當很多人都認為工字不出頭的時候，做生意又係咪一條出路呢？！假設現在真係有個機會去做生意，又有邊行生意至好搵？！…我諗一定係食肆！睇吓有幾多食肆開到成巷成市就知啦～～
都有一段少時間冇來長沙灣呢個商場，呢日碰啱有事辦順道要來，以前呢個商場有幾多唔同類型的店舖，點解今日來到發覺有咁多食肆，真係有啲呆了眼，畀我感覺好似食街…不出兩步就有一間，相信嚟掃場都會幾滿足，可惜森伯吔開住家飯，而且掃場都唔係森伯嗰杯茶，不過約人來食就好啱，咁多食肆可以慢慢揀…
其實以前呢度都有很多小商舖，買吓電子產品，玩具模型，衣飾鞋褲…等，有間幫襯開的鞋舖都難逃迫遷，因為有幾多長者款（俗稱街坊裝）的鞋幾啱森伯，所以每次經過都會睇睇，不過以後就變成“想當年”了…
趕走小商戶就當然有些大集團入駐啦！又真係估唔到有咁多有名的品牌會在此出現啵…始終呢度係工廈區，一到食晏見到嘅人流，你咪話唔驚，間間食肆都坐滿人…
現在去到大型商場你都會感到熟口熟面，一式一樣的舖頭…至於小型商場就會見到很多食肆…就足已證明港人加自由行旅客都同樣咁有「食力」！
十幾年前我就已有一個疑問？
回覆刪除裝修一間像樣子的食肆動輒便過百萬，如果一個經營不善那便血本無歸，況且業主往往盯著你的生意而增租…
再加上競爭大，利潤自然便少，所以我都唔知那些小店怎樣能夠生存？
其實一向以來做生意都要預唔少錢，又其是要搞得好好睇睇，除非諗住做走鬼檔！就算同係飲食業，有人撈到風生水起，亦有食肆生意吊鹽水…好講地區位置～
刪除尤其時下地主話事，話加就加租…所以有些特色小店越來越難生存～滿街都係大集團的連鎖舖，可能呢啲就係港式景象啦~~~
始終食店最多生意.....任何人都可以係顧客
回覆刪除咁又係呀~無論年齡大細, 男女老幼, 個個都要食架啦……
刪除有食肆畀米芝蓮頒咗星級後，畀業主狂加租，結果咪係要執笠，做得好都要死，都咪話唔難做。
回覆刪除咁米芝蓮咪幫手倒米?!!……哈哈哈~~其實我覺得一些小本經營的食肆都係賺辛苦錢，由朝做到晚上上下下一腳踢，唔係易捱架……
刪除唉! 現在香港地商業都冇乜生意好做, 成條街都係做同"口"有關生意, 60%是食店,其如,如藥房,電訊,牙醫,出入口成衣等等. 唔知下一代點樣生活.
回覆刪除哈哈…你話把口都有幾多商機，呢啲真真正正靠把口搵食……係喎，家陣嘅電訊公司都幾多，梗有幾間響左近…
刪除環境都不停變，下一代有他們的生活模式…
而家個社會越來越商業，已經好少再有啲有人情味嘅小店。
回覆刪除以前的士多辦館仔老闆會跟街坊打成一片…但現在的店舖好商業化沒有了個性特色的小舖…
刪除