2019年1月9日 星期三

森伯話當年之-糧油雜貨…


踏入新一年已經過了好幾日,當然有新就有舊,家陣潮流興懷舊,無論食得唔食得的東西,加上昔日情懷」四隻大字就變得有價值有時都會諗諗舊的東西有實質的價值,還只是一種生意價值呢?!

對於新一代的人要買米,當然會去超市,我見過油站都有米賣不過對於上一輩的人來講買米當然去米舖,要買米就要帶個米袋去買,夠晒環保查實米舖唔單止有米賣,還有很多糧油雜貨,而米舖都有送米服務,咁當然要買得多才會送啦

仲有雜貨店,見到有售賣文具,玩具,糖果而呢種幾合一的舖頭森伯好似冇乜印象~~記得細個有辦館,買糖果而文具店就買文具、玩具、運動用品,係類似現在的中南書局類型

畢竟無論有很多事物怎樣眷戀也好,始終時間個巨輪都不停地轉,今日的事物很快就成了舊物,而記憶中的舊物又成了大家的集體回憶

趁新年就等森伯伯好好去愐懷吓

40 則留言:

  1. 買米要自己帶米袋<====真係好環保,應該要重新實行啦^^
    記唔記得以前買魚和買豆腐用咩裝?
    以前屋企樓下商場間文具店有機打添㗎:P

    回覆刪除
    回覆
    1. Gael兄:
      對呀…以前物資唔豐富的時候,樣樣都比較環保,我都有諗過實行環保消費得唔得…但商家的品質可能無咩保障…

      用膠袋裝?!定係綁鹹水草?!

      文具舖有機打…咁又未聽過…

      刪除
    2. 大夫:
      以前的米缸真係用粗瓦整,很重…

      刪除
    3. 如果豆腐用鹹水草綁是失傳了的絕技吧XXD

      刪除
    4. 以前個個買菜的,都識綁鹹水草…
      不過用報紙包住又唔衛生~~

      刪除
    5. 會印咗啲字上舊豆腐度XXD

      刪除
    6. 油墨豆腐邊個敢食…哈哈

      刪除
    7. 森兄新年駛唔駛去辦年貨^^

      刪除
    8. 過年都冇咩年貨辦,求其買少少嘢算…

      刪除
  2. 幅相一森伯喺邊度𥄫嘢?

    屋企人多,會叫米舖送米(一麻包袋)、火水、生油(大鋁罐裝)。因為一個笑話,好記得間嘢叫聯益。有次阿媽打電話去叫啦!起頭緊係問『係唔係聯益啦』,點知接電話個𡃁仔竟然回覆『呢度唔係零壹,係零零七呀,八婆』收線。激到啤啤聲。

    米係麻包袋裝,小學時興跳麻包袋接力比賽,我都被派去同其它小學比賽,好似得梗頸二。

    回覆刪除
    回覆
    1. 森伯為個Blog坐時光機去架!!!!哈哈哈

      你的回應鉤起老人家森伯伯好多回憶,以前鄰居都有叫人送糧油雜貨來,用手推車...
      聯益呢個名好耐冇聽過,專做糧油生意,而家唔知仲存唔存在?!!

      以前有好多人脾氣比較燥,容易開口得罪人,現在的人比較好修養~~起碼唔會郁啲鬧人八公八婆...XXD

      第二名都好喇!!為學校爭光~~
      以上的相在歷史博物館影,有時間去睇吓…

      刪除
    2. 歷史博物館鬆開各段時間嘅繩索,等我哋飛翔於那段歷史當中。

      吊高個錢桶係咪可以防止三隻手呢?

      刪除
    3. 歷史博物館仲可以睇吓古時的香港,在尖沙咀區睇完可以去附近食吓嘢消磨吓唔錯…

      除非自己友,錢桶裡硬幣最多,點會攞呀!!

      刪除
    4. 舊時回樽得一毫我已經好開心,幾毫子可以食到個早餐,搭巴士仲有用斗零,一蚊/伍毫封利是,嗰個時代啲神沙係好值錢,邊似依家拾蚊雞都唔見嘥。

      我幼稚園時畀一班𡃁仔(高我兩個頭)攞住木棍打劫一排吉X利朱古力,依家梗係大笑話啦!以前我係覺得好似鮑魚咁貴重架!要哭喪。 唔同年代、唔同年齡嘅價值觀係不斷變化。

      刪除
    5. 以前的銀紙較見駛,帶十令蚊就可以落街…不過通漲都翻幾翻,一定唔會跟以前一樣…而家唔好話幾十蚊,幾百蚊都好快駛晒……

      咁森伯又未試過感覺朱古力好似鮑魚,通常電視有咩大型show,屋企會有雪糕吔,為之開心……

      刪除
    6. 周三缺貨,希望身體唔嘢嘛!係忙功課至好呢!

      刪除
    7. 一爺兄真係有留意啵,上個周三冇出博…稍後可以講吓!!
      一爺兄簡直可以做森伯的人肉平安鐘……

      刪除
    8. 上次斷骨都冇停寫,呢次一定唔嘢少。

      人肉平安鐘………………吓!(好肉酸)森伯唔係想撳我嘛!唔好亂撳喎!哈哈(偏要講歪)

      刪除
    9. 斷骨有冇停寫我都唔係好記得…不過而家畀你激到斷氣, 想寫都寫唔到啦XXD
      撳?!!...你當你自己係老襯定水魚先?!... XXD
      平安鐘有個功能係可以聯絡長者問吓佢地有冇事架…

      刪除
    10. 斷氣係嚴重過斷骨嘅。咁斷氣可以借啲意同人『咀對咀』人工呼吸,森伯就爽爽。

      你當你自己係老襯定水魚先?! 我咪提醒你 :『唔好亂撳喎!』後果自負。

      刪除
    11. 哈哈哈…斷氣仲人工呼吸,即刻打去call白車啦~~
      反而我想知,假設撳咗有咩後果?!!仲話係森伯個平安鐘!唔及格!等到加生果金即刻換過個…

      刪除
  3. 我記得細個時有人送米到屋企。

    回覆刪除
    回覆
    1. 冇記錯,我們以前都叫過一段少時間送米來...

      刪除
    2. 諗吓送火水的工人都幾辛苦~~

      刪除
  4. 而家新一代,無人識糴米啦!

    回覆刪除
    回覆
    1. 而家邊要糴米呢回事...冇米就去超市糴幾包囉~~~

      刪除
  5. 我記得開米舖嘅大多都係潮州人,而以前仲可以賒數,即係月結!

    回覆刪除
    回覆
    1. 潮州人特別有米…?!!以前賒數都係畀顧客一種優惠…又唔知當時多唔多人走咗搬咗冇畀錢呢?!

      刪除
  6. 糧油雜貨店都買少見少了,大概自己舖的話有更大機會在超市附近經營下去吧。

    回覆刪除
    回覆
    1. 呢類舊式舖頭生意未必夠附近超市搶…所以買少見少,不過一些舊區應該仲有,有些冷門嘢呢類舖頭可能搵到…

      刪除
  7. 糧油雜貨店,我在石硤尾見過有一間。
    再過一、兩年,我想這些店都會消失。

    回覆刪除
    回覆
    1. 我諗呢類舊店暫時都未會絕跡,可能一些舊區都有發現…
      不過時代變遷,總有新物取代舊物……

      刪除
  8. 糧油雜貨店,我還可以在舊的屋村見到.但買米.真的只見新一代在超市買多.

    回覆刪除
    回覆
    1. 舊的屋村街市應該仲有呢類雜貨舖,米舖真係冇乜見,見到都不妨搣吓自己係咪發夢…哈哈~

      刪除
  9. 點解會叫做辦館?係咩意思呢?

    回覆刪除
    回覆
    1. 你真係考起我,辦館相等於現在的便利店咁上下…

      刪除
  10. 以前母親住處樓下的不遠處,有小型街市和糧油米舖,米舖大多是潮州人開的,送米送火水的伙計原來是店主的兒子。媽媽不會歧視潮州人,總會有打賞。

    回覆刪除
    回覆
    1. 以前就算小型的街市, 內裡都有很多舖頭, 當中一定包括米舖雜貨舖, 買些生活的糧油雜貨…咁我又唔清楚原來開米舖多數是潮州人…

      刪除