新年...森希望！！

霎眼間一年又過去，仲好記得上年的除夕跟元旦的時候...感到好似沒做過什麼又新一年了...
相信呢個時候又係回顧以及展望新一年的時候...

正如自己所講都好似冇做過咩又新年...都唔知要回顧什麼事~~~
或者...既簡單又求其講下有咩祈望...

睇森伯呢D長者，都係冇乜大志...哇哈哈哈
老人家的森願同個老字都係離唔開...

身體方面緊係要...
老而彌堅

工作方面...
寶刀未老

思想方面...
返老還童

處事方面...
老成持重

森博方面...
老少咸宜

心境方面...
長生不老

對森伯來講老字並不等如負面詞，用積極角度來睇原來都可以好正面...
新一年即使森老伯又再老一點，但都會繼續向前看～～～

Hea住過聖誕...

一踏入十二月，公司都有好多同事放年假，因為冇得將餘下的假期帶到出年，所以成個十二月公司都係冷清清，往年放假前夕個人都好Hea下，其實呢種放假心情係最開心，忙得來又冇咩壓力，而且即將又有一個長假...但係今年完全相反，臨放假反而多左野做...變左將假期用來返工，幸好到最後都可以放假...不過就唔多假，總好過冇得放...

今年發覺市面上唔多聖誕佈置買，我冇買亦都冇乜佈置家居，擺幾日又要拆，而且現在的人多講環保，多數裝飾都會循環再用...

今個聖誕最有趣就係收到一個唔識的人的聖誕卡，據講佢係跟名單派送，當中仲包括以下兩粒糖，相信係今年收到最有氣氛的小禮物，過時過節都不忘祝福身邊唔認識的人，真係唔係個個人都做得到...

時間真係過得好快，中秋都好似先剛剛過完，又話到聖誕，就算森伯冇為意，身邊的事物都在話你知聖誕已到...

唔映又唔知喎...乜原來聖誕老人的絕配係雪人咩?!!...從映來的兩張相發覺聖誕老人的旁邊就係雪人...呢個真係世紀大發現XXXD

既然咁Warm就祝大家今年有個至暖意窩森的冬至、聖誕、新年...雖則話放假但森伯都不時會上來同大家吹下水，感受一下在Blog裡的聖誕氣氛...

三個第一次...

第一次去A商場…

有時港式商場來來去去都係差唔多，不過有時對於長者森伯來講，逛下商場又係一個唔錯的選擇，或者你認為香港的商場冇咩特色，裡面的店舖熟口熟面，呢個我都認同，入到去你總會見到超市、連鎖藥房、家品店、服裝店…等等

個商場名就時時聽到，去逛都係第一次…可能森老伯腦退化，之前踏足過都未定，不過就冇乜為意…

第一次行A果店…

蘋果店就聽得多，本應之前都想去下中環總店見識，但山長水遠兼且又冇乜要買，其實在官網買都幾方便，而且佢大部份產品都係包送貨…

但實體店都係第一次去觀摩，當日就有售貨員講解ipad點用，唔係一對一喎，係一對十幾個小朋友，小朋友就坐晒地下，講解員就好似老師教書咁！

可能有些家長在場睇啱就買，咁做生意都係第一次見…

第一次飲S咖啡…

其實偶爾都會在便利店買佢的樽裝咖啡，記得有次堂食都係買杯凍飲，真正試佢調配出來的咖啡都係第一次，本來都有意堂食，但當日午飯時間顧客實在太多太多，而且我仲要趕時間走人，所以不得不即時決定帶走，冇法都要排隊，終於等到就叫杯焦糖咖啡…殊不知要用英文落單??!!森諗唔係呀！！即時點知焦糖咖啡係乜英文名＠＠…大家都係港人，講乜詭野英文丫…你地都知森伯外表斯文，內裡粗人…當時真係想爆粗，爆一個字的粗口……最後點埋麵包就拎袋外賣拿拿聲走人…

要焦糖咖啡當然唔想咁苦，不過呢杯咖啡就真係幾好飲喎…反而有少少似鮮奶咖啡…

不過下次去買咖啡前記得要去個官網學定Ｄ英文叫法：焦糖咖啡Caramel Macchiato…鮮奶咖啡Caffe Latte…意式特濃奶咖啡Ristretto Bianco…叫老人家點記得咁多丫～～> <

同一個時間，在同一個商場，就有三個第一次！都叫抵行卦…哈哈哈

細路興趣班...

現在的細路真係好幸福定真係好疲累呢？本應講小朋友一點都與森伯個老人家無關，之不過近來屋企附近的一個商場，越開越多培訓小朋友的興趣班…雖則話係興趣班，但其實很多都同上堂教學差唔多，或者時代改變，細路都要增值，學得越多越有著數~~

一路以來商場的人流唔算多，裡面的店舖就時時轉變，最近有間茶餐廳，見住佢裝修至開張…在短短的幾個月又關門大吉~~~能夠繼續維持的唔多…但最近陸陸續續有新店進駐，大多數都係一些小朋友的學習班…最多係英語、其次係畫畫、跳舞、藝術都有…當然身邊都有認識的小朋友，幾歲大就學很多興趣班，見佢有學口才班、跆拳班、英文班…最有趣的是學一段時間就冇學，個細路都未必記得有什麼學過~~~

有日經過呢類的畫畫班，見到有幅梵高的名作…唔好以為係大人作品，可能就係當中的小朋友學生的作品，果然有大師級風範喎…

 我覺得興趣唔可以強迫出來，當人漸漸大了就自自然然知道自己真正的興趣是什麼，到時再發展都未遲…

整個甜品潤一潤...

呢個時候又到秋至冬來的時候，天氣都開始乾乾地，該是一年裡最舒服的日子～～記得以前細個，屋企好多時都會煲糖水，夠晒滋潤，當然眾多的糖水中杏仁糊都必入三甲之列啦！人大了，學識整杏仁糊、芝麻糊...間中都會當早餐，唔算太難，好簡單…
有日經過一間大型超市，初時睇個包裝好似香腸，再細睇原來係杏腸，以為係即食的杏仁糕之類…買來試試又無妨！

不過在超市的烘培部份買到的多數整甜品用，基本上都唔係即食，其實用來整什麼甜品都可以，看你的發揮！整餅整包對我來講可能太大工程，不如簡簡單單整個杏糊就算，先將米漿煮好再放幾片杏膏，攪拌一會便可…真係極之簡單~~

其實杏腸的杏仁同糖份都好濃縮，基本上一小截都已經夠…
煮出來的杏糊一Ｄ都唔失禮，平時磨的杏仁多數有微粒，但呢碗就極之幼滑，完全合格…一碌杏仁膏應該可以煮好幾次~~

東方同西方所指的杏仁是有分別的，當然有養生效用會選南杏北杏，至於有咩功效…森伯就唔詳細講，自己可以在網上搵搵資料~~而杏仁膏屬於來佬貨，多數整來佬糕點...但森伯就整個中式糖水，私底下幫佢cross over，結果都得喎！！至於有咩其他整法可以搜查Marzipan

如果有人想請客食糖水，又想顯一顯身手，用呢隻杏仁腸整杏仁糊唔錯，應該會簡單易做…幾掂…同呃到下人~~

8年新高…

我講的八年新高，唔係講森伯的收入…只係講最近有新聞話香港的貧窮人口創8年新高…唔好話唔緊張，青年人長者的貧窮人口有上升的趨勢～當然青年人就唔關森伯事，但長者就點都有少少辣到森伯卦，有人認為可能計算上有偏差，我都唔理政府點計，總之關乎到冇錢與有錢的話題，相信大家都會關注下，錢銀幾時都係同每個都市人息息相關～

身為打工仔的森伯，唔想窮就真係唯有慳！不過慳咗亦唔見得有錢喎XXD

要儲個錢都唔易，講到投資──森伯唔識～賭馬──唔識～過大海搏一鋪──唔識～偷厄拐騙──更加唔識…如果呢個年代仲有穿膠花的話，森伯必做！起碼都靠自己雙手嘛…（解釋下穿膠花係乜先，驚有啲真正年輕的博友唔知係乜…該是五六十年代的家庭手作，把所有配件穿成一朵膠花便可，當時的人靠這些手作來幫補家計…咁當然要廠家畀貨你做先得~~~）

以上資料有誤請指教…因那些年森伯應該未出世~~~當然而家的工廠都冇呢類手作分發畀人做…而且感覺上而家的人冇上一代的人咁捱得，個個為求賺快錢，最好唔駛做就有錢落袋，你睇個股票市場就知喇…玩股票除咗考眼光之外，仲要有承受風險的能力~~可惜森伯兩樣都欠奉呢…

有時經過超市後欄，都見到一車二車紙皮，又無人看管，有時真係好有衝動去>>>>影張相啫！不過都唔排除想成車拎去賣番十元八塊幫補家計… 

不過唔知家陣嗰班業界傾掂未，仲收唔收香港紙皮…?!!

On-line Shopping…

講開網購…唔知大家又活唔活躍呢種的消費模式呢？！但現今係網絡世界，或多或少都幫襯過網上買東西…在過去的雙十一唔知大家又有冇份參予，每年到呢個時刻都有極龐大的消費數字...但對我來講就算有幾平都好，買東西最主要都係睇自己有冇真切的需要…

其實淘佬的出現，的確改變很多人的Shopping習慣，無論要搵咩特別東西，好多人都話有冇上淘佬搵過呀…最記得我第一次幫襯淘佬係買一個冷氣遙控器，打去原廠就話再冇呢個型號的遙控器賣，當時有人建議去什麼鴨寮街之類買些萬能遙控器，但買時又未必試到，再有人話可以到淘佬搵搵呢種原廠貨，於是乎真係搵到個類似，機價加運費都只不過係幾廿蚊…@@心諗又幾不可思議…聽人講好多原廠的零件都在大陸生產，可以買到都冇咩出奇…唔覺唔覺呢部遙控器用到而家…已經係好幾年前的事了…講開又講，森伯個老人家到而家都唔識在淘佬買野，都係靠自己人代勞，多數買些陶瓷擺件或者文具…

一向好喜歡陶瓷，如果香港買可能會貴少少，而且現在要搵靚的陶瓷擺件，去國貨公司可能有多選擇，而且貨源大家都來自中國…

呢隻筆...畫畫需要，計埋運費都有著數，所以一買都買多幾支…

其實對森伯來講，網購只是多種消費模式的其中一種，由始至今都唔會在網上購買超過一千元的東西，除非係電腦就會上官網購買，至於新鮮食品就一定唔會，始終都係隔山買牛好壞參差，買貴價的東西點都要親身睇過斗過先買得放森（老人家森態）…

大執工作間…

相信今年對於森伯伯來講，最為難忘都係有個悠長假期，雖然未必可以全森全意放假，是因可能要隨時候命，不過也可以充充電放一放鬆咁啦！或者老人家都係辛苦命，總是無事忙！！亦都在這個期間可以參觀古埃及文明展，早幾日在報章上睇原來這個展覽創了入場人數新高?!!...我諗當中必定包括自由行旅客，因為當時真係幾多國內遊客團…

言歸正傳，放完個長假要返工初時都唔習慣，不過家陣都慢慢適應，公司要改頭換面真係唔容易，相信都幾大工程…

不過點都有一番新簇的感覺，雖然話新了，但反而舊時仲感覺大體一點…或者老人家愛懷舊喇！算比我想像中冇咁大油漆味，可能時時有空調開著，味道可以快點散！而且室內的玻璃多了，亦可能減少油漆揉牆的裝修味…

今次新裝修以玻璃為主，處處都一目了然，據講話唔想太多壓迫感喎…度度都有玻璃牆，玻璃房…踭在個茅廁唔係玻璃咋…哈哈哈

可能始終都係裝修完冇幾耐，仲有很多東西要執拾，放完個長假已經到年尾，感覺2017年時間過得真係好快…

畫作下的社會現象...

以前的社會，人有什麼不滿都不敢隨口講，統統放到一些戲劇，漫畫，歌曲裡引起大眾共鳴來發洩不滿！呢種表達形式就叫諷刺時弊...
但到現在可以宣洩的渠道真的多了，尤其用電子通訊，有咩不滿就講出來，影出來，拍出來...都冇話什麼要諷刺時弊了~~

有日無意中看到呢位藝術家John Holcroft的畫作，發覺都頗有意思，當中可能你同我都有共鳴～～

以下的圖片是來自網絡...
現在的智能手機真的樣樣皆能，隨便都可以列出十樣八樣功能...

每個人都有很多張面孔，對家人一個...對朋友又一個...對工作又另一個...

很多人向上爬的原動力都是...金錢

難道這句俗語是真的...「好就女人，唔好就累人...」哈哈哈

有時對子女過份緊張就變成怪獸家長...

現在很多人的手和眼都離不開手機...

其實畫作還有很多很多，不過選幾張介紹下，喜歡的可以搜查下John Holcroft其他的作品...
一個作品能令人產生共鳴很重要，至少可以得到看畫者的認同～

得閒無事剝花生…

一向都好少買零食返工食，唔似有啲同事個位總摷到一兩樣零食，可能唔係太喜歡邊食嘢邊做嘢…唔好話森伯古板，工作時候又咀郁郁的確成何體統！除非肚仔餓啫…而有啲公司仲會提供零食放到茶水間畀職員任食，所以有時Lunch hour都會見到有啲OL幾個去超市採購零食…不過我哋公司就冇呢種員工福利，要吔嘅就自己買！一唔係就等人接濟…哈哈哈

你哋都知森伯份人講禮尚往來，受得人哋接濟多，總係覺得唔好意思又要請返人哋食，或者咁都係增進吓員工感情吧！

至於今次又有乜食…原來係包花生，原來係同事自己整的…大家唔駛爭一人一包，今云真係可以一路做野一路剝花生～不過同事都係一番心意，烚好的花生仲要逐一包好，真係唔話得！我都已經好耐冇食過烚花生…

有花生食係咪最好有杯啤酒送呢?!!...這一刻唯有以水代酒！忽然覺得森伯伯自己好文雅…

森藏誌－匙扣

收藏一樣東西，最好就係容易搵，容易買，有代表性又可以有記念性的...
綜觀咁多物件中，我認為匙扣就係最理想的物件...

對於森伯來講，收藏了匙扣唔係有很耐歷史，至今只是好幾年，有些是自己以前買落，有些是人家送的...今日就攞三個匙扣出來講講～哩三個匙扣都係人家的外遊手信...

很喜歡這個匙扣的古色古香設計，很有中國風的味道...佢當然來自北京啦！！唔知點解哩個匙扣除咗古雅外，仲添多幾分浪漫元素，唔通聯想起古老的同心扣之類？！...

驟眼睇都唔係太特別，但細看圖畫又很有地道特色，一份屬於約但死海的手信...

一睇就知哩個匙扣來自中東，隻駱駝仔好有代表性，整個匙扣可以感受到中東鐵匠的手工...

昨日博友秋葉提到小木象匙扣，我便醒起早前都收到隻，是來自東南亞的手信，相信是當地的椰殼工藝品，順道post出來畀大家睇睇...

當然唔止咁少，其他的或者留待日後有機會再同大家分享...

到現在收藏的匙扣雖然唔講得多，但自己買的每一個都有記念性，儲的唔一定要貴，即使係普通的矽膠公仔匙扣都無所謂，目的都係一種意義!!

有咁耐風流；有咁耐節...

若然放任等如風流的話，咁節制就可能等如清清淡淡...

每逢過時過節都會比較食得多，再加上森伯又燥底，如果月餅食得多就會熱氣上火...今年月餅多，可能早餐，Tea time都繼續見到佢...所以平時都要食得涼性一點...

森伯有好介紹...一個飯，一個湯！！

呢個健康番薯飯一向都有食開，大節過後要清淡就最啱！個飯仲有糙米，紅米，扁豆，蘿蔔粒，當然有主角番薯...因為粗纖...肥膩,油膩都好易排走...
雖然淡淡口，不過勝在夠健康，任何體質都食得！可以話係太子都食唔壞～～
淡口指數：＊＊＊3/5分

好多人都認為一餐要有飯仲要有個湯先夠完美，咁我都認為！！所以清淡又有益的湯，一定會首選海帶湯...有睇開健康資訊的朋友都知海帶屬於超級食物，係最佳的鹼性食物，佢可以平衡返偏酸性的體質～個人都冇咁易病～～
食海帶都好有益處，因為有天然的膠質有成份～聽人講話呢個湯對咽喉痛，不能開聲都好有幫助...
淡口指數：＊＊＊＊4/5分

淡口的餸菜唔係個個都食得到，森伯都已經習慣了，做菜都唔需要太重味的調味劑...

睇到哩度！大家有冇發現一樣嘢呢？！！......
森伯原來幾易養~~~~哈哈哈哈

森伯伯過中秋...

一年容易又中秋，呢句話真係冇講錯...仲記得上年點過中秋，霎下眼又一年～
過時過節點都要有一點點的氣氛，中秋節謹係要有個燈籠高高掛喇！相對而家一Ｄ手工燈籠都賣少見少，好似話真正識紮燈籠的老師傅都越來越少，新一代又未必肯承傳...所以手工燈籠都幾貴下！！
至於呢種彩紙燈籠，以前又唔太喜歡，但現在覺得幾好睇而且又有傳統味道，最緊要可以摺埋收藏第二年又可以循環再用...
呢種燈籠由細睇到大，唔知大家知唔知呢種燈籠有冇一個正式的名呢？！

今年月餅就特別多，但係完全唔需要自己吟荷包出來買，大部份都係外地的親人由遠方送來，我諗可能森伯上年寒寒酸酸買Ｄ微型棋子餅充迷你小月餅，(可能會有Blog友記得...)畀遠方的親人見到覺得森伯實在太悽酸，冇乜月餅過節...講到呢度森伯又有少少眼濕濕XXD，所以一連好幾盒真係有排食...始終森伯老人家燥底，食得多又會太熱氣，所以食月餅都會配個紅菜頭汁清清熱...

中秋除了燈籠外，中式餅店仲會掛起一個個豬籠餅，不過小時又好少買來吃！反而會淨買豬籠裡面的小豬...其實每年的中秋除了吃月餅之外，呢種豬仔餅都唔少得...呢幅相唔係今年影，是以前影下的，不過有Blog友提到豬仔餅所以摷出來講下...

至於今年的做節飯唔係上酒家食，都係去某間酒店gathering，但估唔到做時做節的時候，反而Ｄ食物唔係太滿意...不過今日都食到呢間酒店的奶黃月餅，總算係應節咁啦～～

但願人長久...

好多人都覺得現今過時過節都冇咩氣氛，真係要講句一代不如一代...已經臨近中秋喇，前兩晚我先見到街上有幾個細路一齊玩拋螢光圈，相比以前的小朋友玩蠟燭燈籠的情況已經差好遠，早在中秋前夕已經有細路玩...不過現今的家長又未必會畀小朋友咁夜出街玩...
對於森伯來講，始終喜歡過中式節日，感覺上西方節日大都同宗教有關，而華人社會慶祝的節日比較貼近人多點...

到中秋都不外乎食吓月餅...賞吓月...不過到呢刻都仲未見到靚靚的月光，不如就聽住靚歌先～～

一首經典的金曲－但願人長久～冇記錯本身係鄧麗君原唱，不過今日所講的係由王菲翻唱...

＊人有悲歡離合；月有陰晴圓缺；此事古難全；但願人長久，千里共嬋娟～～
　（簡直係中秋的祝願...）

好老土咁講：中秋屬於人月倆圓的日子，在呢個節日裡，你又有冇想念誰人呢？！

後註：王菲的經典歌還有很多，呢隻精選碟都收錄唔少，所以當年見到都立即買，不過自從部CD機壞了，已經好耐冇聽自己的珍藏了...

永生傳說（下）

相信這個永生傳說的展覽對科學館來講，都算係隆重其事，場內都有幾多的古埃及的佈置，更有大螢幕介紹古埃及人的生活日事，不過係動畫形式，可能畀一家大細都可參與的一個展覽...

這個展覽除了參觀木乃伊之外，還有介紹少少古埃及的人民生活，看了眾多令人沉重的展品裡，卻有一展品令人感到溫馨...若果冇記錯這展品名為母愛，可能係屬於父母與子的一個雕塑...

原來古時的埃及已經懂得製作麵包作食糧，不過當中的展覽品不知是真定仿真，麵包都冇咩可能留到今天...不過現場真係好暗，要拍攝得清楚都唔易...

之前的博文錯過晒都唔緊要，呢一段大家都要瞪大對眼睇...係講古埃及在製作木乃伊所用的防腐材料，當中見細圖有：泡鹼、木糠、蜂蜜、洋葱、地衣、乳香...而裡面就有蜂蜜同洋葱係食得，又易買得到～長期食咪可以永保青春?!!可能食得多會畀人問句：你食左防腐劑呀！！憑呢句真係幾多錢都買唔到...不能不佩服古埃及人的智慧...又唔知點解呢個板面個個都爭住影，唔通大家都想偷下師...好難先影到呢張咋！！

同場亦有部電腦斷層素描儀(CT Scan)，通常在醫院先會見到，最主要作檢查身體用，在這裡展示是用來了解木乃伊的內在情況，可看出性別、年歲，身體、骨骼的大概狀況，在木乃伊旁就有介紹板講解...

每每睇完展覽後都會去場館內的紀念品店逛逛，可能都搵到有些主題精品選購，但係今次主題精品唔多，只見這類模型，和一些書刊...

如果有興趣都可以前去香港科學館參觀，好似至到本年的十月中！
相可以任影，但不能用閃光燈，如有咩查詢或幫助場內的職員都幾友善～

看過展覽後，就會覺得古埃及人的精神好正面，製作木乃伊都係一個希望...生前要有希望，就算離世後都要抱著一種希望精神，寄望復生、來生會更好...

永生傳說（上）

自古以來無論是皇帝或是平民百姓，都會希望自己可以長生不老，甚至長生不死，縱使肉身已死，但永生精神卻可以永存...

早陣子聽到有個埃及的木乃伊展，都幾想去睇睇，知道呢個展覽在多個國家地方都展出過，可能香港只是其中一站，於是就去參觀見識下...
就是這個永生傳說展，主要參觀古埃及文明以及木乃伊...

一進場已經昏黑一片，有點感覺置身金字塔裡～～場中展示了相關展品...

就可能太昏暗，隨著大人去的小朋友都嚇到喊，因為場中的牆幕上播放木乃伊的製作過程，有不少骷髏頭的畫面，唔好話細路仔，大人都可能嚇到喊～～～
其實大部份的展品都跟殮葬儀式有關，就好似古時埃及人的墓碑...大都以圖騰為主！

當中有些神像，可能是木乃伊的守護者...
這是古埃及人的遺照，望落都有幾分藝術感～

場中都有不少文字介紹，可以對古埃及的文明有更多的認識...
右邊為力量女神，算是較大型的展品...

後註：場中當然有木乃伊的展出，不過我一張木乃伊的相片也沒有拍，始終木乃伊是先人，或應採取一種尊重的心態，不是影張相就放到網站上呃下點擊，所以只把相片留在記憶裡...

木乃伊知多啲：
我們一般的印象覺得皇帝，皇后死後才會製成木乃伊，原來有很多平民百姓，不同職位的人也可製成木乃伊，包括祭司，歌者舞者，甚至小朋友（場中還有些玩具陪葬品）...
所以當時在殮葬上製作木乃伊是很普遍...
 
其實睇呢類展覽，心情都可能比較沉重，或者從另一個角度睇，你可能會有所得著...

森伯話當年之...數字

其實數字在我地的日常生活裡幾乎係有好密切關係，每日都差唔多要接觸多種同數字有關的事情～對於現代人來講，一提起數目字，腦海裡多數都係阿拉伯數字字款...

想當年...數目字可能都係跟返中式數字寫...即是壹、貳、叁、肆、伍、陸...當然喇論到筆劃點都比起阿拉伯數字多，但對森伯來講都有機會用到中式數字，就係開支票的時候，要跟正統模式咁寫！其他的基本上都唔會用～

但對於老一輩的港人來講，原來仲有一種數字係日常會用，就係叫花碼字，現在一些舊式茶餐廳,酒樓的餐牌上都可能仲見到，伙記都可能仲用來落單寫價錢...但係真正會睇會知的又有幾多人呢？！據森媽所講，以前做水草生意的時候，都係用花碼字記帳，所以對花碼字都有認識有深印象...

睇過這些花碼字款，記得細個數學教科書裡都有一個篇幅提過這些花碼數字，不過事隔千年乜都唔記得喇～

所以生活裡很多舊有的東西，不常用就會慢慢被人淡忘了！

酒店 Gathering...

記得以前有咩大時大節屋企人都會煮做節飯，雖然來來去去都係嗰幾味例牌菜，但大家都食得好開心！！
但其後就移師到酒樓食，始終都唔需要屋企煮慳番唔少功夫，而且要叫的菜色屋企係唔會煮，就好似記得有一味叫炸鮮奶，係類似固狀鮮奶醮上炸粉來炸，係好好食...不過已經再搵唔到，食唔到！！
後來酒家小菜點來點去都冇咩特別，而且過時過節客人多，菜式服務都很馬虎...所以時至今日就會揀去酒店食，都有去過好幾間，不過最後都覺得呢間唔錯...
所以每隔一段時間就會來一來！

以下的相片是在不同時候拍攝的！

當中有過時過節的，又有長輩們的生日飯~~

有森伯萬歲的Buffet...

 臨近聖誕感覺特別有節日氣氛~~

 森伯平時好少食魚生類，但在這裡都會嘗嘗，當中包括生蠔及雜菜沙律...

就因為咁一年都有好幾次去食...食...食...

我覺得香港食肆有很多很多，食完再幫襯又的確唔係咁多，而且有些試過就唔會再去，但呢間應該可以繼續再繼續~~