會在一些舊區的商舖食肆見到，可是始終未能普及……

      刪除
  8. Man Man2017年9月23日 下午4:00

    珠算.......

    回覆刪除
    回覆
    1. 森源2017年9月25日 上午10:19

      珠算聽過，不過唔知是怎樣計算...

      刪除

訂閱： 張貼留言 (Atom)