年尾溜溜講森事...

聖誕過後就代表差唔多一年就將要過去，新聞都有回顧的節目，一年時間說長唔長，說短亦都唔短…都有很多事情做過，會記得的又有幾多樣呢?!!

呢個時候出街感受一下市面氣氛都幾唔錯，不過出街就會預左人多，見到都有些食肆有人排隊，若然在旺區相信度度見人龍~~~反而在室內搞下私人派對會好些，食物都可以很簡單，試過似到會形式，不過食物就要自取，問題就係食剩的東西很難食清…最理想當然係每人帶些輕食來啦!!不過人少少就唔需要搞咁多，大薄餅加炒飯為主打，已經夠晒飽…

題外話：每次見到呢隻曲奇餅，就會諗起聖誕兼且有人從外地返來，都會買呢隻曲奇當為手信，已經好一段時間冇買，初時以為冇做，但原來仲有…味道依然唔錯!!!

新一年又將開始，自己都唔會定咩計劃，老土講句：既來之；則安之…咁就唔駛諗太多！森伯都輕鬆晒…哈哈

閒話森常…有假放~~

逢到每年的年尾，即是十二月呢個時候，大家都被一股節日氣氛所籠罩，大家都係懶懶閒閒等放假，往些年一到十二月已經放緊假，不過今年的12月仲未放，話晒辛勤左成年，都係趁年尾輕鬆下～～

今年可能比較凍少少，感覺個節日氣氛都唔錯，聽講訪港的旅客數字多了，所以假期都係預左人山人海，所以人多擠迫的地方真係唔好搞森伯伯，不過今年有咁啱可以到尖東睇下燈飾…

那晚又幾舒服人唔多可能稍為夜喇，兼且未正式到聖誕除夕等….

臨近聖誕屋企都冇咩特別佈置，摷返棵陳年聖誕樹仔出來搞搞，執吓佢又見得吓人，森伯就好似棵聖誕樹仔咁，都要執一執搞一搞先至見得人…哈哈哈～～話時話今年都某乜機會買換季衫，好在森伯平時走開丐幫路線，某乜所謂啦…

樹仔細細，整屋的聖誕氣氛都係靠佢撐住咋～

雖然今個假期冇往年咁長，不過都好過冇！預祝大家有個開心愉快的節日長假…

森活雜記12月...

都好耐冇寫過生活雜記，生活就係從瑣碎裡，從雜項中形成一種生活模式，至於話滿唔滿意呢刻的狀況呢？呢排雖然話忙，但係就十分充實…

其實無論咩節日，都係一年比一年冇氣氛，或者同感覺時間過得快有關，中秋都好似過了冇耐，又已經要唱聖誕歌，見到處處有聖誕樹…

呢排如果唔係落雨，天色都幾好，不過就幾清涼，入夜感覺路面很寧靜，特別舒服，在人人放工回家的時候，就正是我趕返學的時候…

幸好讀呢個課程，唔需要咪書，亦都唔需要帶好多東西，返到去聽下導師的教學，撳下電腦又一堂，當然有筆記要抄低，畫完符再返屋企正正經經寫過，日後有機會會用到…

返工就趕時間，返學就唔駛太趕，不過到放學都肚仔空空，雖然嗰頭好多食肆，但咁夜都半打洋…唯有回到家中食幾塊餅乾之類…都習慣了～～

在這個時候都要好好慰勞一下自己…

杯抹茶雪糕係早前食，氣溫還暖暖涼涼…但若然呢幾日真係冇咩可能食到雪糕，凍到九彩…

換証…

今日有如昨日…昨日有如今日…當手上的智能身份証還感覺是頗新的時候，最新一張智能身份証又準備換了～還記得上次換証的情況，去那間辦理處換証等等都記憶猶新…

至於要換新証本來都冇乜為意，森伯屬於長者果類，初時諗可能有排先輪到…後來有人send些有關資料畀我，睇睇原來唔需要等太耐就可以換…

聽講話新証又係多多功能集於一卡，不過對於森伯來講又係身份証一張，記得本身張智能証可以到圖書館借還書，唔需要圖書証，我未試過…有時一張証放得太多資料雖然方便，但萬一遺失就好易畀人竊取很多個人資料…當然最緊要係要小心看管自己個銀包！！講到換新証都不能不提身份証裡的相片，初時以為先進少少可以有彩色，原來都係黑白照，要映張滿意的相都要留意少少影相攻略，其實都冇咩攻略，仲好記得對上換証時候，話明要穿著深色衫、有領就會映得好好…

 至於今次的相片都有二揀一的機會…咁帶兩件衫各影一張再揀又得唔得呢？！！哈哈… 

為左以最佳相貌影張靚相，由而家開始真係唔大笑得，費事啲皺紋、火車軌暴露晒出嚟…唉~~~人老咗特別多顧慮…

手仔痕痕…

對於時下的都市人來講，上班的時候真係少郁動，好多時都係坐多過行…但對於森伯來講坐得太耐又會好唔舒服，點都要行一行蛇王下，好早之前有同事贈過我一套鬆弛操，大意都係一些可在辦工空間郁動下的運動，目的都係伸展筋骨…

不過整套操都係step by step，你知長者森隨時都有可能腦退化發作，所以都懶記！早前買過一條拉力帶（介紹過…），都係畀人室內可以做些簡單運動，但公司做未免太似馬騮戲…

所以近年來都買了些手部健康石來把玩，佢原意目的都唔錯，因為人的手和腳板都有很多穴位區，據講常常刺激當中的穴位，就可收到健體功效…當然信不信由你，但試下都無妨，尤其現在用滑鼠又多，掃電話又多…隻手好易電腦手（之前我都患過，手腕很酸痛…）資料講呢種手部按摩球對電腦手都有幫助，所以買來試試…返工時用都OK！！

相片中的按摩球是用天然五彩石來做，據講含有微量的礦物元素對人有益…不過對我來講天然便好了，可能石比較硬實唔係太適合我，日後會買些純木做比較好…

呢種按摩球無什麼限制，什麼時候有需要都可以拿來按按…呢個森伯推介！

森伯兩頭騰...

雖則森伯伯已經一把年紀，在古時可能已經養尊處優，退隱歸田，弄室為樂的時候...XXXD（曾孫，正確寫法是什麼？請指教...）

但時至今日森伯伯仍然營營役役，忙忙碌碌...有史以來都未咁勞役過~~~

返工時候要進修真係幾吃力，唔止去上堂聽書咁簡單，仲要顧下要做的功課，以及唔影響份工作為大前題...森理壓力都幾大架~~

所讀的課程都要用到電腦授課，而電腦室又要去到另一處返學，所以呢排真係課室兩邊走...

事實我都幾怕成日要留意個日程表，雖然係隔條街，但上錯課室就麻煩...至於課堂中心那邊是遊客旺區，都冇咩時間周圍逛感受一下夜晚的地道街景，總是來去怱怱...

其實上電腦課最好，感覺玩下電腦好容易又一堂，但如果有D導師長氣少少，就會遲落堂，哪晚就收得夜，落堂時候課堂中心都已經熄燈…搞到好夜~~

返到家中都拿拿聲食少少野，之後二話不說即刻沖個涼覺覺豬喇！第二朝晨咁早又要返工...所以成日唔夠訓，我諗若然讀完呢個課程可能會老左廿幾倍~~~

完全感受到…一個麻甩有兩頭住家的確幾辛苦！！成日兩邊走～雖則個比喻牽強左少少，但這一刻真係好貼切…XXD

放飯…

有人話做人慢活才是生活的應有態度，不過始終港人節奏快，做咩事都係急急腳，如要慢活都可能係生活裡的奢求…

如果要返工的時候，早餐真係好求其食，或者有好多人鍾意返到公司先食，但係對我來講都冇乜所謂…晨咁早就要起身，自家整定個Lunch Box順便食埋個早餐就OK喇…其實帶飯已經好多年，可能自己老人家唔食得太多外邊的三高食物，高糖、高鹽、高脂！因為不時聽到報導話外面的餐飲糖又超標、鈉又超標～～聽到都幾興幸自己係帶飯果批…至於自家製都係以清淡為主，事關整清東西比濃東西簡單，都係一個字講晒──懶！！哈哈

其實食物的濃淡都係從細時的口味開始，習慣食淡的就比較適應淡味的食物，但食開濃味的就很難改口…所以有次在百貨店見到這類小朋友餐盒，其實都唔一定係小朋友，成人都可以買個帶飯，如果係Marvel的fans見到應該幾開心，買個返去儲都好，日本貨應該唔係A貨卦…亦因最近創作超級英雄的作者逝世，這類咁靚的Marvel餐盒或者會乘勢熱賣…

我個飯盒係好平凡的不鏽鋼款，普通貨色咋，總之輕便易洗就得喇！！

有得食；又有得反…

平時都唔會食得太多生果，因為有好多水果都係酸酸地，如果有些生果唔太酸都會食多少少…相信牛油果都係其中之一種生果唔會酸，不過牛油果唔會拎起就咬來食，通常都係畀鍾意攪三攪四的森伯，用來攪個牛油果糊，都好少用牛油果做其他，或者有blog友有其他食法都不妨提供下…

而家買水果唔會一個個的買，多數一份份又或者買得多計平少少，所以一買就幾個，一食就食幾勻，都冇咩所謂，森記果糊；必屬佳品！哈哈，起碼自己覺得好好食喇…

 

牛油果簡直係大人版的出奇蛋，有得食之餘仲有得玩！可能睇到呢度你會問牛油果有咩玩?!!當食完個牛油果之後會發現個牛油果核都係一樣鍛練工具，可以用來練手指靈活，閒來就咁按壓一下手部穴位都唔錯，天然又夠晒環保…如果又有閒情，仲可以種在花盆內，睇睇佢有冇機會種得出！！我又未試過…最主要係冇咁大個地方種～～

平時都可以扮下森家大少他他條條，呢排忽然又忙起來，能夠出到篇Blog都已經可以為自己拍爛手掌…唯有遲吓再逐一探訪大家…

老人家傾吓偈之…洋名

又唔知家下呢個年代，係咪個個都有個西洋名…

當然舊一輩的人就未必會有…但新一代的小朋友中文名可能都未講得掂的時候，就已經有個英文名…

想當年…自己讀書的時候，個英文名就只是英文譯音，當時在自己的角度看已經算係英文名…哈哈哈！又唔覺得有英文名的需要，完全唔會在意，後來為了加入一個英國的雀會，所以就需要一個英文名，只作極簡單的信件溝通，其實呢個名都未必會真正用在日常裡！因為最主要係難讀…所以當時的英文名真係似有似無！反而叫我中文名仲好，聽起來親切OK！～～直至到近年來，從一個電台主持得到啟發了…其實主持大概講一個好的英文名，對現今社會或對自己有幾重要…於是乎長者森都要認真諗諗，一個啱自己的英文名…

長者森認為：揀英文名，切忌太過普通，隨便都有十個八個叫，亦唔可以太過特別，最緊要就係起碼讀音易，唔會連自己都讀錯音，到最後緊係畀人容易記… 

有時候搵啲英文名字大全，會發覺有好多名都幾陌生…唔好話讀連見都未見過（如圖中）～～

至於在網誌上都唔需要叫咩洋名，大家都係叫返森伯會親切得多！！

攪出個甜蜜…

以前的人一到秋天，總會諗到食臘味，正所謂秋風起；食臘味…天時涼涼地有煲熱熱的臘味飯的確好開胃，相信呢排食肆的臘味飯都好生意，因為秋意漸濃…

既然天氣乾乾地燥，就不如飲啲蜜糖潤一潤，我又很少會純飲蜜糖，多數都係配搭在其他食物上…

有人幾個月前遊完紐西蘭回來，帶來了一樽蜂蜜給我，平時又很少食到紐西蘭出產的蜜糖喎！好多時外國出產的蜜糖都係用膠樽裝，而且用深色的膠樽裝蜜糖，目的唔想蜜糖變質，驟眼睇似是有活性的麥蘆卡蜂蜜…但其實呢樽係三葉草蜂蜜，它本身唔係琥珀色，反而係奶油色不透明…今個早餐就攪杯甘梨蜜來飲飲，齋聽個名已經夠晒甜蜜喇～材料甚簡單…甘筍＋啤梨＋少許蜂蜜＝甘梨蜜，又幾好飲喎！幫森伯潤潤燥！

其實咁用蜂蜜有點兒浪費，吃不出它真正的味道…我就再用少許蜂蜜搽麵包食，發覺原來呢隻蜂蜜好香幾好味…一般人少用蜂蜜搽包，外國人就好興，這個食法才試到蜂蜜的原味道…

唔係講笑，今個早餐真係夠晒甜蜜…哈哈哈

數字屋...

唔知大家多唔多幫襯呢間數字屋買零食呢？！其實我就好少幫襯，始終都唔常去，若然出開長沙灣廣場，都會順道入去搜搜有冇咩森水嘢食…

其實講開又講，曾幾何時呢間數字屋都幾多分店，後來聽人講就因為開店過多，結果做唔掂，最後都要縮減一些店舖…若我冇記錯呢間數字屋本身專賣些日本直銷過來的零食，後來日本地震幅射的關係，就減少日本貨另賣韓國貨，所以好多時兩國的零食都見到…講到零食我又好少食喎，不過在舖內都見有好多人執成一大袋零食，可能長沙灣區有幾多工廈，啲打工仔買些零食做嘢時慰勞一吓自己把口…

在我的眼裡數字屋都算是成功，早前聽財經節目講數字屋已經易手，有新老闆收購?!...點解好地地又唔做!!~~後來有人話本身老闆過左身…都幾突然以前睇訪問個老闆唔屬於太年長…咁就逝世！世事真係無常…

有日經過呢間數字屋，裡面有間數字屋的小模型，見到有趣就把它拍下…其實並非模型咁簡單，又會是什麼呢？大家有興趣不妨估吓…遲吓開估～～

不過現今的零食市場的競爭幾大，要數算的話都仲有其他…要做到多人認識真係唔容易，記得以前有間叫優之良乜都幾出名，而家仲有冇真係冇留意嘞…

…………………………………………………………………………………………..

開估…間數字小屋的模型是什麼呢？其實是一個錢罌，因為見佢屋頂位有個入錢口…都幾好！送畀小朋友可以培養儲錢習慣…送畀大人可以儲散紙～～不過我冇買呀...

從玄學角度睇，錢罌代表入錢，證明老闆識諗，將錢入落數字屋仔，寓意數字屋就財源滾滾啦…

歪念...

每個人都有正念歪念，只視乎當中的輕重又或者在什麼事上…

時下的網絡世界已經成為了我們生活一部份，生活上事無大小都會同網絡有關…工作、購物、學習、休閒、以及交友……每樣事都有兩面睇啦，有好亦有唔好，雖然對我們的生活方便了唔少，但亦都造就唔少騙徒在網絡世界搵著數…

好似近排的網絡情緣就已經成為熱話，睇資料講…今年被騙的個案比去年多，而且被騙的金額總數都有4億…聽起來都唔野少！近來有一單個案被騙的金額已有1億，唔係呀！真係好過打工，為了騙到富貴目標，騙徒都要扮專業人士，扮果樣似果樣…真係唔簡單！就算唔識流利英語又冇專業知識等都唔緊要，扮暖男都一樣得，兼且可以用假相，又真係幾易呃喎！！

最衰啦…森伯一早post了相出來，人人都知森伯唔係靚仔果類，搵另外D靚仔相冒充又唔得…兼且森伯目不識丁，扮有學識又唔多似！唯有揀扮暖男噓寒問暖……哈哈哈哈

  
局外人可能會問…事主點解會咁蠢！咁都信！！…有時都幾莫名其妙，未見過的人都可以貿貿然畀錢佢，不過正所謂當局者迷嘛…呃錢仲要呃人感情都幾唔要得，就好似買了假食材，大費周章搞一大餐，到最後成煲野唔食得，仲要蝕埋材料錢添…雖然同情苦主，但防人之心都唔可以沒有！！

茶中小玩意…

可以咁講，由細到大都頗為喜歡陶瓷，或者有人認為陶瓷要很小心擺放，否則就會很容易打碎，的而且確對的，所以想陶瓷耐看耐用一些就要小心看待…

唔知大家又對相中的工藝品認唔認識呢？它可以說是一個擺設，又可以說是一個小用具，又可以說是個陶瓷藝術品，因為有些手工精緻特別的，可以數千元一個…至於呢個答案實在唔難猜估，所以答對都冇得森Blog任大家點…哈哈哈～

有次要在堂上介紹一樣有藝術性的私藏品，我就帶了這個，當然堂上的同學們完全唔多知係乜東東啦…班同學仔實在太年輕了，對茶藝品都唔多認識…

 等森伯簡單介紹一下…其實呢個名稱叫「茶寵」通常有玩開茶道的朋友一定會識，最主要它可以試水溫，沖茶要用滾水，至於開水夠唔夠滾燙呢，就可以搵茶寵測試下，正宗的茶寵係有變色功能，遇熱即變色，原本深啡色的茶寵，熱水淋過後就會變鮮色，相當有趣！冷卻後又會變回原色…

老人家始終係老人家，講兩講又口乾尤其家下秋風起，都係嘆番杯熱茶先～～

屬於阿伯的浪漫…

通常大時大節後，都會想吃得清一點…吃得清！唔係個個人都可以，或者都市人日日大魚大肉，又要惹味又要滋味，搞到個嘴仔刁晒…突然食番清淡又未必可以接受，今個節日有兩餐真係食到飽晒，唔係講笑真係頂住個胃果隻～有時話肚餓辛苦殊不知肚飽都同樣辛苦…俗語有話：嗔饑莫嗔飽…對現代人來講食到肚仔脹的機會大點…結果唔敢坐，郁動一吓希望可以幫助消化～

可能食慣蕃薯飯，個人又接受到，而且根莖類的食材都比較有益，食物都係講求色香味… 

見到靚靚的紫紅色，忽然感覺成兜飯都浪漫晒～～

儘管蕃薯冇乜香味或者味道，但估唔到顏色相當吸引，其實紫薯比起普通蕃薯易壞，所以要趁新鮮食，只要煮飯的時候放落紫薯粒，就會煮出紫色的健康飯…

現語有話支竹火腩飯屬於男人的浪漫（唔知點解，知道可以告之森伯），平時又好少機會叫支竹火腩飯，不過老人家唔好食太多肥膩的燒肉，所以食個有浪漫紫色的蕃薯飯都一樣…養生又可以清腸胃～啱晒食多咗的森伯…

人月倆圓賀中秋~~

唔經唔覺又到中秋，雖則話中秋都來到，但天氣仍有一種暑熱的感覺！想當年......細個的中秋已經開始感到涼意...今年呢個時候自己就忙忙碌碌，都冇咩特別為個Blog影些應節相片...發覺周圍都冇咩節日氣氛可以影~~~

呢排上堂做的習作與字體設計有關，用英文字型砌些圖案出來，忽然靈機一觸一於用英文字型砌些與中秋有關的插圖...

始終過時過節，都不可以沒有應節食品...與人講開而家的月餅唔似以前，記得以前食月餅好有月餅香味，而家月餅好似食一團蓮蓉，冇餅皮味又冇乜蓮蓉味，冇咁好食...

所以今年不如買番一個火腿五仁月好過，當然普通月餅都有啦...仲有森伯伯的至愛中秋小食豬籠餅，點可以唔買呢！！之不過呢間餅店的餅都好有hand made feel...所以個餅求其到呢...又似老鼠，又似孖潤腸，又似鼻涕蟲...冇所謂啦，都係食落肚啫～～

而家天氣仲咁暑熱，用一杯西瓜汁來送月餅都係一流，中和月餅的燥熱～對燥底的森伯來講幾啱...

在此都祝大家中秋快樂，人月倆圓...

聽下懷舊歌…

過去周末的颶風真的十分厲害，幸好風球過後可以不用立即上班，否則都幾狼狽…的確個風很猛，在家中窗外只見橫風橫雨，到下晝時候還聽到一聲巨響，似有很大型的東西從天而降！聽到都幾驚嚇…後來相信可能上層住客的房窗吹爆了，內裡的傢俬很多都吹了出來…因為見到平台一地都係家品…
 

一上班的車程中見到很多塌樹，差唔多每一個地方都有…之前的打風就沒有咁嚴重，據講這幾日最好不要站在大樹下，可能有些樹還會倒塌，真的要注意自身的安全！行人路上不時見到有塌樹…

打颶風的時候，當然最適當都係窩在家中啦…今趟的打風可能連發射器都打歪埋，電視收唔到大台，只睇到一個有線台…不過對於森伯伯來講都冇咩所謂啦，電視睇又得唔睇又得…都可以做下其他事情，就算訓下覺都幾好，橫掂呢排都累到七彩，隨時都可以訓一餐…

其實打風在家都有很多事可以做，例如聽下歌……一路以來覺得容祖兒係近代的女歌手算是不俗，有幾多歌都唔錯，不過就認為她以前的歌比較襟聽，呢隻精選碟都買了好耐，把很多歌都放到MP3偶然聽聽…碟內所有都係容祖兒的經典懷舊歌！！有我的驕傲、隆重登場、未知、特別嘉賓、怯…等等～冇辦法！！老人家始終都鍾意懷舊，包括歌曲……

某屋村打風期間停水停電…但對現代人來講有部手機最重要~~發覺剩係睇訊息覆訊息、同等訊息，驚望「風」景，訓下覺…乜都冇做過咁就已經成日嘞…

區區有森情…

以前曾經睇過一篇來自PChome的博文，博主有句說話講得很貼切，兩點一線的生活，是形容忙碌的都市人只顧每天出門返工，每晚放工返家的刻板生活…唔知睇著呢篇博文的人，有幾多個是這樣的生活呢？…

雖然有些地方唔係居住的地方，但有時你又會對這個地頭有點點的熟悉…其實又唔一定是講上班的地方，一個常到的地區你都變成一條…熟悉的地頭蟲～

自己久唔久要出下荃灣，發覺跟荃灣區都幾有緣，曾幾何時都常常去買東西，而荃灣是個乜都有的地區，住在裡面的人都不假外求，區內都辦到一切生活所需…不過荃灣區感覺上是個很雜的地方…

而另一個想講的地方係沙田，都係同荃灣差唔多，又係乜都有的一個社區，城門河差唔多每日車程必經的地方，係沙田的地標之一…在我的感覺上沙田都係幾多雨水，唔怪得有城門水塘又有城門河…水頭都幾充足架！不過濕氣幾重~~

住開的地區，就可能會發現更多的地利優點或缺點…好耐以前在樂富區返工，日子久了對樂富也有好感，發覺佢交通好便利…而且有一種靜中帶旺的感覺，相當唔錯～

而大家Blog友又有冇邊一區你特別好印象或壞印象呢？分享下都可以，唔想分享自己諗諗都得架…

畫人像…

雖然話喜歡畫畫，但都有些東西不會常畫，或者唔太擅長畫…一路以來畫的是漫畫類型，久而久之畫什麼都帶點漫畫化，自己弱項都算係畫人像，以前養鳥就會畫鳥，但人都是天天見，但人像畫又未必會掌握得好，可能跟專注唔專注有關，有日見到某商場有些畫畫班，見到人家的人像畫畫得好好，當然啦有番咁上下先會放出來作生招牌，吸引想學畫的人…

人像畫要畫得好唔易，如果畀森伯畫分分鐘畫到卡通化，不過畫一張正統的人像素描平時就唔多需要，素描係畫畫的基本功，所以素描都要時時練…不過自己真係冇咩恆心…幸好今個課程樣樣有關美術的東西都可以掂下學下，阿Sir正示範人面比例的畫法… 

 學習素描感覺以為好奄悶，殊不知好笑在後頭，阿Sir要兩個學員一組互相對畫，畫完的作品由導師畀評語，當然學生唔會畫得好專業，而且時間不多，畀評語的時候只能用爆笑形容（不過大家放心，森伯幅傑作冇被爆笑…）明明森伯都好認真畫，到最後的評語都係好漫畫…