2017年8月24日 星期四

森伯好大頭...蝦~~

平時睇開森Blog的友好們都知,森伯屬於穩陣派,隨身物品都睇得幾謹,一向都好少遺失東西...
上個禮拜外出完之後先發覺唔見了張發達通卡..返到屋企即刻趴埋牆自我搜身~~XXD...裡裡外外,上上下下...的衣褲袋摷勻都冇發現!(依家講好似講笑咁,其實當時都幾不知所措架!)
腦海裡立刻案件重組,大概估計到邊度唔見,但在人多的地方跌,應該冇乜可能搵返~~~

其實對森伯伯來講,發達通唔係日日需要用,而且亦有個壞習慣就係張卡要另外拎出來嘟!唔會連銀包一齊嘟,所以今次唔見都可能同呢個原因有關...都要重新買過一張新的,唔睇又唔覺原來又出了幾多特別版的發達通,不過好多都係畀細路用就適合!!!最後買了款有匙扣的,扣著鎖匙應該冇咁易唔見...


遺失發達通唔止一張卡,仲有餘額同埋資料,因張卡仲可以出入住所的所有設施及大門,所以又要重新補返個記錄...

不過有人話唔見張發達通都係小事,若然唔見銀包、身份証等仲濕滯!!!從逆向思維諗,今云都算係好彩既~~~><

24 則留言:

  1. 我最多遺失嘅係遮。

    都試過成個銀包喺後褲袋唔記得拎出黎,就扔落洗衣機,正式係洗污糟錢, 好好彩全部曬乾後又冇事, 用得番,零損失。

    回覆刪除
    回覆
    1. 相信遮係最易唔見,有時放低咗就唔記得拎,過我暫時未試過…
      洗銀包唔驚啦,裡面的身份證銀紙都防水…反而最怕係褲袋有廁紙,洗完成機衫都有廁紙碎……

      刪除
    2. 冇失遮咁穩陣,反而係唔尋常嘅跌咭案??好耐人尋味。

      效法林子健 釘大脾案,要翻睇當天 閉路電視 森入調查,後面一定有股強大勢力 擾亂森神,呢股魔力估計係來自個鬼火咁靚嘅異物,望一望都令人失魂落魄,連森爸姓乜都唔記得,魂魄都失,更何況係一張咭呢,被冷落嘅八達通咪 脫離森掌、逃之夭夭,等森兄可以另結新歡。😁

      刪除
    3. 有幾耐人尋味呢一爺兄,一把遮點都大過一張卡啦!邊有咁易唔見~~~

      人地林子健案全城關注,森老伯唔見咗張爛鬼八達0隆邊個會理,仲要用天眼去調查?!!...你估而家係拍劇?!!...

      我估你真係做編劇...哈哈哈

      先先有個鬼火咁靚的異物...
      仲要望一望令人失魂落魄,連老豆姓乜都唔記得...
      跟住就唔見左D野......

      呢D橋段好有八十年代電影精裝追女仔feel~~~~XXXXD

      遺失左張卡都冇計啦!!!唯有當換個教訓囉~~~~

      刪除
  2. 我離港已久,乜8達通卡可以當通行証(出入大門鑰匙)咁使?我真係大鄉里!
    記得剛回來不久,有西人朋友想去香港一行,我就借張卡給他起碼一落機便可以增值使用(張卡好似仲剩番十幾蚊)。
    其實佢走之前我已話過佢知張卡本身有50元按金,叫佢用完就俾番我,誰知他臨走時發覺冇餘額就掉咗…
    哈哈,佢比我仲鄕里呢!
    另,我諗我同你一樣都係好小心好少漏低啲嘢,誰知我也試過在短時間內兩次遺留了鎖鑰插在公司的locker 而唔記得拎。果時我都係三十幾歲,發生啲我完全冇想過會發生的事,個陣時心情好沈重,覺得自己好瘀,有面對唔到自己的感覺!

    回覆刪除
    回覆
    1. 只係八達通多項功能啫,通常某些屋苑都會有住戶證,但又要發張卡,若然住戶證合併八達通就方便到住戶,出入大門唔需要帶多張卡又唔駛撳密碼,嘟八達通便可進出……

      你個西人朋友又幾烏龍喎…哈哈!乜唔係外國人的國家都有呢種電子貨幣系統咩?

      畀著我都驚啦,唔見鎖匙…尤其屋企鎖匙,若然真的遺失要重新換過把鎖,都幾大陣仗架……所以大頭蝦極都千萬唔好唔見鎖匙呀~~~

      刪除
    2. 森兄,報紙講十幾年前呢個世界就只有香港有8達通的電子貨幣咭,但而家就畀其它地方追過…

      刪除
    3. 恕兄唔講又真的不知,原來香港是先用這種電子貨幣系統……以為歐美日等國家已經用了很久才到香港……
      有時用呢個發達通,嘟吓嘟吓唔覺又好快使晒啲錢…哈哈

      刪除
  3. 我試過唔見咗張信用卡,巢匀晒所有櫃筒同手袋都
    揾唔到張信用卡,果刻好驚,心諗俾人偷咗就大件事喇,即刻打電話去報失中心報失,點知我報失完唔夠半個鐘就係另一個銀包揾返,果次之後,我告誡自己儘量要少申請信用卡同拒絕提高信用額,這樣做就算唔見咗信用卡,金錢損失都減輕啲。(係咪有點亞Q精神呢?!kakaka----)

    回覆刪除
    回覆
    1. 嘩,唔見信用卡真係好驚…尤其kaka張張都係白金卡添!!……你都好最後都係虛驚一場,若然要補領返都麻煩……

      我如果唔係諗住買大件高價的東西,基本上唔會帶卡,唔見咗又要報失,一般都係畀現錢,所以有時都好似土豪咁,帶一疊二疊銀紙(十蚊紙廿蚊紙嗰類)…哈哈
      所以個銀包出到街幾時都要看緊一點!!

      刪除
    2. 邊有張張都係白金卡咁富貴呀!
      其實為了防止被別人盗用,一旦向中心報失了,那張信用卡便會失效了,卡中心會再補發另一張新卡給報失者,當收到新卡時只需重新在電話上再確認一些資料之類的手續便成(我上次是如此這般的。)。
      仲以為土豪森伯會學似啲買豪宅嘅大媽拖幾箱銀紙去買嘢添!哈哈哈…

      刪除
    3. 可能因為唔常帶卡的關係,原來報失卡的程序好似收到新卡咁都唔算好麻煩,但係最驚就係在未發現唔見卡時,有冇畀人用來消費...不過都要個偷卡者識冒你簽名等等~~總之有關財物的都要小心啲啦!!!
      一講就露端倪,就知森伯冇做土豪的資質啦~~唔好話幾箱銀紙,屋企拖0急都冇個~~~哈哈哈哈

      刪除
  4. 森兄好彩無用自動增值,否則要去搞報失手續仲麻煩......
    有鎖扣咁都好,無咁易唔見

    回覆刪除
    回覆
    1. 自動增值應該唔太適合我,假設真的遺失咗張卡,打個報失熱線就已經可以了…
      扣住鎖匙就算跌咗都起碼擲地有聲……

      刪除
  5. 哈哈! 一向穩健的森兄, 今次做了立不小森. 建議森兄買番隻八達通手錶, 包冇失拖.

    回覆刪除
    回覆
    1. 哈哈哈~幾廿歲人都唔想時時做立不小森,所以出街都要好好睇實自己的隨身物品…
      發達通手錶都有諗過,不過手錶感覺冇咁隨意!!

      刪除
  6. 個公仔畫得好鬼靚!我張八達通長期擺喺銀包,最多係壞卡,冇試過唔見……

    回覆刪除
    回覆
    1. 多謝teddy讚個Q版森伯畫得靚!!
      應該放在銀包裡會比較穩陣,可是我嘟完就分䦕擺,所以就咁唔見……真活該……><

      刪除
  7. 我都試過跌左張8達通咭,重要我增值左幾百蚊才吾見,幾咁肉痛﹗

    回覆刪除
    回覆
    1. 咁就真係好唔抵!!或者當作買個教訓,以後更加睇緊自己的財物,免得再有發生……

      刪除
  8. 無獨有偶,我也是習慣了拿著一張卡去嘟機的。有時久不久見到有些人拿著袋子,或是一個銀包去嘟,可是嘟來嘟去都不响,幾無奈呀!後面跟著的人都替她著緊。
    我這裡也是用發達通拍機開門的,不過管理員認得我,總是按了門讓我進去。

    回覆刪除
    回覆
    1. 你十分顧及他人,直接用卡或銀包嘟,就快捷得多……尤其在繁忙時間排長龍的時候……
      其實住得耐很多保安員都會自動自覺開門,但有些設施就要靠卡去進出,對我們住戶來謭都很方便……

      刪除
  9. 無獨有偶,我兩星期前也遺失了八達通卡。

    回覆刪除
    回覆
    1. 以我覺得Amour都應該幾謹慎,唔會咁唔小心...
      我都係當一個教訓,以後要加倍看管張卡~~

      刪除