森記冰室之－消暑西瓜汁...

雖然話已經過了立秋，但天氣仍然非常熱，尤其是將近打風的時候...在這個天時暑熱的日子，一杯清涼的飲品點都唔少得！

所以自己好多時都係把水果雪凍後才打汁，既清涼又健康...
正所謂不時不食，呢個時候當然食瓜類最好，我都冇乜揀擇，很多瓜類都喜歡...呢個時候梗係揀西瓜啦！

記得以前多見蜜瓜，整個圓碌碌切開淡青色那種，而蜜瓜味相當濃而且甜...
最近好少食，記得小時可以將佢切成一半用匙羹拔來食，都算係夏日炎炎的消暑聖品...
反而現在人大了，喜歡西瓜清清地又涼爽，記得小時的西瓜大大個，但可能農產不斷改良，現在反而多見細細個的西瓜仔，人少少食就啱啱好啦...

可能森老伯長氣，講到口都乾乾地，一於整番個森記西瓜汁潤潤~~~
先預備冰鎮過的西瓜肉，跟著加上適量的凍開水，再加上少少蜜糖用機攪在一起...一杯清涼又養眼的西瓜汁呈現在眼前！

餘下的西瓜皮除左可以畀人跣之外XXXD----森伯邊有咁衰~~~

當然呢個時候瓜皮用來裝飾插響杯邊啦！！

森伯好大頭...蝦~~

平時睇開森Blog的友好們都知，森伯屬於穩陣派，隨身物品都睇得幾謹，一向都好少遺失東西...
上個禮拜外出完之後先發覺唔見了張發達通卡..返到屋企即刻趴埋牆自我搜身~~XXD...裡裡外外，上上下下...的衣褲袋摷勻都冇發現！(依家講好似講笑咁，其實當時都幾不知所措架！)
腦海裡立刻案件重組，大概估計到邊度唔見，但在人多的地方跌，應該冇乜可能搵返~~~

其實對森伯伯來講，發達通唔係日日需要用，而且亦有個壞習慣就係張卡要另外拎出來嘟！唔會連銀包一齊嘟，所以今次唔見都可能同呢個原因有關...都要重新買過一張新的，唔睇又唔覺原來又出了幾多特別版的發達通，不過好多都係畀細路用就適合!!!最後買了款有匙扣的，扣著鎖匙應該冇咁易唔見...

遺失發達通唔止一張卡，仲有餘額同埋資料，因張卡仲可以出入住所的所有設施及大門，所以又要重新補返個記錄...

不過有人話唔見張發達通都係小事，若然唔見銀包、身份証等仲濕滯!!!從逆向思維諗，今云都算係好彩既~~~><

時光倒流幾廿年之－小農村

其實身處的地方，又有幾多人知道這地方的歷史，舊有的風貌呢？！！...相信很多人都未必會探究～就因為藉著睇下展覽，自己又再對生長地有多了點認識...

一見到個門面就好似坐時光機返到舊時...唔知點解見到呢個門面令我聯想起過時過節，上面應該掛一串炮仗準備過新年...

呢啲真正叫做簡約家居...

話明農家，點少得農具呢?!!

同場亦有一些香港以前的稻田模樣，正所謂粒粒皆辛苦，而家又有幾多人真正食過made in H.K.既米?!!

見到呢部機，應該係最開心的時候，豐唔豐收都係睇佢忙唔忙～

對於現在香港人，大家的著眼點都是放在建屋上，唔理什麼地方，最緊要起樓...起樓...再起樓～以前的新界真的有農田，有牛睇...
相對而家來講，有地都是起屋至上，想睇番以前農村，唯有靠博物館的佈置尋回昔日的舊貌。

飄來榴槤之香...

其實呢個季節真係食水果的最佳時候，以前的水果都有分季節性，但現在有很多生果一年四季都有，港人都算有口福...

今時今日的人唔知有冇食水果的習慣，我曾經聽過身邊的人們有人話冇食生果，森諗：仲生存到真係奇蹟...其實對於好多人來講，水果只係當副食，食又得唔食又得，都冇太在意！
至於森伯伯就每日都會逼自己食一兩樣水果，目的都係取其均衡飲食...

一到夏季當造的水果特別多，榴槤都算有代表性...想當年！！買個榴槤食下都唔平，屬於貴價生果類，但現在來貨多了又相對平了~~
榴槤稱得上果王，當然非一般，鍾意食的就會瘋狂愛上，唔鍾意的就聞到個味都彈開，真係好極端！

榴槤當造，見到咁多都幾壯觀...森伯記得小時都鍾意食，但其後知道榴槤幾燥熱，所以少食多滋味唔會食得太多！有睇開森Blog都知森伯：外表斯文，內裡躁狂，屬於燥底人，平時都幾火爆所以都係少食為妙...哈哈哈哈

丁仔薯片

其實零食對森伯來講又唔屬於太熱衷，都係果句：想食就食...
至於有些特別零食，都會本著一試無妨的森態去買來試試，就好似呢包丁仔薯片咁...相信呢個品牌由細見到而家幾廿歲，點都會試過佢的即食麵，以森伯伯認為若果要食即食麵，都會首選丁仔麵...
有日經過零食店見到有呢款丁仔薯片，即時諗到呢隻薯片係咪原廠出?!個味又係咪似丁仔麵的湯粉咁呢?!相信佢裡面唔會太多，就買來試試吧！！

一拆開又並唔似一陣湯粉味喎，反而似一種久違的卡樂D薯片味道，如果唔係丁仔做封面，換上普通包裝就真係好似普通薯片咁，唔太特別！

或者佢都好過用湯粉整，到時又話係味精薯片...不過點都好，森伯伯實在N年冇嘗過薯片咯，重拾返個薯片味都好既...
咁岩又同人講開，佢話即食麵味的薯片都未算特別，佢試過億力多味薯片...即係有酸奶味的薯片，聽落又幾特別！而家商家都諗盡法寶去吸引消費者，遲下可能有HD雪糕味的薯片、有海添堂龜苓膏味的薯片、更可能有君隆驅風油味的薯片...唔好笑呀！森伯可能會買架～食薯片之餘又可以幫老人家驅下風，直情雙得啦...哈哈哈哈

一條小懶蟲...

一條小懶蟲...
正所謂夏日炎炎正好眠...可能呢句說話唔係今時今日的人所講，若然比著現在的夏日相信都冇人講得出，有時唔好話訓覺，甚至平時做少少野都熱到周身汗，或者森靜自然涼，唔做就唔熱~~搞到森伯伯都變左條大懶蟲咁...

大懶蟲定大懶蛇好呢?!蛇個名聽起來都威猛少少喎...不過為配合張相都係小懶蟲Q得多...哈哈哈

外表有幾懶都好，骨子裡都係勞碌命，點都有要做的工作！！一年四季都幾怕夏季，又熱又濕最怕悶熱，有時寧願落下雨冇咁熱...



入廠...做嘢！
近排流感都幾得人驚，除左迫爆急症室,病房之外，仲話會奪命...所以大家真係要小心，雖則話森伯伯屬長者類，但都唔驚得太多，因為都好少去人多的地方，希望減少感染機會~~講開醫院，相信平時冇乜大劑事都唔想去，但最近都要去一去醫院，係與工作有關！

咁大個人都係第一次入院做野！對我來講都算幾有趣~~雖然入院的性質唔同，但唯一相同的就係想快D收工出院~~~~

COMIX一遊（下）

這個地方除了可睇睇漫畫之餘，其實仲有很多小型展覽參觀，雖然有些展覽好似跟動漫冇咩關連...不過與藝術，本土文化都相關的...

展示一些以鈔票款的設計版畫...

而在另一角又有：名為城市閘誌的相片參觀，介紹店閘前的有趣塗鴉設計...

你亦可參觀當中的放映室，我去當日真係幾清靜，室裡的椅子人影都冇個，影片只不斷放映翻新綠屋的過程，偶爾見到一兩個人坐在這裡，有婆婆似是街坊...坐在影片前都恰著！！盛夏時候都係一個唔錯的避暑地方，婆婆真識揀...

可惜森伯住得太遠，唔係偶爾來訓個晏覺都幾好...哈哈哈

有關紋身刺青的介紹...

時間都差唔多，最後睇埋個塗鴉作品...

後記：

其實活化後的綠屋改變為動漫基地這個構思都唔錯，而且改建後地方很時尚很舒服，又不失當中的舊有特色，不過主題就唔得連貫好似有些零零碎碎，我認為可以做得更理想，主辦單位真係要諗諗仲有咩有關動漫的新意念可以搞搞...
不過唔同人有唔同的感受，點都要你親自來睇睇或者會有你唔同的睇法...