小小森意；唔成敬意…

相信送禮大家在過年時候都送唔少，其實而家去一趟超市或者便利店都有很多選擇，送禮畀親朋戚友都唔算難，送禮都不外乎朱古力、曲奇餅等小食…送食物基本上都冇錯，人人都鍾意食啦…我覺得反而送用品，未必人人合用，所以送些大路的食品基本上都冇咩唔啱…

平時都收人唔少小食利是（你話森伯幾細個仲逗人利是…XXD）之類，趁新年呢個時候都係還禮的好時機，既然一場去到超市買禮盒朱古力，都唔爭在買少少食品還禮，一向有選擇困難症的森伯，左諗右諗，左度右度送咩最好…其實送畀親戚友人好易，通常可以買些大方得體的禮盒包裝，但送畀同事唔通買一罐二罐餅乾朱古力…太勞民傷財～本來想送些健康果仁類，但當日見就唔係咁新鮮嘞…最後又畀森伯發現到一樣唔錯的選擇，輕巧得來又唔貴，少少地又唔失禮，又可以當為健康飲品又唔駛食滯人…簡直perfect！

 之唔係顆粒沖劑，是關小食有好多人都怕食多會肥，而沖杯野飲大家都好接受，而且花款多多唔同人送唔同口味都得，對森伯來講算係幾good的選擇！！

森犬報喜；步步糕升…

森犬報喜

相信禮多人不怪，更何況祝福語…既然狗年再祝大家，與所愛所親的人長長久久（好似有關狗都係諗到呢句…）其實話時話狗在於中國人眼中，狗的用詞都係比較負面，例如狗口長不出象牙…虎父無犬子…走狗…甚至以前的中國人會吃狗，我們常見的鬆獅狗，本身是用來當肉食狗…但時至今日外國人大大聲說明狗是人類最好的朋友，當養過狗就會明白呢句說話，之後人的思想都開明了…

森伯過年時見人畫狗，於是乎又手癮起，拎起支鉛筆畫隻森狗仔…感覺隻小森狗畫得肥肥地，寓意今年一定過一個肥狗年…哈哈哈

步步糕升

過年的傳統美食，都離唔開糕點…基本上年年公司都有訂購糕點活動，查實公司所訂購的糕點都係十分之健康，食多都唔駛驚食滯果類…不過我未訂過，糕點類又冇話特別喜歡，一般都唔會食得太多，除非有自己喜歡的味道，咁就唔同啦！之前我都有在Blog講過森伯喜歡椰子味，所有與椰子有關的食品都會畀個like佢，今年森媽自家製了細細底椰汁馬蹄糕畀森伯，記得以前食過都好正…

每逢過年森媽都忙整糕點，所謂工多藝熟每樣糕都整得唔錯，底馬蹄糕整得軟中帶結實有彈口，最靚就係見到馬蹄糕的紋路，似白色雲石…食落清甜又有椰香，基本上唔駛煎，冷食都已經好好味…

最重要係出面買唔到咁正的椰汁馬蹄糕，唔講咁多食糕喇！！

眾犬獻瑞賀森Blog…

一年真係好快到，唔經唔覺又農曆年，昨日先同人講一年過得奇快，上年過年的情景仲好記得...以一餐年夜飯就揭開食食食的序幕，港式過年都不外乎食糕，聽賀年歌，聽生肖運程，聚下賭，行街街過節...來到狗年祝大家事事順暢，路路亨通…最緊要就係森想事成！
 
來年森伯可能有返學的打算，希望整體都順利順暢，只要身體唔好左痛右痛就OK…插畫事上都Never Give Up啦…人老了，都知凡事冇得強求，盡過力就算，免得又再多十幾廿條皺紋…哈哈哈
 
之前在國貨公司拍的陶瓷狗狗工藝品，拍下留到今日出Blog就最應節，有時唔知呢類生肖工藝品多唔多人買呢？！有些都好大件下，我諗起碼要間屋有多餘空間先擺放到…對於森伯伯來講都係逛公司時欣賞下就算！ 

來緊有幾日假期，我諗不外乎都係食…食…食…，由其是過時過節，相信熱鬧時光會過得更快…

剪剪煩惱絲…

睇開森Blog的友好們都知，森伯個人平時都幾有丐幫feel…未到最後一刻都懶懶閒閒…梗係啦！仲有幾日就過年~~所以的起森肝去剪髮…以前就有話年廿幾理髮舖就會雙計，到而家已經唔係雙計，直情加價…都冇法喇！到年尾人人都想靚靚仔仔，靚靚女女咁過年～

原來都有好多人留到呢幾日先去剪髮，一見多人我就唔剪住，查實真係日日都咁多人…

附近只有兩間理髮店，森伯又唔想跨區剪髮，迫住近近地就腳！較經濟實惠果間一定多人剪…貴果間冇咁多人剪，不過就手勢好啲…查實剪森伯個頭就最簡單，唔駛洗頭好快趣就可以剪完，根本平貴都係一樣！眼見平果間真係日日都咁旺場，於是一向拮据的森伯，都要幫襯加到離晒譜的理髮店剪髮過年…雖知都係明屈！唯有出年真係要早些少剪定過年…

趁過年前夕去修修煩惱絲都好，平時煩惱事都唔少，趁新年清清佢係好0既，起碼個人都醒神啲…

森春辦年貨…

睇森Blog有咩好呢?!!...就係貪森Blog夠懷舊…辦年貨呢類傳統活動都會講下～～農曆年將至，以前的人興除舊迎新，買新東西都有一種好意頭的含意～～
對於森伯來講為新年準備就可能只係剪番個靚頭，因為平時太唔得...至於傳統吉祥物紅底底要唔要買呢?!!寓意由裡旺到外嘛，見到先算啦！

相信最有feel的辦年貨地點都非國貨公司莫屬，傳統擺設，傳統食品都可以搵到…
平時一般超市就行得多，國貨公司的超市就冇乜幾何行…
話明國貨超市，十居其八都係國貨，原來有機食品仲有幾多選擇…

以前家家戶戶都有臘味過冬過年，臘味當然係年貨之一，一行去已經聞到陣陣臘味味，臘腸，臘肉，金華火腿，臘鴨脾一定唔少得…講起臘鴨脾只要少少就可以送一碗飯…呢個天時有佢送飯就至適合不過～

有人客來拜年，糕點茶葉肯定唔少得，茶葉好唔好都可以試試，見到呢度有張樹檯，有杯可以沖來飲！不過就冇人敢坐落去嘆茶囉…

 而今次逛國貨超市最主要目的都係買呢種藕粉，只是當一種食療…

相信而家好多人都對國產貨或食品冇咩信心，睇到國產食品都會卻步，或者係對一間老字號的公司的商譽仍然不失信心，上得架的貨都應該有驗証～國內都總會有些良心商家，如果下下標籤了那就真係對好的公司唔公平…

可能森伯近年來老成左，間中都想去國貨公司睇下野，最主要係睇下有咩森水工藝品，當係逛下藝術品展覽都唔錯，睇啱仲可以買…

要寫好一封信…唔易~~

時下新世代，究竟仲有冇人會拎起支筆，真真正正去寫封信給人呢？甚至聽過有人講要寫信…寫報告…咪搞我！森諗：乜要寫封信真係咁難為咩？！

最近森伯都要為某些事情寫封信，與工作有關…現在用電腦打就方便得多，有錯就即改，內容用了些時間就鬥好…反而最難就係要寫一些所謂敬辭、稱謂語、啟封詞…好怕寫錯，分分鐘森伯有幾多墨水都畀人睇出…

寫信時稱對方的敬辭：

通常要寫呢類信係好正規，但現今香港地又有幾多人真正理會呢？當然最快捷的方法一定是在網上查閱，唔查由自可…一查就發覺自己好多可能用錯…
就算我們以為寫中文信好易，原來要寫封似樣的中文信都係一門學問…

 唔同對象場合有唔同寫法，我諗唔係咁多人識寫…

平時我只識寫敬啟，收啟，台啟…原來唔係人人都可以咁寫，有分別…唔睇唔知~~

當然喇！現代社會都唔會咬文嚼字，最後唯有用較常用的詞彙就算…

森伯個龜密好友…

近日睇到有單元朗八鄉的新聞，搜到一間村屋有很多的珍稀動物，相信大家都可能覺得有趣…其實森伯好耐以前真係有諗過自己住的地方養好幾種寵物，不過就唔係咩特別寵物…當人越大越唔敢亂咁養，始終養寵物都要有一份責任感…

其實同大家Blog友認識咁耐，都好似冇真正介紹過森伯隻龜密好友，數算一下呢隻龜都養了五、六年…買的時候是小型龜，到現在都係小型龜…我懷疑係唔會再大，可能係品種問題～～

養開龜的朋友可能會認識，但冇留意開就感覺跟普通龜一樣…其實佢有名堂…叫西非側頸龜…來自非洲的一個龜種～咁又何謂側頸龜呢？可能會諗到蛇頸龜，但側頸龜係冇長頸架！！普通龜來講：龜仔個頭伸出伸入成直線…但側頸龜就做唔到，龜仔個頭只能打側，就算睡覺都係一樣，所以無論點樣你都能夠睇到龜仔個頭同眼，因此而得名…呢度真係要長氣咁講明龜仔個頭，冇得簡稱，費是又聯想起其他東西喇…XXXXD室內養要注意日照需要，間中要晒下十令分鐘的太陽燈對健康有幫助…

因為本身係水龜，都好易養冇咩持別需要，我會用魚糧餵飼，若然自己食開白飯魚都會給牠一些，蝦及白飯魚佢都鍾意食，夏季活躍期，冬季在港有假冬眠，唔需要點理！！所以都算係懶人寵物…

龜唔可以長時間在龜兜裡面，間中都要放牠到窗台，若然放地上可能易唔見，在窗台就冇走失，佢把窗台當佢自己的小天地，互動性就係可以跟住我的手行過來，可能畀慣食物畀佢…都得意嘅～～

都市人可能需要一些生活調劑，若然自己夠承擔力，養寵物都係一個唔錯的選擇，唔需要著重名種或稀有，就算好普通的寵物也能為你帶來歡樂…有機會再同大家講下龜經…