2017年10月19日 星期四

森藏誌-匙扣

收藏一樣東西,最好就係容易搵,容易買,有代表性又可以有記念性的...
綜觀咁多物件中,我認為匙扣就係最理想的物件...

對於森伯來講,收藏了匙扣唔係有很耐歷史,至今只是好幾年,有些是自己以前買落,有些是人家送的...今日就攞三個匙扣出來講講~哩三個匙扣都係人家的外遊手信...

很喜歡這個匙扣的古色古香設計,很有中國風的味道...佢當然來自北京啦!!唔知點解哩個匙扣除咗古雅外,仲添多幾分浪漫元素,唔通聯想起古老的同心扣之類?!...

驟眼睇都唔係太特別,但細看圖畫又很有地道特色,一份屬於約但死海的手信...

一睇就知哩個匙扣來自中東,隻駱駝仔好有代表性,整個匙扣可以感受到中東鐵匠的手工...

昨日博友秋葉提到小木象匙扣,我便醒起早前都收到隻,是來自東南亞的手信,相信是當地的椰殼工藝品,順道post出來畀大家睇睇...

當然唔止咁少,其他的或者留待日後有機會再同大家分享...

到現在收藏的匙扣雖然唔講得多,但自己買的每一個都有記念性,儲的唔一定要貴,即使係普通的矽膠公仔匙扣都無所謂,目的都係一種意義!!

38 則留言:

  1. 儲咗幾多個鎖匙扣?

    有段時間好興用真金鎖匙扣做公司年夜飯抽獎,我有幸獲得1個,我嫌鎖匙已經夠重,所以,用個至細圈串起就算,將佢送咗畀阿媽。

    回覆刪除
    回覆
    1. 大概廿令三十個左右…未有仔細數過~希望可以長儲長有…
      嫌個扣重?!!...咁個金匙扣肯定好重手~~
      只要係你送,我諗呀伯有收到咩都咁開心…

      刪除
    2. 我都同森兄諗法一樣,可惜出錢果個好孤寒。

      唔會表現好開心,因為老人總愛說反話。

      有冇收到蠍子星座匙扣?

      買多定人家送嘅多?

      刪除
    3. 送個金匙扣都唔算孤寒~太貴重反而唔捨得用...

      你真係道出長輩們的心聲, 鍾意講反話~~

      我諗知道森伯幾時生日的應該唔會送匙扣~~哈哈

      暫時都係一半一半啦...

      刪除
    4. 個金扣真係人情薄過紙,用膠封印住,金皮都摸唔到。

      做唔倒森兄嘅貴氣朋友,我呢啲窮人係好cheap架,送杯、相架咁啦!

      刪除
    5. 我知你邊種金薄匙扣,有段時間真係好流行,不過而家好似唔多見~

      森伯邊有咁多貴氣朋友丫,如果啱心水,杯或相架都冇咩所謂,但唔鍾意就好阻地方...

      刪除
    6. 真係好少人送匙扣做生日禮物,不過,加上背後好森含義,呢個小小扣確實唔野少。

      可能,暗戀者向森兄表白,希望敞開森扉 牢牢鈎住, 盼森鑰匙打開人哋心鎖,空虛匙扣被森匙填滿,配成一對,當然,最終係收到森家鑰匙,登堂入室啦,以身相許喎森媽都話係大件事。

      亦可能係仰慕者想包飬優質森,得到答允,再送上鎖匙……車匙、樓匙,依家有層樓揸手最低都400多萬。

      (揾個人物寫會傳神啲,如有類同,實屬巧合,唔好對名入座)

      刪除
    7. 哈哈, 聽到咁多quite森好事, 森兄一定不會仇眉森鎖了. 而大家都想願聞其詳 :)

      刪除
    8. 一爺兄:
      鎖匙扣啫,畀你諗到咁多,係編劇人才…鍾意寫乜就寫乜!!!!!
      我諗你意思指第一個北京匙扣,係位太太的手信,畀得森伯嘅就梗係其他人都有啦…我影的鎖匙當然唔係屋企嘅鎖匙~求其搵啲鎖匙畀大家睇個匙扣怎樣用…森伯屋企邊樹有鎖匙…唔係瞓天橋底咩~~~><而家天時涼涼地,要搵多幾張紙皮保暖…
      …優質森?!...你敢講相信都冇人敢認~~~~哈哈哈!!如果哩個時勢有咁筍的優差就已經好嘆,淨係層樓已經可以間幾間劏房收租…
      話唔定一爺都有好多樓渣手……..我估計!!!
      最後想問你點解打到個剔手邊的渣字?!!...有米人用嘅電腦係唔同啲~~~


      KK兄:
      乜野願聞其詳?!...森伯仇眉森鎖的一面冇響哩度講啫,個個都有本難讀的經~~~

      刪除
    9. 多謝讚賞!喜歡我嘅創作嗎?

      都話唔好對名入座,放心,我對森兄冇乜意思架。

      有好多種門鎖係唔駛鎖匙架,例如:密碼鎖、指模鎖、視網膜鎖、人工智能面孔識別鎖、 人工智能聲音識別鎖……森家裝咗嘛!

      瞓天橋底非法架,乜森兄係特權人士。

      又話大陸唔收紙皮,夠森兄瞓一世。

      做包租公好麻煩,唔會囉!

      有米人係用緊國貨華為Mediapad X2 7吋平板手機,公正 格價網 標示兩張金牛。內置華為Swype輸入法嘅字庫有呢個「揸」字,一啲唔渣斗。

      有米人勁慳,冇用電腦啦!二合一太方便,唔駛資料三頭(手機、平板、電腦)共享咁鬼麻煩。

      華為係全球手機全年銷售量嘅季軍,排喺蘋果同三星之後,貪佢夠大,又係中國制造,應該更貼地、更適合中國人用,森兄用緊乜機呀?



      刪除
    10. 我一板走天下,仲慳埋手錶同數碼相機錢,講到好似乜都負擔唔起,好似森兄寫到自己好寒酸風格,我唔係學森兄手筆,唔好開心住,而係學超級富豪行為,應駛得駛,多餘嘅唔會點花費,講究實用,李超人都係戴幾嚿水Casio潛水膠錶。

      刪除
    11. 你的創作都冇話喜唔喜歡,笑吓咁啦…哈哈
      你留言冇乜意思...即係叫森伯唔駛睇,當晒癈話…XXD
      除非酒店!大部份的住宅都係用鎖匙,電子嘢一但冇電或失靈,屋企門都開唔到…咁冒險都係要番條鎖匙最穩陣~
      偷偷地訓天橋底都冇人知喇!森伯唔貪心紙皮夠冚就得…
      平板手機日日拎住好麻煩太大部!!拎住講電話更加唔方便~~其實我鍾意細機,細細部較好用,不過睇網就不太好~我又估唔到原來華為係港手機市場第三大,早前睇新聞先知,果然多擁躉…其實手機都冇分大唔大牌子,早輪三星都發生電池事故啦~所以啱自己用就係最佳的手機…我嗰部係HTC,暫時都OK架…我冇考究佢邊度出產,只係知道佢可以雙卡齊用…呢個先係買點~


      你都好慳下…我部手機最多可以慳部相機,但錶都係要戴起手~總之有錢人有得選擇戴咩錶,我哋升斗小蟻民雖然選擇少,但實用耐用好看便是了吧~

      刪除
    12. 我吹水就係想放鬆、講吓笑,森兄覺我嘅創作可以得啖笑就正合我意,令人笑好難架,好野!咁我成功咗。😁 我都認夾雜唔少開心嘅廢話架,唔似工作時發文咁認真。

      門鎖內置後備電池唔驚停電,電子部份壞咗可手動,即係用鎖匙開,我識人轉咗,係未來世界會普及,都要適應。

      幾時瞓咪通知我,投你所好,等我帶一張紙皮做禮物去探訪森兄。哈哈哈!

      揀7吋大係啱我手形,睇野可接受,貪心多功能咪唔駛帶好多嚿,充電呢又要拖幾隻牛畀手機、電腦、相機、鬚刨,番大陸工作、出外地trip都負擔唔少,森兄都係相機手機融合,方便好多,所以市場上產品符合不同人嘅需求,未來有摺mon 機啱晒森兄想機細mon大。

      我寫係全球,全港我又唔知排第幾。

      買點係雙卡,啱中港兩邊走,啱間諜用2個號碼,走私情人老婆又得。

      刪除
    13. 你個回應咁詳盡,咁有創意,又要廢得嚟帶少少笑…好有寫作技巧先寫倒…索性寫吓Blog囉~無謂嘥咗你啲創意….森伯會成日去十卜!!!!!

      又要電子門又要有條匙後備,咁咪又做多咗嘢…等到未來世界,森伯伯都唔知再屬唔屬於呢個世界羅…

      你講得投我所好,就帶張絲綿被啦!!!!!仲紙皮~~~~~~

      手機成7吋大真係有我部平板咁上下,暫時我又唔需要一機幾用,科技嘅嘢我又唔高要求,你睇我都好遲先有智能手機喇,唔係為工作畀人多些聯絡渠道,我仲用緊長者機咋…
      雙卡係作聯絡用,熟人一個號碼,另一個只係聯絡或留電話用……

      刪除
    14. 我寫過2篇就冇癮。😴

      抽秤下「森伯唔貪心紙皮夠冚就得」,依據中文閱讀理解,要張綿被嘅即係貪心啦!😂

      點解森兄講到好似我係推銷緊部平板手機要你買,我只係詳細解釋我部『有米機』係乜東東咋。

      刪除
    15. 寫過2篇…乜咁多呀?!!...2篇就話冇癮~~換轉係人一齊2日就話冇癮~~~~唔怪得一爺兄咁多情人知己@@
      有需要就唔叫貪心…等如一個在沙漠的人需要杯水~~唔通咁都叫貪心?!!老人家冬天要夠暖~~~咁你嚟探森伯時識做喇!!!!
      我知道,所以話每個人的需要唔同,手機的功能都有唔同~~~

      刪除
    16. 人很醜但我很可愛,人生太短暫,盡量讓多啲人留下美好嘅回憶,造福人們。

      杯水係紙皮,綿被係法國P字頭有氣礦泉水。有朝一日森兄去到呢個田地,我唔食都要送上温暖。

      刪除
    17. 有時外表都唔係人生的全部, 反而內心比較重要...可能森伯自己都係醜人, 所以希望以內心修維去提升自己~~~

      你真係好巴打...雖然都感覺有少少 "肺" 腑之言, 但都感人嘅~~最多到時一齊去執多塊紙皮保暖囉......

      刪除
  2. 森藏畢露, 大方給大家觀賞, 後宮叁拾, 先行三至愛! 覺得北京的最有特色!

    回覆刪除
    回覆
    1. 哈哈哈,後宮三十…咁都畀KK兄諗到~~入得森伯後宮,都會畀森伯愛護有加架啦~
      望落唔似一般匙扣款,可見在設計上花過心思…

      刪除
  3. 森少的鎖匙扣來自世界各地,都很有特色。匙扣輕便一般都不用太花錢,買的方便,收的也高興。
    我在泰國買的匙扣也有未送出的,一隻電燈木製的披彩黑大象(小型立體),可以送給你收藏。來址可寄上。

    回覆刪除
    回覆
    1. 不過有人在韓國買了一套精緻的女裝小荷包回來,才看到裡面有布條印著:Made in China. 有人送我一隻澳州小袋鼠,底下有字寫著:Made in Hong Kong. 正所謂“千里送鵝毛,物輕情義重。”開心受落就是了,我不會介意。

      刪除
    2. 到現在我反而唔抗拒人家送鎖匙扣,因匙扣細唔會阻地方~~的確有些手信匙扣幾有特色...
      謝謝秋葉,記得我都有個類似,是人家買回來的東南亞手信,明天post出來吧~免得多出浪費你的手信...

      係呀!!係呀!!有次記得有人拿來日本手信,都見到印有made in China...@@咁即係邊度嘅手信先?!!!哈哈哈...所以買手信畀人都要睇下made in 邊度先好買~~
      澳洲的袋鼠,樹熊夾夾係澳洲的經典手信~~
      你的收禮心態好正確,只要喜歡的都唔需要理會產自邊度~~

      刪除
    3. 旅行總會買東西,一見到喜歡的東西總會買下來,再加埋手信就會好多東西。所以一般買鎖匙扣的小型物件做手信最方便,因為唔迓埞。
      收藏品當然以不重覆為好,免得阻埞。明白的。
      其實舍下的的東西也太多了,過去都攞咗好多袋衫去救世軍。
      *
      今日睇清楚,家中嗰隻澳洲的樹熊夾夾,底下暗藏一張小標籤,金色的紙印著:
      Made in Philippines . 確是在澳洲出售的,要睇開啲啦。

      刪除
    4. 我都覺得旅行除咗食食玩玩,買手信紀念品都唔少得,因為一生人可能去一兩次,點都買些少東西回來...
      而家送禮給人都唔會送太過大件的物品,細細件或者食物人家反而收到開心~起碼唔需要阻人地方嘛...

      秋葉真的很有善心,把多出的有用物品捐去一些慈善機構...
      我自己好少買太多東西,所以冇咩物品捐出去,多數捐少少錢就算...

      哈哈,我諗真係好多當地買到的手信,都未必係當地的出品,如果介意真係買之前睇清楚~~

      刪除
    5. 大陸和菲律賓、越南多工廠,這些國家的物料和人工都比較平,所以歐美和其他一些國家都會幫襯他們製造紀念品。
      記得以前收過一把綑了花邊的美麗傘子,親戚由澳洲買回來做手信,原來有標誌印著Made in Hong Kong. 又看過一本雜誌圖文並茂,記述美軍團的各種肩章、徽章都是交由大陸某處的鄉村製造的。

      刪除
    6. 森少肯捐錢出去,都算唔話得啦。有啲人會表白立場說:「我乜都做架!除咗善事。」Haha,你話幾好笑吖!

      刪除
    7. 如果純係為商業決定都無錯,做生意就係咁…不過對於遊客來講一心去到當地遊玩,當然想買些當地出產的紀念品喇!記得有人同我講過,去外遊都係睇到made in當地先會買來做手信,咁先有紀念價值…
      而家有很多物品都係中國製造,所以大家都唔介意上淘佬買東西,玩下手各地手信都可能有得賣…哈哈哈

      點解咁講呢?!...當然唔係乜都捐一餐,我係特定某些志願機構先捐,捐少少望大家集腋成裘…你個朋友都幾坦白,我欣賞佢!做善事講個心, 既然唔想做又捐嚟做乜呢…

      刪除
    8. 其實去到當地旅遊,高興時當然係想買當地的特產啦。我第2次去杭州和蘇州,買的當地特產比較多。杭菊龍井、絲織產品,無錫的淡水珍珠。
      *
      人的性情各各不同。做善事不論多少,都係講有冇心啫。有兩年我捐過錢,第三年就冇捐嘞,都唔知有心定冇心? 近年百物騰貴,我窮咗呀。

      刪除
    9. 我諗我都未必太清楚什麼地方有什麼特產…可能只係隨心而買,見到喜歡的,合用的才買!始終出行唔多,就算唔駛買什麼都已經好難忘~~哈哈

      其實我都認為做善事隨心意,我都怕一些慈善機構做一啲長期性捐款…所以每次我都係一次性捐吧!多少都係隨意,總之量力而為就算…

      刪除
  4. 好多人去旅行都係買D鎖匙扣,當做禮物送俾朋友或同事架。

    回覆刪除
    回覆
    1. 其實鎖匙扣都唔錯,一般都係細細個,就算用唔到,都起碼唔會阻地方嘛…

      刪除
  5. 講開又講…都有朋友去完旅行送過一些有剪甲功能的小鎖匙扣給我,但我沒有想過收藏起來,只是隨意放在一旁而已。:P
    死海果個匙扣幾靚。

    回覆刪除
    回覆
    1. 你講起指甲鋏匙扣,家中都有…其實匙扣係實用功能都幾好,起碼有用武之地…不過如果唔係儲開匙扣,都會好似你咁放埋一邊~~死海果個夠色彩幾靚架!

      刪除
  6. 是不錯的旅行紀念品,每次拿出來看也會有旅行的回憶吧^^

    回覆刪除
    回覆
    1. 對呀!不過都要睇睇個紀念品有冇當地特色,否則可能忘記在哪裡買…

      刪除
  7. 我過去也曾收藏匙扣,不過,興趣淡了,也送給朋友了!

    回覆刪除
    回覆
    1. 其實收藏匙扣唔錯,通常都係細細件唔阻地方,而且容易搵到有紀念性的…

      刪除