2017年10月4日 星期三

森伯伯過中秋...

一年容易又中秋,呢句話真係冇講錯...仲記得上年點過中秋,霎下眼又一年~
過時過節點都要有一點點的氣氛,中秋節謹係要有個燈籠高高掛喇!相對而家一D手工燈籠都賣少見少,好似話真正識紮燈籠的老師傅都越來越少,新一代又未必肯承傳...所以手工燈籠都幾貴下!!
至於呢種彩紙燈籠,以前又唔太喜歡,但現在覺得幾好睇而且又有傳統味道,最緊要可以摺埋收藏第二年又可以循環再用...
呢種燈籠由細睇到大,唔知大家知唔知呢種燈籠有冇一個正式的名呢?!

今年月餅就特別多,但係完全唔需要自己吟荷包出來買,大部份都係外地的親人由遠方送來,我諗可能森伯上年寒寒酸酸買D微型棋子餅充迷你小月餅,(可能會有Blog友記得...)畀遠方的親人見到覺得森伯實在太悽酸,冇乜月餅過節...講到呢度森伯又有少少眼濕濕XXD,所以一連好幾盒真係有排食...始終森伯老人家燥底,食得多又會太熱氣,所以食月餅都會配個紅菜頭汁清清熱...

中秋除了燈籠外,中式餅店仲會掛起一個個豬籠餅,不過小時又好少買來吃!反而會淨買豬籠裡面的小豬...其實每年的中秋除了吃月餅之外,呢種豬仔餅都唔少得...呢幅相唔係今年影,是以前影下的,不過有Blog友提到豬仔餅所以摷出來講下...

至於今年的做節飯唔係上酒家食,都係去某間酒店gathering,但估唔到做時做節的時候,反而D食物唔係太滿意...不過今日都食到呢間酒店的奶黃月餅,總算係應節咁啦~~

45 則留言:

  1. 豬籠餅是懷舊節中秋餅食^_^祝森伯中秋節快樂﹗

    回覆刪除
    回覆
    1. 祝Bonnie節日快樂…時下興懷舊,當然應節食品都唔例外……

      刪除
  2. 講到寒酸,我諗我都算幾丟架,因這裡月餅不便宜,況且又吃得不多,曾試過有一年買了幾盒特價,吃唔完便放落個冰箱,隔些時日,攞一個解凍吃一個,咁就差不多要大半年時間才消滅晒…
    原來喺呢度都有好多人似我,好似係跟西人學,因佢哋都常會將買回來的餅急凍起。
    哈哈,森兄,喺香港就唔使咁喇!

    回覆刪除
    回覆
    1. 恕兄呢D就唔算寒酸, 難得外地都有月餅, 當然會買多些慢慢食, 畀著我都會啦~~食唔晒放落雪櫃保存, 我諗可以保留兩三個月都得, 食時放在焗爐翻熱都好好味...
      其實在外國, 雪櫃好重要, 買餸唔易可能去一次超市或街市就要買成個星期的菜, 唯有放雪櫃先可以儲存...食急凍食物好普通~~~

      森伯鍾意食月餅, 可以留來慢慢食...

      刪除
  3. 呢篇有番中秋氣氛。😍

    佢好似係無名氏!

    我都玩過白兔仔同透明玻璃紙飛機紙紮燈籠,不過,佢地都係短命種,幾日後就唔小心火葬咗😜。

    回覆刪除
    回覆
    1. 如果老人家唔係到,我唔會買月餅。因為真係得個鹹蛋黃好食,肥膩蓮蓉唔太鍾意,貴夾唔健康,我畀2蚊雞買隻鹹蛋化算好多。

      刪除
    2. 睇見幅相童年回憶返梗啲,森兄隻豬似 的骰 乳豬仔,細路時隻豬係肥頭耷耳大豬。

      唔好話舊時無注重設計,用個豬籠裝又好有想法,不過,唔知有冇人拎去裝啲小昆蟲、動物玩農村偷情案浸豬籠呢?

      刪除
    3. 森伯鍾意中秋, 所以篇博都有少少氣氛...乜呢種燈籠真冇名架?!!...我細個玩燈籠好少燒著, 通常撞爛碰爛~~

      食月餅係要個鹹蛋配蓮蓉一齊食先好食...邊有人分開架~~而家的餅店做的月餅只見蛋黃同蓮蓉,個皮就薄一薄,皮應該厚厚地先好食架嘛...

      諗起豬仔餅童年返來?!!...咁一爺細個都幾幸福~~因為月餅會有盒豬仔餅送, 所以唔會再買個豬籠餅...

      刪除
    4. 咁我五行欠火。😈

      你話我唔係人呀!唔通我係……仙…妖…外星人😂,係窮人本色唔識食貴野。


      刪除
    5. 咁我做好人搣皮食,森兄等住 收皮。😜

      刪除
    6. 有人話如果想服務好,就要唐節食鬼餐,西節食中餐喎!倒行逆施。

      刪除
    7. 我諗你專登畀個位森伯食...你五行唔係欠火, 係欠打~~~~好out的爛gag...哈哈哈
      我講係邊有人啫...冇講唔係人喎!!!~~~唔識食貴野都係慳家,人知常情喇...


      你講個月餅要搣皮食??!!...咁趣緻!!~~~我而家食南瓜番薯都會食少少皮,有益~~


      完全錯錯錯...我地就係唐節食西餐原來都唔係咁滿意咋~~~

      刪除
    8. 我都覺得啲服務差咗,可能人手唔夠,我呢個宅男偏好外賣pizza套餐加魚生,老咗覺得喺屋企食得舒服好多。

      刪除
    9. 係呀!欠打。森兄快啲黎揼我打我啦!老骨頭周身骨痛嘛!揼骨拍打背脊好 梳乎。

      刪除
    10. 我有聽大佬森 教誨,南瓜蕃薯都要連皮,不過,南瓜皮難吞,係用機打蓉,食咗皮到唔覺,朝朝早都成大事。💩

      刪除
    11. 今次的大前題唔係服務差咗,係食物的質素差啲求求其其咁~~
      不過做節飯叫薄餅食就是但咗,有時出去食都順便感受下節日氣氛嘛...

      你唔好睇森伯平時魯粗一名,好少會打人架!除非有人身痕啦...XXXD
      你咁講,你成日去骨場揼骨架喎...


      南瓜皮你點整呢?!...我無論蒸或煮都好易把皮煮稔~~本身南瓜煮完都好稔,仲要攪爛?!!...你整BB飯仔?!!哈哈哈

      刪除
    12. 咁差!冇下次?

      嫌棄pizza過節,市面有乾手淨腳嘅即食鮑魚、花膠、海參、魚翅,興番熱就食得好方便,蒸條石班,白灼蝦,淥油菜淋上鮑汁,易過借火又快手嘅貴氣家庭應節飯。

      刪除
    13. 平時粗魯……老人家時時講反話。

      有段時間常去骨場。試過工作枱櫈同mouse 不符合人體力學,都係後來發覺會咁大問題,搞到膊頭隱隱作痛,自以為五十肩,弄了一排都唔好,最後畀個(盲人館)盲婆按中穴道,2次就搞掂。

      刪除
    14. 南瓜皮有橙色、綠色同啡黃色3種,我食開啡黃色最平嗰種,某大超市大大個買$9,覺得層皮又厚又難食,平時要去皮食,喺食控日,會連皮同翠玉瓜、豆腐或雞蛋烚熟一起攪拌成糊狀作為午、晚餐。

      刪除
    15. 咁又唔會冇下次...睇下以後仲有冇改善啦~~
      你真係會識整咁多餸菜?!!...如果係真呢餐做節飯真係好和味!!
      人老咗,食得都有限啦~~反而著重一家人聚聚的歡樂時刻啫~~


      森伯唔識講大話, 更加唔曉講反話啦~~魯粗一面你唔知啫...
      我幾年前都有你講嘅情況,返工用得滑鼠多, 整隻手腕位置又痛又痺...亦都唔敢亂咁醫, 最怕情況加劇...後來買個有枕的滑鼠墊, 用冇幾耐立即有改善...自此我發覺生活的難事唔好諗到太複雜,可能一件小東西就可有大幫助...


      我食嗰隻南瓜都係普通種, 綠綠啡啡皮的~~食時將部份皮鈚去, 留下部份皮食用...如果你的咀嚼冇問題, 唔需要攪爛晒先食, 有些大件的纖維先可以幫助腸蠕動~~

      刪除
    16. 即食鮑參翅肚,等同開罐頭咁易。

      條魚唔好貪大,約1斤重就最嫩滑、最易蒸,魚檔劏好晒,番屋企清吓魚鱗洗淨,剪短魚鰭唔好拮口,魚檔仲會教你蒸幾多分鐘,魚底用薑蔥墊起,等熱蒸氣可流到底部, 魚鰓、 魚身放上薑片闢味 ,喺最厚肉嘅魚背沿魚鰭𠝹開一刀,唔驚中間太厚肉蒸唔熟,等水滾冒出蒸氣至放條魚入去起計時,蒸好 淋上熱油、豉油,放芫荽,好食到飛起,上網睇片都學倒啦。

      打邊爐都有灼蝦淥菜食,除非少爺森有工人餵係港童,應該易過借火。

      刪除
    17. 認同森兄歡樂不重於物質。

      最難係揾出原因,方可對症下藥,有時解決辦法只係小改變。

      刪除
    18. 就係你食嗰種南瓜,我連啡黃綠層表皮都食埋,覺得自己好似猿人食樹皮,又似食梗中藥,不過,打爛混和就唔覺。

      刪除
    19. 聽你咁講真係好有煮食心得喎…雖然話罐頭但都要用心機炮製才好味,最衰你又唔寫blog唔係出篇一爺廚房都好喎,等呀少爺㚞學返D廚藝煮下做節餸…

      刪除
    20. 你好似講到南瓜皮好難食,其實都好易入口,反而連皮煮唔會出太多汁,乾爽啲……

      刪除
  4. 我都係用喱種風琴紙燈籠,可以環保下年再用....^^
    豬籠餅未見過喎,幾靚幾特別!
    月餅一年吃一次當過節食品無妨,不過食得多我諗森兄要勤力做占先得XXD

    回覆刪除
    回覆
    1. 呢種風琴型燈籠簡便又好用, 用來中秋佈置唔錯~~

      豬籠餅未見過??!!好多餅家用做剩的月餅皮料, 再做豬仔餅出售,好似今年就有魚餅,又係另一種風味~~~

      我食月餅都有節制既, 總有人們分享晒, 正如你話一年一度又會覺得無乜所謂啦...

      刪除
  5. 森兄點解唔畫番張月餅應下節呢.

    回覆刪除
    回覆
    1. 其實做節呢幾日都唔係太有閒餘時間畫下畫, 出到篇Blog都已經好好~~

      刪除
  6. 個人覺得風琴紙燈籠最美,很討厭有聱膠燈籠.

    回覆刪除
    回覆
    1. 係呀!!現在反而喜歡呢種風琴型燈籠, 相中的細細個又多顏色~~~
      我都好怕膠燈籠尤其有音樂果種, 一響.半夜訓著都嚇醒...哈哈哈

      刪除
    2. PS: 初頭霎吓眼個大標題, 以為係 "森怕怕過中秋", 好彩不怕, 還吃了六大份月餅, 豬籠餅應吓節!

      刪除
    3. 你講咗,我仲以為真係打錯字,即刻睇睇…

      每日都畀個限制自己,唔㑹食太多…個人年紀老邁,都唔敢過量~~~哈哈哈

      刪除
    4. 我都好怕音樂果啲,太吵耳了XXD

      刪除
    5. 嗰D音樂係好刺耳, 有啲家長索性把個播音器用膠紙封住...

      刪除
  7. 回覆
    1. 見D豬豬餅咁得意,先影張相~~~~哈哈

      刪除
    2. 小時候鍾意風琴式的燈籠,顏色多又平麻。

      刪除
    3. 最好呢種風琴型燈籠仲有唔同的尺寸, 今年就見到一些迷你的風琴小燈籠...

      刪除
  8. 原來森少個中秋節仲未過完,我也是一樣。單黃的白蓮蓉月餅我最喜歡。
    雙黃嫌太多,有些說是蓮蓉,其實是薯蓉。點都好啦,一年一度,有得食就好。


    回覆刪除
    回覆
    1. 真不好意思, 過節期間都沒有逐一拜訪各位blog友...或者時間過得奇快,白忙一遍也感到沒做什麼...
      月餅的確要有少少黃才好吃吧~~選擇單黃最好, 不過我自己今年冇買呀...

      刪除
    2. 以前都唔多覺月餅有乜咁特別好吃,可是近這幾年來越來越喜歡吃它。 前幾年節前節後都會買一盒回來,又試過買月餅卡送給親友。
      *
      今年都懶了很多,沒買沒送,只吃過一個。不知是窮了,還是那家餅舖搬了。 有時會蒸一蒸它才吃,如果蒸出來有白色的一層糊狀,這顯然是用豬油搓的,這層豬油就不吃為妙。 就算吃了也沒大礙吧,不過是一年一度啫。

      刪除
    3. 我都發覺有很多食物,以前唔喜歡食,但人大了反而喜歡…
      通常過時過節都會吃得多了,放任少少…但只是間唔中啫,都冇咩所謂啦!因為平時我都食得比較清而淡…哈哈

      刪除
  9. 我發覺Blogger. 久不久發生同樣問題,收不到博友貼出新網誌通知,幾個月來我都收不到你新網誌通知,剛才看見其他博友處有你回應,才追蹤番分享的網誌。

    回覆刪除
    回覆
    1. 先謝謝你繼續來捧場,其實有些網誌平台久不久就會出現一些問題,所以時時要作一些備份或資料更新…

      刪除